《我將一位宅女變成女神，然後再將自己變成佢隻兵》: 下集 (6)

佢叫我收聲個陣，我真係覺得好正，依一刻，我成個細路仔咁，唔敢去打針咁，要護士姐姐哄下我，原來真係幾正。為左適得其反，我就真係收聲。而阿靜以為我真係為左佢餐飯而收聲，就笑我屎嗇。
 
當我將隻眼有咁大整到咁大時侯，而阿靜將佢個頭望望移近我時侯，近距離望到阿靜既樣，好靚，皮膚愈黎愈好，而且.......丫......我好耐無真真正正咁近距離望住阿靜，而我都好耐無試過阿靜係我身邊，我地真係好耐無見過面，估唔到見返面會係我間房，而我仲受左傷。
 
原來關心我，擔心我既係阿靜，一個好耐無聯絡，但因為我受傷而搵返我既人。當我受到阿靜既照顧時，令我感到好舒服，阿龍當時被阿雪照顧都有依個感覺嗎? 我真係好寂莫，好孤獨，兜兜轉轉攪左咁多野，到最後都係得個吉，得返自己一個。而我漸漸覺得我真係需要一個女朋友，當我寂莫同孤獨時可以搵女友解悶，傾計，什至解決性需要。當我工作感到累既時侯，好想打比女友呻下，得到女友既支持。當我等緊巴士，返屋企個段垃圾時間，好想打比女友傾下計，消磨下時間。當我有套電影想睇，有地方想去，好想搵女友陪我睇。當女友唔開心時侯，我好想照顧下佢，鍚下佢，比到幸福佢。
 
講到尾，我好想有個伴。
 
唔知點解"好想有個伴"依個念頭突然間一發不可收拾咁，由我腦海深處湧現出黎，禁都禁唔住。而我岩岩起身個陣，生理反應之下，我扯左旗，加上阿靜係我格離，係寒冷天氣下，令到間房本來好凍好涼，傳來一陣少少既暖體溫，而佢隻手同我身體有所接觸時，都令我有點反應。
 




當阿靜幫我滴眼藥水時，為左想一 Take 過，準確咁滴落我隻眼到，就靠得好近。而我個陣突然間忍唔住將個頭慢慢向阿靜方向伸去。
 
短短一秒之間，短短幾厘米既距離，我個嘴就鍚左阿靜一淡。由於黎得比較倉猝，我都較唔正個位，本來想鍚佢個嘴，變左鍚左佢嘴上同鼻下之間既範圍，雖然鍚唔到正宗位置，但仍然接觸到阿靜既嘴唇，我初吻仲係到，一直都保持，如今終於比左阿靜，都算係叫初吻呀? 原來Kiss既感覺係幾奇妙，難以用筆墨黎形容，只係好想鍚得更加狠更加長時間，但阿靜已經眼都突埋，即刻彈開，塊面即時紅哂，用手掩住把口，驚訝咁望住我。
 
當我見到阿靜咁既反應時，我內心突然不安起黎，我即時諗到既.....係怕阿靜驚左我，會唔會當左我係個咸濕佬? 突然鍚左佢一淡，佢以後又點睇我? 佢對我印象係咪差哂? 佢又會唔會誇張到告我非禮? 雖然依個可能性都幾細下，但我個刻真係怕阿靜對我印象差哂，屌啦星，鍚左一淡之下竟然諗左咁多影響出黎，但鍚個下竟然任何後果都諗唔到，唔通真係用左『下體』諗野?
 
