《我將一位宅女變成女神，然後再將自己變成佢隻兵》: 上集 (5)
今日係高級程度會考放榜既日子。
早上，阿靜禁我屋企門鐘，我就拿拿林開門，見到阿靜打扮得好靚，完全唔似一個一陣就要去睇成績既高考生，佢完全散發出自信，自豪既氣色。而且平時係我禁鐘叫佢，佢先死死氣出黎，如今佢竟然.......
『早晨，行得未? 』阿靜微笑地問。
我係到諗，阿靜仍然係我身邊，我地之間既距離都唔遠，而佢正正就係我面前，而且見到阿靜既微笑，令我有一種特別既感覺，頹氣好似一掃而清。睇黎我應該回復生氣先得!
『OK! 行得!』 說罷，我就關門同佢走。
一路返學校時侯，阿靜一路係到用手提同人玩Whatspp，令我覺得好唔自在。佢同緊邊個Send? 高登班狗公? 定係阿風?
阿靜傾傾下仲笑左出黎......! 激氣，我都唔輸得。
我係袋到拎出電話，睇下邊個可以同我Send msg先，當我用手指係個手提上不斷掃，我竟然發現冇咩人可以同我傾計，原來自己圈子其實都好細。此刻，反而阿靜既圈子大過我，雖然只係網上識返黎。
當我亂掃時侯，手提螢幕上出現穎兒的名字，望住以前同穎兒Send msg既日子，不禁令我個心酸了起來。此刻，我......好掛住....好掛住...好排住...同穎兒Whatsapp既日子，個段日子真係好開心。唉，唔知穎兒依家點呢，自從佢走左之後，佢就好似消失左一樣，Facebook同msn都無再出現。唉
愈諗愈傷心，我好僧自己無好好珍惜個段感情，自己仲玩埋哂D手段.......去對待穎兒。
突然間諗起五月天首歌...突然好想你...
穎兒.....突然好想你..... 你會在哪裡...... 過得快樂或委屈......
『阿明!!』范威從後拍我膊頭。
『點呀你，係咪好驚呢? 』我知道范威成績一向唔係太好，而且佢都預左自己要自修考多年。
『挑! 驚條春! 大不了咪死! ..........咦喂......』當范威見到阿靜既時侯，眼前一亮。偷偷地拉埋我一邊細細聲講：『喂...阿靜索左咁多既?』
『好出奇咩，我不嬲都話佢潛力股黎架啦!! 係你地成日話佢重口味之嘛! 』我突然間有點自豪，因為我當日既想法係正確，眼光獨到。
『咁叻....晨早媾左佢啦你! 喂...有冇打算媾佢姐。』
我望一望阿靜，如果唔係經過琴日既事，我可以好肯定好自信咁答范威 : 『有!』
但依一刻，我都唔敢講D咩，因為我清楚明白到，阿靜已經唔係一隻潛力股，而係變成一隻優質股.....唔係一般人可以認購，包括我在內。
去到學校門口，已經有幾個人係門口幫人介紹一下ive課程同埋各大院校副學士等等。
當我地行過去時侯，其中一個人已經留意到我地，於是行埋黎問我地
『同學! 唔知你地預期拎咩分數呢? 我地有幾個課程想推介....』
『唔好意思丫，我預左我地拎幾條A，係咁! 』范威一副自信的樣子去回應。嚇得那位男士都目瞪口呆。
『拎A? 拎到C你都偷笑啦!』我說。
『挑! 我先唔care依d野! 』
『你咁唔在乎放榜成績，不如我比樣野你做啦! 拿....』我係袋到拎左部相機出黎，再比范威。
『你比部相機佢做咩?』阿靜見到，都忍唔住好奇一問。
『個相機有拍影片功能，一陣你就全程幫我地錄得放榜既一刻啦!』
『嘩! 你咁變態! 』范威拎起部相機開始研究。
『人一世物一世，會考放榜都試過，今次高考放榜我估都係人生中最後一次啦，好少人都無係依個時侯拍低佢，但咁重要既時刻梗係要拍得佢啦，結婚都要拍片啦! 係咪先! 將來睇返一定好正。』我將我意見講出黎，事實上，會考個陣已經想拍片，但最後都被當時氣氛感染左，連我都緊張埋一份，攪到無心機拍片，但依一刻，我對自己成績都好有信心，升大學唔難，梗係拍低佢。
『哈! 果然青春! 好啦 ! 我就幫你地拍啦! 』
八時三十分，班上開始聚集左同學仔，有d同學靜靜地坐埋一邊，係到祈禱。從來無宗教信仰既人，依一刻個腦都要求耶穌丫，佛祖丫，觀音娘娘丫，上帝丫等等咩類型既神都求下，唔理邊個係真邊個係假，幫到我地拎好成績就係真神。
有d同學就不停拎住電話同屋企人一直保持聯繫，務求將第一手成績講比屋企人知。
有d同學就不停係到同人傾計，放鬆一下，但口裏不斷說出 " 好緊張丫! 今次死得啦 " " 我發夢夢到放榜呀!最後英文肥左呀!" 等等。其實放榜前發夢見到放榜一刻，都好正常既事，主要都係太過緊張。
而我呢?
就係到同范威係到玩緊部相機，而范威一直係到拍攝影片。
『喂~明哥! 就快放榜有咩感受先!』范威將個鏡頭影向我。
『咳咳...我就無咩緊張，覺得我應該都有兩條B既! 』我面向鏡頭反而有點唔自然。
『問你依個高材生都唔好玩既，我地不如.....問下阿仁啦。』范威行去阿仁面前影住佢。
『就快放榜，有咩感受呀!阿仁。』
『屌你死開啦仆街! 我好撚淆底呀! 今獲真係屙撚啦! 』 阿仁激動地說，似乎放榜對佢黎講感到巨大既壓力。
『哈哈哈哈! 屌你! 我從來都未見過阿仁咁淆底既樣! 依家終於見到啦! 哈哈!』我同范威笑到肚痛，不斷串下阿仁，但我地心內有數，阿仁成績應該考得不錯。
當我周圍望下身邊既同學，不禁暗說一聲: 『好快就要經歷一埸殘酷既時刻。』
我返返座位坐低，已經好耐無返黎學校，以前一直都唔覺得學校有咩特別同比到咩感覺我，但依一刻，感覺上好似十幾年無返黎咁，我諗今次真係最後一次以學生身份黎依間學校。
望返張桌上既圖畫，係穎兒走前留低所畫，棵感情樹仍然係到。我打開隻手，再慢慢移去感情樹上既樹支。早前穎兒係到畫左支樹枝，慢慢畫去我隻手上既感情線，那條畫得好深色既線已經消失左。意味住我同穎兒既感情淡了? 感情樹既樹枝已經無得再生長?
