《我將一位宅女變成女神，然後再將自己變成佢隻兵》: 上集 (7)

第二日
 
返到學校，當我上緊堂既時侯，我就收到阿風既Msg
 
阿風:
阿明，聽阿靜講你肯同我一齊組莊，首先唔該哂你先，希望我地合作愉快
你今日返左黎學校嗎? 我地今日會係下午三點係范克廉樓地庫既Meeting room開會
到時上莊既人都會黎，到時見。
 
我放低手提，呆呆望住Professor係到講書，我無諗阿風點解有我電話，大概都估到邊個比佢。我腦海只係到諗組莊既事。




阿靜講得岩，我覺得作為一個大學生，好應該為社會做返一d野，為社會不公義發聲 ，既然答應左阿靜，我就要做好佢。
 
落堂後。
 
『阿明?去唔去食下午茶? 』阿龍問。
 
『唔啦，我要去開會。』
 
『開會? 開咩會呀? 』阿龍好驚訝。
 




『我去選學生會。』
 
『你之前唔係話唔選咩? 』阿雪亦都好驚訝。
 
『諗諗下都係去吧。』我講唔出口係為左阿靜既要求而去。
 
『阿明，其實我地都想選，不過.......』阿言說。
 
『你指我地....係?』我都有d好奇。
 




『無，上次聽你提過學生會，之後我地傾計個陣都有講起，我地都想去選，仲諗住睇你可唔可以同阿風講預埋我地姐。』阿龍說。
 
『哈，原來你地都咁有心，好啦。我一陣去開會個陣，我同阿風講下仲有冇位一齊上。』
 
『記得預埋我!』阿雪拍一拍我膊頭。
 
『好啦，唔講啦。我去先。拜。』我揮一揮手，就去左阿風個到開會。
 
到達後，見到十幾個人坐哂係到等開會，而且有部份人已經係到傾計，講笑。無一個人係我識得，我唯有毒毒地坐埋一邊等開會。
 
當阿風到左之後，向我打了一個眼色，就正式開會。
 
『首先，我想介紹一下上年學生會幹事既人都係到，佢地都會全力支持我地今次組莊，而且都會比好多意見我地。根據我地自己查既資料同意見所得，上年學生對學生會既滿意程度都算唔錯，根據咁既民意，有左佢地既民意基礎，我地要選其實唔難。而我係今年既會長，我都搵左唔少唔同學系既人黎組莊，包括同我讀同一科既政政同學，心理學同學，社工學同學等等。我都準備左幾份文件，都因應你地意願同埋我觀察，安排左職位比你地。』
 
阿風就向大家派發幾份文件。




 
當我收到後，望一望職位，我好驚訝。
 
會長 劉俊風         副會長 葉樂欣     外務副會長 黎嘉銘            財務秘書 李婷     秘書/內務秘書 劉旋旋      外務秘書 張志雄 福利幹事 彭嘉樂       其他幹事-常務劉啟明區少祥 梁思因
 
點解……點解我係做常務工作?
 
