《我將一位宅女變成女神，然後再將自己變成佢隻兵》: 下集 (8)

正式到左學生會質詢日，我好早就起左身作準備，面對鏡中既我，依一次我對上一次有好大既分別，今次我係充滿自信。不過，如其話充滿自信，倒不如話覺得就算點做都死，點解唔放膽豁出去呢? 抱住必死既決心，依一刻真係無咩好怕。
 
我換上一套Suit，整理一下髮型就正式出發。
 
去到大會埸地時，已經有好多人係到，依一埸係史無前例咁受外界既關注既選戰，係中大到掀起一埸文宣戰，係網上各大論壇都紛紛有網民討論，各大報章都報導有共產黨滲透中大學生會既事，係中大學生眼中，今次將視為建制同改革派之爭，阿風就係建制派，而我地就係改革派，都可以話係『老鬼』同『新血』之爭。
 
『阿明! 今日睇你!』莊員說。
 
『唔好咁講，我地大家一齊團結一致，去面對依埸大戰。』我覺得我講野愈黎愈老積，當自己有做身份後，開始代入角色時，都開始有返同等身份既態度，或許我應該要有會長既風範。
 




『死啦!好多人呀! 好淆底呀依家!』
 
『一陣怕比人問到口啞啞呀!』
 
『其實大家唔洗怕，何況我地支莊不嬲都臭朵，要嬴根本就係奇蹟，人地都唔期望我地會答到D咩出黎，反而可能會針對住阿風支莊，開佢地多D問題以確保佢地既係咪投得其所。』
 
『你地怕咩......最怕係我之嘛。』阿Sam說。
 
『你.......哈哈!』唔知點解見到阿Sam咁講，突然覺得好好笑。
 




『請兩支侯選學生會內閣成員上台。』評議會班人開咪叫我地上台準備。
 
此時，我地集合左一齊，我再大叫:『廢話唔講，要講既野都講左，要加氣既說話都講夠，總之今日有前無後，打死罷就!』
 
我伸出一隻手放係中間，各莊員都伸出一隻手搭上搭咁放係中間，接著我地大叫: 『靜變靜變! 今次一定Sure Win! 嗚呀!』
 
此時，阿風支莊同時都Dem 起Beat增加士氣，我同阿風對望左幾秒，大家都意識到一埸大戰即將開始。
 
當我地上到台後，先發覺現埸真係好多人，我諗咁大個仔都未試過比咁多人注視，同埋好多閃光燈都開始間中閃下，睇黎依到既記者都唔少。
 




『今日係第四十屆香港中文大學學生會幹事會質詢日，各同學可以發問任何問題，不設限制。正式開始。
 
此時，有一位中大學生行前對住咪講:『祟政政，學生蔣泳輝，學生編號324366312，丫......我想問一下靜變，到目前為止......你估我地會唔會投一個有共青團成員既莊? 我地中大係唔容許有共產黨滲透，我，地，不，要，中，共，滲，透，你地返屋企啦，係咁多。』說罷，現埸掌聲同歡呼聲起哄聲都同時出現，仲有人大叫:『不要共產黨!』
 
『請第四十屆香港中文大學學生會幹事會侯選內閣靜變回應。』評議會成員說。
 
其實我都唔知個位同學係表達佢既心聲定係問問題，令我都唔知答咩好，但我地點都要回應。
 
我拎住支咪，企起身說:『我係第四十屆香港中文大學學生會幹事會侯選內閣靜變學生會會長，劉啟明。丫......首先多謝依位同學既意見，對於突早前有莊員......認自己係共青團一事，我有需要向大家澄清一點......就係當事人根本有好長時間已經無接觸過任何團活動既事，係今次既選舉之中，我地立埸都好明確唔係親共，都唔容許有共產黨滲透中大校園，所以我向大家保證，我地絕對有明確既立埸，為中大學生利益著想。不過.....近日有傳言格離莊都有共青團成員一事，我就唔知佢地有冇依個保證。』說罷，我就坐返低，最後我都要抽一抽阿風支莊水，希望可以將大家注意力轉移到阿風身上。
 