『老師黎啦! 』各人見到老師後，都紛紛靜了。大家都觀察緊老師既面色，因為從老師上既面色可以透露出或估計出大家考成點。
『我都唔講咩廢話，總之大家考成點都好，都唔好放棄自己，都唔好覺得輸哂或者覺得好似世界末日咁，身邊仲好多人係到支持你地.....』 陳Sir不斷係到講一d正能量既說話。但係同學們聽到後，內心只係不斷講 : 『頂! 咩叫唔好放棄!? 咩叫唔好覺得輸哂!? 姐係我地考到成pat屎啦! 』
『好啦! 我就由大家既班號順次序黎派成績啦。』陳Sir開始派成績。
范威就係咁拍片影住阿仁個淆底樣，而我就係到欣賞緊班上放榜一刻既眾生相。開始派到第三位同學，班上氣氛開始推向極端，聲音開始傳得好大聲，有點失控。
有d同學仍然專注地望住老師，等待死神向佢地判刑。
有d同學就行去收左成績既同學睇一睇咩分數，佢地評估一下如果個廢柴同學都高分，咁佢地都應該放心d去收成績。
『何妍靜!』陳Sir讀出阿靜既名字。而我既視線都轉向阿靜，只見阿靜收到成績後，邊行邊睇，咀角開始微笑就知佢考得唔錯。
『阿仁....到你啦。』陳Sir叫阿仁出黎，面色不太好。阿仁即時嚇撚到腳軟，個口不斷爆粗，而范威見到阿仁咁樣就愈開心，全程跟住阿仁拍攝。當阿仁行到去陳Sir面前，伸出雙手拎成績，但陳Sir無比成績表佢，反而同佢講:
『唉，阿仁! 你明明係聰明仔，但成日懶懶閒又掛住玩同識女仔，其實你真係可以考得再好d。』
『嘩屌....................................陳Sir，你咁講姐係我炒左啦。唉!』
『你自己睇。』陳Sir比左張成績表比阿仁。阿仁一睇，中英Pass，而且考到1B1C，佢已經好清楚佢可以升讀大學。
『wowowowowowow!原來條友嚇鬼!!!喂!! 快d影我啦!!哈哈!!』阿仁向范威不斷炫耀張成績表。
『范威!』終於輪到佢收成績表。阿仁即時搶左部機，然後好high咁講
『今次你仲唔仆街! 等我幫你拍低佢! 哈哈哈。』
雖然范威預左炒，但到真正既收成績一刻，反而有點緊張，原本恥笑阿仁仆街既笑容都收返，因為係佢內心深處仍然期望可以有奇蹟發生。
『屌你3D2F! 你考咩春! 哈哈哈哈! 』阿仁影到范威張成績表，笑到肚痛，將之前范威對佢做過既野一一奉還。
『Well~ Who fucking care about it~』范威扮哂瀟洒咁，但其實佢內心酸到死。
『劉啟明!』陳Sir終於讀到我個名，阿仁都即時將部機影向我，不斷講一d負能量說話嚇我，但我完全唔怕。
『你果然係全班考得最好既一個!』陳Sir說。
『多謝陳Sir。』我接過張成績單後，一直行返去座位，之後阿仁同范威都跟住黎。
『各位觀眾!!!!4條煙..............!!!!』之後我就賭聖咁，慢慢係張成績單由上而下咁慢慢甩個成績出黎，最後都係只得1A1B2C成績，加上我會考既分數，應該都夠入中大。
『嗚嗚.....點算好呀....點解咁呀。』突然傳出一把喊聲，令到我地既視線都轉向依位同學身上。個位女同學係到喊，一路傾住電話，埸面份外傷感。
再望望其他同學，個個都好傷心，哀傷既哀傷，喊既喊，走既走，埸面好傷感。只得我地幾個he he ha ha咁，好似同個氣氛格格不入，范威影左陣就熜左個部機佢，因為佢都頂唔順咁死寂既氣氛。
而我都慢慢走其他同學到安慰下佢地，阿仁都打電話返屋企報平安，范威就搵下老師傾下自修既意見。
當我安慰同解答同學既問題時，望一望阿靜，當我以為佢走左既時侯，因為不嬲佢都同班中好唔合群，應該收到成績後就走。但我仍然見到佢。
阿靜係到安慰佢身邊既女同學，一班雖然唔係同佢玩得埋同太熟既朋友，但阿靜都樂意為佢地分擔，可能阿靜都第一次見佢地咁傷心，都忍唔住想幫佢地。
到左下午，人群都開始散了。我同阿靜都一齊返屋企。
『我地終於成為準大學生，希望我地黎緊大學生活會好正。』我眼前對大學既生活充滿光明。
『我都期待大學既生活! 我地又會做校友! 得閒可以一齊食飯! 』
『哈! 好呀! 係呢! 你住唔住hall呀? 』我問。
『我.......都唔慣同人住既。』阿靜仍然對自己不太有信心，始終佢都慣左自己一個，同人相處都難，更何況同人一齊住。
『大學生活，點都要住hall既! 唔係點叫大學。』
『咁又係。』
『不過唔洗咁快諗定啦! 等正式放jupas先再慢吧! 』
放榜之後，我都投入返工作，中午一點返工，夜晚十一點先放工既日子，令我都無咩空閒時間去同阿靜傾計，連去佢屋企食飯既日子都無。
有時侯，我返到屋企後，都不自覺地登入阿靜既account黎睇，發覺佢開始少左係高登到留言，pm都收少左好多，會唔會係我之前話過佢，佢開始檢點一下?
而我係訓覺前，都會攤係張床到，拎起手提打開whatsapp，禁下阿靜有冇上線，當我見到阿靜上線中既時侯，不自覺地認為佢同阿風Send 緊 msg，內心都突然酸了一酸，但一諗起阿風份人真係屈機，雖然唔知佢家底點，但如果拎我同佢比，我真係追都追唔上佢。
再望望穎兒whatsapp，顯示時間為 20/3/2010
穎兒已經幾個月無上線，就好似消失左咁，究竟佢發生咩事?
日子好快就過去，Jupas放榜過去。我同阿靜都入左中大心目中既學系，我入左我地都一齊去中大reg day，去成為真正既中大學生。
『阿明! 你報唔報o camp呀? 』阿靜問。
『梗係報啦! 聽人講好好玩!好青春! 』其實我恨左玩o camp好耐，終於都一償所願!
