《我將一位宅女變成女神，然後再將自己變成佢隻兵》: 下集 (5)

晚上，收到一個朋友電話，話後日佢地有個反高鐵組織行動係立法會門外攪一個示威，要求政府徹回興建高鐵撥款方案，好想我地中大學生都參與支持。雖然我地仲未選到學生會，但我地都可以以中大學生身份名義去參與，而且仲有城大，浸大等各大學都有學生出席支持。
 
基於我份政綱都有提到反高鐵，雖然比一大班人插我依個立埸，但最近因為發生太多事，我都無咩點理到最近時事政治，連高鐵方案傾到咩程度都唔知，如果唔係我朋友打黎提我，我都唔知已經去到通過撥款既日子。於是我二話不說就答應左佢，我仲提到我將會聯同一班莊員參與。
 
於是，我係聽日開左一個緊急會議，為反高鐵示威作準備。
 
『聽日一班反高鐵關注組將會係立法會門外進行靜坐示威，上一次因為班議會進行拉布戰所以拖到今日，今次如無意外今晚將會有結論，我地要作最後既抗爭同埋去聲援一班關注組成員，佢地希望我地可以出席幫手，大家聽晚得唔得閒?』我問各位莊員。
 
『雖然我地平時唔係好接觸時事政治，但既然聽日去到關鍵時侯，我諗唔到有咩理由去拒絕，聽晚你預我吧。』有莊員說。
 




『但我地其實唔係好清楚興建高鐵既事情，我地都係基於你既政綱先有立埸，但實質上，我地都唔係好了解高鐵件事。』阿言說。
 
『我明白依一點。所以我琴晚準備左大量有關高鐵既資料比大家參考，同埋今次我地是否出席都係自願，去既同唔去既都係你地決定，我地唔會因為你唔去而怪責，我地都唔想撐人數而強逼你地去。』
 
『但我想問......聽日係咪只係靜坐? 而唔係有任何衝擊行動? 因為我成日睇電視見到有示威者同警察有衝突，所以我怕.......』莊員問。
 
『大家放心，我地今次行動只係靜坐，唔會有任何衝擊行動。』我說。
 
『我地諗下先!』
 




『無問題，大家可以討論一下再決定。』
 
 
於是，各莊員都睇緊聽日行程有冇空閒時間黎到，又商量一下去唔去。對我黎講，聽日既行動對比以往我出席既社運行動真係小巫見大巫，始終反高鐵依個議題都傾左好耐，係市民政治冷感之下，實在太少人關注依件事，只有一班網上既人組織關注組，各大專同政黨等等去反高鐵，所以聽晚都應該幾少人去，同埋都應該和平進行。不過對班莊員黎講，始終都係第一次出行動，難免有點擔心。
 
係佢地討論商議期間，我將視線偷偷地望向阿雪，慢慢欣賞佢既樣貌，我已經有幾耐無認真望住佢? 我都唔記得左了，見到阿雪認真既樣，真係令我好想望多佢一陣，好多人話過，不論男或女，當佢地認真做一件事時，佢地都會散發出一種獨特既吸引力出黎。
 
我一路望住阿雪，而阿雪不自覺發現我係到望緊佢，短短幾秒間，我地望住對方。我無逃避佢既眼神，雖然對望既一刻，我既心跳跳得好快，好快。但我都無逃避，係公事上，我想阿雪去支持，係私事上，我唔想再逃避佢。
 
當阿雪見到我都望住佢時，然後好快將視線轉向其他人，就好似唔想同我有任何眼神接觸，免得比阿龍見到吧? 估唔到依家係佢顧慮我，而唔係我逃避佢，定係佢為左阿龍? 始終我同阿雪都算曾經有過曖味關係，而阿龍都知道。可能對於阿龍黎講，佢對住我都難免有點介意，只係佢唔想表露出黎，而阿雪都唔想阿龍有任何擔憂，都盡量唔想同我有太多既接觸。依個情況，就係拍左拖後既現象。




 
一個女仔或者一個男仔，當拍左拖之後，有左身份，唔再係自己一個人，以後想做任何事，任何決定都唔再係自己一個人既事，而係會牽涉伴侶，已經變成兩個人既事。以後想出街，同邊個出街，都可能要向另一伴報告或者文代。而重點係同邊個出街，未拍拖前，你可以單獨同男性，女性去街睇電影，但拍拖後，就會為左唔想另一伴誤會，就會斷絕異性過密來往，以後出街只可以搵同性友人去。拍拖後生活雖然因為伴侶而有所豐富，但亦會因為拍拖而失去一些東西。
 
而阿雪係未拍拖前，就算同我有幾親密，同我單獨出街都無咩問題，但依家成為阿龍既女朋友，我明白同理解阿雪佢需要避忌一D野，免得同佢阿龍既關係有所影響。對於此，我只能無奈地默默接受。因為除左接受，我仲可以做D咩?
 