『阿......阿靜。』我只能驚訝望住佢，但我都唔知可以講D咩。
 
『你頭先......做咩鍚我?』阿靜仍然用手蓋住把口。
 




突然我有一個念頭，係短短幾秒之間，腦海即時將依個情況分析，如果我成個死狗咁認錯，反而令到關係會惡化，我以後都難以係阿靜面前抬頭，於是我唯有用一個無賴既態度去對佢，咁樣應該效果唔錯。
 
我企起身，用盡成身既力，好輕巧咁跳落床，十足一個Play boy咁，笑笑口咁講:『正唔正先?』
 
由於我岩先仲係個死狗咁攤係張床到，仲係死死下個樣，突然間見我變成一個精力旺盛既人，阿靜彷彿覺得自己好似比我戲弄咁。
 
『原來你一直都無事!係到扮野!』阿靜似乎有點生氣。
 
『我唔咁做! 我又點知你會關心我呢?』我行埋去，用雙手輕摸阿靜塊臉，扮哂情聖咁。連我自己都覺得嘔心同好笑。
 




阿靜一野甩開我隻手 :『咪玩啦!』
 
『咁鍚多淡好冇!』
 
阿靜一野推開我，突然間依下無情力令我本來好虛弱既身體掉倒係地下，個下個屎忽真係跌到痛，但我仍然扮哂野。
 
『以後唔洗指意我再理你!哼!』說罷，阿靜就行去床到拎埋袋走，仲狠狠咁關門。
 
『呯!』
 
見到佢走左，我都鬆一口氣，成身都無哂力咁攤左係地下，呆呆咁望住天花板，覺得頭先個『無賴』行為，有D似我上年既作風，我唔係不嬲都咁對阿靜嗎? 唔通我對阿靜既作風同態度都變左嗎? 不知不覺間，令我懷念返以前成日整蠱阿靜，戲弄阿靜既日子，次次阿靜都好嬲，見到佢比我激到發火個樣，真係令我好覺得好過癮，但最後我地之間又無咩事咁，唔知依次會唔會又係咁呢? 畢竟今次真係玩得大左。
 
『唉!』我嘆了一句，就用隻手蓋住雙眼，我真的累了。
 
『女唔係咁媾既! 阿明!』




 
依把聲咪係我室友?
 
『哈! 死仔! 你幾時醒?』我仍然攤係地下，用手蓋住雙眼說。
 
『由你係咁話唔要滴眼藥水個刻開始，我就醒左啦! 我幾驚你地係到攪野呀!』
 
『哈哈!』我企起身，攤返係張床到，呆呆望住天花板。
 
『你無事呀嘛?』
 
『無! 我想抖多陣，一陣仲要返學校攪D野。』
 
『咁好啦! 我起身返學啦! 有咩call 我!』說罷，我室友就去左廁所梳洗，而我就閉雙眼，作最後休息。
 




晚上，我同莊員一齊印左好多份文件同大字報，全部都係針對阿風支莊既言論，仲有老屈阿風入面有共青團，攪外務既莊員有政黨背景，偏向民建聯，學生會最忌有政黨背景，最忌令人有懷疑，即使以上既野通通都係老作，但已經唔多唔少影響緊學生對佢地既睇法。
 
同時間，為左唔想比其他學生同阿風支莊話依D言論係我地早前比人踢爆有共青團先老屈佢地，所以我地同時印製大量言論文件以第三者既角度去寫，不但只插爆我地支莊有共青團，仲插爆埋阿風支莊內政混亂，有上莊支撐，透明度唔高，我地務求同歸於盡，攬住一齊死。
 
『阿明，貼上依D野，聽日中大應該幾熱鬧。』阿龍說。
 
『嗯，好快就黎一埸最後大戰。』我地邊貼邊說。
 
『阿明，你隻眼仲有冇事? 不如剩低落野既野，比我地攪啦!』阿雪說。
 
『無咩事，今早抖左好耐，我OK GA!』雖然阿雪問到，但我仍然有點介懷，依家先關心我身體狀況嗎?
 