『答得好呀!阿明!』阿龍說。
 
『會長好型呀!!哈哈』各莊員都細細聲咁向我打氣。
 
『殊! 好多人睇緊架! 好戲在後頭』我細細聲回應，事實上我等緊一個發問，一個足以改變局勢既問題。




 
此時又有另一位同學走上前，對住咪說:『聯政政，學生洪建光，學生編號3244 02412。都係問靜變，我就係對政治唔係咁熟悉既學生，但我好想知道你校政會攪成點，你地當選後，除左識攪O camp外，仲有咩實質既福利係比到我地? 唔該。』
 
激氣，唔係依個。
 
『請第四十屆香港中文大學學生會幹事會侯選內閣靜變回應。』評議會成員說。
 
『我係第四十屆香港中文大學學生會幹事會侯選內閣靜變學生會會長，劉啟明。首先多謝依位同學既發問，到目前為止，關於校政方面，我地之前作一個調查訪問左過百位既中大學生，發現佢地最關注既問題係校巴同車站設施，大家都知道......朝早返學要等成十幾分鐘先上到車，一定會遲，而我地係山上面讀書，唔坐校巴真係好麻煩，所以我地會要求校方盡快解決依個問題，增加班次同車既數目。謝謝。』
 
此時又有另一位同學走上前，對住咪說:『新新傳，學生李嘉浩，學生編號3245 31412。問中連，你地最近都比人傳出有共青團成員係你地支莊入面，格離莊都有人認左，咁你地呢? 雖然你地係民主牆到澄清過，但我想你地今次親口解釋真相，唔該。』
 
終於都有人問阿風支莊，今次就等我地食花生睇下你回應。
 
『請第四十屆香港中文大學學生會幹事會侯選內閣中連回應。』評議會成員說。
 




 
阿風企起身拎住支咪說: 『我係第四十屆香港中文大學學生會幹事會侯選內閣中連學生會會長，劉俊風。首先多謝你既提問，我地中連重申一次，我地成員絕無有共青團背景，都無任何政治背景控制我地，一切都係某D人中傷我地既說話，想拉埋我地落水。』
 
『新新傳，學生黃志驕，學生編號3245 47982。問中連，你地話你地無政治背景? 你講緊大話!! 你地個外務同民建聯有關係架喎!!』
 
此時，現埸起哄聲不斷，有人大叫:『禮義廉!』，『民賤聯走狗!』
 
我個刻心都涼哂。
 
『請第四十屆香港中文大學學生會幹事會侯選內閣中連回應。』評議會成員說。
 
『我係第四十屆香港中文大學學生會幹事會侯選內閣中連學生會會長，劉俊風。我地再一次重申，我地無任何政治背景。謝謝。』
 
『嘩....咁就叫回應左拿?』現埸人士不斷起哄同埋怨。
 




雖然現埸人士開始對阿風支莊有埋怨感覺，覺得都係無料到，但依樣仲係改變唔同我地既形勢。要嬴佢，就係等個條問題!
 
此時又有另一位同學走上前，對住咪說:『聯政政，學生黃加峰，學生編號3244 557622。問靜變同埋中連，我唔理你地有冇共產黨或者民賤聯背景，我只係想你地依一刻同我表達一下你地對六四既睇法同立埸!唔該。』
 
等到了! 就係依條問題，我等左咁耐就係等依條可以改變局勢既問題!
 
『請第四十屆香港中文大學學生會幹事會侯選內閣靜變回應先。』評議會成員說。
 
我慢慢企起身，對住支咪說:『我係第四十屆香港中文大學學生會幹事會侯選內閣靜變學生會會長，劉啟明。本人同埋支莊對於六四事件係抱住堅定既立埸，我地本著民主，自由，公平公義既原則，繼續堅持平反六四，結束一黨專政! 關注中國人權狀況，加快落實雙普選! 廢除功能組別!』 說罷，我同班莊員隨即係台下拎出小型Banner，同大字，再企起身走向背後既壁報，貼上同掛上我地平反六四既Banner，此舉引來極大起哄同回響，而評委員班人見到我地咁做，即時想開咪阻止我地。
 
