《我將一位宅女變成女神，然後再將自己變成佢隻兵》: 下集 (4)

過左幾日，我潛足幾日水，但今日我唔可以再潛水，因為今日係政綱發佈日，將會面對全校中大學生既提問，作為會長既我，必須同莊員一齊出席，而阿風都會帶住佢地班莊員一齊出席。
 
當我對住塊鏡整理一下衣著，依套Suit好岩身，可惜我既樣同精神都配唔上依套Suit，唉........
琴晚成晚無訓，因為自己從來未試過面對咁多人既提問，攪到好緊張，係到狂睇熟自己份政綱，務求準備好。不過琴晚一路睇既時侯，覺得有點浪費時間，仲咁上心做咩? 我究竟係為左自己聽日既面子定係真正幫支莊呢?
 
當我到達會埸時，學生人數比我預期中少得多，阿風同班莊員已經係台上坐好，從佢地既樣可以睇得出佢地充滿自信。當我再望望周圍，見到我班莊員係到圍住傾計。而我.......依一刻竟然唔敢行埋去。
 
『我地一定要加油!!知唔知呀!!!』阿龍大叫。
 
『係!!!!!!!靜變靜變靜變Sure win!!!!』接著班莊員各人都伸手出黎邊叫邊放手，埸面好熱血同鼓勵。




 
而我卻孤獨一個企埋格離，內心一陣心酸味道.....再加點無奈。
 
阿雪見到我了，行過黎同我講 :『你都要加油，一陣睇你。』
 
『嗯.......』
 
接著，評委員班人就叫我地上台準備連續幾小時既質詢。當我坐係莊員既中間時，感受到莊員對我既不信任，感受到佢地既白眼，我好似一個唔合群犯眾既人咁，身旁只有阿言佢地支持我，但阿龍已經對我好有意見，開始對我有d微言，再望一望出面，好多學生準備提問，內心真係好緊張。
 
政綱發佈會正式開始




 
『新新傳，學生陳志風，學生編號3245 53221，想問一下侯選內閣靜變。 你地支莊依個星期係咁比人批評，但你地支莊竟然完全無回應，你地係咪默認所批評既事實!!!如果係事實既!! 你地仲有咩資格出黎選?』
 
評委員班人聽到後即時發言: 『學生陳志風，學生編號3245 53221，你所發問既內容唔係今日既主題，請重新發問。』
 
『好，我再問過，新新傳，學生陳志風，學生編號3245 53221。你地政綱提到反對政府起高鐵，仲想組織中大學生以中大名義去反對，我想問你地憑咩代表我地中大學生? 』
 
評委員班人:『請第四十屆香港中文大學學生會幹事會候選內閣靜變回應。』
 
聽到問題後，莊員們你眼望我眼，係到諗緊點答同埋由邊個去回應。我內心好想佢地叫我去答，或者哄我去答，我可以以一個英雄式既姿態去幫佢地，但之後嬴返莊員們既掌聲。




 
但佢地完全無視左我，圍內傾但從來無問我意見。由於時間只可以諗數十秒，最後阿雪去回應
 
『第四十屆香港中文大學學生會幹事會候選內閣靜變秘書/內務秘書 黃小雪，由於起高鐵方案，政府從來無回應同處理點樣解決一地兩儉問題，加上六百幾億費用，當中既外判同預算透明度好低，我地根本唔知道依六百幾億何去何從，而強行清拆菜園村......當中既不合理賠償更令人髮指，作為大學生既我地，好應該為依個方案作出回應。』阿雪說。
 
『新新傳，學生陳志風，學生編號3245 53221，你無回應我既問題，我係問你地點解可以代表中大去反對方案? 只係你地覺得依個方案有問題，但唔代表所有中大學生同意你，如果你選到學生會就可以蓋住所有讚成方案既異見聲音咩? 係咪代表你選到既話!!!你地會無視學生既意見同訴求!!!』
 
個位學生講完後，現埸即時起哄，仲有人拍手支持。好明顯班學生衝住我地黎，藉機會黎中傷我地支莊，此舉令到阿雪都開始亂了陣腳了。
 
評委員班人:『請第四十屆香港中文大學學生會幹事會候選內閣靜變回應。』
 
『第四十屆香港中文大學學生會幹事會候選內閣靜變副會長陳文樂......我地絕對重視學生既意見同訴求，我地都會聽大家既意見，但我地知道總有學生意見不一，但我唔可能做到所有同學都有共識先出行動。』阿Sam說。
 
聽到阿Sam既回應，我心知不妙，點可以咁樣去回應人，成句說話都係弱點，實比人插到暈。
 




『新新傳，學生陳志風，學生編號3245 53221。咩話? 既然你知道意見不一，你仲要以中大名義出行動? 你咁做同一意孤行同埋打壓異見學生有咩分別!!!你選到學生會既話，我地仲有得發聲咩? 你同獨裁有咩分別呀? 』
 