直到半夜，我地完成手頭上工作，各自回家。
 
『我地走先啦，拜拜!』阿龍就拖住阿雪隻手一齊離開。




 
呆呆望住佢地背影，雖然內心有點酸，但已經無咁強烈，看來我內心深處，打從心底已經開始接受依件事。
 
『你返Hall嗎?』阿言問。
 
『嗯，你都返屋企吧。』我說。
 
拜別左班莊員後，獨自一個人返上Hall，個條長長既路又令我諗左好多野，依堆垃圾時間一個人行真係好悶，個腦諗起既人唔再係阿雪，而係阿靜，我摸一摸自己個嘴，回味緊今早鍚阿靜既感覺，好想記低依個感覺，好驚唔記得左初吻既感覺，因為我聽到好多人講過，如果一個人對感情認真既話，依世人都會記得初吻既感覺，如果對感情唔認真既人，連幾時初吻，鍚既感覺都唔係好記得。
 
我拎起手提，打開Whatsapp，留意到阿靜既Status寫住 "你在想什麼?"，更新時間為8小時24分鐘。即係我早上鍚左佢之後改既? "你" 係指我嗎? 睇黎我依一吻，令到阿靜開始混亂起黎。
 
阿明:
做緊咩?
 
阿靜:




不理你
 
阿明:
點解呀?
 
阿靜:
你話呢
 
阿明:
我真係唔知喎
 
阿靜:
唔知就算
 
阿明:
今早既事?
 
阿靜:
Angry
 
阿明:
你再Angry 就會進化成 Angry bird架啦
 
阿靜:
唔好笑
 
阿明:
扮野! 你一定係到笑緊!
 
阿靜:
.......
 
阿明:
今早既事.....對唔住，我衝動左
 
阿靜:
算吧!
 
阿明:
食左飯未?
 
阿靜:
食左了
 
 
 
阿明:
做緊咩?
 
阿靜:
nothing
 
阿明:
ic
 
接著，阿靜就無再回我，我雖然盡力想攪下氣氛，但阿靜既冷言冷語，字數都係幾隻單詞回應，都令到我無咩癮去傾落去，睇黎今早既事對阿靜真係有點影響，不禁有點後悔感覺出現。
 
沖完涼後，攤係張床到，又忍唔住拎起手提睇，發覺無人叫我，阿雪同阿靜雖然顯示" 上線中"，但奈何唔係同我傾緊計，再望一望阿龍既Whatsapp，又係顯示" 上線中" ，大概同阿雪傾緊計吧? 而阿靜呢? 同阿風嗎? 最近好似無咩見佢同阿風有任何消息狀況，再用手提上網按下阿靜既Facebook，睇下佢既相，真係幾靚女，阿靜真係我一手一腳咁改造出黎，見到佢張張相都影得好自然，面對住相機佢都好大方好自然咁去影，一D都唔怕同抗拒，影相都無再三分臉，而且好勇敢咁用正面既樣做Facebook頭像，因為通常對自己個樣無信心，毒撚就會用動漫既相黎做頭像，什至空白，而毒女通常都係拎D 外國歌手/名星，或者蓋住臉，拎下角度既相黎做頭像，總之就唔會比你見到佢個樣。
 
睇黎阿靜真係改變左好多。係好事定係壞事呢?
 
第二早，民主牆反應果然熱烈，好多中大學生係民主牆到指指點點，議論紛紛，仲有好多學生係大字報上填上學生編號留言，大多係 " 我們不要有政治背景的學生會 " ，"投不信任票是常識吧?"。
 
