《我將一位宅女變成女神，然後再將自己變成佢隻兵》: 上集 (6)
第二朝起洗梳洗時，見到另一組既人係廁所到討論緊一樣野。
某人A: 『喂喂，聽講阿邊個食左條女!』
某人B: 『唔係化?咁快? 吹水咋?』
我係格離一路刷牙一路聽，令我諗起 O camp其中一個意義就係媾女，我掛住燃燒青春都冇諗過依一點， 但睇返我既組員，除左阿雪之外，我都唔覺得其他女仔係優質股，阿Kay個人太潮，有一種MK味道，我一定駕馭唔到。而其他組女都係一般既中價股，無咩特別，好難買得落手。
唔知點解，我開始有意無意咁出現係阿雪身邊，就算企係佢身旁我都好滿足，而且一有機會我就會聊佢傾計，不斷增進感情。
聽組爸講，中大不嬲玩營火會都唔會用真火，但今年就破例! 會用真火! 而我地去到玩營火會既時侯，我地整左個好大既火堆，之後係咁播D跳舞歌，令到大家都好High! 而我都係第一次玩營火會，你老味令我諗起中學有個領袖生訓練營，我望住張行程表，寫住夜晚會玩營火會，個刻我勁期待，唔知營火會係點既呢? 個火有幾大呢?
仆街! 點知去到夜晚，個營長叫我地圍圈，之後佢係圈中間點左一支蠟燭就話係營火會! 我真係比佢吹到啤一聲，佢仲厚面皮到問我地熱唔熱，又問我地High唔High，佢係咪有心玩野定係想辣興我地，仲叫我地分享心事，我個刻勁想開佢波!
但依個O camp既營火會就唔同啦! 個火堆真係堅既! 堅到行近既話真係令人感到好熱，但都唔緊要! 咁樣只會增加我地既情緒，玩到真係好high，大家都好忘我，我地又玩噴水，已經唔理儀容係點，成身濕哂，頭髮都亂埋。
我仲食住個勢，跳到去阿雪格離，扮哂high咁藉機拖佢隻手。但為左唔想太過明顯。
之後我再加多句: 『我地大家手拖手， 一個拖一個咁跳啦!』
其他組員聽到之後，一於和應我，大家拖住大家。咁樣我拖住阿雪，阿雪又拖住人，咁就唔洗咁顯眼。
係一個深夜，天上佈滿星星之下，營火堆不斷飛出少少煙火灰，我同阿雪就係咁既環境下拖手跳舞 。
另一個角度睇，我相信依個係一個好靚既畫面。
**************************************************************************************
其實O Camp最重頭戲就係夜晚係間房玩既遊戲，基於大學傳統文化，我係唔可以將當晚玩既野講出去，所以都唔係唔分享。
而最後一晚，我好多遊戲都玩過，好多房都用黎玩遊戲同Set埸，我就拎住個杯麵出去草地坐低休息下。
望住寂靜既天空，雖然依幾日我玩得好開心，玩得好放，但玩完之後，就會突然間感到好空虛，我好似藉著O camp黎逃避一D事。
我拎起手提電話黎睇，阿靜仍然無回覆我，依一刻我唔想再理阿靜係咪玩手段，我唔知佢想點，都唔想知佢想點，我就係知道，我依一刻好想見佢，好想聽佢把聲。我決定唔再係Whatsapp搵佢，我直接就打比佢。
『嘟.......嘟........嘟』
聽到接駁鈴聲時侯，我突然間又感到後悔。
『喂? 』 電話裏傳來阿靜既聲音。依把聲音就係阿靜? 把聲好似細路女咁，好得意。而且把聲仲係細細聲，好明顯阿靜佢訓緊覺。
『丫……喂……阿靜……嘈醒你?』
『阿明? 做咩打比我既? 你唔係去左O camp咩? 』
『係丫!岩岩玩完，出左黎抖下氣，見無野做……咪打比你囉。』
『你好似第一次打比我，哈! 你把聲都幾得意。』
『有幾呀? 你把聲咪仲得意! 好正.....哈 』
『有幾正呀? 咪又係咁。』