現埸再一次起哄，莊員即時細細聲問大家:『點呀....點回應佢好?』
 
『唉，我都唔知。』
 
我望望阿Sam既樣，佢都無奈了。成支莊開始亂了。
 
評委員班人:『請第四十屆香港中文大學學生會幹事會候選內閣靜變回應。』
 
『第四十屆香港中文大學學生會幹事會候選內閣靜變副會長陳文樂...我地會接受大家既意見。』
 
現埸再一次傳出噓聲同埋 " 咁叫答左拿? "既說話。
 
評委員班人:『請第二位同學發問問題。』




 
『崇政政，學生李德康，學生編號3375 32412。我想問靜變，你地既立埸係親共定係反共!』
 
評委員班人聽到後即時發言: 『學生李德康，學生編號3375 32412，你所發問既內容唔係今日既主題，請重新發問。』
 
『唔係! 依條問題好重要!!因為我收到可靠消息!!靜變支莊入面有親共學生!!!有人係共青團成員!!一個親共既學生會!!我地係唔接受呀!!!』
 
現埸起哄更大聲，各人都紛紛報以噓聲。連我都感到大驚，我地莊有人係共青團? 咩事? 係阿風佢地屈我定係事實? 我即時望一望莊員，各人都唔知道發生咩事，更加唔知共青團究竟係咩。
 
『佢究竟講緊咩?』阿龍問。
 
『共青團即係中國共產主義青年團.......但我地點會有人係?』阿雪說。
 
" 回應! 回應! 回應! 回應!"
 




全埸都大叫住口號，要求我地快d回應問題，而評委員班人都因情況而淮許發問 :『請第四十屆香港中文大學學生會幹事會候選內閣靜變回應。』
 
我知事態嚴重，依句說話影響巨大，隨時令到我地支莊一獲炒起，永不番身。我都忍唔住出聲問:『你地究竟有冇人係共青團? 如果真係既，千其唔好去認........』我話未說話。
 
『第四十屆香港中文大學學生會幹事會候選內閣靜變副會長陳文樂.....同學所問既問題，我要作出回應，我地莊的確係有共青團，而該名莊員就係我。』
 
現埸噓聲更大，近乎失控，現埸學生即時大叫口號" 退選!退選!退選!
 
更有人大叫 "中共滲透呀!!!" " 食屎啦共產黨"!!!!!
 
我望住阿Sam，我驚訝得目瞪口呆，連把聲都開始震了 : 『阿Sam.....你.....講緊咩......』
 
評委員:『請現埸學生盡量唔好咁大聲，否則活動就唔可以進行!』
 
阿Sam坐低之後，身邊既莊員即時忍唔住問 : 『你係共青團? 你攪咩呀?』




 
阿Sam回應:『我無諗過有人會知! 同埋我都唔係同共青團咁有關係咋!』
 
我都忍唔住問: 『就算係......你都唔應該係依個時侯認!!你知唔知咁做好大獲架!』
 
阿Sam一直望住前面無回應我地，只係話: 『唔講都講左，我都無辨法!』
 
『你咁做好不負責任.......』我說。
 
『我不負責任? 咁你呢? 你有資格話我咩?』
 
『...........』
 
『崇政政，學生李德康，學生編號3375 32412。既然靜變有莊員係同中共有關!!我地仲會投你票咩? 』
 
評委員:『學生李德康，學生編號3375 32412。同學所問既問題唔係屬於政綱提問。』
 
『崇政政，學生李德康，學生編號3375 32412。靜變會長! 我要你親口講出!你係外務方面，你支持定唔支持平反六四!』
 
評委員班人:『請第四十屆香港中文大學學生會幹事會候選內閣靜變回應。』
 
由於依條問題佢指名要我答，身邊既莊員都望住我，睇黎我要親口回應。對於依個問題，一定要答支持，如果唔係我以後唔洗再出黎見人，而我本人亦都支持平反六四，但我理解到，同學都知道我一定會答平反六四，佢只係想我講出依句作日後證據，廢事到時我走數。
 
『第四十屆香港中文大學學生會幹事會候選內閣靜變會長劉啟明，我本人同埋代表靜變等人，包括副會乎長陳文樂，都支持平反六四。』我故意提及阿Sam個名，盡量將現埸人士情緒降溫。
 
接住落去既問答大會，佔左八成既學生提問都係針對住我地支莊，加上阿Sam自認左係共青團之後，反靜變情緒愈演愈烈，每當阿Sam回應時，現埸既人都大叫"共狗"! 退選!" ，令到我地相當難堪，今次我地真係輸哂了。而我今次覺得輸既原因唔係文宣戰，而係阿Sam個句說話，自認共青團係死罪......做成巨大影響
 
***********************************************************************
 
返到會議室開會，我已經忍唔住開阿Sam波 :『你要好好解釋一下點解你係共青團! 你知唔知我地比你害死呀! 點解你唔一早同我地講呀?』
 
『我講左啦! 我加入係好耐之前既事，我都無咩相關接觸架啦! 我點知有人爆出黎姐!』
 
『你係有心唔講定係真係唔知呀?』我個心已經開始懷疑阿Sam。
 
『你咁講咩意思? 你姐係話我突登整死依支莊姐!?』
 
『算啦!唔好嘈! 都發生左既事都無得改變! 我地傾下跟住應該點做仲好啦!』阿龍說。
 
『仲傾落去? 如果佢係有心咁做，我地之後所做既野都係白費! 佢根本有心整死我地支莊!』
 
『你講咩撚野呀!』
 
『我話你害死我地呀!』
 
『屌你老母!』阿Sam衝向我到，意圖想郁手打我，但佢一行過黎，阿龍同阿言佢地就拉開左阿Sam。而阿雪都拉開左我。
 
『夠啦! 唔好再嘈啦!』阿雪說。
 
『你個仆街! 你有咩資格話我呀! 攪死支莊既人係你呀! 劉啟明!』阿Sam指住我說。
 
『阿Sam講得岩! 真正攪死我地既人係你呀!』有莊員說。
 
『我攪死? 我只係無理到莊務一陣姐? 點攪死呀? 阿Sam自認共青團就等於同所有中大學生講"我係共產黨!唔好投我呀!" 有咩分別呀? 你知唔知依件事一定會上報紙，到時大大隻標題寫住中大學生會有中共滲透，唔單止影響支莊! 仲影響到我地架!』
 