『阿風! 點解我係編左去做常務? 』我忍唔住出聲問阿風。
 
當我發言後，全埸都人望住我，佢地都係到諗" 依條友邊個黎? "。
 
阿風望一望份文件，再對住我講: 『我唔覺得有咩問題。』
 
『你都知我好留意時事政治，我上學生會都係為左社會，依類外務工作，我好應該擔當去做外務副會長，點解我會去做常務?』
 




『我係黎嘉銘，姐係名單上既外務副會長。你係.....常務既...邊個?』黎嘉銘一路問一路睇張名單。
 
『佢叫劉啟明。』阿風對佢說。
 
『哦!劉啟明! 聽你所講，你覺得你留意時事政治依類外務工作得多，所以好應該做外務? 咁姐係代我地全部學生都唔留意時事，都係政治冷感既人啦?係咪?』 黎嘉銘說。
 
現埸即時傳出零聲笑聲。
 
『我唔係咁既意思.......只係阿風不嬲都知我好想做依個職位，而我都係因為咁既原因而上學生會。』
 
『阿....阿明! 我諗你攪錯左，我從來都唔知道你好想依個職位。』阿風笑笑口說。
 
現埸再一次傳出零聲笑聲。
 
『你講咩話?』




 
『其實做咩職位有咩所謂，我地攪好校政，先再去處理外務先啦。最重要我地要選到，ok? 』阿風說。
 
『但係.......』我堅持地說。
 
『夠啦! 我唔想再係依d位到再討論落去，我編左就編左，其他人都無意見，就通過吧。我唔會再改。』阿風接著拎起第二份文件再討論落去。
 
我無奈地坐低，再望望名單上佢地既科，再望望佢地同阿風既對話，好明顯佢地同阿風好老友，而且個勢好似係阿風食住佢地，但佢地全部都欣然接受，佢地根本就係小圈子，我依個外人根本無意見出。而且安排既位全部一早定哂，都無問過我既意見，夾硬將一班人組埋一齊......我諗起阿龍佢地，睇黎都無位比佢地加入。
 
整個所謂既組莊會議，都係小圈子形式，全部都係阿風安排好哂，我地只係默默咁接受，班人又係到講笑，係到玩，好熟悉。而我咩人都唔識，靜靜咁睇下文件咁，之後係咁話" 無問題 " ，"無意見 "。
我係到做緊咩? 我為左咩而上學生會 ?
 
唔得......唔可以咁! 我已經Under阿風，我唔可以連外務都做唔到，到時講行動攪組織都唔係我話事，我變左一個Follow者，完全違背我當初上學生會意願，攪校政又唔係我強項.....我決定唔返hall，我要好好搵阿靜講清楚點解咁，於是我keep住成肚火返屋企搵阿靜。
 
『叮.....噹....叮.....噹。』 我狂禁阿靜屋企門鐘。




 
『阿明? 你無返Hall咩?』阿靜開門後，覺得好驚奇。
 
我係袋到拎左張名單出黎比阿靜睇 : 『你睇下依份野! 係阿風編，佢編左我去做常務!而唔係外務呀!!你都知我上學生會都係為左攪外務，而唔係攪校政! 你知阿風知，點解仲要咁做? 咁做姐係玩我姐?』 我激動地說。
 
阿靜拎張名單睇一睇，然後微笑回應: 『做咩位有咩所謂，學生會係屬於大家，到時攪外務時一齊攪咪得囉。』
 
『你根本唔明，每個職位就係佢要做既野，如果我唔係做外務，我根本無權去組織件事，都無權去進行決策， 而阿風又同佢地咁老友，我根本無得出聲，如果我唔做依個位，我仲點做事?』
 
『你都識講啦，係阿風話事架啦。到時你同阿風講咪得囉!』
 
『你.....你根本唔明白我講咩!!! 阿風佢會聽我講咩? 佢地根本就係小圈子!!』
 
『好啦好啦!唔好嬲唔好嬲。你答我，係咪一定要做外務先可以參與時事，政治?』
 
『.....唔係....』
 
『你都唔好咁功利啦，做咩位有咩所謂。乖啦，好冇?』
 
『我唔係功利...只係.....』
 
『好啦好啦! 既然你都做左常務，好應該好好去計劃一下來年，諗下點為我地謀福利啦，唔通我地班中大學生又無需要去照顧同關心喎?』
 
『我.......唉! 你講得岩。』
 
『係囉! 而且黎嘉銘係攪開社運既人，講經驗佢真係好多，你咪跟下佢學下野囉。』
 
『但係我......』我開始灰灰地。
 
『唔洗但係啦。食左飯未呀? 我叮返熱d飯比你好嗎? 』
 
『好......唔該。』
 
『唔好咁灰啦個樣! 笑下啦! 快d快d! 笑!』
 
我好牽強咁對住阿靜微笑。
 
『哈!咁咪係囉! 入黎啦! 』說罷，阿靜就去廚房叮返熱d飯，而我......唉。係阿靜面前，我真係做唔返自己。
 
同阿靜食完飯，返到屋內，沖涼個陣諗左好多野，阿靜講得岩，講到底，我內心深處都可能為左成名而想做外務，有咁既諗法已經唔係真心為社會，而係為自己。咁樣覺得對唔住一班需要幫助既人，咁樣同我平時所僧恨既政黨所做既野無分別。既然無得做外務，我唯有做返本份，攪好校政，幫學生謀取最大福利。
 