『原來女仔訓覺把聲咁好聽，我真係好想以後都聽到，不如你以後訓覺個陣打比我!』
『你個變態! 點呀! 玩得開唔開心?』
『都ok ar! 哈哈! 』
『有冇玩變態Game丫? 我好驚到時會玩丫。』 原來阿靜都幾擔心O camp玩D變態遊戲，睇黎佢係高登到睇唔少關於O camp既Post。
『平時就無咩既......不過夜晚玩房Game就.....哈哈!唔講啦! 你到時咪知!』
『你咪嚇我啦! 』
『係呢……阿靜。』
『嗯!?』
『 點解你唔覆我Whatsapp既?』我決定鼓起勇氣問佢。
『下? 你有Send 比我咩?』阿靜好似好驚訝。
『有......之前去你屋企食飯，但你阿媽話你出左街。』我突然間後悔左問依個問題，因為咁樣問好似證明左自己好在乎阿靜唔回應自己Msg。
『哦......係咩? Sorry ar! 我無留意。』
"無留意" 依一句說話好似一把刀咁插落我心到，咁意味住D咩? 我係咪係佢心目中地位已經好低? 唔經唔覺，由於我同阿靜長期無聯絡，我地之間既距離愈黎愈遠，遠到開始觸摸唔到對方，遠到開始感到陌生。
『丫……唔緊要，我都係問下姐。』雖然我咁講，但我已經返唔到轉頭，我既底牌已經擺哂出黎。
『你......仲......訓.....呀?』阿靜既說話不斷被嘟聲打斷。
『等等! 我有電話入!』 說罷，阿靜就轉左另一條線到，我唯有靜靜地等待，聽住一把女人電話等侯錄音。
一分鐘……兩分鐘……三分鐘......
阿靜仲未轉返線過黎，同邊個傾計咁重要呢? 阿靜都會同人傾電話嗎 ? 會唔會係阿媽打比佢? 但無理由傾咁耐……何況阿姨咁夜應該返左屋企吧? 會唔會係阿風? 關係已經去到傾電話嗎 ? 阿靜係咪唔記得我係格離線到? 想著想著.....
我放低電話，慢慢關上手機。
坐係草地上，抬頭望向天空，好靚既天空，如果阿靜係我格離一齊睇星，應該係一件好浪漫既事。 係我身後遠處宿舍傳來無數叫聲同笑聲，而我依一刻卻笑唔出，呆呆地望向天空，腦海只有阿靜。
完左O camp之後，我地每個組都有個分享會，向你地組爸組媽講下依幾日既感受，同埋向其他組員分享你對佢地感受。
當我見到攪手係到喊既時侯，終於明白到佢地攪O camp既辛苦，原來用左超過10萬開支，用左半年時間去籌備，就係為左比我地依班新仔玩幾日，此時此刻佢地都放低心頭大石。 見到佢地咁，埸面咁感人，我都忍唔住眼濕濕，唉濕撚哂唉唔撚驚。
組爸Peter叫我地拎本Camp Book出黎，所謂既Camp book就係印哂所有人既樣同基本資料，例如讀咩科，Year幾等等。
『不如我地互相寫D野比大家好嗎?』
依個主意唔錯，我都好想睇上其他人寫左D咩比我，特別係阿雪。
當大家正式離別時侯，我第一個企起身離開，然後轉身向佢地講左一句:
『好多人話O camp識到既人，多數都係hi 拜 friend，但我希望……我地黎近日子都會keep到依段關係，多謝大家。』
說罷，我就轉身離開，因為我唔想比佢地見到我喊既樣。
O camp係一生人只可以玩一次，而我終於完左依個機會，無論個Camp好玩定唔好玩，浪費時間或者浪費金錢都好，至少我已經無悔，至少我已經得到一份寶貴回憶。
特別係Camp Book 大家竟然寫左同一句說話比我 “ 多謝你，青春達人!”
***********************************************************
返到屋企，放低個袋，攤左係梳化到，呆呆望住天花板。突然，Whatsapp提示聲響起
阿靜:
岩岩聽到開門聲，你返左黎?