『你收聲啦! 我地當初本來都諗住輸架啦! 我地邊個會覺得會嬴? 我地享受過程! 但你就係破壞我地感情!』
 
『你.........』
 
『我地都覺得你無資格話阿Sam! 如果阿Sam唔認既話，之後比人踢爆反而更加衰! 你唔應該再話佢!』
 
我完全估唔到莊員一致覺得阿Sam無問題，個問題係出自係我身上，一時之間所有莊員將谷埋谷埋既怨氣一次過發洩係我身上，令我無法應對。阿雪見情況咁樣，就行埋我身邊說 :『阿明!夠啦!唔好再講.....』
 
阿雪咁講我愈係要講 :『我無對唔住莊既事! 但你地知唔知阿Sam個句就真係玩死我地啦!』
 
阿雪更激動地 細細同我講 :『夠啦!!!!唔好再講呀!!』
 
『係你要同個個阿風鬥先叫我地組莊!!我地根本無諗過會嬴! 輸咪輸囉! 玩咩死我地姐!』
 
『原來你地根本致在參與.....咁OK啦! 大家無諗過要嬴! 咁我地仲做落去有咩意思!』
 
『夠啦!!!!!!!!!!!』阿雪大叫。所有人同我都驚訝，都收左聲。因為我地從來無見過阿雪咁大聲講野，我地都見到佢面都紅哂，就知事態嚴重，都閉上口。
 
『唔講都講左，我地傾落去無意思! 我地仲有Con day!姐係質詢日，我地仲有機會反勝!』阿雪說。
 
我覺得阿雪太天真，依家根本就真係輸哂，依件事聽日民主牆一定被人無限發大黎講....我覺得既然莊員都覺得無問題，我再講落去真係無意思，我都覺得我唔需要再留低開會，於是就收恰野就離開左。
 
一路搭住車返屋企，一路望住窗外既景色，係到諗之後落黎應該點做，我開始諗下自己係咪過份睇重勝負，正如莊員所講，我地係重過程而唔係結果，輸係我地意料中事，反而係我唔係咁諗，我要嬴係為左支莊定係要同阿風鬥? 我相信我係後者，我知道的，但我唔甘心就咁拱手相讓左比阿風。不過佢地講得岩，我放棄左支莊先，係我唔要佢地先，如今我要出聲要埋怨人根本就無恥行為。
 
Sms鈴聲響起:
 
阿雪:
你點呀? 冇野呀嘛?
 
阿明:
無
 
阿雪:
振作D!! 我知你無放棄到支莊架! 如果你唔上心，你根本唔會咁激氣!
 
對住阿雪依番說話，突然間有陣悔意出黎，自表白後都已經過左個幾月，我一直都懶懶散散咁，為左唔想面對阿雪，不知不覺間自暴自棄，經常都講出一D 唔係發自內心既說話，一D違背自己良心既說話，我唔知點解要咁做，但我控制唔到。
 
阿明:
算啦，再講落去都無意思，見步行步吧
 
阿雪:
咁暫時唔好再講依D吧
 
阿明:
嗯
 
正當我以為講完後，想收返部電話落褲袋時，阿雪又再Send過黎
 
阿雪:
其實我有D說話想同你講......不過唔知你感唔感覺到=_=
 
依句說話突然間令我覺得好不安，個心即時嚇左一嚇，阿雪想講咩? 會唔會關表白事? 我感覺D咩? 係咪阿雪當晚口中所講既"感覺"呢?
 
阿明:
你想講咩?
 
阿雪:
你sense 唔sense到我同阿龍啊@@
我同佢一齊左..我唔想公開..但好似同你講聲好點
 
我望住個手提螢幕呆左.........阿雪同阿龍一齊左? 點解會咁? 個一刻我腳都軟埋，我完全接受唔到依件事。阿龍.....? 我上個月表白個陣，阿雪應該未同阿龍一齊，姐係佢同阿龍一齊係依個月既事，咩料.....短短一個月就一齊左?..... 阿龍只係用左一個月時間就追到阿雪? 佢地之前根本就無咩交流....阿龍唔係追緊第二個女仔咩? 點解會追阿雪?
 