阿龍細細聲問阿雪: 『你去嗎?』
 
『嗯! 我OK呀!』
 
『我覺得今次個行動應該可以帶比我地成支莊有一個唔錯既經歷，一來我地好多莊員都未試過真係親身出去示威，一直以來我地都係坐係屋企睇下電視留意下就算，頂多咪係Facebook打下幾句說話，轉發一D消息就代表自己關心政治，但實質上我地從來都係鍵盤戰士，到真正需要我地出去發聲時，我地都會諗好多藉口同理由去推三阻四。其實說穿了，我地都係一群政治冷感而去扮關心社會既人。如今我地身為學生會侯選人，如果日後我地真係好好運選到學生會，將會參與好多社運行動，所以今次都係一個好好既鍛鍊比我地。』阿Sam說。
 
估唔到阿Sam咁支持我地出行動，都估唔到佢說出一番咁既說話，短短幾句就說穿了好多人既心聲同對政治既態度。雖然我內心仍然介懷佢當日係政鋼發佈會到認自己係共青團，造成不可挽救既局面，但慢慢地，我都放低己見，慢慢變成如莊員所講，重過程而唔係重結果，我地參選學生會，上莊過程，令我地認識到一大班莊員，不知不覺間我地成為一體，成為一班好好既伙伴，都因為上莊而同阿雪有一段不可忘記既經歷，雖然我同莊員之間既關係有待改善，但依一刻既感覺比我好好。
 
『既然係咁，我去吧!』
 




『我都去!』
 
『好啦! 我地去啦! 聽日將會係我地第一次一大班人出行動既日子!』
 
『多謝大家，我一陣會同關注組成員聯絡，聽晚我地就係立法會門外等吧。』我說。
 
直到聽晚，我地係地鐵站到點算人數，之後就出發去立法會門外靜坐。現埸人數比我想像中更多，一班菜園村居民同聯盟，中大現莊學生會，社工學聯，反高鐵行動組，社區發展陣線等等多個組織都黎左聲援。係我地支莊入面，得我同阿龍有出過社運既經驗，所以今次行動組織由我同阿龍去負責帶住莊員參與。我地係現埸搵左少少空間安置我地，之後就靜坐。
 
有組織係立法會門外整左個直播顯示，直播緊立法會入面開會既情況，好明顯睇得到，一班議員盡最大努力去發問同提出動議去進行拉布，但全部都被否決。而一班建制派既議員回答有關高鐵既問題時，佢地全部都以" 有關問題之前已經答完，唔再回應 "，" 有關一地兩檢問題，會日後商議" 等等。以佢地作風黎講，先通過後檢討依個可恥行為真係令人髮指。
 
『嘩!我從來未睇過立法會開會係點，平時都係睇電視播D精華，覺得無咩問題，依家睇直播先知班議員咁仆街既!!!』
 
『咪臭係! 班功能組別就坐係到等投票，成部投票機器咁!!依班人點解會代表香港人架?!』
 
『屌! 好嬲呀!!仆街政府!』




 
『琴晚我睇資料發現政府一直都估計錯誤!!成日都誇大左經濟利益，今次用六百億起高鐵!如果到時又估計錯誤，受害既咪係我地?』
 
『屌! 起高鐵話有一萬個就業機會! 不如起係錦上路，慳返三百億黎起公屋仲好啦! 到時可以有五萬個就業機會呀!』
 
主持人大叫口號:『反高鐵! 停撥款!』
 
現埸人數同班莊員都即時大叫:『反高鐵! 停撥款!』
 
『反高鐵! 停撥款!』
 
『反高鐵! 停撥款!』
 
我係側邊聽到班莊員係到熱烈討論同埋見到佢地咁叫到走哂音，雖然佢地對政治無咩認識，對政策既見解都唔係話好好，但我開心既係，佢地開始接觸政治，開始關注到社會上既不公義。攪社運係要一團火，如果無火好快就會頹，失去意志。如今見到佢地心中既政治火開始慢慢燒起，真係興幸今次出行動係正確，可以比佢地見識一下，同埋孕育出一班90後既年青人力量。
 