阿明:
嗯
依一刻，我對阿靜開始感到心淡，我已經唔想再理佢，都唔到我去理。我唔知佢同阿風發展到咩關係，我只係知道自己好傻仔，一直係到單方面接觸阿靜，但阿靜根本無意慾接觸返我，既然係咁，何必咁辛苦自己? 我好累，真係好累。我個腦無時無刻都諗緊阿靜，無時無刻都諗緊阿靜做緊咩，唉! 好辛苦。
阿靜:
好累嗎?
阿明:
嗯
阿靜:
.............
阿明:
我去訓啦
阿靜:
OK.....
我放低手提電話，去左沖涼。閉上眼，比花灑慢慢沖洗自己，希望可以清醒一下，但個腦仍然高速運作緊，仍然充滿住同阿靜相處既回憶，仍然充滿住對阿靜既問號。沖完出黎時侯，見到電話上顯示左Whatsapp提示。
阿靜:
Sorry....琴晚有緊要事傾，我以為你訓左所以無打返比你。可能你好累吧，但我今晚會係屋企，我會煮飯，我好想你黎食，好嗎?
我望住個Whatsapp，諗左一諗，嘆了一口氣，就回應左阿靜 。
阿明:
好呀!哈哈! 終於有得試你個餐飯啦! 我今晚會黎!
阿靜:
哈! 好好好! 你去訓啦! 今晚食得再叫你
阿明:
OK! -3-
我專登打多一個鍚咀咀既符號，我想睇下阿靜既反應係點。
阿靜:
拜拜 -3-
我笑了，睇黎阿靜都幾配合，可能係我諗多左，我成日都單方面假設左阿靜係點，假設左阿靜好似玩緊我咁，但全部都係自己假設，我真係諗多左。心情突然好左好多，即刻跑上床訓覺，準備今晚去阿靜屋企食飯。
晚飯過後，我同阿靜係廚房到洗碗，依個情境好熟悉，我記得幾個月前我同阿靜都係廚房到洗碗，個陣傾得好開心，仲拎D水撥黎撥去，好似一個小夫妻咁。
『係呢，你上唔上莊呀? 』阿靜邊洗碗邊問。
所謂既上莊，姐係大學入面既學系，學會等等組織幹事。
『無咩興趣呀，雖然我學系既"現莊"都叫我地諗下，如果想上莊就早D搵人組莊去選。』事實上，我對上莊無咩興趣，總係覺得好哂時間，但聽人講好似燃燒GPA(成績)。
『點呀你，個O camp玩成點? 有冇識到女仔? 』
識到女仔? 哈，阿靜係咪想試探我口風? 唔難理解，O Camp係識女媾女既地方，難免阿靜係高登到聽唔少依D傳言，佢咁問我係咪關心我?
『有呀，都識唔少。』
阿靜聽到後，停左洗碗，望住我說 : 『死狗公。』
『喂喂喂! 哈哈! 咩狗公呀? 識女仔都叫狗公? 』我覺得阿靜咁講幾好笑。
阿靜繼續洗碗，一路洗一路回應: 『你去O camp都係為左識女姐，威啦你!』
『你呻醋呀? 』 我試一試阿靜既底線。
阿靜停止動作，慢慢轉頭望向我，微笑地回應 : 『係呀!明哥! 我好驚你比人搶走呀 OK?』
『哈哈哈! 講笑之嘛! 咁認真做咩! 』唔知點解我依一刻心情真係好好，我好想感受返以前既感覺，重現返之前係廚房同阿靜玩既情境，加上我見佢心情都幾好，於是我有意無意地將洗碗D水撥去佢身到。
我預計佢會笑笑口，之後會撥返我轉頭。
點知，佢既反應係: 『頂……你做咩呀? 』
阿靜好嬲既樣，停左洗碗，拎條毛巾去左廁所清洗。見到阿靜咁樣，我總覺得有D野唔同左，但我講唔出有咩唔同，依一刻我只係感到一股無力感。
**************************************************************
開左學幾個星期，原來大學比我想像中自由得多，基本上無王管，自出自入，除左某D堂一定要上之外，其他堂都可以唔洗上。而Psychology既人差唔多成六十幾人，我根本識唔哂咁多人，我都係跟返阿雪，阿龍同埋阿言一齊上，分組都同佢地一齊，突然明白到O camp既作用開始發揮出黎，如果無玩O camp可能仲識緊新朋友，分組都比較麻煩。
當我同佢地食緊lunch既時侯，阿風突然黎左。
『Hello! 好耐無見。』阿風對我說。
我望一望佢 : 『好耐無見。』
『我有D野想同你講，方唔方便?』
『OK!』我放低餐具就起身跟阿風走去餐廳一角。
『咩事?』
『我開門見山，我想組莊選學生會，我就做學生會會長，依家我搵緊其他志同道合既莊員一齊去選學生會，我玩左大O，已經搵左唔少人。我想問你有冇興趣一齊上莊姐。』
『選學生會? 點解要搵我?』
『因為我覺得你幾有料，我不嬲都好睇重人材，有料既人我都會搵佢一齊選。』
挑! 咩意思? 不嬲都睇重人材? 你以為自己係邊個? 點解由你做會長? 姐係話我要跟你做野? 點解無啦啦地位同身份好似比佢壓住? 明明我地就係平起平坐!