阿風同班莊員睇到以上言論即時咬牙切齒。
 
『阿風佢地黎左喎。』阿言說，而我地位置正正係遠處望住。
 
『過去會一會佢地。』我說。
 
『阿風! 咁樣攪法，我地好大獲!』阿風莊員說。
 
『即時Call班莊員開會，我地要諗下對策!』說罷，阿風就轉身離開，剛巧遇到我。
 
『咁急趕住去開會呀?』我笑笑口問。
 
『你個仆街......咁樣砌我生豬肉?』阿風說。
 
『你咁講即係話D野係我貼上去? 你無睇到我地都有份比人插爆咩?』
 
『如果係既話，你地點解可以咁冷靜?』
 
『哈! 上次政剛發佈會我地都比人噓爆啦! 仲邊會嬴? 洗咩咁著緊，你就唔同啦! 你一定以為自己志在必得，比人話幾句就已經淆到震，真係陰公。』
 
『你唔好咁串，即使有依堆垃圾言論都影響唔到我地，你要玩黑材料呀嘛! 我就陪你玩! 你要攬住一齊死呀嘛! 好! 就睇下邊個死先!』阿風認真說，說罷就係我身旁走過。
 
唔知點解聽到阿風依句說話後，內心不安感突然湧現，我一直以為依件事上食硬佢，而事實上我又真係玩殘左佢，先嬴一局，但見到佢講依番說話後，我覺得有點心寒同淆底，心跳得好快，特別佢個句令我好在意 "你要玩黑材料呀嘛! 我就陪你玩! 你要攬住一齊死呀嘛! 好! 就睇下邊個死先!"
 
我擔心緊......我係咪激起一隻沉睡左隻獅子。
 
『依家點做好?』阿Sam問。
 
我吞了吞口水，將內心不安既感覺盡量收埋 :『我地都去開會吧，黎近下星期質詢日都要準備一下。』
 
望住阿風既背影，總覺得今次我所做既野將會付出沉重代價。
 
係會議室內。
 
『下星期質詢日同上次政剛發佈會唔同，上次學生所出作既提問都被局限係政剛事宜，而今次將會完全開放所有問題，到時我地回應將會更加困難，隨時比人問一D針對性，難堪既問題，大家都要有一個心理準備。』我說。
 
『你覺得我地會被問咩問題? 等我地可以去準備一下。』阿雪問。
 
『應該都係共青團既野。』當我講左依句說話後，我不禁望一望阿Sam，始終佢係共青團既成員，聽日佢應該成為戰靶，而且更可能連累我地。
 
『我會講明自己同共青團係劃界線。』阿Sam說。
 
『嗯，到時侯我地會撐你。』
 
『完左依個質詢日，好快就會正式投票，我地選唔選到學生會就睇依一次。』阿龍說。
 
『總之我地讀熟自己政剛，留意一下民主牆最新近況就得。』
 
『講起民主牆，你估阿風佢地會點反擊?』莊員問。
 
『我都唔知，我總覺得......』正當我想講出內心上既不安時侯，但為左怕莊員之間會後悔咁樣做之外，仲可能會打擊佢地士氣，於是我都係決定唔講。
 
『總之大家團結D，係好又好，係衰又好，都係短短一個月內既事，好快完結。』
 
開完會後，大家各自各做自己野，而我再一次望住阿龍同阿雪拖住手離去，阿言亦都問我返唔返Hall，個情境就好似琴晚咁，日日如是，就好似機械式咁生活，除左莊務上有點激情外，其他感情生活仍然一片空白。
 
係返HAll個段垃圾時間，我又拎起手提睇，阿靜仍然無叫我，其他人都無叫我，Whatsapp好似荒廢左一樣。我禁阿雪既Whatsapp睇，發現佢個頭像加左張相，係一張同阿龍好親密既相，以往阿雪都係用舊式手提，玩Sms時侯，都只係顯示佢個名，如今佢換左智能手機，開始玩Whatsapp，都順便加張頭像落去，我又禁一下阿龍既Whatsapp頭像，亦都係同阿雪一張親密既相，我係到諗，當阿龍同阿雪傾緊Whatsapp時，望住對方既頭像，講下Sweet既說話，Whatsapp內既文字唔再係冷冰冰，而係有感情，令人感到窩心。
 
 
我除左暗嘆之外，都無咩可以做。阿靜依然唔叫我，我又唔想成日自己主動搵佢，好似我求佢同我對話，但明明自己好想同佢傾計。最後我都係忍唔住叫佢
 
阿明:
做緊咩?
 
阿靜:
nothing la
 
阿明:
不如傾下計@@" (我盡量打D符號出黎，等關係無咁冷淡。)
 
阿靜:
ok
 
阿明:
其實真係好耐無同你傾下大家既近況，你最近點?
 