沖完涼，返房後，開燈後，便著手開始研究一下過去學生會既常務所做既野，同埋參考一直以來做既內部學生意見調查，同樣去各大論壇睇下平時學生對中大有咩意見，當中既意見都可以比我參考。
 
於是依一晚，愈做愈起勁，做左好多數據研究，暫時起左一份草稿可以做常務既理念同政綱。我拎起依份稿，覺得好滿足，唯有做一個歷年最好既常務吧。
 
*************************************************************
第二日
 
由於上午無堂，所以相約左阿雪佢地食lunch，順便開始做Project。
 
『唔好意思，我諗學生會無位比你地加入，因為已經搵哂人組莊。』
 
『唔緊要啦，都預左啦! 唔洗唔好意思喎!』阿龍拍一拍我膊頭。
 
『喂!你地係到食野呀?』阿Sam突然從後出現。
 
『喂!阿Sam!好耐無見。』 事實上，由於唔同學系，我都好少見到阿Sam。
 
『聽講你選學生會喎!』阿Sam對我說。
 
『係呀……』
 
『你就威啦!可以同佢地班人選，聽講個會長幾猛料，第一日已經搵到班老鬼幫佢手。』
 
『老鬼?』阿雪問。
 
『姐係以前上學生會既幹事。』阿Sam解釋。
 
『唉!我仲諗住中大四子可以一齊選學生會!』阿言說。
 
當我聽到阿言咁講既時侯，內心突然有種唔舒服既感覺，好似有樣野屈住屈住係個心入面。
 
『不如我地組返支莊同佢地憾過啦!』阿Sam建議。
 
『我地又組? 得咩?』阿龍問。
 
『你都傻既，點解我地唔選得? 我地一於組返支莊憾佢老味!』阿Sam愈講愈起勁。
 
『哈哈! 我又選! 我要做中大民主女神!』阿雪舉埋手。
 
『不過人地勢力咁大，點憾呀! 輸梗喎!』阿言說。
 
『有咩所謂呀!輸咪輸囉! 致在參與姐! 拿! 我地一於各自搵人，睇下邊個想選又岩心水既，就叫佢地一齊組莊啦。』
 
當佢地幾個人係我面前傾組莊既時侯，我感覺到好似被人孤立咁，好似依個地方唔再屬於我咁，而令到我被人孤立既兇手，就係我自己。睇住佢地傾組莊傾得好開心，好起勁，覺得佢地好熱血，雖然好似阿言所講，勝算好少。但係至少佢地參與過，即使輸左，我相信佢地之間既友情一定更加好，已經仲會得到一份回憶，一份經驗。
 
『咁邊個做會長先!』阿雪問。
 
『依D咁惡哽既位我無興趣。』阿Sam搖頭說。
 
眾人望住阿言，阿言即時說: 『拿拿拿! 唔好望住我呀! 你知我不嬲毒毒地，依個位唔岩我架。』
 
『就阿龍你啦!』阿雪指住阿龍。
 
『得啦!就咁話啦!』阿Sam拍一拍張桌，一致讚成。阿龍都欣然接受。
 
阿龍見我好似無人理咁，於是笑笑口咁對住我講: 『叫你個會長輕D手，唔好殺得我地咁盡就得啦! 』
 
『係囉! 你依個外務都要手下留情?』阿雪都笑笑口講埋一份。
 
『外務?』 我問。
 
『你唔做外務邊個做呀? 喂喂! 唔好講依D住，我地傾返Project先!我一陣趕住幫人補習!』阿雪隨即收埋碗筷，係袋到拎部手提電腦出黎。而阿Sam都去左買野食，我地就繼續傾。但我腦海仍然無法專心，同埋…….我講唔出口……我其實唔係做外務。
 