『我無咩興趣去選，你都係搵第二個吧啦。』說罷，我就返返去座位。
『你認真諗下啦，我等你答覆，你都唔想渾渾噩噩咁讀大學吧?』阿風遠處對我說。
但我依然無理會，坐低繼續食。
『係咪有咩事? 』阿龍問。
『無。佢想叫我同佢一齊選學生會。』我邊食邊說。
『選學生會? 依樣係好大壇野喎! 唔同你上D學系，學會莊。』阿雪說。
『我知，學生會代表中大所有學生，做得唔好隨時會上報紙。而且仲係大莊，唉! 我諗起都煩。所以推左佢。』
『但我成日聽你話中大好多地方要改善，又成日批判時事，其實選學生會都幾岩你。』阿言說。
『等我諗諗先。』我視線慢慢移向阿風，其實佢都幾有大將風範，佢真係做到公私分明，係一個好厲害既人。
返到Hall後，見到Roomrate仲未返，間房又細，實在有點無聊。已經住左Hall一段時間，感覺上無咩特別，而且更加唔方便，我都有參加Hall camp同識下樓層既人，但可能大家都怕羞，見到面都係打下招呼，無咩深交既朋友。望一望月曆，聽日星期六，我都係今晚執野返屋企先，通常假日我就會返返屋企訓。反正假日，Hall就會變成死城咁。
阿雪:
聽日我地re-u呀 你黎唔黎呀?
阿明:
好呀 幾點呀?
阿雪:
聽晚八點係沙角打邊爐啦
阿明:
OK! 準時到!
所謂既Re-u 就係我地玩O camp既小組短聚，通常黎既人數都好少，因為開學後，大家聯絡少左，開始有左自己圈子，慢慢就唔會同我地有聯絡。阿靜都係一樣。
返到屋企後，打開電腦，見到Facebook有個女仔add我，禁入去睇原來係阿靜，佢開左新Facebook? 於是我add左佢，發覺佢個朋友list竟然去到六百幾人，佢……唔係得五十幾人咩? 竟然多左十幾倍?
我望一望佢朋友張List，好多都好雜，男既佔大多數，而且中大學生都佔左好多，佢唔係走去add哂呀?
我再睇佢相簿，發覺佢開左好多相片集，入面好多都係O camp既相，張張都影到佢好active，好開心。
當我繼續睇既時侯，發現有個相片集既名係 " 大O 相" ，阿靜佢有玩大O既? 佢唔係只報department既O camp咩? 我再睇入面既相，見到阿風同佢好多合照，而且仲係同一個組.......
阿靜為左阿風去報大O? 以佢性格點會參加大O依D咁多人既camp.....