主持人拎住支咪大叫:『大家!不如我地唱"人民之歌"!唱出我地一班心聲! 唱比入面班無能議員聽!我地對民主既追求!好冇呀!
』
『好!!!』現埸既人都和應同起哄。
 
 
" 看吧人民在挽手 爭取正義和自由
歌聲裡群情似火 滿溢激昂震撼著四週
 
捍衛人權護眾生 不分社會還是個人
方可叫無限理想 每日每天漸近
 
人民意願求實踐 自由的風不怕遏止
每刻也願勇敢 背負這革命旗幟
忘記畏懼勇踏前 正面迎接歷史
 




捍衛人權護眾生 不分社會還是個人
方可叫無限理想 每日每天漸近"
 
這晚，這首歌將見證住我地既成長，都見證住我地作為大學生開始關心政治，關心社會，為市民發聲。大學生，理應如此。
 
晚上六時多，立法會財務委員會正式就興建高鐵方案進行投票，即係話今次會唔會通過就睇依一次。現埸人士情緒非常高漲，不斷大叫口號: 『反高鐵! 停撥款! 反高鐵! 停撥款!』
 
但我地都知道，由於立法會內有好多功能組別同建制派議員係到佔據立法會，無論政府想通過咩方案，基本上都一定會通過，而所謂既功能組別唔係我地市民一人一票所投出黎，即係話佢地唔係代表我地市民但佢地卻有立法會投票權，可以見到佢地係立法會霸權，長期騎劫住立法會。所以今次既高鐵方案，議員同我地都明白到高鐵一定會通過，不過我地唔會放棄，而且我地希望係會議上問多D問題，令到建制派同班功能組別答多D問題，將來有咩事都可以秋後算帳，捉佢地出黎鞭屍。
 
隨著一班投票機器既功能組別，同一班無良心既建制派議員，高鐵撥款正式通過。在埸人士即時起哄，情緒好高漲，亦都有人話唔好比入面既議員走，同埋要衝擊立法會。
 
『阿明! 依家點?』阿Sam問。
 
『係到等多陣，睇下情況點。』我望一望周圍，決定留係到多一陣。
 
現場人士起哄聲好大，身邊既人開始討論緊衝唔衝擊立法會，亦都有人大叫話要去禮賓府門外示威，隨即將人流分開。埸面開始有D混亂，因為我從來無諗過要衝擊立法會，更加無諗過要惡化我地既靜坐示威，我係一個和平主義者，加上撥款已經通過，已經係不可挽回既事實，咁衝擊立法會係為左咩? 為左唔好比班議員走? 咁唔比佢地走，到時又點? 我地目的係咩?
 
時間一分一秒咁過，大批示威者開始分別霸佔左遮打花園，德輔道中，同埋立法會門外多處地方，同時都有大約幾百人出發去禮賓府示威。而立法會門外既示威者開始同警方有衝突。
 
阿龍: 『阿明! 你衝唔衝?』
 
『衝咩呀?』
 
『前面班人話要衝入立法會，開始準備Call人上前! 我地不如都去!』阿龍表現得好興奮。
 
『咪住! 我地當日開會講過，我地係靜坐示威，唔會衝擊架! 加上我地班莊員未試過咁做，都唔想咁做，我地點解要佢地衝?』
 
『依家情況有變呀嘛! 佢地唔衝咪我地衝囉! 總有人要帶頭出去衝! 如果個個都唔衝咁和平理性，咁對件事有咩幫助?』
 
『和平理性對件事無幫助? 咁衝擊就有幫助?』
 
阿Sam見到我同阿龍係到理論都忍唔住加把咀:『算啦!唔好再嘈! 始終衝擊係有危險! 我地又唔係攪開社運，不如算啦!』
 
『阿Sam講得岩! 我地既目的已經達到，要做既野都做左，我地唔需要再做額外既野!』我說。
 
『講到尾你地都係怕事，你地唔衝我去衝!』阿龍說。
 
『各位! 有邊個想上前衝擊?』阿龍大叫。
 
莊員有部份男士竟然和應，紛紛走過黎支持。
 
『你地傻左呀! 衝咩擊呀!』我同佢地說。
 
現埸有市民見到我地理論又加把口支持阿龍:『後生仔! 咁有衝勁! 將來香港靠哂你啦!』
 
『又唔好咁講! 我地都係盡一分力姐!』阿龍見有人支持自己，表現得更興奮。
 
『WOW!!』前方既示威者開始起哄，而且開始唔小人係後面開始湧上黎。
 
『大家! 我地唔好去衝擊，我地盡快離開依到!』我說。
 
『大家! 前面有一班人係到試圖衝擊立法會! 我地作為大學生! 好應該上前盡一分力! 如果大家想一齊衝! 依家跟我黎!』阿龍說。
 
我即時火起，捉住阿龍大叫: 『你講夠未呀! 你想死既話你自己去! 唔好累人呀!』
 
阿龍推開我大叫:『你龜縮就返屋企! 我有我衝! 唔關你事!』
 
在埸有一班後生仔說 :『怕就返屋企啦! 』
 
『你收聲呀! 關你咩事!』我罵班後生仔。
 
在埸人士知道阿龍佢地想衝，即時遞上保鮮紙，雨衣同潛水眼鏡，以防警方用胡椒噴霧! 阿龍就收哂所有物品，同班莊員係到互相幫大家包住個身體。睇黎佢地真係要上前衝擊立法會。
 
