《我將一位宅女變成女神，然後再將自己變成佢隻兵》: 上集 (4)

到左第二日，阿靜好早起左身打扮，著返當日阿明幫佢執既LOOK，準備出去見阿風。出門前，send 個msg 比阿風。
 
阿靜:
我出去啦 我著左藍色衫，白色短褲。
 
阿風:
好! 我著白色衫，黑色牛仔褲。我都出去啦! 一陣見!
 
阿靜:
好!一陣見




 
今日係阿靜約會阿風睇電影既日子，阿靜從來都未見過阿風，而阿風都從來未見過阿靜，不過兩個人已經利用Whatsapp傾左兩個多月，大家都對大家好熟悉，只係差一個見面機會。
 
係火車上，阿靜不斷對住火車上的門窗照鏡，盡可能以最靚最完美既姿態去見阿風，而且佢一直都幻想緊阿風係一個點既人，係一個毒男? 係肥? 定係廋 ?
雖然阿靜本來就已經宅開，自信心低，只覺條件差。不過去到揀男仔既時侯，內心深處仍然對擇偶要求有一定準則，仍然希望對方好好睇睇，最好就靚仔，不過唔靚仔唔緊要，最緊要正正常常，乾乾淨淨。
 
係火車上，愈近旺角站時，阿靜心跳愈要緊張。
 
 
『呵欠~~~~~』望一望個鐘，原來已經到左十二點幾，D陽光都從窗哂落黎，我都逼不得已起左身。




 
起身梳洗後，就煮左個公仔麵搬左入房食，之後上住高登睇POST，一路食公仔麵，一路都覺得好無聊，亂咁禁D POST入去睇，留言都廢事。睇睇下，見到個D小圈子交友POST，心思思就禁左入去睇下，睇下有冇D 娘娘J圖睇下。
 
當我係咁用滑鼠好快速咁掃下D 留言時，突然見到巴打係到討論緊一位絲打 - 絲
 
我心諗: 『絲咪就係阿靜? 咩佢咁多人識?』
 
之後我再慢慢睇下D留言，掃下掃下，發覺有人貼左D相，我望真D，仆街! 依個咪係阿靜? 無人比我更清楚阿靜，加上阿靜既衫唔多，我都好清楚，就算張相遮左塊面，我都認得出佢，唔通阿靜自己影相貼上去?
 
心內突然有一種不安感覺。於是我搵到絲既留言，再禁佢account入去睇下究竟佢係高登做過咩黎。




我發現全部都係交友POST，星座POST，香港女仔仲有冇男朋友既POST........
 
『阿靜佢攪咩......咁活躍係依D POST到既? 』由於D POST實在太多既關係，我查唔到阿靜留過咩言，於是我直接登出自己Account，再登入阿靜係高登既Account。
 
當我登入時侯，阿靜竟然收到過百封PM，標題全部都係" 可唔可以做FD? " " HI 娘娘! 交換MSN?" " 你Whataspp係咩? " 等等。最驚訝既係.....阿靜竟然全部都回覆哂，而且仲留哂手提電話。
 
我即刻彈起身，我明明叫左阿靜唔好留低資料比人，點知佢仍然咁做? 我再睇下D PM，全部都係巴打，語氣極度狗公，但阿靜好明顯就知道，但一一接受，而且我發覺阿靜係高登到好受歡迎......佢真係成為我口中既娘娘.....? 唔得.....唔可以咁....唔可以比阿靜再沉迷落去，我一定要阻止佢。
 
係依個時侯，阿靜岩岩踏出地鐵，係到搵緊咩出口最近旺角中心，而阿風已經到達左旺角中心，一直靜侯住阿靜既出現。
 
我換件衫就走去阿靜屋企門口禁鐘，但禁左咁耐鐘都無人應門，平時阿靜唔係留係屋企無野做咩? 點解唔係到? 我再望一望手錶，已經一點幾，我要趕住返工，激死。我唯有拎埋袋走去返工先。
 
另一方面，阿靜到左旺角中心，阿風同阿靜講好左大家既衣著係D咩，方便認得，而出現係阿靜面前既男人，身形標準，唔肥唔廋，皮膚好好，一粒暗倉都冇，已經衣著仲著得幾型。但阿靜始終都係怕羞，唔敢叫人先，雖然明知個個係阿風，但都唔敢行埋去，唯有扮哂野企係到周圍望。
 