突然間腦海一閃，諗起當日同阿言佢地食lunch，阿龍曾經講左一句 "
 
『你個死仔! 日日都講到阿雪好似天上有，地下無! 講到我對阿雪都心思思! 不如我都去追佢!』阿龍說。
 
『你要追我無所謂架! 公平競爭! 不過阿雪呢~同你就....哈哈! 好有出入囉! 我同佢既關係依家簡直就係完美!』我自豪地說。 "
 
原來個陣.....阿龍已經開始想追阿雪，我竟然完全sense唔到依樣野，我更加估唔到阿龍真係會去追阿雪，但阿龍唔係追緊第二個女仔咩? 追唔到就轉追阿雪? 咁佢係真心鐘意阿雪定係為媾而媾咋? 但阿雪竟然會答應佢? 我亂了，我完全亂了。我一直以來都無放阿龍係競爭對手.......但原來佢......唉.....佢唔係知我鐘意阿雪咩? 點解仲要同我搶? 雖然話公平競爭，但明知我追緊阿雪.......大家又係兄弟......真係可以咁做咩?
 
突然間覺得好似比人出賣左既感覺.......丫.......咪住.....阿雪會唔會講左阿龍講我對佢表白過? 阿龍會唔會知...? 唉......咩都無......兄弟.....阿Sam係咁，阿龍又係咁，兄弟!? 咁叫兄弟咩!!
 
阿明:
..................
 
阿雪:
你打"....... "我唔知你諗咩
其實你呢排點..你依排又唔多講野咁
 
我已經唔知道點應阿雪，我接受唔到，我真係接受唔到，好想問阿雪佢知唔知阿龍係媾唔到第二個先媾你咋!!!點解一個月內可以追到阿雪，係咪真係有感覺就大哂? 我係咪比唔上阿龍? 唔知點解....隻眼開始紅，我竟然慢慢流下眼淚，但我完全唔覺得傷心，不過個心又真係好痛......我已經分唔清楚我係妒忌阿龍定係恨阿雪亂咁黎.......我真係好累，新一年......我就衰足咁耐，我究竟做錯D咩?
 
以後點面對阿雪同阿龍?
 
我諗起放完假返去開會個日，我好早就到左會議室，當時阿龍佢地問我對阿雪表左白未，我因為怕佢地問起我表白既事，所以呃佢地話我對阿雪無哂興趣。個陣阿龍既反應都信左，好明顯當時佢仲未同阿雪一齊，數返個時間，可能一個月都無阿龍就追到阿雪。唉
 
作為朋友，知道阿龍拍拖，我應該為佢高興，因為佢一直都好恨拍拖，之前追女仔追到咁頹，如今得到阿雪依個絕世好女仔，佢真係執到，同時間，我應該為佢得到幸福而高興。 我無嬲到阿龍，我係嬲自己，只係因為阿龍的確曾經對我講過佢想追阿雪，只係我當時認為佢講笑，加上佢對我一D威脅都無所以無理到，如果要嬲佢追阿雪，我又真係幾無恥，因為我根本唔係阿雪邊個，無資格阻止人追佢，更加無資格去怪人。
 
拎起手提睇，已經零晨五點幾，好快就天光，由九點幾攤係張床到諗野，竟然一D睡意都無。個腦無一刻係停止運作。
 
我係到諗，過去日子，我已經失去好多女仔，穎兒，阿靜，阿雪.....我更加發覺，凡係接近我既女仔，我都好易產生興趣，同時間，依班女仔都係因為我對佢地有興趣而慢慢離開我.....唔係，應該話係我離開佢地。當我知道穎兒有男朋友時，我即時反感，態度180度轉哂，無再理到穎兒，最後佢走左，到依家仲係下落不明，造成今日既局面係我劉啟明一手做成。
 
阿靜，一個同我由細玩到大既宅女，性格本來單純，一直都好聽我話，而我一直都好鐘意同佢傾計，雖然明知佢幫唔到，更加比唔到咩意見，但我都成日將每日發生既事話比佢知。後來自己幫阿靜既潛力發揮出黎，教佢上高登依個大染缸，阿靜由一張白紙慢慢染成一張....五顏六色既紙，就好似生活開始出現變化咁。就係因為生活出現左變化，我既重要性都慢慢下降，大家圈子唔同，加上我無正式追佢，更加因為阿風既出現，同佢關係慢慢變得好差，到左今日......我同阿靜既關係已經可有可無，造成今日既局面係我劉啟明一手做成。
 
阿雪，一個係高登識返黎既女仔，但佢從來唔多上高登，只係當初知道入中大，想搵同學仔而由Uwant論壇走過黎。一個性格好好，聰明，善解人意，唔港女，又靚既女仔，曾經令到我以為可以得到佢，到最後千算萬算，就係輸比兩隻字，感覺。本來一直好好朋友既我地，就係因為我既表白，就係因為我既幼稚，就係因為我既鬥氣心態，令到我同阿雪關係變得非常惡劣，而且自暴自棄既態度仲漫延開去，令到身邊既朋友，莊員都討厭我，當我意識到依個係一個愚蠢既行為時侯，已經發現返唔到轉頭，唯有繼續頂頸落去，鬥氣落去，造成今日既局面係我劉啟明一手做成。
 
短短一年內，已經有三位女仔因為我而離開我身邊，令我諗.....究竟男女之間有冇純友誼? 如果我無對依三位女仔產生感覺，一直都以禮相待，一直保持好朋友既心態去對佢地，我既生活係咪比依家更加開心同幸福? 我鐘意以上三位女仔，係因為我係佢地面前，可以做返我自己，唔洗顧忌D咩，對住佢地我好開心，就係正正因為咁，我先會鐘意佢地，搵女朋友唔係要搵一個岩自己既人咩? 點解搵岩時，但發覺只可以做好朋友而唔係男女朋友? 點解將關係提升多一步係咁困難 ? 點解班女仔明知大家都係開心都唔肯將關係更進一步提升? 係怕變成男女朋友後關係唔同? 但係.....變唔到男女朋友，關係唔係更加會變嗎?
 