『阿明! 依家點?』阿Sam問。,
 
『唔洗理佢! 我地帶班莊員走吧!』我說。
 
『OK! 咁我地走吧!』
 
當我地收恰D報紙時，準備離開，我望到阿雪竟然拎左D保鮮紙同雨衣著上身，我即刻走埋去問佢咩事。
 
『我都要上前!』阿雪說。
 
『你傻左咩! 你女仔黎架!』
 
『阿龍上左去! 我都要去! 放心啦! 我地無事既! 我地唔會企最前，有咩事我地會走。』阿雪微笑回應，但從佢既臉色黎睇，佢個樣好緊張同好擔心，好明顯佢從來未遇過咁既情況，係因為阿龍去左佢都要跟住嗎? 就係因為佢係阿龍女朋友，佢就要陪住阿龍嗎?
 
『唔得!!你知唔知咁做好危險! 我唔會比你咁做!』
 
『阿雪! OK未? OK就上去吧!』阿龍突然從後說。
 
我轉身再罵阿龍:『你自己想做英雄就自己做到夠! 你唔好拉埋阿雪落水!』
 
『你講夠未! 我無逼過佢! 我都知危險! 我都叫左佢唔好去! 係佢自己決定去!』阿龍說。
 
『你地唔好嘈啦......係我自己決定! 』阿雪說。
 
『阿雪呀......』
 
『放心啦! 我地無事既!』
 
說罷，阿龍就帶住部份莊員同阿雪就逼上去，務求行到最前線，即係立法會門外。望住佢地身影慢慢消失於人群之中，都開始見到警方舉起旗幟，寫明如果示威者有進一步行動就會作出防衛，要求我地盡快離開。
 
莊員都收恰好，正要離開 :『阿明!走吧!』
 
我視線一直望住前方，實在好擔心。於是同阿Sam說:『你帶佢地走吧! 我要上去!』
 
『下?你上去做咩呀?』
 
『我要睇住阿雪! 我唔會比佢有事! 你地快D走!』 說罷，我就衝上前搵阿雪佢地。
 
人群之中好擠逼，後面班人不斷撞上黎，逼到我根本搵唔到阿龍佢地係邊，而有人大叫:『班狗官想走呀! 唔好比佢地走呀!』
 
此言一出，在埸人士情緒更加高漲，不斷叫口號，同時係咁從後逼上黎。
 
『WOWOW!衝呀!』前面傳出一班叫聲，相機閃光燈係咁閃，好明顯前面開始有行動。激氣，點解好地地會攪成咁。我好辛苦逼到上前，搵到阿龍佢地。
 
『夠啦! 班莊員已經走左! 我地走啦!』
 
但阿龍無理到我，不斷叫口號同逼上去。我清楚阿龍性格，當佢決定好做既事，無人可以阻到佢，所以我都放棄左唔勸佢，反而更加保護阿雪。我見到阿雪雞手鴨腳咁將保鮮包隻眼，我就行埋去幫佢整一整。
 
我一路幫佢整一路說:『一陣你企我後面，有咩事你要走! 知唔知?』
 
『嗯! 我答應你! 你都要小心!』
 
當我企係阿雪面前幫佢整好副潛水鏡，睇見佢一臉天真既樣，傻傻更更咁好似唔知發生咩事咁，同現埸氣格格不入，就好似一個細路女無神神走左入大人既世界咁，令人好想好想保護佢。
 
『阿雪.....』我話未說完，前面已經同警方爆發衝突，後面既人更加湧上黎，我都逼於無奈咁逼上前。警方手拖手築成一條人鏈，再加上前面放上鐵馬，防止示威者更進一步上前，而我地就不斷向上逼，令到前方既人係咁撞個鐵馬。
 
警方再一次開咪宣佈 :『請盡快離開! 否則會採取進一步行動! 請示威者盡快離開!』
 
警方再一次舉起紅色旗以示警告，睇黎情況好快一發不可收恰。唔洗一分鐘，衝突正式爆發，所有人都一窩蜂咁湧上前，我擔心阿雪比人撞倒，於是我將阿雪推後，叫其他莊員帶佢走，由於莊員都知道事態嚴重，都聽我話帶阿雪走。
 
『阿明! 你要睇住阿龍呀!』
 
依句說話係阿雪離開前最後一句說話，估唔到去到緊急關頭，佢係關心阿龍多過我，個一刻埸面雖然混亂好嘈，但係係我眼中，所有野都好似靜止左咁，個腦一片空白，眼白白望住阿雪離開，個腦不斷重覆一句"阿明! 你要睇住阿龍呀! "
 
請示威者盡快離開現埸! 否則會採取進一步行動!
 