但此時評委員班人即時阻止開咪既人 :『喂!唔可以阻佢地，阻佢地既話，我地會比人屌到飛起，實標籤我地唔支持平反六四，我地都係無謂出面阻佢地，由得佢地啦!』
 
我一路掛上去時，留意到評委員班人無出黎阻止，就估到佢地咁做。係六四依D大事大非既事件當中，係唔應該去出面阻止。
 
我隨即拎起支咪: 『我地當中共青團成員會答應大家會盡快退出團，雖然我地支莊比人數臭，令到大家對我地失哂信心，但希望大家唔會因為依件事而唔留意我地政剛，格離莊同上莊好熟，佢地班老鬼咁支持佢地，大家唔覺得有問題咩? 上年佢地比到D咩比大家? 係外務上佢地又做過D咩? 我唔求當選，但希望大家都認真諗下係咪要投比對方。謝謝。』




 
『WOW! 好波!』現埸有人大叫。
 
阿龍都拎起支咪說:『平反六四!』
 
現埸同學都有人和應: 『平反六四!』
 
我留意到阿風面色一沉，佢一定估唔到我有咁既一著，今次不但做左個勢，增加返D票源，而且可能令到阿風既票源流失左好多。
 
『喂喂..夠啦!評委員班人黑哂面，我地拎夠采就得!』阿雪細細聲說。
 
講得岩，成個質詢大會比我攪一攪都破壞哂，被逼暫停一陣，但點都好，做都做左，評委員因為六四件事唔敢屌我地，點計我都係嬴左，阿風你收皮啦!
 
完左質詢會後，我地各人都鬆左一口氣，因為整個過程我地唔係比人針對得太多，反而對阿風支莊針對得多，始終佢地回應得麻麻，加上佢地上莊班老鬼上年既政積都幾臭朵，所以好多人都對佢地抱有疑問。
 
但最重要既係，我一日成名了，各大報章聽日一定會登我既相，哈哈!突然有一種英雄感，莊員都對我今日既表現都讚不絕口，依個就係會長風範，佢地同埋班中大學生一定會對我有大期望，或許會投我一票，改善中大校政。就好似奧巴碼咁，但求變! 點計都好，阿風既回應真係失準，不過比著我面對依個問題都真係幾難回應，而我雖然對六四事件好似抽左水咁， 不過我對六四件事既立埸同意向同我地支莊係一致。如今質詢日完結，剩落黎只係投票日。依一刻我好有信心個局勢一定唔會一面倒。或許仲會有奇蹟出現，
 
晚上，同班莊員去廢祝後就各自回家。
 
係我返Hall個段路，又係垃圾時間。我不禁係到暗爽緊，總覺得我人生開始充滿熱血，咁大個仔都未試過咁，學生會會長劉啟明! 屌! 真係好型棍! 真係好想快D到聽日，睇下D報紙點報導我! 哈哈! 即使輸左都好! 我都已經成左名! 屌! 仲唔媾死女?
 
我拎起手提，不知不覺又禁左阿靜既Whatsapp，顯示為上線中，我一路行一路望住個Mon，不禁暗嘆一下，我仲留戀緊阿靜嗎? 係喎! 阿靜今日有冇黎到呢? 唔知佢今日見到我咁 會唔會覺得我好型呢!? 哈! 點都好! 先嬴依一埸仗再慢慢諗阿靜都未遲!
 
 
係同一個時間，阿風同班莊員夜晚晚係民主牆上貼大字報。
 
『阿風，估唔到你出到依一招。』
 
阿風邊望住民主牆邊笑說: 『係佢逼我出依一招，劉啟明，今日你就威啦，我就睇下聽日你可唔可以咁威風。今次我一定玩死你。』
 
*****************************************************************
 
第二日
 
張開雙眼，望住天花板，個腦仲諗緊琴日Con day既情境，不禁笑了。唔知邊個曾經講過，人一生之中總有一次係做英雄，琴日我當住數百人面前顯示左一個學生會會長應有既風範，而且借六四事件成功挽回唔少掌聲，而阿風一直都處於劣勢，從佢既回應當中，可以睇得出佢無咩點準們過依埸Con day，佢對自己太有自信，一直認為我無咩可能會嬴，以為全埸既人只會針對我支莊既共青團問題，但事實上，就係因為D人認為我地係臭左朵，所以更加想確認值唔值得投阿風支莊。所以大部份問題都問阿風，一時之間令阿風有點招架不住。
 