而且見到阿靜求其係Facebook打句無聊野都竟然有過百人like ……
反觀自己平時既Status最多都係十幾廿個like......阿靜自從入左大學後，圈子慢慢擴大，什至比我更大。
電話響起，原來係阿媽打黎，話今晚遲返，叫我去阿靜屋企食飯。 終於又可以同阿靜見面，由於阿靜無住Hall關係，所以佢一定係屋企。我已經差唔多個半月無見阿靜，而且Whatsapp都無咩兩句。
禁鐘後，開門既係阿靜。
『好耐無見。』我真心地說。
『好耐無見啦，入黎先! 我仲煮緊。』
入到阿靜間屋，感覺好似重遊舊地咁，對上一次黎已經係個半月前。個次仲係廚房激嬲阿靜，不過好再都比我哄返。不過正式開學後，都無咩接觸，明明大家係Whatsapp約好見面食lunch，最後都係不了了之。
我行入廚房，聊下阿靜傾計 : 『岩岩返屋企見到你add我，成六百幾個friend喎!』
『都係O camp識返黎既。』 阿靜邊炒餸邊說。
『你知唔知Facebook咁多Friends 好易嚇親人!』
阿靜轉身望一望我，然後笑住炒餸 : 『點呀!阿明! 又有咩偉論要發表? 』
『拿! 通常女仔黎講，Facebook超過500人，我地作為男仔就會列佢為"難媾"對像，什至會Banlist左佢，點解? 因為通常依D女仔都係亂add d朋友仔，成六百八百個friend唔通真係識哂咩? 肯定亂add想收兵啦! 依D女仔都唔方好得去邊。』
『你意思係想話我唔好?』
『唔係，我都係講下姐。』其實依個所謂既”偉論”都係想單打阿靜。
『我唔會係收兵個D人囉，我真係識佢地架，唔識我都唔會add佢地啦。』
『嗯! 我都知。』
『聽你咁講，唔通少個500人就係好女仔?』 阿靜問。
『唔係咁講…..不過少人，感覺唔會亂add囉，依D女仔都唔會想等人媾既。』
『我之前Facebook得五十幾人，講咩同分享咩都無人理，咁就證明我係好女仔嗎? 咁就證明我唔想比人媾嗎? 』
阿靜依句說話令我答唔出口，雖然覺得依句好極端，好負面。但我又話佢唔落。
阿靜見我好似答唔出咁，就打圓埸說 : 『幫手開飯吧。』
一路食飯時，伯母都係問下我最近既事，關心下我大學生活係點，好多時阿靜都無咩點出聲。
直到洗碗時侯，當我同阿靜單獨相處既時侯，阿靜先會多出聲同我傾計。
『今次你咪再撥D水係我到丫!』洗碗前，阿靜先作警告。
『得啦.......係呢! 今日阿風搵過我黎。』
『我知呀。』
短短三個字，再一次顯示出阿靜同阿風既關係密切，連阿風搵我都知，姐係話阿風同阿靜講過佢想組莊既事。
『但我推左佢。』
『點解呀? 我向阿風推舉你架。』阿靜停左手，轉身同我講。 好明顯阿風仲未同佢講。
『你推舉我?』
『我知你份人平時好留意時事，所以覺得你幾岩上學生會，而且你同阿風合作應該做得會做得好好。』
『原來係你同阿風講.........』挑，阿風仲話我好有料先搵我，原來係講大話。咁又係，我何德何能令到阿風睇到我有料呀?
『你認真考慮下啦，我知你唔係咁鐘意阿風，但難得有咁既機會，我覺得你要好好諗下，阿風家底唔錯，講資源講人脈都好好，隨時超過預算咁去放錢去選，選到既機會好大。你要公私分明呀! 難得阿風都做到，點解你做唔到? 』
『阿風做到? 』
『當我係阿風面前推舉你，佢都讚成! 你就唔好咁小器介意啦。』
『哼......』我繼續洗碗。點解無啦啦變成我係小器既人，點解我一定要去選學生會? 點解我一定要追隨住阿風?
『阿明，我為左你好，希望你明白我既心意。』
『你洗吧，我有D唔舒服，我返屋企了。拜拜。』我放下碗碟，就開門離開。
返到屋企之後，我好嬲。但我唔知道我嬲緊d咩，我嬲緊阿靜同阿風關係咁好? 定係嬲緊阿靜睇我唔起? 但阿靜想我幫手，係咪又睇得起我呢? 定係佢真係想我發展所長呢? 但點解要我追隨阿風? 我唔甘心......