天光了，依一晚我諗左好多野，製造左好多問題比自己，依幾個月黎發生左好多事，一時之間有點消化唔到。係今晚，係一個凍到入心入肺既天氣下，反而令我更加冷靜落黎諗下前因後果，我想通了。
 
我唔會再自暴自棄落去，當時係想得到阿雪注意同想令佢傷心先咁做，但既然佢已經同阿龍一齊，我就無必要再咁做去，反正唔會改變到D咩。至於班莊員，我會用行動去證明同挽回修補返大家既關係，我會全心全意咁去處理莊務，雖然爆出共青團件事，勝負早已分，但我都唔會放棄，至少我唔會令到阿風選到，我要中大學生對兩支莊都投不信任票，我要今年中大無學生會。
 
我要重新振作，我要做好自己，我要係阿雪面前證明自己係得，我係一個岩佢既人，佢唔揀我，係佢損失，我要令佢後悔當初點解唔揀，我要活得比佢好，我要好過阿龍，至少我....至少我要阿雪個腦到出現一個想法 " 早知當日揀阿明...."。
 
我起身落床沖涼，梳洗後，換上衫，就出門返學。我知道一陣落黎我將要面對一連串困難同難以估計既傷心，我唔知我捱唔捱到，我依一刻可以咁勇咁有精神咁有決心，但我唔知當我面對阿雪同阿龍時，我心情可以點。不過我係唔會放棄，絕對唔會。
 
係火車上，諗起琴日返到屋企之後，已經咩都唔想做了。一直沉默咁屈埋係間房入面，阿媽都覺得我最近好頹好無精神，但佢一直以為我係因為攪莊既事而煩，佢點都估唔到自己個仔竟然咁失敗，平時同佢地食飯一直都講笑話只有女追我，無我追女仔，阿媽知我性格好，一直都唔擔心我搵唔到女朋友，只係擔心搵唔搵到個好女朋友。但佢應該估唔到我搵到個好女仔，只係做唔到我既女朋友，都估唔到自己個仔係感情路上係咁失敗。
 
係阿媽個個年代，盲婚啞嫁，都唔知點解鐘意左我依家既老豆，更加無我地依個年代咁復雜，想一齊就一齊，想結婚就結婚，略過追女曖味既過程反而令佢地關係更加堅固。
 
望住火車上既窗外景色，腦海不知不覺咁諗起當晚同阿雪表白既情境，當時佢話 " 我唔可以因為你既好而同你一齊，只要有感覺，對方幾壞都好，我都鐘意。"
 
感覺.......究竟係女仔心目中，感覺係咩一回事? 感覺究竟點先可以製造出黎? 我最估唔到佢係對阿龍係有感覺。我唔甘心，我真係好唔甘心。我究竟輸左係邊? 追左阿雪幾個月，而阿龍只係追左一個月。可以令到阿雪開心既人係我，阿龍又可以咩? 佢連追女仔都無咩膽，當初仲要問我點追女仔，佢可以令到阿雪開心嗎 ?
 
我伸出隻手望一望，發覺手掌上有三條線，有人話三條線分別係感情線，事業線同埋生命線。但我不知不覺間將依三條線當成感情線，分別係穎兒，阿靜，阿雪。依三個女仔既經歷已經深深刻係我手掌中，永遠唔會消失。
 
我捱緊雙手，慢慢放係心內，諗起Eason首歌，人來人往其中一句歌詞 " 愛若難以放進手裡　何不將這雙手放進心裡 "
 
以往聽依首歌，一直都唔係好有感覺，但依一刻我終於明白依句歌詞既意思了。
 
返到中大，由於我太早返黎，班上既同學仔都未到，我唯有靜靜地坐係到等上堂。今日我坐左班上最高既位置，係依個角度望落去，坐住以往坐既座位，就諗起阿雪經常坐我格離，我地一齊上堂一齊吹水一齊玩，雖然阿言同阿龍都坐係我地身邊，但佢地既角色只係配角，主角始終都係我同阿雪。不過依堆情境明明係上個月既事，依家好似己經變成回憶。所謂既回憶，就係只可以回味當中既經歷而無得再次遇上。正所謂此情此景，如今不再，只有回憶......
 