『但我都聽人講...o camp玩埋d變態遊戲。我怕。』阿靜似乎擔心緊依樣。
『唔係個個o camp都玩變態遊戲既，好多都好正常! 如果你唔想玩咪出聲囉! 做得大學生好應該有自己意見! 唔鐘意就要出聲。不過，都係個句啦! 人一世物一世，o camp都係一生人只可以玩一次! 你點解唔玩?』
『嗯....報唔報好呢，至衰你又唔到我同學系，唔係我地可以一齊玩。』
聽到阿靜咁講，我反而有點開心。因為阿靜到依家為止都好似好依賴我，無我係佢身邊，佢無安全感呀?
『好多人話o camp哂錢，去到識朋友只係識到hi 拜 friend，我覺得依d都係藉口去比自己唔去o camp，點解d人成日將人地既經歷套入自己到呢? 唔通人地識唔到朋友，就代表你係camp到都識唔到朋友? o camp係一個放開懷抱既日子，讀左十幾年書，點解仲要保持中學生既守舊，唔去放縱一下呢? 』
『好啦好啦! 聽你咁講! 講到唔去一定會後悔咁。』
『去左未必後悔，但唔去就一定會後悔啦! 點先後悔呢? 當人地享受緊o camp時侯，你就on99係到等開學，當人地擁有去o camp既開心回憶，你又有d咩? 雖然讀大學唔係為左o camp去玩去識朋友，但有時侯都要平衡一下，大個左 d仔仔女女問你大學有咩玩，你hall又未住過，o camp又未去過，你真係枉讀大學呀!』
『我都同意阿明咁講。』阿風突然從我背後出現。
『咦，你唔係兩點先reg咩? 』阿靜問。
『係呀，但我想過黎參觀一下中大。』
短短兩句對話，我就知道阿靜同阿風早有默契大家reg 既時間，而且佢地應該都日日whatsapp傾計。睇落佢地兩個其實都幾襯，當日我反對佢地，係因為唔想阿靜同網友有咁大接觸。
但依一刻，阿風同阿靜成為校友，佢地兩個已經唔再係網友既關係，而係真真正正變成朋友。
『阿明.....你介唔介意阿風同我地一齊食lunch呀?』阿靜諗起之前係旺角發生既事，怕阿明對阿風好反感。
『我諗阿明唔介意既，我地又唔係仇人，係咪?』阿風笑住望向我說。
『我唔介意。不過我約左人食飯，你同阿靜食啦。』雖然我感到阿風既壓逼感同敵意，但我都帶以微笑回答。而事實上，我都約左一個網友食飯。
『你約左人食飯? 』阿靜問。
『嗯，所以你同阿風食吧。我唔阻你地啦，拜拜。』我好瀟灑咁快步走了，唔知點解當阿靜同阿風同時出現係我面前時，我會混身唔自在，而且仲有一種尷介感覺。
而係遠處既阿靜，望向阿明背影，覺得阿明對佢開始不太在乎，會唔會係大家太耐無接觸而冷淡了? 雖然依幾個月都係同阿風傾計，連街都出過好多次。但阿明對阿靜黎講，仍然佔有好重要既位置，眼見阿明慢慢消失係自己視線時，感覺到與阿明距離愈黎愈遠，關係亦愈來愈遠，覺得有點唔捨得，依刻，佢唔想阿明離開，好想留阿明係自己身邊。而且都好在意阿明岩岩個一句說話" 我約左人食飯 " ，阿明約左邊個食飯呢?
『點? 行未? 』阿風問。
『嗯! 行得! 』阿靜回神過黎，就跟阿風去左食飯，離開時不自禁地回頭望一望阿明.....
而我的確約左一個網友食飯。
係放Jupas時侯，高登出現好多各大院校既post" 中大同學揮手區" " 入到港大既入黎! " 等等，而我對大學無咩太大認識，所以入左去睇下了解d師兄講既大學生活，同埋順便睇下有冇同學仔一齊讀。
最後都入左m群到傾計，咁岩比我搵到一個絲打同我讀同一個學系。而今日我地都係一齊reg day，所以我順便都約左佢一齊食飯。我雖然唔知佢個樣係點，我地只係whatsapp傾計，facebook都無交換，但我個心只係想識個同學，無其他意思。 不過當我知道佢係絲打時侯，我內心深處仍然有一絲期待。
『hello~你係咪孔明巴打呀?』
我轉身一望，一身長頭髮裝扮，皮膚好白滑，而且高度同我差唔多，短褲下露出一雙長美腿既女仔。好明顯佢就係我所識既絲打。
『係呀，唔好叫我高登個名啦! 你叫我做阿明啦。』
『哈哈!好呀! 阿明! 你叫我做 阿雪啦。』阿雪伸出右手，示意同我握手。
我笑了，估唔到佢會咁老套，我都伸出手同佢握手 :『希望我地黎緊三年會讀得開心。』
『一定。』阿雪帶以微笑回應。
同阿雪一路食飯時，阿雪真係好專注咁食佢碟飯，佢既視線一直向外望，陽光照射下顯得佢好cool，睇落去佢好似係一個好Cool既女仔? 無咩點出聲咁，於是我就打破冷埸。
『你reg左未? 』我問。
『岩岩Reg左! 頭先都幾多人排隊。』阿雪帶以微笑回應，此刻又唔覺得佢好冷漠。
『係呢，你有冇報O CAMP呀?』阿雪邊食邊問。
『有呀，我報左我地department既O CAMP，你呢?』
『我都係報左department個CAMP呀!。』
『我地到時又會一齊見面。 』
『哈! 咁就好啦，起碼有個伴陪我!』
『鈴….鈴……』
咁老套既電話鈴聲竟然出自係阿雪身上，阿雪係袋到拎出一部舊式手提電話出黎。
『喂? 嗯! 一陣我會返黎! 好啦! 拜拜! 』阿雪收線後，向我示意係屋企人。
『係呢，你平時有咩做呀?』 我想了解一下佢生活習慣。
『無呀……平時放假都係屋企煲劇咁!哈哈! 我好宅架!』
『唔出去玩?』
『都有既，但少囉! 我鐘意留係屋企多D。』
一餐飯既時間，經我觀察，阿雪屬於優質股，外表一副冷漠冰霜，鐘意留係屋企，少有參與戶外活動，唔怪得皮膚咁白。由於假期都留係屋企關係，應該佢無男朋友，加上用埋D舊式電話，應該性格好純，唔係追求物質既港女。不過我都無諗得咁多，只係好開心識到一個咁靚咁好既女仔。
數星期後，當我返工時侯，電話響起。
『你好呀!劉啟明! 我係社會科學學院既組媽呀! 你係咪報左O CAMP呢?』
我偷偷地行埋一角聽電話 : 『係呀! 我報左O CAMP呀!』
『我地O CAMP係八月十五日至八月十八日! 不過係去CAMP之前，我地組爸組媽想約你地出黎見下面，順便練下跳camp fire! 你邊日OK架?』
『丫….我黎近星期五放假，到時可以出黎。』
『咁岩其他人星期五都得丫! 不過就要夜晚! 咁我地就約實星期五夜晚八點旺角朗豪坊等!』
『哦…好呀!到時見!』
『聽你把聲就知你唔摺架啦! 到時記得玩得放D! 令到個組氣氛好HIGH丫!哈哈! 唔阻你啦! 拜拜!』
收線後，我心諗，我壓到把聲線咁低都可以覺得我唔摺。同埋我都聽到一頭霧水，仲以為報左OCAMP到時先見面，原來係CAMP之前已經約我地出黎。
直到星期五晚上，到左朗豪坊後，即刻見到個靚女姐姐係遠處揮手同我SAY HI! 我怕怕羞羞咁行埋去。
『你好呀!劉啟明! 我叫Yuki係你既組媽，另一位叫Peter，係你既組爸! 我地黎緊都會全程照顧你地，陪住你地玩OCAMP架! 』組媽Yuki介紹自己。
『HELLO! 我可以點叫你呀? 』組爸Peter微笑地問。
『你地可以叫我做阿明就得!』 我望一望周圍，已經有幾個男仔同女仔係到等，我估佢地應該同我一樣係依個組呀?