而阿風一早已經留意到阿靜，見阿靜怕怕羞羞咁就笑了，於是好大方咁行埋去同阿靜講野。




 
『HI ! 係咪絲打呀? 』阿風有禮貌地問，而且加點笑容。
 
『係呀......你係阿風?』阿靜終於近距離望到阿風，即時猜測阿風既高度，估計有一米八，應該比阿明高少少。
 
『係呀，你係阿靜! 哈哈! 終於見到你啦，果然係靚女!』
 
『唔好講笑啦......』阿靜估唔到阿風會讚佢靚女，除左阿明之外，阿風係第二個。
 
阿靜心諗 ：『好再佢無對我反感姐。』
 
『我無講笑呀! 我好認真架! 』
 
『唔好再講啦，我地要去買飛呀，一陣多人就麻煩。』阿靜試下轉話題。
 




『唔洗買啦，我岩岩去左買飛，你睇! 』阿風係袋到拎左兩張電影飛出黎。
 
『嘩，原來你買左喇? 幾多錢呀? 我比返你呀。』
 
『話哂第一次見面，無理由要你依個靚女等既。同埋唔洗比返錢我啦，我請!』
 
『唔好再話我靚女啦!! 唔得! 無啦啦做咩要你請我呀?』 阿靜有點面紅。
 
『我約你在先，無理由要你比錢，比個機會我請你，如果唔係我一直叫你做靚女架! 靚女...靚女....』
 
『好啦好啦! 你請啦今次! 唔好再叫我做靚女啦! 我唔係囉! 』
 
『哈哈! 好好好! 咁行啦! 靚.............妹! 』
 
『喂呀!!!唔理你架!!』雖然阿靜口說不要，但身體係最老實，阿靜其實係到暗爽緊，佢都好享受依一刻。




 
『哈哈!!』兩個人就慢慢行去戲院，一路上有傾有講，阿靜估唔到第一次見面就咁開心同順利。
 
另一方面，阿明一路搭車返工一路都好唔放心，於是打比阿靜手提。
 
『嘟.......嘟.......嘟.....』
 
『喂? 』 阿靜回應。
 
『阿靜! 你依家係邊到呀? 』我急燥地問。
 
阿靜望一望阿風，於是偷偷地講 : 『我......去左睇戲呀。』
 
『睇戲? 同邊個睇呀? 喂 ! 我有野問你呀! 』 我從來都未聽過阿靜會自動自覺去睇戲，佢一定約左人。
 




『有咩返屋企先講啦，我要入埸啦! 拜拜!』 阿靜快速收埋電話，免得比阿風聽到。
 
『邊個黎? 』阿風問。
 
『無呀，我阿媽之嘛，唔好講啦! 我地入埸啦!』阿靜為左盡快入埸，不自覺地捉住阿風隻手，半推半推咁一齊行入去。阿風見到阿靜捉住佢，感受到阿靜隻手原來咁滑，佢就知道佢無投資錯誤。阿靜絕對係一隻好股。
 
 
『喂喂......?阿靜?!? 頂...竟然收我線。』 我愈來愈急燥，於是我再打去比阿靜時侯，發現阿靜連電話都熜埋，激死我。
 
我冷靜一下，我要重新諗下依家究竟發生咩事，依幾個月黎，阿靜背住我一直係高登到收兵，仲比哂資料比人，唔怪得換左部智能手提電話，之後無啦啦好急咁要我幫佢轉look，應該係約左人，今日就係佢地見面之日。
 
以阿靜既性格黎講，佢根本好少出去睇電影，更加好少出街，唯一會去既地方，就係我教佢行既旺角，無錯! 阿靜一定係旺角睇戲! 我再上網查下邊間戲院係依個時段播放，發現只有一間 - 嘉禾。
 
我決定今日請假，我要好好問清楚究竟依家發生咩事!! 於是我就落車，轉搭去旺角方向既巴士，我決定去搵阿靜!
 