Whatsapp提示響起。
阿靜:
我唔明你點解突然咁嬲，我同你做左咁耐朋友，我好清楚你既性格，你每年遊行都會去，而且好關心政治時事，依家有一個機會係你面前，你應該好好利用學生會去做你想做既事，你都好清楚學生會係代表整間大學學生意願，將來你出咩行動都可以有人撐你，點解唔肯做? 加上阿風能力咁高，有佢帶領你地一定會做得更好。
當我睇到阿靜開頭既內容，我個心都開始慢慢平伏，但當我睇到後段時，我就愈睇愈嬲，阿靜根本唔明我想點，我係唔想同阿風合作! 我更加唔想比佢感覺我係under佢!
我無回應阿靜，我放低電話好好諗下自己，阿靜既一哭一笑，一動一靜，都令我情緒忽而高，忽而低。我諗我自己開始依賴左佢。無錯，係我教阿靜由一個宅女變成今時今日既佢，教佢上高登，教佢點捉男人既心態，直到依家，講得唔好聽既，我似係佢隻兵，一直拖住我。但我就算知道我係佢隻兵，我都依然跟住佢，好想好想佢會為我而改變，好想有一日佢會將我依隻兵，變成一個男朋友。
我係高登流連左咁多年，見過唔少感情post，往往都比到唔少意見比人，但講就兇狠，做就碌撚。能醫不自醫，當發生係自己身上時侯，原來係可以感情大過理智，我內心深處根本放唔低阿靜，就算知道佢同阿風關係好好，我同佢距離慢慢疏遠，我內心深處......我內心深處....根本唔肯放棄......
就算我知道對方係點玩我，就算知道對方係吊我癮，就算知道對方......唔鐘意我
我都依然....依然....甘心被佢牽住走.....
可能我真係犯賤。
Whatsapp提示聲再次響起，我擦光眼上既眼淚，拎起手提睇
阿靜:
點解唔覆我? 你唔出聲我唔知你諗緊咩，我好想你明白我所做既野，我只係想你好，我只係係阿風面前推舉你，其實我都唔係做左好多野，但我想知你知道，我好想你好，好想你係學生會有返一職，阿明! 希望你明白我心意，聽日比答覆我吧。早抖。
我放低電話，諗左一整晚。
此刻，阿靜係張床到，緊抱住張被，個心有一點點生氣，點解阿明可以咁小器? 之前係旺角當住阿風面前將我叫走，已經好失禮人，依家我只係係阿風面前推舉佢姐，都係想幫阿明發展所長，點解佢要咁冷淡對我?
阿靜諗左一整晚，最後不禁對住Whatsapp中既阿明說了一句:『大傻瓜!』
******************************************************************
『明仔!!起身呀!!阿靜黎搵你。』
我張開雙眼，轉身望一望個鐘，原來已經中午十二點幾，我慢慢起身。就見到阿靜打開房門，只係著住一件背心同一條白色短熱褲。岩岩起身既我，我下面即時有反應，我慢慢用被蓋返住下面，免得阿靜睇得。
『做咩事咁急走黎?』我問。不過我係明知故問。
阿靜坐落床上，令我視線有意無意地望住佢對雪白大脾。
『琴晚你諗成點?』
『嗯……』
『點?』
『好啦，你想我做既，我都做。』 對住佢我真係投哂降。
阿靜聽到之後即時好興奮 : 『真係架? 你肯做?』
『嗯! 你想點就點吧。』我微笑地說。
阿靜即刻攬住我，此刻完完全全感受到佢身體上既體溫，我隻手無意間觸摸到佢對雪白皮膚，真係好有感覺。原來只要我答應阿靜既要求，我就可以享受到。真係諷刺……
『我即刻同阿風講!』 阿靜放開手，拎起手提係到打字Send Msg比阿風。雖然我唔知道阿靜究竟係為左我定係為左阿風，但我知道阿靜聽到我答應之後，佢真係好開心好開心……我遞起岩岩觸摸阿靜身體隻手，我已經好耐好耐無咁近距離接觸阿靜，對上一次攬係係旺角時侯。哈……個陣既阿靜仲好單純，咩都聽我話，估唔到……依家身份調轉左。
『我返過去先，我要做埋d paper，你都快d起身啦! 拜拜! 』阿靜說罷便離開了。
我呆呆地望住房門，腦海一片空白。
***************************************************