我起身梳洗一下，鏡中既我充滿新氣象，依幾個月發生太多事，自己既情緒都大起大趺，已經開始攪到我有D神經質，內心充斥負能量，特別係每一晚既寂莫時間，更加有種負能量爆登既情況，雖然失去左好多野，但我依家先係Year1學生，我仲有大把青春同時間等緊我，我唔應該為左小小野而自暴自棄。
 
望下手提，時間仲早，今日約左班莊員開一個檢討會，檢討返琴日Con day既事，我都期待班莊員點睇依件事。內心一直係到暗爽緊，於是好快就出左門去行返落中大。
 
當我經過民主牆時侯，見到好多人圍觀，係咪阿風又貼左D新野攻擊我地? 就睇下佢玩咩野! 行多兩步，係遠處見到民主牆竟然有我既大頭貼係到，應該係我Facebook搵出黎，相上面好清楚見到好大既字- " 咁既人選學生會，你會唔會投佢票? "
 
我個心即時離左一離，不安感一下子湧現，開始腳軟，我有一個唔好既預感。
 
我頭Dup dup咁慢慢滲入人群之中，抬頭一望，全部都係我既Whatsapp對話，而對像就係阿靜。我即時摸一摸褲袋，部手機仲係到，但點解入面既對話比人拎哂出黎? 係阿靜貼出黎?
 
格離仲有篇文章，" 狗公劉啟明!人地有男朋友仲成個狗公咁去煩人!夜晚晚仲要話去人地屋企見佢! 非常嘔心!!可恥!! "
 
人地有男朋友? 佢指Whatsapp中既阿靜嗎? 阿靜有男朋友? 發生咩事?
 
由於有大量既圖同文章貼哂出黎，我亂咁睇下，發現一張Facebook照片，清楚見到係阿風既Facebook，而右邊既個人資料相片下面.......寫住"訂婚對像 Ho Ching"，個個人就係阿靜.....原來阿靜同左阿風一齊左，而阿靜既Facebok一直收埋唔顯示依個關係，但我根本無阿風Facebook，所以唔知道同見唔到依個Status......
 
再慢慢睇其他圖，見到一個標題寫住" 平反六四是大話! 假情假義呃票源! "
 
D圖又係Whatsapp圖，見到我同一個人既對話.....個個係我唔識，但我竟然係到講
 
阿明:
中大班傻仔撚識政治咩! 鳩up一下平反六四! 佢地就會起哂哄朝拜我架啦
 
無名人:
中連支莊其實有冇共青團成員?
 
阿明:
我屈佢之嘛! 我地就真係有共青團成員啦!
 
慢住.....我完全無講過依堆說話，有人改圖!!!有人改圖屈我!!!我唔識個個人!更加無講過依堆說話!!
 
『屌....原來個個劉啟明仆街黎!』
 
『成隻狗公咁! 好撚肉酸呀!』
 
『有冇筆係身? 等我寫衰佢先!』
 
『我又寫我又寫!』
 
只見好多中大既人紛紛係D圖上寫低感受" 賤過民賤聯!" ，" 當我地傻仔? 你都ON99!"，"媾人條女!死左落地獄會比人燒春袋架!仆街!"
 
我無.....我真係唔知阿靜有男朋友......由於群情激憤，我留係到遲早比人認得，到時實會捉住我黎數臭我，於是我就好快離開現埸，點解成件事會變成咁?
 
望一望手提，點解就快到開會時間都無人打黎同Whatsapp group出聲? 班莊員睇到依件事? 於是我就跑去會議室，我要解釋成件事，唔係大家想像咁!!
 