警方既大聲公叫聲令我突然嚇左一嚇，清醒過黎。後面既人將我推到最前，驚覺阿龍都係最前。我就同佢講:『阿龍! 夠啦! 阿雪佢地都走左啦!』
 
『咩呀?』
 
『我話阿雪佢地走左呀!』
 
『阿雪做咩話? 我聽唔到你講咩呀! 』
 
由於現埸起哄聲好大，我同阿龍中間有幾個人隔開左我地，所以阿龍聽唔清楚我叫佢。
 
『WOW!! 反高鐵! 停撥款! 』起哄聲更大。
 
阿龍不斷用腳踢開鐵馬，同埋前面班人試圖爬過鐵馬進入立法會!當警方見到有示威者爬過鐵馬時，即時用胡椒噴霧射向前面既人，警方一噴，前面既人即時散開!!!
 
『仆街!走呀!!』前面既人大叫。
 
『嗚呀!!』阿龍大叫，好明顯佢被胡椒噴霧噴到。
 
我轉身望望阿龍既方向，見到佢已經退後同埋係咁用手亂咁Fing，我就大叫:『阿龍!!!你有冇事呀!!!』
 
說罷，突然間我背部感到好似比火燒一樣，好刺痛，我即時反應係轉身一望，就見到有警察向我噴胡椒噴霧。
 
『呀!!!!!!!!!!!!!!!!!!!』 我隻眼即時覺得好撚痛，個種刺痛痛到入心入肺，我隻眼完全張開唔到，我隻雙手遮住塊面，本能反應不斷整走眼上既既液體，但真係好撚痛，後面既人又係咁逼上黎，我痛到不斷大叫，跪左係地下。
 
我完全唔知個刻發生咩事，只係知道好嘈好混亂，隻眼完全張開唔到，個背部好熱.....我個刻以為自己盲左，會唔會死係依到? 個頭好暈.....點解好地地會攪成咁? 阿雪佢走唔走到呢? 丫.......
 
『讓開!讓開呀!有人中左招訓低左呀!』
 
係混亂同好嘈既環境下，我仍然聽到一把好清晰既阿叔既聲音，然後我就感覺到好多人捉住我，之後抬起我，慢慢抬出去。個刻我除左感到好撚痛之外，仲覺得好淤，依到好多記者同電視直播緊，我咁樣衰比人抬出去一定比人笑死。唔知阿雪見到我中左招會點諗呢? 係咪覺得我當初唔衝擊既決定係正確呢? 阿龍都中左招，但傷勢一定輕過我，因為佢整左保鮮紙同有潛水鏡，而我咩春都冇，硬食胡椒噴霧，講嚴重，我嚴重過阿龍十幾廿倍，唔知阿雪見到我咁慘會唔會同情我? 關心我呢?
 
當我意識到自己比人抬到出去，慢慢放低我，有人提議用水幫我洗眼，但有人阻止左，話用水洗可能有反效果，但我實在痛到仆街，於是D人最後都決定用水慢慢少少地幫我洗走臉上既液體，但好笑既係，當時無人有水係身，我聽到有人話即刻去買水，而我就靜靜地坐係到等人救。
 
我Feel到自己開始流鼻水，同埋有少少呼吸困難。雙眼依然感到刺痛，成身好似比火燒咁，成身都無哂力，估唔到胡椒噴霧咁堅，噴幾野就收左我皮。點解警方有依D有殺傷力既武器對住我依D手無寸鐵既人? 你老味真係好撚痛。
 
『阿龍你有冇事呀?』
 
我隱若聽到阿雪既聲音，我突然有一股衝動同力量，好想張開雙眼，因為我想見阿雪，好想比佢知道我係到，我中左招，我需要佢既關心，我需要佢.......
 