『仲差黃小雪未到。』組媽Yuki同組媽Peter講。
黃小雪? 哈! 個名咁好聽既，小雪小雪。會唔會係我識既阿雪呢?
『到左啦! 係後面!』組爸Peter指向我身後。我轉身一望，果然真係阿雪。
阿雪見到我都好驚訝 :『 咦? 你都係依組呀?』
『哦! 原來你地識既! 』組媽Yuki指住我，似乎另有所指。
『拿! 我嚴禁我既組仔女係到拍拖架! 哈哈! 』組爸Peter講笑地說。
『我地都係Reg day個日識姐。』我解釋，但我又幾享受佢地話我同阿雪拍拖，我偷偷地望阿雪既反應，佢都即刻笑笑口咁話唔係。
『好啦，其他組仔女過埋黎，等我同大家正式介紹先!』組媽Yuki叫埋其他人組仔女過埋黎。
『你地不如自己簡單介紹一下自己好嗎? 簡單就得!唔好好似面試咁介紹到幾分鐘呀! 哈!』組爸Peter說。
『.........』全埸靜哂。
哈! 全埸竟然靜哂，睇黎好多人都好怕羞咁。
『我叫劉啟明，大家可以叫我做阿明，都係讀Psychology Year 1! 』我唯有打破冷埸自己講先! 之後其他人都跟住我講。
『我叫黃小雪，可以叫我做阿雪架，都係讀Psychology Year 1! 』
『我叫何尚言，叫我阿言，都係讀Psychology Year 1! 』
『我叫阿Kay! 都係讀Psychology Year 1!』
『我叫阿Sam!，我係讀Sociology Year 1! 』
『大家好! 你地可以叫我做紫欣架! 我讀Sociology Year 1! 』
『我叫阿龍，讀Psychology Year 1!』
『我係阿May! 讀Social work Year 1! 』
『嘩......依個組好多都係讀Psychology 既組仔女，唔知佢地識唔識讀心術呢!哈哈!』組媽Yuki講笑地說。
從佢地介紹之中，我又知道我既同學有邊幾位，女仔除左阿雪外，仲有阿Kay讀依科。男仔就有阿龍同埋阿言! 睇落阿Kay都幾似MK女，打扮得好潮。而阿言就一般般咁，普通男仔。而阿龍真係人如其名，個樣幾有霸氣咁。
『我地一齊去Cafe到玩好嗎?』組媽Yuki問。
『..........』全埸靜了。
『哈哈!睇黎你地都好怕羞咁! 你地唔出聲就當你地ok la!我地出發! 』組媽Yuki就帶我地行。
一路行，大家都各自各行，組媽Yuki同組爸Peter睇黎仲緊張過我地，為左打好關係，佢都係咁同我地傾計。我望一望阿雪，見到佢自己一個行，個樣真係好Cool。於是我就行埋去聊佢傾計。
『睇黎我地都幾有緣! 竟然會同一組! 』
『係囉!岩岩係咁遠見到你都覺得好驚訝!哈!』阿雪笑住咁答，依一刻佢又比我既感覺係開朗既女仔。我明白了，外表冷漠，但實質上佢係一個熱情同開朗既女仔。
『你知唔知如果唔識你既話，真係覺得你好Cool ! 』
『下?真係架? 好多人都咁講呀!』
『咁姐係我無睇錯啦! 哈哈! 不過都幾好既! Cool 有Cool既好! 』
『丫.......我唔Cool架! 只係有時侯唔知講咩好之嘛! 我好熱情架!哈哈!』
『有幾熱情先? 』
『丫....熱過熱帶雨林!! 』
『嗯。』 聽到阿雪攪左個爛Gag之後，我故意扮到目無表情地回應一個單字。
『喂丫.....比D反應我啦! 哈哈! 我都係唔識攪gag!』阿雪用手輕輕拍打我，此刻佢笑得好純真。
『喂喂喂! 你地又話岩岩識既! 又會咁好傾! 唔得! 我一定要阻止你地! 哈 ! 阿雪你跟我行! 』組媽Yuki拉開阿雪。
『唔好屈我呀!組媽!』我比佢講一講又有點暗爽。
既然阿雪行開左，我就搵第二個傾下計，就搵左阿言。
『HI! 阿言!? 我地到時會係同學黎! 』
阿言望一望我，頭dup dup咁 應我: 『你好呀! 』
『我都係讀Psychology 架! 我地第時會係同學!』
『嗯! 』
丫.....我睇得出阿言唔係想Hea應我，只係唔知點應我，突然間覺得好難搵到話題同佢傾咁。突然有人從後搭我膊頭。
『我聽到Psychology 依個字Wo! 你地傾緊咩呀!』原來係阿龍，估唔到佢都幾熱情，肯主動聊我地傾計。
『我地三個將會係同學! 我地要好好享受一下大學既生活! 』我順手搭埋阿言膊頭。
『咁我呢? 雖然我唔係讀Psychology ! 但你地會唔會唔理我先!』阿Sam都加入我地傾計團，因為佢見到其他三個男仔都痴埋一齊行，得返佢一個男仔，好似比人排斥左咁，唯有主動D加入我地。
『傻啦! 大家有緣痴埋一齊! 就係好兄弟!!』阿龍搭埋阿Sam膊頭!
