《我將一位宅女變成女神，然後再將自己變成佢隻兵》: 上集 (3)

經過兩個多月既AL，我地終於都考完試，正式踏入短暫既雙失時期，係未到放榜前，我答應左阿靜，會係依段時間，幫佢黎一個大改造，希望大大提升佢既優點，將佢本來既潛質通通展現出黎。
 
星期六早上，我去左阿靜屋企，因為今日我約左佢出街。
 
『今日你會帶我去邊? 』阿靜問。
 
『一個好出名，好多人去既地方。』我扮哂神秘咁講。
 
『姐係邊到? 我去過未? 』
 




『就係旺角!』
 
『旺角? 去個到做咩? 』
 
『係你未執個裝扮之前，我想你先做一個特訓。你可能將來會同男仔出街，或者自己都需要出街行，旺角就係最多人去既地方，因為地方大到你行足成日都得。我問你，你去過旺角幾多次? 』
 
阿靜認真諗下，慢慢數下有幾多次.....
 
『洗鬼數咩，正常人梗係去過好多次，多到數唔哂架啦，你走去數，姐係你都唔係成日去架啦。』
 




『咁依家去個到做咩?』
 
『其實依個訓練係岩男仔多，不過你要學識駕馭男仔，都要先了解一下地理環境，如果本身都唔熟悉旺角，隨時迷失路，或者唔識行。隨時比人食住，或者比人感覺好" 毒 "! 旺角都唔識行，同條同毒撚有咩分別! 仲洗媾女既? 』
 
『咁要點做?』
 
『跟我黎啦!』
 
對阿靜黎講，旺角依個地方真係好陌生，過往黎旺角既次數真係十隻手指都數哂。香港女性黎講，旺角係一個好好購物行街娛樂既好地方，每當有假期都會同班姊妹男友黎旺角行返轉，不過阿靜完全唔會做以上既野，只係小時侯，跟阿媽去硃籣街，女人街買埋D平價衫。依一刻先知，原來佢真係幾"毒"。
 




由出火車站個一刻，阿明就一直帶住阿靜行，街道上既人都愈行愈多人，開始有D擠擁情況，阿靜只好不斷緊貼住阿明，以免走失。
 
『阿靜，唔好睇小旺角依個地方，一個好多人鐘意既地方，如果唔識去行，唔熟悉依個地方，隨時都會被依個地方吞噬。』 阿明一路行一路同阿靜講。
 
『咁我地依家去邊? 』
 
『我帶你去哂旺角每個熱門地方，你要記熟點行，同埋有咩特點。』
 
阿靜心諗旺角都好細姐，應該好快行完。但阿明見到阿靜無咩反應，就同佢講
 
『唔好覺得旺角好細，就係記街道都已經有豉油街，花園街，洗衣街，通菜街，亞皆老街，彌敦道，山東街，窩打老道，硃蘭街，奶路臣街等等，而且你都要記埋熱門既地方，例如先達 ，先施 ，好景 ，旺中 ，朗豪坊 ， 雅籣中心 ， 百老匯 ，信和 ， 創興， 聯合廣埸等等。』阿明如急口令咁講出旺角重要地方。
 
『咩話? 』對阿靜黎講，係上述既地方只有信和，朗豪坊同先達係聽過之外，其他都唔知係邊。
 
『唔洗咩話啦，一路行一路記住啦。』




 
『咁女人街呢? 唔見你提既，我以前成日同阿媽一齊去買野。我應該記得點去。』阿靜唔想比阿明覺得真係好毒，唯有提一提自己都識去某D街，提升返自信。
 
阿明聽到之後，停左係到，之後轉身同阿靜講 : 『我咪提左囉，通菜街咪姐係女人街囉，你以為通菜街同女人街係兩個唔同既街道?』
 
『哦....我知呀，我聽少左之嘛，我以為你講左......』阿靜知道自己樣衰左了。
 
阿明突然捉住阿靜隻手，一直帶住佢行旺角，係一個人煙密集既地方不斷穿插。阿靜第一次同男仔拖手，終於感受到同男仔拖手既感覺係點，加上係咁多人既陌生環境下，阿明一直帶住佢行，令佢對阿明不自覺有一點英雄感，阿靜終於知道點解男仔一定要識行旺角，原來會比人一種識好多野，有種大哥既感覺。
 