阿靜同阿風入埸後，因為戲院比較黑，阿風為左方便行，同埋唔想阿靜跌親，於是主動捉住阿靜隻手，帶佢行。
 
『你唔介意呀嘛? 依到好黑，我驚你跌親。』阿風問。
 
『唔介意!』阿靜開始感受到阿風既溫柔。
 
當兩個人欣賞緊電影時侯，而阿明就氣沖沖咁趕緊去旺角。
 
戲院既冷氣好勁，阿靜今日只係著左隻深藍色衫同一件短熱褲，過左一粒鐘，已經覺得好凍，不自覺咁係咁磨擦雙手。阿風見到後，就係袋到拎出一件風褸。
 
『係咪好凍? 我早有準備! .....拿...著住佢。』阿風向阿靜遞上一件風褸。
 
『唔該你呀。』阿靜面紅了，佢從來都未試過比男人咁溫柔，咁體貼咁對待。佢覺得阿風應該係一個好細心，好溫柔既男仔，內心開始產生有阿風既影子。
 
兩小時好快就過去，阿靜同阿風都睇完電影，一踏出去門口，就係咁討論頭先套電影既劇情。
 
『女主角好慘呀! 比個男人咁玩法!』 阿靜有點不快。
 
『男人就係咁賤架啦! 所以女人一定唔可以對男人咁認真! 』
 
當阿風講依句說話之後，令到阿靜有一種層似相識既感覺，覺得好似係邊到聽過咁。
 
『咁你會唔會好似入面個男主角咁，玩女人?』阿靜似乎另有所指。
 
『我絕對唔會咁做，我對每段感情都好認真，女人係用黎鍚，唔係用黎玩!』阿風行向阿靜面前，認真地講。
 
阿靜吞了吞口水，阿風既高度令佢有一種壓逼感，加上佢依句說話又好似另有所指。阿靜諗起阿明既說話，千其唔好咁快比對方食住，一定要好好收埋自己底牌。
 
『哦! 係咩! 丫! 我肚餓! 不如去食D野。』阿靜盡量將喜悅既心情收埋，免得比阿風察覺到。
 
『好丫! 不如去銀城到食。』
 
『一於咁話! 』 正當兩人步出戲院門口時，遠處傳來一把聲音。
 
『阿靜!!!!!!!!!企係到!!!!!』
 
阿靜轉身一望，只見阿明氣沖沖咁行緊埋黎。
 
由於岩岩散埸關係，一時之間好多人湧出黎，我驚阿靜走左，於是係出D等，再周圍望下阿靜係唔係到。
 
當我係遠處見阿靜同個男仔一齊行出黎個陣，我就知我無估錯，佢真係係到睇電影。而且身邊既男仔一定係高登仔，激死! 佢竟然咁大膽同網友出黎。我見佢地好似想走咁。於是唯有大叫
 
『阿靜!!!!!!!!!企係到!!!!!』 於是我就氣沖沖咁行埋去。
 
阿靜轉身一望，好驚訝咁望住我。但我既視線唔係向住阿靜，而係佢身邊既男仔。
 
『你真係黎左依到....!!』 我問。
 
『做咩事......』阿靜唔知點比咩反應。
 
『你識得既?』阿風問阿靜。佢覺得阿明依個態度同行為，可能係阿靜既男朋友，因為阿風到依家為止都唔知阿靜有冇男朋友。
 
『我朋友....佢叫阿明。』阿靜向阿風介紹。
 
『原來係……朋友!』阿風望住我講，個態度好似向我示威咁，同時間好強調”朋友”依兩隻字。
 
係近距離望住阿風，佢既身高應該有一米八，我同佢講野時個頭都要向上，壓逼感果然利害。而且以男人黎講，佢身形算係標準.......從佢衣著同樣貌，絕對同毒男依兩隻字扯唔上關係，而且仲幾靚仔，可能又一個MK扮毒男上高登搵食。
 
『你好! 我叫阿風。』阿風伸出隻手想同我握手，而阿風正正就係想係阿靜面前展現風度。
 
『跟我走! 我有野問你! 』我無理到阿風，就叫阿靜同我走，實在唔想係到再糾纏落去。
 
阿風隻手停係半空，見阿明唔理佢，就慢慢收返埋。係阿風心目中，依個舉動已經覺得阿明成為佢既大敵，阿風即時向阿明衝量一下，阿明身高唔夠佢高，而且出街仲唔會GEL頭，衣著仲要....仲要咁熟口面.....好似返I.T咁? 個樣又普普通通，仲隱約見到暗倉印，依個敵人真係低level到無得再低，要解決佢應該好容易。
 