望望個鐘，都差唔多要上堂。同學仔都一個一個咁返黎上堂，突然門外傳出巨大起哄聲。班上各人都望住門口方向，好想知發生咩事。
 
『wow! 你終於得左啦!!阿龍!!!』同學大叫。
 
『點解阿雪會鐘意你架!!你究竟點追佢架!!』
 
『嗚呀!!竟然比你搶先一步! 你就威啦!』
 
我聽到之後，大概已經知道發生咩事。阿龍慢慢走入班房，身邊好多男女同學圍住阿龍，唔講以為明星黎左。同學們圍住阿龍係咁問點解追到阿雪，又送上祝福比佢，我望到阿龍個樣，估唔到佢依一刻好怕羞，面都紅哂，阿雪又話唔想公開既? 睇黎阿龍忍唔住公開左，咁又難怪既.....拍拖係一件開心既事，當然忍唔住要同人分享。
 
原來拍拖係班上係一件咁哄動既事，大概對像係公認靚女又好女仔既阿雪，令到身邊既人都好驚訝，男仔們雖然葡萄得黎又會真心送上祝福。阿龍係遠處見到我，就慢慢行埋黎。
 
『嘩!阿明!你今日咁早既?唔似你喎!』阿龍問。
 
面對住阿龍，心入面有一種難以形容既感覺，我知道我依一刻真係好葡萄阿龍，我個心真係好酸，阿龍佢一開始係阿雪既對手上，我完全唔會將佢放係眼內，如其話唔放佢眼內，不如話完全唔知同唔會意識到有佢依個對手，但估唔到既係.....阿龍佢亳不留情，好恨心咁將我自己最鐘意既人搶走去。但我唔會再自暴自棄，更加唔可以去埋怨，於是我強顏歡笑咁回應佢: 『我都頹夠啦，係時侯重新上路!』
 
『琴日既事唔好放係心到，班莊員都係緊張件事先咁嬲，我地會一齊捱過佢!』阿龍說。
 
『希望係咁!』我笑笑口答。
 
突然又傳出更巨大既起哄，女主角終於出埸，阿雪返左黎。阿龍亦都起身行過去阿雪到，埸面好似結婚擺酒咁，新郎新娘係到招呼各位貴賓咁，望望阿雪既樣，好明顯佢唔係好慣面對依個埸面，個樣同阿龍一樣，面都紅埋，怕怕羞羞咁，真係一個幸福既新娘咁。
 
阿雪同阿龍向我既方向行黎，就算我坐係邊都好，佢地都會搵我，之後就會坐我身邊。但今次同以往有D唔同，就係我格離既座位從今日開始唔再係阿雪，而係阿龍。我唔知係阿龍無意中坐低定係阿雪既意思，但點都好，個一刻我意識到既係......有D野無左就無左，你改變唔到，只有無奈接受。
 
同們們勢都唔係放過佢地，於是行埋黎問:『阿雪! 你男朋友就唔肯同我地講咩事，我地放過佢! 但你呢!就唔可以啦! 快D講! 你地幾時開始既!』
 
『咳咳...拿拿拿! 我唔會比你地蝦我女朋友架!』阿龍一手搭住阿雪膊頭，慢慢將阿雪拉向自己身邊。
 
當我望到依個畫面時，個心一陣刺痛，阿龍......可以隨便就可以觸摸到阿雪既身體，可以感受到阿雪既體溫，當初我觸摸到阿雪既身體時，都令我開心左半日，估唔到阿龍竟然可以隨便就可以觸摸到阿雪......唉。
 
『喂呀!我地要上堂啦! 哈哈! 你就放過我地啦!』阿雪笑笑口答。
 
阿龍突然企上張桌大叫: 『各位! 就等我正式介紹! 黃小雪正式成為我既女朋友啦! 從今開始! 我會好好咁對佢! 比幸福佢! i love you!!!』
 
『WOW!!!!!!!!!!!!!!!!!!!!!!!!!!!!』同學們起哄更利害，簡直就震動左整個班房，同學們都好開心好熱情咁送上笑容同祝福，仲哼埋婚禮進行曲，登登登登...登登登登......
 
而我面對咁既情境時，我仍然笑住口，和應佢地，仲拍哂手跟埋佢地一齊哼住婚禮進行曲。雖然我面露笑容，但係我好清楚知道，我個心一直係到喊緊。我唔可以黑起塊面，我唔想令人有懷疑同知道我好心酸，我一直都扮哂開心......拎住個假面具，背住良心送上祝福。
 
起哄完後，大家都冷靜落黎正式上堂，但我腦入面一直都係一片空白，個心好痛，好想離開依個地方，但我唔可以，我唔可以再逃避，我只係一個Year1既學生，我仲地三年時間對住，可以避得幾時? 我曾經係到諗，我可能係發緊夢，又可能成件事都係阿雪自己諗出黎既計劃，佢一定係為左激起我鬥志先咁做，又或者佢一定係為左修補返關係，又或者令我正式對佢死心，又或者想得到我對佢既注意......又或者.....丫.....我竟然諗左好多好多既假設同藉口想無理化阿雪拍拖依件事，我咁諗係因為我希望整件事都有彎轉，可以改變。係啦......一定係假，拍拖依件事一定係假既! 阿龍同阿雪點會一個月內就一齊? 感覺大哂呀? 阿龍同阿雪根本就係兩個世界既人，阿龍份人又唔識講笑，又唔識追女仔，性格又急燥又成日大大聲聲咁，點會得到阿雪歡心? 無錯! 一定係假!
 
當我轉身想問阿龍時，我發現阿龍隻手係桌底到拖住阿雪隻手，再望望阿龍，佢將個頭慢慢伸去阿雪到，係阿雪既耳仔到細細聲講D野，之後阿雪就怕羞咁笑，外人睇落黎，佢地關係真係好sweet.....
 