『嘩嘩嘩!你地班男仔做咩咁Gay! 』組媽Yuki見到就大叫。
『睇黎我地都唔洗擔心你地玩得唔埋，咁快就Friend起黎!』組爸Peter開心地說。
我有預感，阿Sam，阿言同埋阿龍將會係我大學生活之中成為我既好兄弟。個一晚去到Cafe，都係分享大家既情史，我本人都無咩情史可以分享，唯有講下穎兒既事出黎，當佢地追問穎兒去左邊既時侯，我都答唔出，我已經有差唔多幾個月無同佢聯絡。
當阿雪分享時侯，佢竟然話從來無拍過拖，令我地好驚訝，估唔到一個優質股竟然無人認購。
『你地有男仔記得介紹我識呀! 哈哈!』 當阿雪講依句時侯，我突然間個心好想講不如考慮下我，聽到阿雪未拍過拖，加上個人咁宅，我好有興趣。
咦? 點解我愈黎愈對宅女有興趣? 係咪覺得好有安全感? 唔怕比其他男仔媾?
其實好多女仔都話需要安全感，但係男仔都好需要安全感，特別係我地依班小股民，無咩能力買到優質股，如果咁岩買到既話，真係好驚隨時有一日比其他人買左。
依一晚，大家都好快熟落，組爸組媽好識帶動氣氛，仲封我地幾個男仔做 "中大四子 "。
我幾鐘意依個名，哈哈! 我感覺到大學將會係我人生中既新一頁。
深夜十二點 。
返到屋企樓下時侯，撞到阿靜。
『你岩岩放工呀? 』阿靜問。
『唔係，今晚同O CAMP組員一齊出黎聚下姐。』我見到阿靜一身出街裝扮，估計佢都岩岩出完街。
『咁快就識到啦? 』
『係呀! 我地組媽打黎叫我地出去聚。黎近下星期我地又再出黎玩。』
『你地就好啦! 我仲未有人打黎囉。』
『你岩岩出完街?』我好想問阿靜岩岩去左邊到，最重要既係，佢同邊個出。
『嗯.....同阿風去左睇戲。』阿靜似乎吞吞吐吐咁講。
突然心頭一酸，意識到阿靜同阿風關係愈黎愈好，佢地究竟拍緊拖? 定係維持緊朋友關係?
係升降機入面，只得我同阿靜兩個人，我視線一直望住升降機既樓層顯示，慢慢咁向上升。
『其實阿風都幾好丫。』我說。
『下? 』阿靜似乎有點驚訝。
『讀書叻，高大靚仔，係女仔都鐘意佢，既然你同佢行得咁埋，可以考慮一下佢。』
『咁你呢? 』阿靜對我說。
『哈?! 我? 我咩呀? 』我唔係好明白阿靜既意思。
『都係無野......』阿靜頭dup dup回應。
到左我地既樓層，當我地背對背咁開自己屋企對門時，阿靜突然說出一句
『你好耐無黎我屋企食飯啦。』
『嗯.......最近成日返工都無咩機會，第時我住Hall就更加無機會。』我望住鎖匙，呆呆地說。
『嗯.....早抖啦。拜拜。』阿靜突然感到無癮，就關上左門。
我企係阿靜門口到，好似睇到以前著住校服既我走去阿靜屋企食飯，又見到我以前係咁禁佢屋企門鐘，又見到係阿靜屋到成日笑佢，玩佢。又見到阿靜成日黎我屋企玩.......
『唉.....』我暗嘆了一口氣。已經變成回憶，我同阿靜關係一直都好好，竟然短短幾個月之間，一下子就變哂。
返到屋企後，沖完涼攤係床上。無聊再一次拎起手提電話，開住Whatsapp睇下阿靜有冇上線，再睇下穎兒點。
一路望住阿靜顯示上線中，我心又亂諗埋一邊，唉! 明明之前我食住佢，我話一佢唔敢話二，好多野都係我教佢，我幫佢。但依家我竟然睇唔通佢，覺得佢好陌生，佢係咪真係變左呢?
" 輸入中....."
阿靜既顯示竟然變左輸入中，佢主動叫我? 於是我好緊張咁望住個status。過左一個字，都仲係維持輸入中....，係咪打咁緊篇文呀? 打咁耐既?
阿靜:
阿明，我今晚好唔開心，我依幾個月黎我只係見過你幾次，你更加無黎過我屋企食飯。我阿媽都問我你既近況點，我都唔知點答佢。我對你都開始唔了解，我好驚開學之後，大家各有各生活，而且你又要住HALL，我真係好擔心你慢慢離開我。我無咩朋友，都唔係好識同人相處，黎緊開學我都唔係好有信心可以同班同學玩得埋，每次我一諗起依到，我就諗起你。如果你唔係我身邊，我真係唔知點算。
阿明，你最近點呀? 你可唔可以答應我，唔好離開我身邊呀?
我呆了，估唔到阿靜會咁講，我就好似解碼達人咁，係到對佢既內容進行解碼，究竟佢咁講算唔算表白? 好想留我係佢身邊? 講到咁白，我係咪應該有D表示? 睇黎阿靜都好關心我同需要我，而且阿靜所講既野，正正就係我對佢既感覺。我都好怕阿靜開學之後，有左自己既圈子，慢慢同我有距離，慢慢由好朋友變成朋友，最後變成陌路人。
我個陣唔知點回阿靜，我個心又有刻暗爽緊，我係咪嬴左阿風? 阿風係咪比唔到依個感覺比阿靜?
話哂我同阿靜有咁多回憶同咁多年感情基礎，我諗我應該係依方面可以揪嬴阿風呀?
突然間，我對阿靜產生巨大好感。
我從來未試過聽過女仔咁同我講，而且阿靜既身體........丫。真係好吸引我。
阿明:
放心。我答應你，我一定會留係你身邊，即使我地唔同學系，但我保證! 我一定係你身邊陪住你! 黎近我搵日去你屋企食飯! 我好掛住你煮既飯呀!
阿靜:
咁就好。哈哈! 好呀! 你想幾時黎食! 我隨時都得!