『但我約左佢呀......』阿靜似乎唔願意跟阿明走。
 
『我有急事要問你，快! 跟我走! 』我堅持。
 
『要走你自己走! 一黎到就叫人走! 你有冇過份D呀?』
 
『你講咩話? 』我估唔到阿靜會唔聽我說話，而且態度對我仲咁惡劣，覺得阿靜真係變左咁。以前阿靜發嬲都唔係真係發嬲，好易哄。但依家佢發嬲既樣，真係黎真........
 
『阿明，如果你有事既，不如遲D再問，我約左阿靜再先，我見佢都肚餓，我要同佢去食野! 』阿風似乎想帶走阿靜。
 
『你.......』對住阿風，突然間有一種壓逼感壓埋黎。
 
『總之有咩返屋企再講，我同阿風去食野! 係咁啦! 阿風，我地行。』阿靜就轉身走人。
 
阿風一直望住我，慢慢帶住笑容回應阿靜: 『好呀，我地去食野!』
 
『你......』面對阿風我竟然唔知講咩好，我突然間感到一種無力感，慢慢睇住阿靜同阿風離開，慢慢睇住佢地消失於人群之中。
 
『依個阿風絕對唔係普通人.....!!!激死呀!!!!』
 
係路上，阿靜一直都無出聲，阿風為左了解情況，於是開口。
 
『點呀? 你好似好嬲咁喎! 』 阿風問。
 
『我係佢邊個喎! 無啦啦要人跟佢走! 』阿靜仍然好嬲。
 
『你同佢識左好耐架? 』
 
『算係......佢住我對面屋，由細玩到大，都好熟。係佢教我上高登，係佢幫左我......』正當阿靜想講阿明幫佢轉look既時侯，為左唔想比阿風知道自己原來係宅女，就唔再講埋落去。
 
『總之佢就幫左我好多啦，但唔代表我咩都聽哂佢話! 』
 
『我都係咁話，你係你，佢係佢，又唔係你邊個，點解好似管女朋友咁對你! 』
 
『你都覺得佢唔岩呀?』 阿靜問。
 
『係呀! 如果我約左人出街，無啦啦叫我走，仲要態度咁無禮貌，我一定會打柒佢!』
 
『不過....佢話好似有急事問我.....會唔會.....』阿靜似乎又想幫阿明講好說話。
 
『會唔會真係有事? 傻啦! 真係咁趕! 就當面講啦! 點會叫你走!』
 
『咁又係.....』阿靜係袋到開返手提，點知一開，阿明就send 左 msg黎
 
阿明:
我係旺角中心等你 聽我講 跟我走
 
『唉......算啦! 我都係跟佢走! 不如下次.....』阿靜未講完。
 
『好好好，你都係跟佢走啦! 不過呢! 係遲D! 你依家肚餓就去左食野先! 』阿風體貼地講，佢仲記得阿靜好肚餓。
 
『但阿明佢係個到等緊....』阿靜似乎擔心阿明。
 
『哈哈!唔緊要啦! 比D教訓佢! 鬼叫佢岩岩咁無禮貌呀! 咪由佢等下囉! 』阿風笑笑口咁講。
 
氣氛即時轉哂，阿靜終於都笑了，佢覺得阿風都幾識哄人，又識攪下氣氛，於是就聽阿風講，食左野先!
 
『咁我地去食野先!』
 
『丫....阿靜! 你行先! 幫我叫埋野食! 我想去一去廁所，一陣搵你! 』
 
『OK!無問題!一陣電聯! 』阿靜講完就轉身走左。
 
而阿風根本就唔係想去廁所，佢望住阿靜既背影慢慢消失之後，再轉身望住旺角中心既方向。
 
『阿明? 嘿 ! 我就睇下你咩料。』 於是，阿風就慢慢行去旺角中心方向搵阿明。
 
當我係旺角中心門外等緊阿靜時侯，我不斷冷靜自己，我覺得成件事都黎得好急，一下子湧哂出黎咁，我需要D時間消化一下。我諗返起頭先既情況，真係覺得有d肉酸，唔係我作風。竟然工都唔返跑黎依到捉阿靜走，依家拍緊上海灘咩!
 