********************************************************
 
幾日後，阿風再一次召集我地開會。
 
『報名日子仲有幾日就到期，係到想大家簽返D文件，我地就計齊人就會去交表。』阿風說罷，便傳上文件比各人。
 
我望住張表格，不禁暗嘆了。不斷說服自己都係做野姐，無所謂啦。
 
『講返正題，黎緊我地會草擬一份政綱去選，每個職位都需要草擬一份來年政綱出黎比班學生去睇。』
 
政綱? 我即時諗起我之前通頂做左份政綱出黎，如今可以大派用埸，於是我就係袋到拎份文件出黎。
 
『講起政綱，我草擬左一份常務黎近既政綱，我已經研究左過往既常務政綱，同埋參考左好多既意見，我覺得依份好岩做常務既政綱。』說罷，我傳上份野比阿風。
 
阿風打開文件睇左兩眼後，就笑笑口講: 『我都無叫你做份野，你做咩走去做既?』
 
『份外事姐，何況遲早都要做。』
 
阿風搖頭說: 『唔洗咁麻煩啦，我已經一早幫你地寫好哂你地所屬既政綱，你地返去背熟佢就得。』
 
『咩話?』 我好驚訝說。
 
阿風叫一叫身旁既人派發大家所屬既政綱，當我收到後，我望一望份野，發覺份政綱同上年無咩分別，只係字眼上改動左少少，講到底，姐係抄返上年份野。
 
『依份野同上年有咩分別?』我質詢阿風。
 
『上年做得好，用返上年既野有咩問題? 大家話係唔係?』阿風問一問大家。
 
各人都笑笑口回應: 『仲好，慳返唔少功夫去寫，我依排功課開始多啦。』
 
『阿明你太認真啦，有時D野唔洗咁認真，而且我收到風，好似得我地一支莊選，我地嬴緊既，唔通班學生投不信任票比我地咩? 哈哈哈! 咁姐係中大無學生會? 點會發生呀!』
 
各人都以笑聲和應阿風。
 
『呯!』我拍一拍張桌，然後起身離去。
 
阿風見到我咁時，都扮出一副無奈樣，笑笑口攤開雙手。各人都暗暗地各自笑。
 
當我打開房門準備離開時，阿風突然大聲說
 
『我唔知你依家走係去廁所丫，定係唔同我地組莊，不過我好肯定咁講，由於無人同我地憾莊，我地支莊一定會嬴。你走左，就會無左個上莊機會。你要好好諗清楚。』
 
我企係到諗左數十秒，然後慢慢轉身對住阿風講
 
『Sorry，我諗你收錯風，今年唔會得你地支莊選，因為將會有一支莊同你憾過。』
 
說罷，我大大力關上門。全埸人都因為我剛才既說話而靜了。
 
阿風望住已關上既門，暗暗地說 :『我就睇下你有咩本事同我憾。』
 
離開會議室，我即刻拎起手提打比阿龍。
 
『喂?』阿龍問。
 
『阿龍.....你係邊?』
 
『同阿雪佢地傾緊組莊既野呀，你開完會?』
 
『嗯，我過黎搵你地。』
 
我掛線後，就氣沖沖搵阿龍佢地。我實在忍無可忍，我唔想再做一隻任由阿風擺佈既扯線公仔，竟然可以無視我既努力，而且想用上年既政綱黎過骨，根本唔係為左學生而選學生會，不知所謂。我再留係到有咩意思。
 
去到lecture room後，阿雪佢地都見我好似好嬲咁。而我見到佢地桌上都寫滿參與學生會既事項，而且有張組莊表。
 
『你無事呀嘛?』阿雪關心地問。
 
『我退左莊。』我坐低透順條氣後說。
 
『退莊? 點解呀?』
 
『佢地圍內根本就係小圈子，無心參選，全部都係聽個個劉俊風話事，咩職位都分好哂，而且政綱仲係用返上年，我再留係到都無意思。』
 
『你同佢地講左?』阿言問。
 
『嗯......我仲好型咁話會同佢地憾莊。』我無得到阿雪佢地同意就講左依句說話比阿風聽，好似唔係幾岩咁。
 
『好呀，講得好呀! 一於你同我地組莊同佢地憾過!』阿龍說。
 
『咁我地中大四子就可以正式組莊選學生會!』阿Sam說。
 
『阿龍，唔知你......介唔介意比我做會長? 因為.....丫....』我對住阿龍說。
 
『明既，你想親手砌低阿風呀嘛。當然無問題，我地都係無人選先焗住叫我做姐，你做不知幾岩。』阿龍似乎無介意。
 
『咁就好! 我地又多一個新莊員!』阿雪興奮地說。
 
阿Sam企上張桌大叫: 『過幾日我地交表參選，正式打柒格離支莊!』
 
見到佢地唔介意比我突然加入，令我感到好意外，佢地真係我既好朋友，而且我正式參選中大學生會會長，責任重大，由依一刻開始，我一定要會盡心盡力，為我支莊，為我既好莊員，一定要選到學生會，打低阿風。
 