阿明:
一言為定! 早抖啦
阿靜:
早抖 =]
依一晚，我係咁重覆睇阿靜既長篇內容，一路睇，我一路暗爽。睇黎我真係有機會同阿靜一齊。
(待續)
下回將會進入大學篇。
第一篇好似太多字，不過見係第一次，唯有貼多D試試反應。
第二日
我關上門準備返工時侯，望一望阿靜門口，不禁回心微笑起黎，我伸出一隻手，慢慢移去阿靜門口的鐵閘，當觸摸到鐵閘時侯，我閉起雙眼，靜靜地感受一下屋內的情況，聽到腳步聲，聽到碗碟的撞倒聲，我就知道阿靜就係我面前，我地既距離仲係好近。
我打開雙眼說 『好快我地就會見面。』
『好累呀!!可唔可以抖下呀? 』阿Kay係到怨辛苦。
依一晚，我地組爸組媽又約我地出黎玩，順便返中大練CAMP FIRE，所謂既CAMP FIRE 就係O CAMP其中一個環節─營火會。我地會整一個營火堆，然後會圍住堆營火跳舞，所以我地一定要識跳依幾隻舞。
跳舞好明顯唔係我強項，身體硬到成個機械人咁，你叫我跳舞真係會跳你老母。雖然D舞都係好簡單，但我對於記舞蹈，什至我連左右都唔係好識分既我，真係有難度。不過原來阿言仲比我更加屎。
『阿言!!係舉起左手呀! 唔係右手呀! 』組爸Peter邊說邊舉起左手。
『係……明白。』阿言頭dup dup說。
『好!我地再黎! 』組媽Yuki播起音樂再一次跳舞。
當我地開始跳舞時，組爸又再一次叫停。
『停停停! 阿言! 係你既左手! 唔係我既左手!』
『哈哈哈! 睇黎阿言唔識分左右喎! 』組媽Yuki說。
阿龍行到阿言面前，再轉頭說 : 『我企你面前，你係後面跟住我跳就得!』
『唔該你!』有阿龍係面前，阿言可以跟住阿龍動作做，總算解決跳舞的環節。
後來我地跳舞跳到悶悶地，就玩下D 小遊戲，例如”呯，BANG，嘩” ，我係熊啤啤” ，”朱古力呀彈彈波” 等等小遊戲。以前覺得依D遊戲好低B，都唔係咁想玩，但玩玩下又真係幾好笑同開心，開始感受到，原來開心唔係出自遊戲本身，重點係你同邊個玩。
『好啦! 今日到此為止啦! 下次見面就係O CAMP到見啦! 到時我地約埋一齊食早餐啦! 』組媽Yuki拜別我地。
返屋企個陣，突然有人從後輕拍我一下。
『喂! 』
轉身一望，原來係阿雪。
『咦? 你搭火車架咩? 』 因為我行緊去火車站。
『係呀! 之前我坐小巴返屋企，但依家返中大，咪搭返火車走。』
『哈! 咁我地一齊走。』
『係呢，你依排攪緊咩?』阿雪問。
『最近都係返工，不過琴日我唔做了，都黎到八月中，黎緊又要玩O CAMP同準備入U既野，應該都幾唔得閒，所以我唔做份工了。』
『咁咪好囉! 搵夠錢就可以專心去玩!』
踏進火車內，阿雪就問返之前係分享會分享穎兒既事。
『之前你提既穎兒聯絡返未?』
『未呀，佢走個陣都無留低聯絡方法，我地只係一直睇返佢之前既電話同Facebook，但唔見佢上線。』
『太可惜啦! 咁你依家有冇對像呀?』阿雪問。
『我……』當我想講我對像係阿靜既時侯，但我諗一諗。阿雪都係一隻優質股，我都唔排除自己同佢有發展既可能性，如果我依刻同佢講我對像係阿靜，可能會阻礙到我地之間既發展關係。
『我無呀! 你有冇好介紹? 』 我唯有講住大話。
『哈? 你有好介紹先要介紹比我呀!』阿雪輕拍我膊頭。
『你咁得! 遲早大把人媾你啦! 』
『有先算啦!』
個刻我真係想答: 『有呀! 咪係我囉! 』
返到屋企後，見到阿靜大門無關上，從鐵閘空位可以見到阿靜媽媽係到坐係大廳睇電視。當我轉身開門時，阿靜媽媽聽到鎖匙聲音後便大叫 :『明仔!』
『係! 咩事? 』
阿靜媽媽拉開鐵閘，再走入廚房拎左袋菜比我，叫我拎返屋企比阿媽。
『你都好耐無黎我屋企食飯啦! 』阿靜媽媽說。
『係呀! 之前都日日返夜班，不過今日開始唔洗做了，會多d機會黎你屋企食。』
『咁不如聽晚黎我到食啦! 我叫阿靜整d你鐘意食既野比你!』
『丫….好呀!咁幫我同阿靜講聲多謝。』
『大家咁熟! 客咩氣! 好啦! 聽晚見啦! 』說罷，阿靜媽媽便關上鐵閘同大門。
我返到屋內，沖完涼。攤上床上，決定send個Whatsapp比阿靜。
阿明:
訓未? 我聽晚黎你到食飯呀 =]
阿靜:
哈! 我知呀! 阿媽岩岩同我講左
阿明:
終於可以試你既手勢! 唔知你有冇失準啦!
阿靜:
聽日你咪知囉!
阿明:
好啦 =] 聽晚見! 早抖啦
阿靜:
早抖 =]
放低手提，望住天花板，希望可以順順利利。
直到聽晚，我沖完涼，執到個人整整齊齊就去左阿靜屋企食飯。開門既人係阿靜媽媽。
『明仔! 你等多陣! 等我炒埋條魚就食得! 』阿靜媽媽係廚房到煮餸。
『阿靜呢? 』我覺得有d奇怪。
『阿靜佢同人出左街呀! 今晚等我黎煮比你食! 』
『出左街……? 』 琴晚無聽阿靜講既? 佢唔係約左我咩? 佢唔係話好想見到我咩? 出街? 同邊個出? 阿風?
於是我拎起手提，send個msg比阿靜。
阿明:
又話煮飯比我食既 ><?
我盡量打多d符號，因為文字係冷冰冰，好多時雙方嘈交都係因為文字，因為文字表達唔到你既語氣，但加左符號就可以令到成句野語氣溫和好多。
舉例:
第一句: 屌你老母丫!!
第二句: 屌你老母丫><”
好明顯收到第一句既人都會覺得對方係認真，隨時爆返粗罵返對方。但第二句，好明顯係攪笑成份，收到都唔會嬲。
當我見到阿靜變返上線中時侯，唔洗幾秒又變返顯示時間。意味住佢睇完MSG後，就關返佢。
『黎黎黎! 食得飯! 』阿靜媽媽放低碟魚，就正式開飯。
算吧，都好耐無同阿靜媽媽食飯，唯有今晚陪下佢吧。係食飯期間，阿靜媽媽都係講佢個女多，同埋佢話最近阿靜主動好多，活躍左好多，街都出多左。
『咁咪好囉，唔洗成日收收埋埋。』
『我怕佢識埋D唔三唔四既人咋!』
『唔會既! 我會睇住佢!』事實上，我點睇住佢?