當我開門時，驚見所有莊員都係哂到，我氣喘喘咁問:『你.....你地有冇睇民主牆所貼既野?』
 
阿龍一臉無奈，之後發悔氣咁講:『屌你.....今次真係比你累撚死啦! 』
 
『你唔係真係信呀? 好明顯係阿風佢地玩我啦!』
 
『人地有哂圖，張圖入面個個係你，連講野語氣都似足你! 仲有假?』
 
『你唔比係改圖呀?』我堅持解釋。
 
『屌! 一句到尾! 你究竟有冇媾到個個女人? 你有冇係Whatsapp講過個D狗公Msg?』阿龍問。
 
我個腦即時諗起依排我好掛住阿靜，都做左唔少對阿靜追求既行為，Whatsapp既對話我更加有講過，所以阿龍問我有冇咁做，我完全唔知點答好。
 
『我......唔知個個女仔有男朋友架!』
 
『屌你究竟有定冇呀? 你答我一句! 有 定 無!?』
 
我吞一吞口水，望一望其他莊員，佢地個樣都好失望，個額頭好似寫住" 唉，比你累撚死"既字咁。
 
『有......』我否認唔到依件事，唯有死死氣認左佢。
 
『屌!仆街黎!哂鳩氣!』阿龍拍一拍張桌，就轉身唔望我。
 
我望一望佢身邊既阿雪，阿雪又望一望我，我地眼神接觸個幾秒之間，清楚見到佢好失望咁搖一搖頭，而且帶點憤怒既樣。
 
喂......點解你地要咁樣? 點解你地咁失望? 你地唔係話唔Care嬴定輸咩? 你地個樣全部都顯示出你地好重勝負，好似我累撚死你地咁，之前阿Sam認共青團既時侯，你地唔係撐佢咩? 阿Sam......係.....係阿Sam拎左我部電話，一定拎左去做左手腳。
 
『阿Sam!!係你條仆街拎左我部手提去!』我指住阿Sam說。
 
『下? 我?』阿Sam O哂咀咁用手指住自己。
 
『我前日借左部電話比你，之後我同阿雪去左食早餐，個段時間你一定拎我部手機Copy同做手腳! 仲有你之前認共青團件事，兩件事加埋，全部都係你條友累! 你究竟係咪阿風派黎攪事?』
 
『你係咪High大左呀? 咁樣屈我?』
 
『你問下阿雪，我係咪借左部手機比你!』我望向阿雪。
 
阿雪點了頭，阿龍就即刻講:『屌你阿Sam! 阿風比左咩野著數你呀?』
 
『成班都痴撚線! 我都廢事同你地講!』阿Sam就起身走人。
 
當佢經過我身旁準備出去時，我即時捉住佢 :『你講清楚先好走呀!』
 
阿Sam即刻推開我: 『你死撚開啦!死狗公!』
 
我比佢推開左後，想衝埋去阿Sam到，而阿Sam即時用手好兇咁指住我: 『夠喇! 再黎就反面!』
 
『反面? 你有當我係朋友咩?』我激動地說。
 
『........』阿Sam無回應，就轉身離開了。
 
『咁得喇! 我地今次真係玩完啦，琴日攪左埸好Show，比阿明攪彎哂啦!可以早D收皮!』阿龍就收恰野準備走人。
 
『唉，阿明! 你媾女既事其實唔關我地事，但係你點解要同人講我地做Show又話中大既人係傻仔呢? 之前我地做落既野都白廢啦! 出面既人都知我地係屈阿風啦!』
 
『我無呀......我無咁講呀!』
 
『頭先你先話自己有咁講過......』
 
『我.......』
 
『算啦，夠鐘上堂啦! 我走先!』
 
『我都走先!』
 
『唉!走先!』
 
我見佢地全部人都執野走，我即刻說:『大家做咩野? 我地仲未輸架! 今次好明顯係阿風衝住我而黎，我地要準備澄清! 我地仲有機會嬴架!』
 
『你都識講佢係衝住你而黎，而你又認左有做過，仲澄清黎做咩? 算啦!』
 
『算?』
 
『各位!我行先!』接著，一個接一個咁離開，一個接一個咁係我身旁離開。阿言都走黎同我講:『唉......原來個晚話追個個女仔就係佢拿? 人地有仔架?.....算啦，食左早餐未? 食完一齊去上堂。』
 
我呆呆地望住地下，實在唔知點好。阿言見我無反應，暗嘆左一聲就走左。
 
最後會議室內，得返我同阿雪兩個人。
 
『我估唔到.....原來你咁快就有鐘意既人。』阿雪說。
 
『我唔明你講咩......?』我問。
 
『睇返個文章......D圖係上個月開始，姐係你同我表白完之後既事，估唔到你咁快就鐘意左第二個......』阿雪完全唔Care選戰既野，佢似乎好在意我同阿靜既事。
 