當佢一路行既時侯，阿明突然鬆開隻手，之後聽到阿明講左一句: 『等等，我想買個.......』
 
『咩話? 我聽唔到你講咩呀。』阿靜不斷行前，想搵返阿明既時侯，發覺阿明唔見左。
 
『阿明.....阿明....你係邊呀?』阿靜唔敢係條街到大叫，唯有細細聲咁叫，希望阿明聽到，但一直都聽唔到阿明回應。
 




阿靜周圍係咁望，一直係到漫無目的咁行，佢根本唔知自己係邊，根本唔知自己點返去，佢拎起手提打比阿明，發覺未能接通。令到阿靜好急燥，係一條人來人往既街道上，令到阿靜好辛苦，加上天氣炎熱，好焗，街道上傳來種種既雜音，人聲，車聲，令到阿靜感到好無助，街道上既人愈黎愈多，係咁推撞阿靜，令到阿靜都唔知應該點算，突然之間，阿靜感到巨大既無助感，好似一個孤兒被人遺棄左，依種感覺令到阿靜終於崩潰了。
 
『呀...........................』阿靜準備大叫。
 
 
正當阿靜開口之際，阿明捉住阿靜隻手。阿靜抬頭望住阿明，即時攬住對方，仲喊起上黎。其實阿明諗住玩下阿靜，就等於一個人學踩單車一樣，後面捉住佢既人一直答應唔會放手，但最後往往都會放手玩下對方，或者比對方試下自己一個人踩。而阿明一直係格離睇住佢，估唔到阿靜咁大反應，今次真係玩大左。但對於阿明黎講，都未嘗唔係壞事，因為佢見到阿靜喊起上黎既樣，好可愛，好吸引， 原來一個女仔喊既時侯，係咁吸引人。
 
『衰人衰人衰人衰人!!!你去左邊呀!!』阿靜一路喊一路輕打阿明。
 
此情此境，阿明情不自禁地伸出雙手，輕輕將阿靜攬住 :『對唔住……我去左買野。對唔住!我下次唔會再掉低你。』
 
『下次再掉低我，我一定會僧死你呀!!』
 
『唔會……唔會再掉低你。』阿明好享受這一刻，係一條人來人往既街道上，攬住阿靜既時侯 ，都唔再理其他人既目光，而係享受緊由阿靜身體發出既體溫，真係好舒服。
 




『嗚……喂!好熱呀。』阿靜輕輕推開阿明。
 
『丫……sorr……』阿明都輕輕放開手。
 
大家冷靜左落黎之後，對於頭先所發生既野都唔想再提，大家都係怕怕羞羞咁。
 
『點呀? 好D未?仲……行唔行落去? 』我關心地問。
 
『嗯! 梗係行啦! 』
 
我輕輕伸出一隻手，示意阿靜拖住我行。阿靜都欣然接受，拖住我隻手，我地十指緊扣咁行旺角。感 覺上我地就好似拍拖咁，一路拖住手一路行旺角，但一時之間，我無可能對阿靜由朋友變成情侶既關 係，雖然我好享受依一刻既感覺，但我知道自己仲未係鐘意阿靜。
 
而對於依一刻既阿靜，已經對阿明產生感情，慢慢對阿明感到興趣，對於阿明要求佢做既事，佢都一一答應 ，佢好想阿明一直係佢身邊，陪住佢。但都知道阿明應該仲未對佢有興趣，所以都盡量維持返之前既關係。
 