『有你睇住佢就最好啦! 你地由細到玩到大! 多得你成日照顧依個衰女。』
『哈哈! 其實阿靜都大過架啦! 你都唔洗咁擔心咁多。』
『望就咁望啦! 做人阿媽既! 邊會唔擔心自己個女呀! 養兒一百歲!長憂九十九呀! 你都要好好孝順父母呀!』
『我一定! 』
食完飯後，返到屋企，望下個鐘已經九點幾，老豆老母仲未返，其實我都好耐無見佢地，我返夜班時，佢地都返晏，當我放工時侯，佢地都已經訓左。我入到大學後，屋企人都無時間同我慶祝，而事實上，阿媽一直都好想我成為大學生。我總算完成佢既心願。
打開手提，阿靜whatsapp時間又變返上線中，但佢既然上線，點解唔回我MSG? 究竟阿靜諗緊咩?
聽日就係O CAMP既大日子，我係到執恰物品入袋時侯，阿媽拎左D錢比我。
『阿媽! 入去唔洗點用錢架!』 大概阿媽以為我係同班同學仔去CAMP。
『點都好啦，就當獎你入到大學啦! 你呀! 終於比你恨到入大學啦! 成日話青春青春! 依家終於比你去燃燒青春啦!』
無錯，我每次同屋企人食飯，我都會提起我要燃燒青春，我要入到大學後大玩特玩! 讀左十幾年書，終於可以拎正牌玩，以讀書，阿媽成日都話要捱左會考先可以玩，最後捱過會考，佢又話要捱過高考先可以玩，直到依家我捱過高考，阿媽終於可以比我放縱一下。
我拉上袋既拉鏈，諗左一諗。最近既生活太過枯燥，太過無聊。如果唔係阿媽提起，我差D就忘記左”青春”依兩隻字，我都差D忘記左我對O CAMP既期待。我要暫時好好放低心中既憂慮同不快，好好咁係O CAMP到盡情去玩。
執好野之後，攤係床上，興奮既心情一時之間禁唔住，心中既青春氣色一下子湧現出黎，真係好想即刻就係O CAMP!
望住天花板，諗起好多人都話，大學係一個天堂，入面好多女，好多野玩，見識好多，你諗得到既野入面都有。加上好自由，鐘意上堂就上堂，鐘意走堂就走堂，冇人理你，冇人管你，加上大學生感覺上好似天之嬌子咁，儘管好多人話 " 通街都係大學生" 。但事實上，香港得18% 升u 率，仲要係UGC學位更加少。身邊親戚，屋企人都當左我係皇帝仔咁，一時之間，令我覺得大學應該係幾美好幾青春呢…....
想著想著…….不知不覺地就訓著左………
直至聽日，正式開始為期三日兩夜既O CAMP，究竟大學既O camp係咩一回事呢? 每年都聽到唔少人討論O camp好同壞，又有人話一生人點都要玩一次，又有人話O camp只係D低能自High既活動，如今終於好好比我印證以上所有言論，O camp! 我黎啦!
今日天氣非常之好! 完全係燃燒青春既好日子，當組媽係到點緊人數既時侯，我拉左阿龍阿言同埋阿Sam一齊指住個天大叫: 『我地中大四子正式殺入中大啦!』
阿龍率先帶頭以一身霸氣姿態大叫: 『殺佢老味!!!!』
阿言則低著頭，托一托眼鏡 ，慢慢地說: 『殺……殺……佢老味。』
阿Sam突然轉哂話題問我 : 『阿明你琴晚有冇打飛機? 』
『做咩咁問? 』
『我睇你好想發洩所有精力咁，怕你唔夠洗。』
『挑! 你識條春! 唔夠精用咪拎你D精黎用! 』
我發覺我地之間既對話愈黎愈露骨，但我地只係識左一個月都無，見面次數幾隻手指就數得哂，竟然可以咁熟，證明左大家都玩得之人，同埋岩Key之伴。
『喂! 阿言! 比D動力黎睇下啦! 咪成日咁龜縮啦! 』阿龍大大力拍一拍阿言膊頭。
我行埋阿言到，再搭住佢膊頭說 : 『老老實實，你真係有D毒! 不過唔怕! 有我地係到，一定會感染到你! 』
『其實我都知自己毒架啦.....唉! 最緊要你地唔好笑我就得! 』 阿言托一托眼鏡講。
『笑? 有咩咁好笑! 拿! 入大學有冇目鏢先? 』
『我想我Facebook人數可以有幾百人.......』 估唔到阿言既目鏢竟然係想Facebook有幾百人。
我聽到之後即時大笑起黎，估唔到阿言既要求係咁。
『咁你Facebook依家有幾多人呀? 』阿龍問。
『自己朋友唔多，朋友數量一百個都冇，眼見身邊既同學冇三百，都有二百個，但自己就...... 雖然話自己唔介意依d野，反正大把人都亂add，唔通真係五百個Friends ，就真係五百個都識同埋熟咩。』阿言愈講愈激動。
阿言接著說:『但我一諗到……屌! 唔洗咁強烈對比呀? 起碼我都要有一百個啦! 所以好想add多D人，貼多D O camp相係Facebook!我仲帶左部相機黎。』阿言係袋到拎出一部相機。
我拉住阿言隻手舉高向天，大叫 :『哈哈!好好好! 我地就影多D相! ADD多D人! 識多D女! 我地中大四子一定要玩轉中大!』
『你地班男仔大叫完未!快D黎集合! 』組媽Yuki拉我地過去。
組媽Yuki要我地即刻換上Camp tee，一下子個時間同氣氛好似好急咁，之後又派左D腰包比我地裝手提電話同銀包。坐埋中大校巴上去學院後，突然有一班好響亮既聲音大叫:
『歡迎黎到中大社會科學系O camp! 由於時間緊逼關係! 我廢話唔多講! 我地就正式開始我地三日兩夜既O camp！我地個學院咁大咁多科咁多人! 我地將會分三個大組! 去到完個一日! 邊個組最低分! 我地就要佢收皮! 好唔好呀!!』負責O CAMP既MC大叫。
『好!!!!!!』全埸人大叫。
『收佢皮!!!』MC再大叫。
『收佢皮!!!! 』全埸人和應。
『收佢皮!!!』MC再大叫。
『收佢皮!!!! 』全埸人和應。
氣氛好激昂，唔講以為依家準備出去打仗咁，唔通依個就係我夢寐以求既O CAMP!?之後我地班人分成三組，三組之下再細分幾組，好似三組要互鬥咁，我地團長又比口號我地叫，大家都叫得好落力，拍子又齊，一路叫口號一路係到踏地，踏到個地板都識震，埸面相當震撼，我對自己講: 『要放鬆心情!盡情投入個O camp!』
大學O camp 必玩之一 既活動就係 Hong Kong Hunt ，我地會被分發一張印左所有香港著名地方，港九新界都有，每個地方都有唔同既分數，而且每到一個地方都要做大會所定既特定動作或者行為先有分加，愈遠愈高分，地點要係中大出發，時間九點開始，五點前一定要到西貢個營地。
『各位組仔組女，Hong kong hunt係一個好辛苦既活動，加上依家個天氣咁熱，我怕你地頂唔順! 所以記得帶多D水! 如果有唔舒服記得要講比我地知! 』 組媽Yuki關心地說。
『你地所有行季會由工作人員用車運送去西貢，所以我地可以輕裝上陣，大家要加油! 我同組媽會係背後幫你地撥扇，唔會比你地熱親。』
時間一到，我地組大叫口號之後，就正式由中大出發，享受三日兩日既 O camp!