我慢慢半張開隻眼，朦朧地見到阿龍坐左係地下，而阿雪用紙巾幫佢清走臉上既液體同慢慢幫佢拆保鮮紙，埸面好溫馨，就好似一個征戰完既士兵，身負重傷，誓死都返返屋企搵佢老婆，而佢老婆已經一早係門口等佢返黎，慢慢幫佢清洗身上既污糟野，慢慢呵護對方。
 
當我見到咁既情境後，內心好痛，好痛。阿雪，你知唔知我係到?
你可唔可以同我講:『阿明! Sorry ar!我見你唔到呀! 原來你係到! 有冇事呀? 痛唔痛呀?』
如果你咁講，我個心起碼會好安樂，因為你係睇我唔到先唔理我，而唔係本身就唔理我。盲既都知我嚴重過阿龍咁多，點解可以去關心阿龍而唔係關心我先? 我係為左咩而衝上前? 我咁樣係唔係自己囉黎衰?
 
『頭先邊個話要水架?』突然有人大叫。
 
『係個到! 佢需要用水洗!』阿雪大叫。
 
阿雪所指既佢係阿龍定係我? 我個刻心裏不斷拜託上天，拜託上帝，拜託彿祖，總之咩神都拜託個個人千其唔好行埋黎，因為行埋黎既話就代表阿雪所指既佢正正就係我。當一個人雙眼好似盲左既時侯，聽力反而係更加強勁，令我聽到腳步聲慢慢走近。
 
『後生仔! 有冇事呀? 拿! 我依家用水慢慢同你洗眼!你唔好郁呀!』 一把阿叔既聲音出現係我身旁，好明顯佢係同我講。
 
我半張開隻眼，望望阿雪，原來佢一早知我中左招坐左係到，點解唔肯黎睇下我關心下我? 而全程留係阿龍身邊? 依個就係朋友 同 男朋友既分別嗎? 我個心好痛，真係好痛。
 
『後生仔! 痛唔痛呀?』
 
『痛......好痛。』
 
『陰公囉!你忍住呀! 依家幫你洗!』
 
大概阿叔以為我所講既痛係隻眼比胡椒噴霧所引起，但事實上，我所講既痛係心入面既痛，一把痛到入心入肺個隻痛。我感覺到水慢慢佈滿我既臉，我已經分唔清我臉上既水係阿叔淋我，定係我既眼淚，我竟然不自覺地喊左出黎，但我盡量死忍住，一直半抽搐咁喊，阿叔以為我一定嚇親，所以就安慰我:『其實好小事姐!唔緊要架!好快無事! 後生仔捱得既!』
 
阿叔既粗獷聲線，但又以一把溫柔既態度安慰我，令我更加盡情喊出黎。我唔知點解見到阿雪同阿 龍依個畫面會忍唔住喊，因為係琴日係學校見到佢地正式宣佈拍拖個一刻，我都可以忍住。但估唔到，去到一個咁緊急既情況，一個我同阿龍都受左傷既情況下，阿雪選擇左照顧佢男友，而我徹徹底底地輸了，我最心痛莫過於此，突然間覺得內心好孤獨，好孤獨，好寂寞，好寂寞......
 
 
那晚上，莊員送左我返Hall，因為我唔想嚇親我屋企人，於是返Hall休養。返到Hall後，就攤左係張床到，成身都好累，腦海只係諗到阿雪，我手握拳頭，我唔甘心，我接受唔到失去阿雪，我更加接受唔到阿雪同阿龍一齊，但我實在成身發唔到力，就算我盡力去握緊拳頭，都握唔到，我竟然連小小既拳頭都握唔到，我仲點可以去捉緊阿雪隻手?
 
 
" 『hello~你係咪孔明巴打呀?』 "
 
『哈哈!好呀! 阿明! 你叫我做 阿雪啦。』阿雪伸出右手，示意同我握手。
 
我笑了，估唔到佢會咁老套，我都伸出手同佢握手 :『希望我地黎緊三年會讀得開心。』
 
『一定。』阿雪帶以微笑回應。
 
"『喂呀! 你肯唔肯講呀!』
 
『講咩?』
 
『你鐘意既人係唔係讀Psychology呀!』
 
『哈!你又提返依條問題。』此時，車門都開了。
 
『快D答我啦!』阿雪似乎有點急。
 
我伸手按一按阿雪既頭 : 『唔知呢!』 "
 
"『係呢，點解你成日都覆我既SMS同MSN咁慢架。』
 
『下? Sorry ar! 我成日都要幫人補習，所以我無咩點睇到。』
 
『次次同你傾親，你都係覆我好少，又好快Offline!』
 
『平時我同D Friend都係咁架WO!』
 
『我....唔係你平時D friend呀嘛!』 我擺明另有所指。
 
阿雪望左我幾秒，之後笑笑口答: 『好好好，我答應你，以後好快咁回覆你，打多D字! 哈哈。』 "
 