我睇到依個畫面時，我之前一直諗既假設同理由一一消失哂，睇黎依件事係事實，一個無辨法可以改變既事實。我見到依個情境時，腳都軟埋，個心就好似一把刀一野插落我心入面，連透氣都有D困難，心跳得好快，好難受.......真係好難受，比我想像中仲難受十倍....廿倍....百倍......
 
一直坐係阿龍格離，成日都聽到阿龍同阿雪既對話，佢地對話之中帶點曖味，肉麻既說話，而我一一都聽到哂，但我忍住，我個樣唔可以有任何變化，我扮哂專心咁聽住Professor講書，扮哂專人咁抄低筆記，凡係有地方令人懷疑或者意識到我介意佢地既關係，我都一一迴避。
 
終於落堂，我恨不得想即時離開，我好辛苦，我戴住依副假面具係身，去強顏歡笑，去祝福佢地，去為佢地開心，我真係好辛苦同埋好累.....
 
『阿明! 去唔去食lunch? 食完之後去開會!』阿龍問。
 
『丫.....我約左人食，下次先吧，一陣我會去開會!』我回答。
 
『咁好啦! 咁我同阿雪去食，阿言個死仔又走左堂，你一陣得閒就提佢要開會!拜拜!』
 
『OK! 拜拜!』我再一次笑笑口咁回應。
 
而阿雪都以一個微笑黎拜別我。
 
我望住佢地背影，著眼點仍然望住佢地既開心笑容，一對新婚既夫婦，享受旁人既祝福時，更享受佢地之間岩岩拍拖既感覺，既Pure 又 True......
 
其實我無約到人去食飯，只係唔想再係佢地身邊而難受。嘿......估唔到平時我地坐埋一齊做Project既時侯，我地身份都係一樣，都係同學。係學生會會議上，我地身份都係一樣，都係莊員。但係依一刻開始，當我地坐埋一齊既時侯，我地除左係同學之外，我地大家都多左一個身份，佢地係情侶，而我......係一盞電燈膽。
 
廢事食飯比佢地撞到，我寧願唔食去餓住肚求其搵個地方去Hea，當我個肚咕咕聲響起時，覺得自己好折墮，竟然攪到自己咁，何苦呢? 但我知道我依一刻唔可以做到大大方方去接受佢地，對住佢地笑已經係我最大極限......
 
拎起手提無聊掃下Whatsapp張list，好想搵人R水吹Hea下時間，發覺無人可以搵到。依個時侯諗起當日知道穎兒有男朋友後，唔再理穎兒，但當苦悶緊既時侯，就會係Whatsapp到周圍睇下有冇人可以R到水吹，嘿.......我諗好多女神都收唔少兵，都係苦悶緊既時侯搵下D兵仔R下水吹，就好似等巴士期間，返屋企既途中，總之就係垃圾時間時，就會搵D無謂人吹下水。但係我一個都搵唔到，最後仍然得返我一個。
 
個一刻好想搵阿靜，但當我打開到阿靜既Whatsapp時，發現佢狀態顯示係"上線中" ，之後好快又"最後上線時間係 14:32 " ，之後又好快變返"上線中".....過程不斷重覆，好明顯佢同人Whatsapp緊，係阿風吧? 唉，我當阿靜係咩? 一件工具? 係我垃圾時間就想搵佢? 平時又唔見我搵?
 
但依一刻，我真係好想搵下阿靜，我已經無左穎兒同阿雪，我得返阿靜依個睇落好似仲有機會既人，但我覺得自己好似變左質咁，好似追唔到阿雪就想追阿靜咁， 我對感情既態度唔係一直以專一而引以為榮咩? 唉，我唔知，我就係知道，我真係好寂莫，寂莫真係好可怕。我就快比寂莫攪到個人好亂，好易亂諗野......
 
終於到左開會時間，唔洗再係到亂諗野，我慢慢行到去會議室，始終我一直都係到頹緊，係莊員眼中我同個賤人無咩分別，好討厭我，琴日仲同佢地嘈過黎，你話突然間嘻嘻哈哈圍喂威咁玩，我做到佢地都未必做到，心入面始終都係擔心，我就好似執返自己以前留落黎既蘇洲屎咁......依個就係自暴自棄既代價。
 
當入到會議室時，已經聽到一班莊員既起哄聲同笑聲，阿龍同阿雪又成為左佢地既討論對像。我入左去後，慢慢坐低，莊員都因為我既準時而有所驚訝，當見到我後，有左眼神接觸，佢地就點了頭，示意" 你好”! 之後就繼續捉住阿龍佢地黎問。
 
『死仔! 係到食竟然係到屙呀! 』莊員問。
 
『唔好講得咁難聽好喎! 莊員之間拍拖好正常姐! 哈哈!』阿龍答。
 
『我當初以為阿明同阿雪拍拖，之後感情有問題先嘈交! 丫! 原來唔係! 原來你先係阿雪男朋友!』有莊員竟然扯到去我身上，原來班莊員一直以為我同阿雪係拍緊拖，我之所以咁頹係因為我同阿雪關係出現問題，可能冷戰緊，估唔到佢地估中一半又估唔到另一半。
 
『哈哈! 我都以為阿明同阿雪拍拖呀! 』
 
『傻啦! 我邊有咁好福氣同阿雪拍拖呀!阿龍同阿雪都係好男人好女仔! 佢地先襯呀! 哈哈哈!』為左同班莊員打好關係，我都笑笑口加把咀落去，再一次戴上面具，講出一D違背自己意願既說話。
 
『WOW! 郎才女貌! 我地支莊既男神女神呀! 我地有喜事可以沖喜一下啦! WOW!』
 
阿雪都聽到唔好意思，塊面長期紅紅地，不時都用手蓋住自己個口係到笑，好可愛......
 