同阿雪佢地傾埋D細節野後，我就獨自返左Hall。返返房後，放低袋同匙卡，發現電話有好多Whatsapp我未應，阿靜佔左大多數。
 
阿靜:
阿風話你退左莊，發生咩事?
 
阿靜:
你係邊?
 
阿靜:
打比我OK?
 
阿靜:
做咩唔應我，我好擔心你
 
我望一望D Msg，阿靜好似真係好驚訝我退莊既事，其實對我黎講，退莊唔係咩大件事，反正都無人在意，我留係到只會淪為笑柄。
 
阿明:
我同我班朋友組莊，所以退莊
 
阿靜:
你朋友? 做咩咁突然?
 
阿明:
我唔想講，總之我就組莊同阿風佢地憾過，係咁。
 
接著我就熜左電話，放埋一邊。攤係床上，呆呆望住天花板，遞起一隻手係面前，依家我手上有一班莊員支持我，佢地都以我為首，我唔可以再咁頹，我唔可以浪費左佢地心機，我唔會令佢地失望，雖然要嬴阿風有好大難度，但我相信，中大選舉唔會咁兒戲。
 
我即刻起身，將阿風之前放低既所有文件都拎哂出黎睇同研究，我要了解佢地既政綱同政策，我再可以進行部署，今次我一定要志在必得。
 
**************************************************************************************
 
第二日，阿雪佢地各自都搵到有意參選既人一齊開會，因為我地要正式填參選表，最後我地確定同參考各人既意願，經過長達六小時既會議，初步計劃左黎近既競選路線同埋人選出黎。
 
會長 劉啟明
副會長 陳文樂(阿Sam)
外務副會長 李展龍(阿龍)
財務秘書 李紫欣
秘書/內務秘書 黃小雪 (阿雪)
外務秘書 何尚言(阿言)
福利幹事 黃志良
其他幹事
常務 (學術)伍永康、(社會)陳麗明、(宣傳)蕭志健
 
正式同以阿風為首既莊憾過
 
會長 劉俊風
副會長 葉樂欣
外務副會長 黎嘉銘
財務秘書 李婷
秘書/內務秘書 劉旋旋
外務秘書 張志雄
福利幹事 彭嘉樂
其他幹事
常務 鍾澤健   區少祥  梁思因
 
『大家，選學生會係一件好漫長，好辛苦既事，正式投票日大約係二月中，姐係我地要作戰幾個月，希望大家可以團結一致，做好自己本份，一齊奮鬥，好嗎?』 係會議室上，我對各位莊員說一句奮勉既說話。
 