 
"『捉棋之嘛。又唔係D咩事，我地係學生會嬴返佢一次咪得! 我一定撐你架!!』阿雪輕輕捉住我既手說。"
 
 
『究竟你有冇心上人姐? 講黎聽下啦! 哈哈! 』阿雪說。
 
『阿明....覺唔覺得好凍呀?』 阿雪細細聲說。
 
『咁你慢慢用手吸走我既熱力啦!』我細細地回應佢。
 
阿雪聽到後就笑左 :『哈哈! 衰人! 唔好係到引我笑! 』 說罷，見到阿雪既影象慢慢離我而去。
 
『唔好.....唔好呀.....阿雪!唔好走呀! 阿雪!』
 
"醒了我卻還是閉著眼睛　只有這樣才能留住夢境
還看見我最愛的眼睛　還有你偷偷親吻我的情境
醒了我都不會睜開眼睛　是怕淚水慢慢吞噬心情 "
 
張開雙眼，呆呆望住天花板，原來岩岩係發夢，一個夢到我同阿雪以往經歷過既夢，我呆呆望住天花板，成身半點力都發唔到，我慢慢緊閉雙眼，我好想追返岩岩所發既夢，好想繼續享受同阿雪相處既夢，只有夢入面我先可以同阿雪起埋一齊，只有夢入面我先可以同阿雪親近。好想永遠留係夢入面.......
 
"原以為我們有了約定　就能夠聽見朋友祝福的聲音 "
 
一直以來，我都自以為事，以為可以同你起埋一齊，以為我同你都有共識，以為我地有左約定，只係差對方一句說話，一句表達心意既說話就可以起埋一齊享受大家，同學，朋友既祝福。
 
 
"還來不及和你　和你在一起
數著天空裡墜落的星星
你已經離我而去　愛沒有繼續
原來我根本不是你的唯一 "
 
『WOW! 你終於得左啦! 阿龍!!!』同學大叫。
 
『點解阿雪會鐘意你架!!你究竟點追佢架!!』
 
『嗚呀!!竟然比你搶先一步! 你就威啦!』
 
但原來身邊朋友所祝福既聲音，唔係祝福我同你，而係祝福阿龍同你。仲記得聖誕節同你表白個一晚，天氣好凍，面對剛離開既你，面對住岩岩表白失敗既我，面對住我地之間既關係步向終結，我地之間既曖味同愛情都唔會再繼續。直到知道阿雪同阿龍起埋一齊之後，我先發覺，原來我根本不是你的唯一。
 
" 我緊閉雙眼摒住呼吸　根本就不敢在夜裡想你
誰知道在白天遇見了你　看見你新的唯一靠在你懷裡
我流乾眼淚不能呼吸　我無法面對最後這個結局"
 
當知道阿雪同阿龍拍拖之後，係夜晚，我係唔敢諗起阿雪，因為我一諗起阿雪，我個心就好痛，好痛。痛在我無能為力去挽求依個局面，痛在我改變唔到我同阿雪之間既關係，個種後悔同恨自己既感覺令我好難受，加上夜晚寂寞感覺好強烈，負能量超標......令我怕左同意識到我夜晚係絕對唔敢去諗起阿雪.....
 
就算我唔去諗阿雪，係學校到我依然要去面對你，同埋你既男朋友，睇到阿龍坐你格離，攬住你，拖住你，睇到你聽哂阿龍既說話，睇到你呵護阿龍既時侯，即使我強忍住內心既痛，但我仍然接受唔到依個結局......
 
"曾經我們有過無數話題　愛到最後
我們對愛竟會無能為力"
 
『我唔想再講野，我地算啦。』阿雪搖搖頭，之後一直望住部機。
 
『我地不嬲...都算架啦.....』我都開始無氣再講落去......總覺得沒完沒了。
 
以前SMS每日百幾個，Facebook傾計傾到零晨，出街有講有笑，但係到最後，我地之間已經無說話可以講，我同阿雪之間既感情如無意外.......真正的......就咁算吧。
 
張開雙眼，呆呆望住天花板，順手拎部手提出黎睇，雙眼仍然刺痛，估唔到過左一晚都仲咁痛。
望一望手提顯示，竟然收到過百個Whatsapp Msg，一睇之下發現佔左最多Msg既係阿靜，原來佢知道我琴晚反高鐵示威受左傷，好擔心我。而其他Msg都係莊員，阿雪佢地。但阿雪既Msg比我感覺好同其他莊員無咩分別，就好似大時大節既祝賀Msg咁，Copy and Paste咁Send過黎，無半點出自真心，無半點比我感覺係溫暖，只係一堆冷冰冰既文字。
 
再打開阿靜既Msg，比我感覺上，佢有感情過阿雪。
 
阿靜:
阿明! 頭先係電視見到你比人抬走! 你有冇事呀?
 