不過依刻，兩個人都唔諗其他野，一直享受住依個短暫快樂時光。




 
返到屋企，阿靜沖涼個陣，一直都諗緊頭先同阿明發生既事，阿靜伸出一隻手，再慢慢放係自己心口，再閉上眼慢慢回味頭先阿明對佢既情景，阿靜依世人都未試過同人攬，亦未試過同男仔拖住手行旺角，今日對阿靜黎講有好多既第一次，都係由阿明比佢。
 
沖完涼後，阿靜拎起手提，好想Send 個Sms 比阿明，但當打開手提電話時，發覺原來一直都無咩點同阿明Send Sms，佢睇返對話，睇返上一次對話已經阿明知道穎兒有男朋友個一日。
 
阿靜放低電話，開電腦，就上高登，睇下有冇咩POST值得去睇同留言。當阿靜睇到一個POST 叫" 香港仲有幾多女仔無男朋友 "，阿靜覺得依個Topic好吸引佢，雖然佢記得阿明講過依d post係小圈子，入面有大量狗公，但阿靜依然好想試下入去傾。阿靜忍唔住將今日發生既事打左落個post到，引來很多巴打絲打既回應，而且好多巴絲都記得阿靜曾經貼過相出黎，一對雪白既大脾令到好多巴打留下深刻印象，傾傾下，已經有人貼返上次阿靜post既相，都引來一班從來未睇過既巴打黎睇。
 
而好多人既回應都好正面，都係留言" 去馬!/ 女追男好易 / 好葡萄” 等等，令到阿靜真係覺得好有機會。但阿靜都知道自己有d毒，於是問下點樣可以改善.......
 
就係咁，阿靜就迷上左依個post同埋入面既人，而且唔聽阿明曾經講過既說話-"唔好留個人資料/fb/tel等等資料，仲加入左佢地既Whatsapp group，此刻，阿靜既手提電話從來都無咩點響既Whatsapp提示不斷響起，令到阿靜覺得自己既圈子真係擴大左。
 
有一晚，阿靜Whatsapp提示再次響起，原來係之前個post所識既巴打，係post到不嬲都有傾計，但今次係阿風第一次單獨搵阿靜傾。
 
阿風:
hi 絲
 
阿靜:
hi
 
阿風:
做緊咩?
 
阿靜:
無呀，上緊高登囉 你呢? 做咩唔係Whatsapp group到傾既?
 
阿風:
唔啦 好多人講野好煩，所以靜靜地搵你傾計，你唔鐘意?
 
阿靜:
傻啦，我ok ar! 我都覺得好嘈
 
阿風:
你覆我都幾快喎
 
阿靜:
之前我打字好慢架!哈哈!傾得多自然就打得快左!
 
阿風:
係呢……之前睇你話追緊個男仔，進展成點?
 
阿靜:
無咩進展呀.....最近佢成日返工，都好少見面。
 
阿風:
哦……你無做暑期工?
 
阿靜:
無呀!唉! 好灰! 無人請!
 
阿風:
唔返工好悶喎!
 
阿靜:
係呀 日日都係屋企坐....好悶
 
阿風:
我都係呀 不如一齊出黎玩啦
 
阿靜:
唔好啦 我怕羞
 
阿風:
我都怕羞 但係屋企真係好悶 不如出黎玩下啦 出多幾次就唔怕羞
 
對於阿靜黎講，除左阿明約過佢出街之外，阿靜從來未試過比人約出街，阿靜打從心底係好想出去同阿風去玩，因為係個post到，阿風經常分享周遊歷各國既經歷，應該係一個好Social，見識好多既人，令阿靜都好想同佢一齊去玩。
 
但阿靜自知個樣可能嚇親人，好驚阿風見到佢之後，態度轉哂，而且可能會話比Whatsapp group既人知，咁樣令到一直視阿靜為娘娘既人可能失望，同埋可以退役唔做兵。所以阿靜都唔想答應佢住。
 
阿靜:
不如下個月先 好嗎?
 
阿風:
點解既?
 
阿靜:
下星期有套電影上映，我想去睇好耐...
 
阿風:
哈哈 好呀 咁套電影上映之日 我地就出黎睇 好嗎?
 