『阿明! 我地睇你頭架啦。』阿龍送上一個大拇指比我。
 
『好啦，今日都辛苦哂大家，今日就到此為止。』說罷，各人都各自離去，而我都係到收恰D文件準備走。
 
『一齊走?』阿雪問。
 
『哈! 你又知我唔返Hall? 』我感到有點意外，阿雪好少主動約我一齊走。
 
『今日星期五，我估你都返屋企架啦，咁岩大家都係要搭火車，咪叫埋你。』
 
『好呀，一齊走。』我微笑回應。
 
離開校園，天色已晚，我同阿雪慢慢行去中大巴士站等校巴，順便傾下計。
 
『你終於似返個人。』阿雪邊行邊說。,
 
『下? 』 我好驚訝阿雪點解咁講。
 
『之前見你一直都好似好頹咁，無咩精神咁，我估你應該心事重重。不過依家見你咁樣，我都放心D。』
 
原來阿雪一直都留意住我，一直都知我無咩精神，原來佢都關心我。
 
『可能睇通左D野，但....又好似睇唔通D野咁。唉! 我都唔係好知自己想點。』
 
『哈! 男人煩都係兩樣野，一係錢，一係女人! 咁照計你讀緊書都唔會煩錢銀架啦! 咁姐係煩女人啦! 係咪追緊女仔呀?』
 
『係呀! 咁都比你睇穿，我煩緊點樣追你! 哈哈! 』
 
『咪擺我上枱啦你!』阿雪輕輕打我。
 
『咩你唔追得既咩?』 為左唔洗個氣氛因為我既說話咁尷尬，我故意說話時輕挑D，但有時說話就故意認真，等阿雪分唔清我係講緊笑定係認真緊。
 
『哈! 你堂堂一個會長! 點會睇得起小小既莊員呀!』阿雪似乎想扯開話題。
 
對話間，阿雪既說話態度同行為，令我腦海諗起一個人，一個好耐無聯絡既人- 穎兒。
 
『係呢，你記唔記得我地係O camp個陣，夜晚玩房Game玩First impression呀?』阿雪問。
 
『記得! 班死仔係咁問埋D咸濕問題丫嘛，咩邊個係唔係處，扑左野未個D。』
 
『頂你!唔係講依D呀! 』阿雪又輕輕打我。
 
『哈哈! 唔係依D係咩?』
 
『有一條問題係你最理想情人係邊個呀。』阿雪說。
 
『哦.......記得，我地男仔選哂你呀嘛。你就威啦。女神。』
 
『咁你知唔知我地女仔選左邊個呀?』阿雪笑笑口說。
 
『係喎! 我都未知，我玩玩下比人捉左出去玩其他game，返黎個陣你地掉鬼左張紙。』
 
『哈哈! 係阿Sam話要掉架! 佢話唔想比你認叻!。』
 
『你咁講，姐係你地班女仔選我為最理想情人? 』我有點意外。
 
『明知故問! 哼! 都話你認叻架啦。』阿雪故意整個鬥氣臉出黎。
 
『哈! 咁我地咪好夾? 你又選到，我又選到。』
 
『你又知我投左你一票?』阿雪問。
 
『唔知呢。』
 
校巴到左，我地對話被打斷，上車後，阿雪已經講緊另一樣野。
 
『我記得我地選邊個係毒男既時侯，我地全部女仔都一齊講係阿言個下好好笑呀!』阿雪諗起都已經笑到收唔到聲。
 
見到佢面紅既樣，總覺得係佢身邊，我會感到好舒服。
 
去到火車站，等緊火車黎緊既時侯，阿雪又問左我一句。
 
『喂!你都未答我! 你煩緊咩女人姐? 』
 
『煩女人咪煩女人囉! 哈!』
 
『死仔! 你答我一句就得，你係咪依家有鐘意既人呀?!』阿雪問。
 
我即時用腦係到諗，究竟有沒有呢，個腦只係出現左幾個人物 ，但真是鐘意定出於好感? 我腦海只浮左兩個女士，一個就係阿靜，一個就係阿雪。
 
當阿雪見我無回答，就問多一句 :『呀...你答我係唔係讀Psychology就得。』
 
我唔知道阿雪出於咩好奇心定係點而走黎問我，但我故意將個頭挨向阿雪既耳仔到，
 
輕輕說一句: 『唔知呢~』
 
阿雪聽到後不斷輕打我，係咁叫我講，此刻令我覺得好開心，原來同阿雪相處真係唔錯。
 
『哼! 依家D人威啦! 做左會長之後，個人都風騷左咁多。』
 
『嘩!咩叫做左會長之後，你講到我依家真係做左咁。』
 
火車黎到，我地仍然係咁傾計，阿雪坐我身旁，近距離望住阿雪，當阿雪講緊野既時侯，我其實無咩留意佢講緊咩，我一直望住阿雪既樣，留意佢講野既神態，眼神。阿雪依隻股票同阿靜比，真係嬴幾條街。不過，當我個腦將阿雪同阿靜比較既時侯，我個心又好似"拿住拿住"咁，因為我清楚知道，我唔可以就咁拎佢地兩個黎比，我同阿雪只係識左幾個月，但我識左阿靜好多年，我內心上仍然偏向阿靜。
 