『多謝大家多謝大家! 哈哈! 』
 
阿言突然偷偷地同我講 :『喂，你個心點呀? 你之前唔係鐘意阿雪咩?』
 
阿言依句說話再一次令我感受到心入面既痛，我細細聲回應:『傻啦! 我話左我之後對佢無興趣!』
 
『係咩? 你真係咁諗?』
 
我唔再係到同阿言討論依個，因為我唔想比人聽到，於是我盡量壓低聲線去回應: 『其實阿雪麻麻地咋，我係媾都媾第二個啦! 咪再講啦! 廢事班人又估黎估去!』
 
估唔到我為左唔想比人懷疑，無啦啦可以中傷阿雪.....唉
 
係開會期間，大約都係講返政綱發佈會同埋阿Sam係共青團件事。
 
『係政綱發佈會到，我地好明顯比人針對住，可能係格離莊指使，又可能係因為依排民主牆種種針對住我地支莊既言論所影響，加上阿Sam佢......』當我講到阿Sam件事時，正想去埋怨同質問阿Sam時，突然睇到莊員既臉，令我覺得依個時侯唔應該咁做，阿Sam同班莊員關係好好，琴日都係因為我質問阿Sam而攪到同佢地嘈，我都係唔好再追究落去，加上阿Sam始終都係我既好兄弟，都唔想我地關係再惡化落去，既然班莊員唔介意，我唯有和應佢地。
 
『加上阿Sam件事，所以對我地好不利。不過一日未選，我地一日都唔知會唔會輸，黎緊仲有一個月左右時間，我知道我之前可能有D唔係好理莊務，係到我向大家道歉，黎緊我一定會盡力處理莊務，一齊憾佢老味!』
 
我預期班莊員都會好High咁和應我，一齊叫憾佢老味，但佢地都沉默住，個樣好明顯對我有介心，而且從佢地既態度睇得出，佢地已經唔再重視勝負，已經唔再關注憾邊個，好似佢地琴日話咁，佢地著重過程多過結果。我唔知佢地本來一開始已經咁諗定係因為我既頹攪到今時今日既局面，但我好清楚知道我既地位係莊員之間心目中已經係好低好低...低到一個可有可無既人。這叫我好心痛。
 
『好囉! 阿明返黎啦!』阿龍打破冷埸說。
 
『其實我都唔岩，因為我既身份累到大家!我係到都向大家道歉!』阿Sam說。
 
『傻啦! 你都唔想既!』莊員說。
 
『總之黎緊落黎，我有個主意，我今晚會SEND 份修正左既政綱比大家，同時間希望大家可以留意一下人地針對我地既言論，我地要作出回應同反擊，同時間，我地都要話阿風支莊有共青團既成員!』我說。
 
『阿風支莊又有共青團?』阿Sam說。
 
『阿明你點知呀?』阿龍問。
 
『我咩都唔知，我諗住屈佢地，反正中大學生一定唔會去深究，對於政治冷感既佢地，只有聽到支莊有共青團，唔多唔少一定對佢地有影響，大家今日有冇睇報紙? 有一小部份專欄都講緊中大有共產黨滲透，琴日件事上左報，已經令到好多人關注我地，只要我地屈阿風支莊都有，就算我地嬴唔到，都唔可以比阿風佢地嬴!』
 
『依招絕呀! 大家鬥唱大家! 但好似唔係我地作風咁.....同埋有冇帶份報紙黎? 我想睇下!』
 
『雖然唔係我地一直以來既作風，但去到咁既地步都唔到我地去揀!』
 
『嗯...........』
 
『總之大家今日開始去準備一下吧!好嗎?』
 
『好啦! OK!無問題！』莊員答。
 
『睇黎你真係返哂黎!阿明!』莊員說。
 
『哈! 多謝!』我微笑回應。
 
開完會後，大家都收恰野離開。聽到阿龍問阿雪:『去唔去睇戲，我想睇最近個套恐怖片!聽人講好正!』
 
我心諗: 『竟然要阿雪睇恐怖片?佢不嬲都唔鐘意依味野!』
 
但阿雪笑笑口竟然回應:『好呀! 你話事!哈哈!』
 
我驚訝地望住阿雪，點解佢會去睇既?
 
個一刻，腦海突然閃了一閃，點解今日我同佢地兩個既對話全部都係得我同阿龍? 點解開會個陣阿雪無咩意見發表? 阿雪從來都無加把咀埋黎? 原來係阿雪係阿龍面前顯得一個小小既女人，比阿龍發言，比阿龍去渣主意，慢慢將自己既身份同處事作風慢慢調低去配合阿龍........
 
究竟係阿龍改變左阿雪? 定係阿雪為阿龍而改變? 望住佢地兩個拖住手離開時，接受莊員既祝福同善意笑下佢地，我既內心再一次刺痛同流淚......真係好難受。
 
*****************************************************************