阿靜:
ok la
 
阿明:
哦....我最近就好唔得閒= ="
 
阿靜:
選學生會呀嘛
 
阿明:
係呀 黎近就係con day，要準備
 
阿靜:
+ oil la
 
阿明:
thx ^^
 
此後，等左好耐，阿靜都無回應，佢係咪以為咁就end左我地之間既對話? 而佢所打既字都已經冷淡到無得再冷淡，就好似一副唔想同我傾但唔想得失我，唯有應下幾隻字求其打發下我既態度。我唔知係咪我鍚左佢一淡而造成今日既局面，但我都唔認為我只係鍚佢一淡我地之間關係就變成咁，定係因為我當初受傷，佢先著緊我? 搵返我? 依家我好返，佢又再一次回復返之前大家唔搵大家既關係嗎?
 
返到Hall，開住部Notebook，上下高登，睇下youtube，亂咁上下網打發一下時間，真係好悶。當我上facebook時，又忍唔住禁下阿靜既facebook，睇下佢最新近況，當見佢更新status時，都即刻禁一禁個"like",一年前，阿靜玩facebook打Status出黎係無人回應同like，只有我會回應佢，比D鼓勵佢，同埋會比like佢，整個Facebook都係我既like，令我既like顯得特別突出同重要。
 
如今阿靜求其打句 "好累呀><點解咁多野做!! " ，閒閒地都有五十幾個like，我個like已經被淹沒係一堆狗公之中，定係話我已經成為狗公既其中一份子呢? 以往我既鼓勵加油既說話已經被數十個狗公copy and paste咁打哂係阿靜個Facebook到，我個加油說話只會當成狗公。
 
只係短短一年間，就好似發生左好多事咁，大家既關係都改變左好多。雖然中間兜兜轉轉，出現過阿雪，但其實打從心底上，我個心仍然偏向阿靜，始終我認識阿靜好長時間。
 
晚上沖完涼，見到Roomrate係到同佢條女傾電話，而我就呆呆坐係張床到唔知做咩好，內心既寂莫又湧現，拎起手提再望一望阿靜，忍唔住再聊佢傾計。但無理由次次都係用同一個開埸白"做緊咩"去叫佢，以前都可以藉口問功課依D On9藉口，依家都唔知可以用咩開埸白去叫佢。
 
阿明:
l miss you so much
 
唔知係咪夜晚關係，定係我真係好寂莫，定係我真係好掛住以前既阿靜，我忍唔住打左一句算有曖味意思既文字出黎，我真係唔想再有冷冰冰既字去回應我。
 
阿靜:
haha what happen ah?
 
阿明:
自從上左大學之後，我地好似唔同左咁。
 
阿靜:
咩唔同?
 
阿明:
你覺得呢?
 
阿靜:
下??我點知你呀!O!
 
阿明:
好似好陌生
 
阿明:
=[
 
阿靜:
how come !O!
 
阿靜:
im still me
 
阿明:
可能我好耐無搵你......正常既
 
阿靜:
haha
 
阿靜:
ok la busy ma
 
 
阿明:
what are you doing now?
 
阿靜:
going mk
 
阿明:
oh......Sing k?
 
阿靜:
No la
 
阿靜:
movie je
 
阿明:
ic......
 
望一望手提個時間，已經係夜晚11點幾，阿靜咁夜仲出去睇電影? 同邊個睇電影? 唔知點解我個腦海只係想像到一個人- 阿風。 我對於阿靜既回應實在無可奈何，我係咪應該收皮，以往我捉弄阿靜，一直食住佢，如今佢既冷言冷語，令我依家個心十五十六，究竟佢諗緊咩，以前既我一定好輕挑咁問阿靜" 睇電影?同邊個呀 哈哈!有人同你睇既咩?"
 