到站時，我起身說再見，阿雪突然問: 『喂呀! 你肯唔肯講呀!』
 
『講咩?』
 
『你鐘意既人係唔係讀Psychology呀!』
 
『哈!你又提返依條問題。』此時，車門都開了。
 
『快D答我啦!』阿雪似乎有點急。
 
我伸手按一按阿雪既頭 : 『唔知呢!』
 
說罷就走了，車門都岩岩好關上，係門外透過鏡望入去，只見阿雪沒好氣地揮手說再見，不過佢仍然係展露笑容。
 
一路行返屋企既時侯，個腦都係咁回味返岩岩同阿雪既情境，諗諗下都不自覺笑起黎，睇黎我心情真係好好。
 
去到走廊，當我開緊門時，阿靜就開左鐵閘叫停我。
 
『做咩唔應我Whatsapp?』
 
『無留意呀嘛。』我沉著地回應。而阿靜聽到依句後，內心都沉左一沉，因為之前無回應阿明既Whatsapp，當阿明問到佢既時侯，阿靜一句" 無留意呀嘛"黎回應阿明，如今阿明又講依句說話，明顯向佢示威。
 
『唔緊要啦.....我想知你做咩退莊。』
 
『退唔退莊都唔係問題啦，反正大家都交左表。講黎都無意思。』
 
『但你明明答應過我。』
 
『對唔住，但我覺得阿風支莊根本唔需要我，你都唔好咁睇得起我，我咩料我自己知自己事。』
 
『咁好啦，我希望你選到啦。』阿靜都沉著回應。似乎佢心情不太好，可能我說話傷害到佢嗎?
 
『你想我選到定係阿風選到?』
 
『我.....』
 
『問下姐，其實唔洗答我。』
 
『嗯......』
 
『.............』
 
突然間氣氛變得好沉重，各有各想法，咁樣既氣氛都係第一次。
 
『你最近點? 我地好耐無傾計。』阿靜打破冷局，問我最近既近況，正如佢所講，我地好耐無傾過計。
 
『都係咁，Project同Paper都開始多，下個月仲要mid-term! 開始唔得閒。』
 
『估唔到我地開左學之後，會變到咁唔得閒，傾下計既時間都無。』
 
『我夠估唔到……你會變成咁。』 我衝口而出說了一句。
 
『下?』阿靜驚訝地問。
 
『無! 我話估唔到你變得咁active，我成日係Facebook見你貼D去玩既相，幾開心呀! 依D真係U life黎。』 為左唔想攪到氣氛咁極端，於是故意轉話題。
 
『嗯.....』
 
『唔講啦，我返入去沖涼訓覺。』說罷，我就開門入屋，關門時，我留意到阿靜悶悶不樂既樣，唔知點解我都有點唔開心。沖完涼，開電腦玩下Facebook，順便睇下阿靜最近點，當我慢慢用MOUSE掃落去時，比我發現一句 status :
 
" Wing Yee 對「好物推薦」讚好。 "
 
穎兒Facebook竟然有用? 佢返左黎? 究竟發生咩事?
 
當我見到依個動態時，即時感到驚訝，一直都無出現係Facebook，Whatsapp，什至我打過去依個電話都係未能接通，而唔係停止使用。穎兒就好似突然間消失左咁，如今佢出現係Facebook like依D野，姐係佢出現返?
 
我即時拎起手提，打開Whatsapp，再禁去穎兒，發現時間竟然顯示 :
 
" 最後上線時間: 今天 21:35 "
 
我即時彈起身，佢開過Whatsapp黎睇，我於是係咁Send Whatsapp比佢
 
阿明:
穎兒!你依家點? 之前一直都無見你出現過! 發生咩事?
 
但等左好多耐，Whatsapp只係顯示一個Tick而唔係兩個Tick，而且上線時間仍然顯示 21:35。直至夜深，穎兒都無再出現，就好似消失返一樣，究竟發生咩事?
 
我再係穎兒Facebook留言問下佢近況，即時吸引左部份同班同學注意，紛紛回應我既Status，都係問下穎兒做咩潛左水咁耐，會唔會係外國出左事。不過，最終大家都係得個估字，根本無人知道發生咩事。
 
而我只能再一次感到無奈，內心總係有點不安。穎兒，你最近點呀?
 
**************************************************************************************