而且頭先個男仔叫阿風吧? 其實阿靜講得好岩，我唔係佢邊個，點解話要佢走就走，而且我點解咁做?
 
我驚D咩? 擔心D咩?
 
約網友出黎，我都試過。係網上識女仔，我都試過。
點解阿風咁做，我就咁敵視佢?
點解阿靜係高登識男仔，我就咁反對佢?
我諗我真係要反省一下......
 
『阿明。』
 
我轉身一望，只見阿風企係我身旁，我再望一望周圍，唔見阿靜係到，得佢一個黎?
 
『阿靜呢?』 我將之前咁敵視同急燥既態度收起，穩重地問。
 
『佢去左食野，不過你放心。佢食完就會黎搵你。』說罷，阿風係袋到拎左包煙出黎。
 
『整返支? 』阿風伸包煙出黎。
 
『我唔食煙。』
 
『咁乖仔? 嘿.....』阿風啪著打火機，慢慢點起支煙，再深深吸一口，再慢慢噴出黎。
 
『聽日放榜，緊唔緊張?』阿風問。
 
『我不嬲都唔會擔心同緊張我學業上既野，我年年都考頭三名。』我好自豪地說。
 
『原來高材生，不過我情況同你差唔多，唯一唔同既....我年年都係考第一名。』
 
『點呀? 串我呀? 洗唔洗頒個獎比你? 』
 
『咁又唔洗。係呢，你對阿靜好有興趣? 』阿風想知道阿明對阿靜既心意係點。
 
『係又點? 唔係又點? 』事實上，我答唔出我對阿靜既感覺點，只係我內心感到不爽。
 
『如果你對阿靜有興趣，咁咪大家公平競爭。如果你對阿靜無興趣既，咁你......就咪撚阻住。』說罷，阿風將手上既煙掉落地下，再用腳踩踏支煙。
 
『言下之意，你對阿靜好有意思吧? 』正所謂輸人唔輸陣，我無比佢既粗口同行為嚇親，仍然好冷靜咁講。
 
『無錯! 你岩! 阿靜依種女仔......就好似D未開發既金礦一樣，內藏好多好多有價值既黃金，如果得到佢，真係執到。所以我一定要得到佢。同埋我發覺阿靜應該係宅女黎，不過可能上得高登多吧? 所以佢對好多事物都唔係咁認識，嘿.....咁可愛既女仔，真係幾吸引我。』 阿風邊說邊笑，似乎好了解阿靜為人同性格。
 
阿風果然唔係普通人，只係同阿靜傾左幾個月Whatsapp同見左幾個鐘就知道阿靜既價值，以未開發既金礦黎比喻阿靜，正如我用潛力發展既股票比喻阿靜一樣。
 
『你個狗公........』 我怒視住阿風。
 
『哈哈，又唔好咁講，狗公依個名係比班廢柴既男人配上，但對我黎講，就唔係太岩。哈哈哈! 我食女多過你打飛機呀! 阿明! 』
 
阿風望一望手錶 : 『好啦! 我返去陪阿靜食飯，你慢慢係到等啦! 哈哈哈! 』
 
當阿風轉身時，我情不自禁地講左一句 : 『我係唔會比你得到阿靜。』
 
阿風停了步，再轉身回應: 『好呀，睇下我地邊個可以得到佢。』
 
******************************************
 
『返黎啦? 咁耐既? 我幫你叫左個下午茶餐。』 阿靜示意桌上既下午茶餐係屬於阿風。
 
『我岩岩去左屙屎! 所以咁耐! 』
 
『咦.........快D坐低食啦。』
 
『今次大獲!!!』阿風突然大叫。
 
『做咩事? 』阿靜問。
 
『我唔記得洗手呀! 』阿風伸出雙手向阿靜個身摸去。
 
『頂你! 講真定講假! 咦....咪掂我呀!』阿靜邊說邊避。
 
『哈哈! 講下笑之嘛! 』 阿風拉開張椅，坐低慢慢食。
 
『喂喂，聽日放榜，你諗住讀咩呀?』阿靜問。
 
對阿風黎講，以佢屋企既家底，讀咩科都無所謂，反正畢業之後都會接掌家族生意，如果真係要揀既，阿風就想讀港大，話哂屋企人都係讀港大出生，但為左試探阿靜讀D咩，於是唔講出黎。
 