但依家既我，驚頭驚尾，連問佢同邊個去睇電影都唔敢膽，我係唔敢問定係唔想知個答案呢? 我好怕阿靜會答佢同阿風去睇，我接受唔到依個答案，但我又好想知佢同邊個去睇.....唉。我發覺我愈對阿靜有顧忌，我就愈清楚自己真係對阿靜愈黎愈有感覺，我成日忍唔住打開Whatsapp睇下我地之前既對話，係到回味，更會成日留意阿靜既上線時間，一時之間，成個腦都係阿靜，阿靜，阿靜.......
 
第二日，我同班莊員再一次開會。
 
『唉呀!真係好煩呀!』
 
由於我地係食飯時間開，所以決定一路食一路開會一路傾下閒計。
 
『咩呀靚女，做咩咁煩呀?』阿Sam問。
 
『有個男仔成日都聊我講野，堅煩囉!』
 
『點聊你講野呀?』
 
『佢係我做Project個陣識既，開頭大家梗係Friend架啦，得閒傾下Whatsapp咁囉! 依家做完Project，佢仲成日搵我，又講埋哂D無聊野，我勁唔想應佢囉!』那位莊員個表情顯示出佢真係好討厭個位男仔，點解我咁講，因為好多女仔都好鐘意哂命自己有幾多人追，明明呻緊苦都可以暗爽緊，擺明曲線哂命。但依位莊員明顯地唔係曲線，而係直線屌柒個位男仔。
 
大家都被依件事吸引住，紛紛加入討論:『喂喂!有冇佢個樣睇下呀? 睇下佢Facebook啦!』
 
之後個位莊員就用手提開Facebook，將個位男仔既樣顯示出黎，各莊員都紛紛搶住部手機黎睇下依個小狗公個樣。
 
『嘩屌! 個樣好毒呀!』
 
『哈哈!你今鋪奶屎上身啦!』
 
『唉也!你地唔好再講啦! 我突然間覺得好嘔心呀!』
 
Whatsapp提示響起，我即時禁一禁手提個螢幕睇下，會唔會係阿靜呢? 點知原來係個位莊員響起。
 
『唉呀!佢又黎啦!』
 
阿Sam拎左佢部手機睇:『睇過睇過! " Hi，做緊咩呀? 開緊會?" 人地問你做緊咩呀!』
 
『救命呀!』個位莊員都沒好氣咁講落去，就順勢攤左係張枱到。
 
嗯? 做緊咩?
 
依D開埸白咁似我平日所做既? 咩原來咁問人，係女仔眼中係咁煩架? 阿靜會唔會都有同一個諗法呢? 佢會唔會好似個位莊員咁，極度唔想理我應我，拎住個手提係到同班FD呻苦呢? 冷冷冰冰既回應，字數十隻手眼都可以數得到既回應，一直成個狗公咁聊佢既我，突然間覺得自己好低賤，
 
好樣衰，好自卑。我會唔會被阿靜討厭呢? 點解我不知不覺間對住阿靜變得咁軟弱，驚前驚後既人? 最重要既係......我好想同阿靜傾計，唔傾計我會好唔安樂，我每一分每一秒都想知道阿靜做緊咩，好想佢知道有我既存在，好想變返以前咁咩都會講咩都會玩既關係，我不知不覺間依賴左阿靜......定係因為無左阿雪而想搵返阿靜呢?
 
我好亂，真係好亂。
 
『既然佢咁淋你，收佢做兵啦!』阿Sam大叫。
 
『係啦!依D小毒撚一於收佢做兵啦!』
 
『哈哈哈哈哈!』面對住莊員一班起哄歡呼聲，我既內心更加不安。
 
『咔嚓!』
 
突然間，會議室內既燈全部關掉，由於會議室係地下室既關係，所以無任何窗口。係無陽光照射下，室內一片黑暗，正當我開口想問發生咩事時。已經傳出班莊員既歌聲:
 
"恭祝你福壽與天齊～慶賀你生辰快樂～年年都有今日～歲歲都有今朝～恭喜你！恭喜你！”
 
接著，燈光開返，只見幾個莊員係門口慢慢捧個蛋糕過黎，我可以好清楚咁睇到蛋糕上既署名”To 我地偉大既學生會會長劉啟明" ，我腦海即時九秒九Load一下究竟發生咩事，不過弱智既都知道佢地係幫我慶祝生日，原來人真係可以唔記得幾時生日，以前睇電視，電影見D人成日唔記得生日，之後D人幫佢慶祝個陣，仲扮哂驚訝咁講 " 下! 咩原來今日係我生日呀!我竟然唔記得左!"
 