出發前，我地都開始討論我地路線應該點做，點先可以揀一條又唔會行得太遠又可以拎到好高分既路線，而大家都好主動咁分享自己既意見。
而我企係格離望一望個天，天氣真係好好，有陣涼風吹來，令我更加舒服。再望一望討論緊既組員，我好似感覺到一陣青春熱血既氣色慢慢湧出黎……後來我地開始走哂好多地方例如去左旺角，去左城大，浸大，星光大道，灣仔，黃大仙等等，做左好多平時唔會做既野。
例如，我地係旺角馬路訓低一分鐘! 又或者一路跑，一路係條街到大叫口號。
以街外人既角度黎睇，依D行為同on9仔無咩分別，堂堂一個大學生，二十歲都黎，竟然做埋依D野? 而且隨時會煩到其他人，成何體統?
其實依D所謂既大學文化要討論既話真係講到死個日都無答案出黎，始終公有公講，婆有婆講。但對我地黎講，依d行為，我將來肯定以後都唔會再做，既然依家有機會做一d 平時唔會做既野，又可以攞正大學生既身份去做依D野，何樂而不為? 唔通每個人都要正正常常過日子嗎?
後生仔，熱血過，青春過，第時先唔會後悔!
我成日強調一樣野 " 唔柒!!就唔係青春!!"
所以我地一路上都好Enjoy。而且，我地見到格離大學既人都玩緊Hong Kong Hunt ，我地都係到交流，因為如果我地同其他大學生合照會有分加。同時間，我留意到阿言個人有少少毒，而且好似無咩膽去玩，玩依D活動都唔係玩得咁放，仍然有一D顧慮。
當我地準備行去火車站時，我同阿言講 :『不如我地一路跑過去一路叫口號!』
阿言猶豫左幾秒後，再答: 『好!』
二話不說，我就即刻跑起黎，然後放盡喉嚨大叫口號! 當我一路跑一路叫既時侯，我感覺到有陣風從後慢慢吹上黎，我望向我身旁時，見到阿言係我格離追上黎，我地兩個人一路跑一路對望住大家，都不其然地笑了。突然間，我地都感覺到大家都有個念頭就係 ”爬你頭!” ，於是我地鬥跑去火車站。
係後面既組員見到我地突然間咁爆，都唔執輸，一路從後跑上，而且一路大叫: 『等埋呀!』
如是者，我地成日有意無意都會邊跑邊叫 ! 叫到聲都沙埋，個感覺真係好正，好似有好多壓力積左係個心到，經歷左公開試既煎熬，一直屋企人催逼讀書咁耐，依一刻終於可以放低所有野，一一發洩出黎。
去到最後，我地去到Camp Site時侯，發覺仲有十分鐘就遲到。
組爸Peter突然話: 『落車之後大概有200米距離先到，所以落車要即刻跑去!邊個最早到，成組都會當Pass!』
我即刻將身上既物資交比身旁既阿雪，之後阿龍向我打眼色，睇黎佢想同我賽跑返一轉，我一於奉陪到底。 我地兩個麻甩佬係架巴士入面做熱身，又係到扮D健美先生狂Show肌肉，埸面好攪笑，班女仔見到都頂唔順，係咁話:『我睇唔到你地有肌肉囉! 只係見到你地真係好”Gay”囉!』
阿言見到我地咁，都將身上既物資交比阿Sam。
『你想做咩呀?』 阿Sam望住阿言問。
『跑囉! 』阿言有D呆然。
『你都係收返皮啦，你邊夠佢地跑姐! 由得佢地跑啦! 』說罷，阿Sam就掉返D物資比阿言。
阿言仲係到傻頭傻腦咁，係到諗:『咦? 係咪唔洗我跑呢?』。
落車後，我同阿龍一路跑，我就一路諗，我今日都跑左好多次，整段時間我不斷對我D組員講 :『我地要燃燒青春丫! 』
諗下諗，真係好似d日劇咁，成日都係到跑呀……跑呀......跑.呀…..之後個主角就係到回憶，一直都覺得好造作，係咪真係咁多回憶同係咪真係咁需要跑呀?
屌! 今日一試，原來個Feel真係好正。
後來返到Camp site，開始玩一堆集體遊戲。至於所謂既意淫 Game，其實又唔係話D太過份既野，報紙同傳媒都過份吹大左，其實D遊戲完全可以接受，仲玩得幾開心。
個一晚我沖完涼，本來組爸組媽話今晚唔準訓，一齊玩通頂 ，但最後大家唔知做咩事都係訓左。
而我都累累地訓係張床到，真係好累......好累......
呆呆望住天花板，忍唔住拎部手提電話出黎，阿靜仲未回我既Msg，究竟佢諗緊咩? 唉，突然間好掛住佢，點解唔回我Msg? 係唔係收唔到我既Msg? 但無理由……明明見到個Whatsapp有兩個Tick號，姐係代表佢收左，但收左又唔回既? 佢想吊我癮? 但有必要對我咁做咩? 唉……都係唔好諗，我實在太累。
當我轉身時，驚見阿雪訓左我格離，距離好近，令我有d 驚訝。
睇黎佢已經熟睡，而我卻有意無意地，係到望住佢，其實阿雪真係幾正。
女仔訓覺既樣真係幾好睇，個樣好似岩岩出世既BB咁，呆呆地，一副天真既樣。加上我好少同女仔訓得咁埋，身體突然間感到唔好意思，什至發熱。
我再轉返身，望返天花板 。
暗嘆 : 『黎近大學依三年，我真係會體會到唔同既野……』
訓前再望一望阿雪熟睡既樣，細細聲講句: 『早抖!』
****************************************************************************