『你呢? 』
 
『我應該會讀中大呀! 個到地方夠大! 上次開放日我去左參觀，一去就好想係個到讀。』阿靜腦海係到回味之前去中大既回憶。
 
『咁岩既? 我都係揀中大喎! 』
 
『下? 真係架? 好夾呀我地! 哈哈! 我地一齊做校友啦! 』阿靜好興奮，因為佢意識到開學後，仍然同阿風可以保持聯繫，什至有進一步既發展。
 
『哈哈! 我都估唔到同你都幾夾! 』 阿風睇黎要返去改一改jupas既排序，將港大飛走，換入中大。
 
如是者，阿靜同阿風一路食一路談笑風生。
 
離別時，大家互相說再見就離開。
 
『阿靜! 』 阿風大叫。
 
『做咩? 』阿靜轉身回應。
 
阿風慢慢行去阿靜面前，慢慢說 : 『今日我同你玩得好開心，唔知我仲有冇機會同你一齊出黎再玩過呢?』
 
阿靜微笑回應: 『一定有! 』
 
阿風都帶以微笑回應: 『多謝! 返屋企再傾。拜!』
 
『拜!』阿靜內心一直都暗爽緊，估唔到同阿風既發展係咁順利，而且阿靜見到佢同阿風應該仲有發展既可能性，而且機會仲好大。當阿靜行左幾步，先醒起阿明係旺角中心等佢，面色即時一沉，不禁說了一聲
 
『真係麻煩!』
 
阿靜行到我面前，淡淡地說 : 『點呀! 係咪有急事問我。』
 
『返屋企先，一路行一路講。』我開始感到沒好氣，事實上，我突然覺得好累。
 
係車上，阿靜仍然無出聲，視線一直望住窗外。
 
『我登入左你個高登Account，發現左你原來係高登到咁活躍，而且......而且應該收唔少兵。』
 
『咁又有咩問題? 我無收兵，我只係識多D朋友。你唔好成日將男女關係扯上狗公同娘娘好唔好? 』
 
『我上高登咁多年!!我好清楚班人既心態! 做朋友? 你真係覺得佢地咁諗? 』
 
『總之我唔覺得有咩問題! 同埋我識朋友又好，收兵又好! 關你咩事? 』
 
阿靜依句說話一針見血，我都唔識點答。可能我驚佢識左壞人吧? 但事實上，我係咪真係擔心緊依樣?
 
定係自己既佔有慾.....唔想阿靜比人佔有?
即使自己唔係阿靜男朋友，我都唔想比阿靜比其他人佔有.....
我竟然有依個自私既想法.....突然間覺得自己其實根本唔係擔心阿靜安全，而係擔心自己....擔心自己會失去阿靜。
咁係咪代表我鐘意左阿靜呢?
 
『你放心啦，我唔再係以前既阿靜，我好識玩依個遊戲同清楚個遊戲規則，唔係你教我點樣識男仔咩? 唔係你教我點樣控制男人咩? 你教左我咁耐，我點會有事，你放心啦。』 阿靜見我唔出聲，可能覺得我諗緊其他野，為左唔想再糾纏落去，唯有講出自己既想法。
 
『嗯......總之你小心D啦。』我都唔知可以講咩好，死死氣咁回應算。
 
返到屋企門口。
 
『聽日一齊食早餐? 之後一齊返學拎成績。』阿靜問。
 
『是但.......』說罷，我就開門入屋，慢慢地關上門。
 
阿靜見到咁，都無回應。返到屋內，攤係梳化上，不禁笑了起來。
 
『睇黎阿明應該鐘意左我! 哈哈! 而阿風都對我有意思! 哈! 原來比人緊張，比人追求既感覺係咁正! 』阿靜起身走去廁所，對住連身鏡不斷照，以後充滿自信地說 :
 
『好似阿明所講，我一定要好好利用我依個本錢去享受。』阿明所指阿靜的本錢就是她的身體。
 
***********************************************************************************