屌，原來真係可以唔記得，我完全無印象我今日生日......睇黎最近太多事發生，都令我諗唔起我生日日子，咦.......咪住先，雖然我唔記得我生日姐，但我記得生日日期架嘛，好似係聽日而唔係今日......唔通班莊員攪錯左? 都係算吧，無謂掃大家興。
 
正當我開口想講多謝大家既時侯，班莊員一見我開口就即刻唱" Happy birthday to you~ happy birthday to you~ happy birthday to 劉啟明~happy birthday to uuuuuuuu"
 
"wowowowowowowow"
 
"生日快樂呀!!!會長!!!"
 
個刻見到有莊員拍片，記錄低依一刻，加上見到班莊員幫我慶祝，同埋重點係"偉大既學生會會長"，令我個心突然酸左一酸。大半個月前，我仲係到自暴自棄，唔理莊務，沉迷阿雪件事，連政剛發佈會都可以唔出聲，而且係莊務上仲同班莊員有分歧，估唔到依一刻佢地幫我慶祝生日，從佢地眼中同表情可以見到，佢地係發自真心幫我慶祝。
 
我企起身，彎一彎身說一聲:『多謝大家，真係......多謝大家。』
 
『你應該要多謝阿雪呀! 係佢記得你既生日，提我地要準備訂蛋糕架!哈哈!』阿Sam說。
 
我望一望阿雪，只見阿雪微笑說一聲:『生日快樂，阿明。』
 
『多謝你......阿雪。』
 
『不過呢! 今日就唔係你正日黎! 我地知架! 唔好當我地傻仔呀! 我地估你聽日應該約左人慶祝，我地聽日又唔洗開會，咁岩今日又齊人所以幫你預早慶祝生日!』阿龍說。
 
其實我真係唔記得我生日，所以更加唔會約左人慶祝，而且.......我都諗唔到生日有邊個同我慶祝。每年都係求求其其咁慶祝，反正我都唔係幾重視生日，同范威佢地食下飯就算，不過今年生日，好似無咩聲氣咁，可能范威佢地都唔記得左我生日。
 
『唔好講咁多! 快D過黎許願吹蠟燭!』莊員叫。
 
我慢慢行去蛋糕面前，許願!? 突然問我有咩願望，一時之間諗唔起，而腦海只係得一個人，阿靜。於是我就行去蛋糕面前，閉上眼向蛋糕之神許左一個願望" 希望可以同到心愛既人起碼一齊。"
 
我突登用"心愛既人"而唔講"阿靜"，係因為我都唔知阿靜係唔係我真真正正鐘意既人，或許將來有更加心愛既人出現吧?
 
張開眼後，見到身邊既莊員都在我身旁閉上眼許願。
 
『丫......你班友仔，成班過黎搶願!』我笑笑口說。
 
『順手姐! 咪咁孤寒啦!』阿Sam閉住眼說。
 
見到班友仔咁樣，不禁令我真心笑左出黎。
 
食完蛋糕後，大家既心情都被生日既氣氛所影響，都無咩認真咁去開會傾計，之後索性唔鬼開，大家開開心心吹下水食下零食就散Band。
 
離開時，阿言問:『阿明! 你聽晚諗住去邊到慶祝呀?』
 
頭先對住成班人實在唔敢講我無人約同無節目，總覺得好似好"淤"既事，但見到阿言問，對住佢反而無咩避忌，就如實回答:『丫......暫時未諗到丫。到時先算吧。』
 
阿言呆呆地望住我，大概佢都估唔到我竟然生日都無人同我慶祝既小毒撚。
 
 
返到班房上堂，未入去班房前，我有一個唔知點解會有既期待，我期待班同學仔會係我入門口時就會大叫" 劉啟明!生日快樂呀!"，因為聽日唔洗上堂，所以要同我講生日就最好係依堂到。但入到班房後，無咩特別事發生，一切如舊。或許大學既朋友真係唔會有大太深交，同班莊員玩得埋都係因為大家一齊上莊，其他同學仔就真係同學仔，隨左見面時打聲招呼外，都無咩特別關係。
 