阿靜:
有冇事都好! 覆我丫!
 
阿靜:
阿明.....你點呀
 
阿靜:
點解唔聽電話? 我叫阿威打比你，你都無接聽到.....我好擔心你
 
阿靜:
阿明.....你點呀? 訓左?
 
阿靜:
阿明! 聽早我黎Hall搵你丫!
 
阿靜:
你起左身未? 我依家出門
 
阿靜:
應一應我!我真係好擔心你
 
阿靜:
阿明! 我唔知你房既匙卡，我等緊我FD黎接我上HALL，希望你室友係到啦
 
當我睇到依段Msg後，個腦呆左一呆，之後即時有反應彈起身，阿靜要上黎? 我再望一望我室友係唔係到，佢仍然熟睡中，我隱若記得琴晚班莊員嘈醒左佢，要佢照顧我，睇佢訓得咁淋，我估佢為左我都好夜先訓。
 
"拍! 拍! 拍"
 
我意識到係阿靜上黎，我落床準備去開門時，發覺全身都腰酸背痛咁，就好似好耐無做運動，突然間做左成日運動，攪到周身都酸軟，特別陽光哂落間房到，攪到我雙眼更加剌痛，要合合地眼，又張開少少咁睇野。
 
開左門之後，果然係阿靜，身旁仲企左佢一個女性朋友。阿靜見到我之後，無咩反應，好冷靜咁對佢個朋友講: 『唔該哂!』
 
『唔洗! 咁我走先!』說罷，佢既朋友就走左。
 
阿靜見佢朋友走左，即時換轉一副好擔心我既樣，係咁問我發生咩事。
 
『你點呀? 你對眼係咪有事呀?』
 
『嗯......好酸，有D刺痛。』我邊示意叫阿靜入黎，邊說。
 
關上門，我就攤係張床到，實在感到無力感。阿靜就坐係我床邊，見到我室友係到訓覺，就細細聲咁同我傾計，問我情況。
 
『洗唔洗同你去睇醫生呀?』阿靜問。
 
『唔洗啦......我諗訓返晚應該無事。』
 
『但我見你好辛苦，不如去睇醫生啦，係學校睇好平之嘛。』
 
『個D醫生出名廢架! 佢頂多咪開隻眼藥水黎，有咩用!』
 
『你講得岩! 我帶左眼藥水黎比你!』
 
『嘿......』我個陣唔知點解覺得好笑，不禁冷笑左一聲。個陣我仲係閉起雙眼，一路同阿靜對話，因為閉起雙眼會令我感到舒服D。令我諗到Eason首人來來往一句歌詞 " 閉起雙眼你最掛念誰 "，腦海岩岩仲充斥住阿雪既畫面，一時之間阿雪既影象揮之不去。
 
『打開隻眼! 我依家幫你塗眼藥水! 』 阿靜帶點命令既說話。
 
『下?你講真架?』我即時張開雙眼，因為估唔到阿靜真係黎真，我以為佢帶左眼藥水係假既。
 
『拿! 我帶左呀! 乖! 我幫你塗!』阿靜手上真係拎住支眼藥水。
 
我自細就好怕塗眼藥水，大佬......要整到隻眼有咁大得咁大，突然隊支野係我隻眼面前，咁近距離望住支野滴D野落黎，嘩! 我諗起都驚! 所以細過阿媽幫我塗個陣，我都忍唔住合埋隻眼，攪到次次都滴唔到我隻眼到，攪到好耐。你依家要同我滴? 我真係淆底。
 
『唔呀! 唔洗滴啦!』
 
『你又唔睇醫生! 又唔滴! 你想點? 快!』之後阿靜就隊支野落黎。
 
我本能反應推開佢隻手，彈起身同佢講:『唔呀! 我唔要呀!』
 
阿靜一野用手推返我落床，之後我正想開口講野之時，阿靜又帶命令既語氣說:『訓低!唔好郁!』
 
唔知點解個一刻，我有一種莫名奇妙既感覺，我突然好受落依一套帶有命令既說話，感覺上好似情侶耍花槍咁，又感覺到好似有媽媽照顧我咁，有一種母愛既感覺。
 
雖然我好受落，但我又想試下比阿靜命令多幾次，我好享受依一種感覺，就扮哂野反抗下
 
『唔呀! 唔要呀!』
 
『收聲! 唔好嘈! 唔好郁! 好快就攪掂! 至多你好返我請你食飯!』