『我......』我實在唔知點解釋，事實上，我係向阿雪表白完後，覺得好寂莫，所以搵返阿靜。
 
『我真係好懷疑你個陣到底有幾鐘意我......』阿雪失望地說。
 
『我個陣真係好鐘意你架! 我依世人第一次向人表白個個就係你!』
 
『我睇到D對話.....真係覺得好肉酸，唉!』
 
『我個晚飲左酒.....』
 
『D圖有咁多日子，你晚晚都飲酒咩?』
 
『........』
 
『我對你好失望。』說罷，阿雪就係我身旁離開。
 
當我係我身旁走過時，時間彷彿用慢鏡播住依個動作，我深深感受到阿雪個種失望，無奈.....原來佢一直都對我有期望，即使拒絕左我，都仍然記住我曾經鐘意過佢，都仍然深信我個陣係真心愛佢，所以一直以來都支持我，見我自暴自棄時會好心痛，知我生日會攪慶祝，因為我真心愛過佢，即使唔可以用拍拖黎報答我，都可以用其他方法去關心我，但依一刻，阿雪知道所有野都係假既時侯，佢真係對我好失望。睇黎我真係一個狗公黎，見人就追，追唔到就好快換手......
 
會議室只剩下我一個人。依一刻，我覺得我好似失去左所有野咁。
 
發左呆一陣，個腦一片空白，但我仍然記得我仲係要上堂，我就帶住依副已死既身驅去上堂，係行出會議室門口，我就腳軟，不安感，好驚見到中大既同學，好驚佢地用奇異既目光望住我，我好介意人地點睇我，我只係Year 1，我仲有2年留係依到讀書，我唔想就咁就臭朵......我以後點見人?
 
一踏入班房時，同學仔都望一望我，之後就轉身同格離位既人竊竊私語，個刻，我好心痛同難堪。
 
我見到阿龍阿雪佢地坐左係到，而我實在唔敢再坐佢地身邊，於是求其坐埋一邊算。而阿龍佢地都見到我黎左，都無意欲叫我同佢地坐。
 
上堂時，望住同學們對我竊竊私語，再諗起阿雪既對話......再諗起阿靜已經同阿風拍拖.....咪住，我唔記得左.....阿靜同阿風已經拍拖依件事，依家一諗起，我就更加心酸......我即時將過往阿靜同我經歷既事組合一齊，阿靜比我鍚左一淡之後，好驚訝咁閃開，係咪因為佢已經有男朋友?
 
我Whatsapp一直同佢講曖味既說話，而且係咁搵佢.....佢會唔會因為有男朋友而對我感到討厭? 所以求其打幾隻字回應下我，冷淡對我，希望我可以知難而退? 我生日唔黎，係阿風唔比佢黎? 唉，一諗起阿靜同阿風一齊我真係好心痛.....一直苦心經營同改造既阿靜，如今可以享受阿靜既人....係阿風而唔係我，我好似送左一個心愛既人比阿風咁，將一粒未啄磨既鑽石，整到靚一靚再賣比人咁.......
 
 
唉，好亂，我盡量將我情緒同感受壓住，雖然依一刻好想喊出黎，我真係感到好委屈，但無理係班到喊出黎，我唯有盡力壓住......一落堂我就即刻閃人。
 
返到Hall後，突然間咩都唔洗做咁，莊務都接近完了，時間都去到二月份，都開始係考試季節，除左溫書之外都無咩Project同Paper要做，由於無咩野做.....我更加感到寂莫到委屈。打開facebook，好想澄清成件事，但我實在唔知點講好，我怕只會愈描愈黑，我依一刻好後悔對住阿風狂追猛打，令到佢咁做，我更加後悔自己參選學生會，招致比人唱衰，起底......
 
我係Facebook打左一句" 好辛苦.....好委屈....."
 
我諗除左係Facebook呻之外，我都無咩途徑舒發情緒......
 
打開Whatsapp，已經唔想搵人吹水，都唔知可以搵咩人傾，我雖然有好多野想問阿靜......但我已經唔敢搵佢，我握住手提，縮埋係被窩之中，忍唔住喊左出黎。
 
過左一星期，民主牆所貼既野，由於唔關中大事，所以好多都比評委員撕走，但間唔中仍然有人補貼返上去，我每一晚都趁無咩人既時侯，偷偷地望下D人係D圖到寫左D咩感受，好多都係負面既說話，而且仲要狠狠咁批評。我除左心痛外，我仲可以點做?
 
*************************************************************************