上堂時，我拎部手機打開Whatsapp隨意掃左一下，其實依個動作我基本上日日都會做，明知道無人會叫我，明知道無咩可以傾得計既人係到，我都依然打開Whatsapp係到睇......我開始慢慢發覺，我真係無咩真心朋友，范威阿仁佢地雖然係兄弟，但聯絡愈黎愈少，始終大家圈子唔同，阿龍阿Sam佢地雖然外來人睇我地好似四大才子咁，但事實上我地又唔係真係咁老友。唉，估唔到我劉啟明都有無朋友既一日。
 
而且我仲係到期待阿靜會唔會有所表示，連阿雪都咁有心機同我慶祝，我諗阿靜都應該有呀?
 
返到Hall後，沖完涼開住電腦，又重覆返每日既事，人地就返工放工返屋企上網，我就返學放學返Hall上網，日日如事，生活Dry到地裂。上Facebook睇下睇，諗起仲有幾個鐘頭就十二點，到時Facebook就會顯示我生日，就算無人記得我生日，到時全世界都知我既生日，我既WALL就會排山倒海咁接受好多人既祝福。
 
但係......佢真係真心同我講生日快樂嗎? 如果Facebook無顯示時侯，仲會唔會有人記得我生日? 我不由自主咁禁一禁我Facebook，再按入去基本資料，見到寫住出生日期，旁邊有個制可以設定"公開"，"朋友"，"只有自己"，我好想禁"只有自己"依個設定，到時Facebook就唔會顯示我生日日期，我就可以真真正正知道邊個係我既朋友，一個記得我生日既朋友。
 
不知不覺間，時間到達11點55分，我一直都係到猶豫，好唔好咁做。直到十二點，我最後都無咁做，我唔知道自己係想見到朋友仔同我講聲生日快樂，定係唔敢面對個WALL空空如也既情況。我諗我都係無勇氣去面對無朋友記得我生日依個殘酷現實，講到底，我都好重視"存在感"，只有顯示生日，D人先會發覺我存在吧?
 
果然，成個WALL都比人洗板，好明顯個個都係到Copy and paste" 生日快樂呀^^"。
 
哈.....劉啟明，估唔到你對依D野咁上心。
 
關上電腦，暗嘆一句後就去訓。雖然生日，但我心情卻好沉重。或許今日我應該許願"希望可以搵到一班真心朋友"吧?!
 
 
直到第二日，起床時見到Whatsapp有好多個MSG，當中仲有阿靜既msg，我就即刻打開黎睇
 
阿靜:
生日快樂呀!聽晚我地成班中同都會出黎同你慶祝，你無約人架可?
 
我即刻回應
 
阿明:
無約人呀 哈哈!好呀! 今晚我會到!
 
 
阿靜:
起左身拿? 哈哈! 壽星仔! 今晚8點係旺角中心唱k浦飛!
 
或許今日係我生日既關係，阿靜係既回應字數同語氣都比平日多同溫和。雖然明知依個係假象，但我內心仍然暗爽緊。
 
阿明:
岩岩起左! 好呀! 到時見!
 
果然，我地既對話就咁END左，都話係假象......唉，我究竟點先可以同阿靜關係變返以前咁? 我究竟應該點做? 一直咁樣落去，我真係唔知可以做d咩，我除左每晚R話題同藉口去叫佢，我真係唔知可以做d咩......
 
**************************************************************