阿靜:
好呀 一於咁話。
 
如是者，阿靜一直同阿風每日都有傾Whatsapp，而阿風一直都故意套阿靜口風，好想得到阿靜既facebook同埋相，而阿靜都知道阿風既用意，但阿靜一直都唔夠膽比，因為佢對自己無咩信心，驚嚇怕左阿風。不知不覺間，阿風開始講d曖味既說話哄阿靜，有時令到阿靜不知所措......
 
阿風:
如果我話我鐘意你，你會有咩感覺?
 
阿靜:
唔好玩啦 你都唔會既
 
阿風:
我話如果姐 你會點?
 
阿靜:
無如果囉
 
阿風:
咩依個世界唔可以有人鐘意你架?
 
阿靜:
唔知ar
 
 
阿風:
哈哈哈
 
當阿靜每次睇到依d msg時侯，阿靜都感覺成身好熱，係到猜測阿風係咪鐘意佢，如果阿風真係鐘意佢，佢答唔答應好呢? 但又不斷諗藉口比自己，阿風係唔會鐘意佢。
 
有一晚，阿靜Whatsapp再一次響起
 
阿風:
你有冇一秒鐘係覺得我鐘意你?
 
阿靜:
唔知ar....
 
阿風:
想唔想知道答案?
 
阿靜:
丫....你都未見過我...
 
阿風:
一定要見過面先可以鐘意?
 
阿靜:
咁....
 
阿風:
而且我地都好快會見面，記唔記得我地約左套電影上映就會出黎睇?
 
阿靜:
我記得....
 
阿風:
哈 你記得就得 夜啦 去訓啦
 
阿靜放低手提，個心一直十五十六，睇黎阿風真係鐘意佢，而佢對阿風既都開始產生感情，之前一直對阿明既愛意，隨住阿明成日返工無咩點聯絡阿靜既日子，再加上阿風既出現，對阿明既愛意都慢慢消失。
 
但阿靜依一刻都係諗住阿明，好想阿明救佢，盡量係同阿風見面之前，幫佢改造一下裝扮。
 
『阿明，你仲唔放工? 仲拎勤工獎呀?』I.T同事說。
 
『我攪埋d手尾就走架啦。』說罷，我就將d衫搬返入倉。無錯，我最近返緊暑期工，係I.T到做，工時雖然都算可以接受，但自從返左暑期工後，總係覺得無咩私人時間，同埋我都唔係好等錢洗，所以返工都係為左塞住屋企人把口，廢事比佢話我係屋企無野做。
 
我氣沖沖咁趕返屋企，因為天氣實在太熱，熱到條底褲都濕埋，唉屌濕撚哂 唉唔撚驚!即刻沖返個靚涼，我覺得人生最快樂除左屙屎之外，就係沖涼。
 
當我沖完涼個陣，發覺屋企條底褲拎哂去洗，仲要未乾。我心諗唔係呀化? 正當我係咁係櫃入面搵，睇下有冇多條底褲係到，發現只係剩返一條小學著過既底褲，頂! 我仲留條小學底褲係到做咩野?
突然電話響起，原來係范威約左今晚踢波，叫我快d去。本來我岩岩沖完涼，好想推左佢，但踢波係男人既浪漫，仲要自從考AL個段時間開始，我波皮都無掂過，有得踢波梗係去啦!
 
我放低電話，望一望眼前既底褲，思考左一陣。
 
『屌! 死就死啦! 著一陣姐。』之後我就著左條超緊既底褲，仆你個街，緊到呢....勁唔舒服。但望一望個鐘，唉! 頂捱上，即刻換衫衝落球埸。
 
一路踢波一路都feel到條底褲好緊，緊到我粒蛋蛋痛到仆街，踢踢下仲更加無感覺，懷疑緊爆左兩粒睪丸。
 
『阿明，你冇野呀嘛?面色咁難睇。』范威問。
 
『無無!繼續踢!我無事。』
 
『喂喂，阿靜搵你喎!』 范威指住球埸外既方向，只係見到阿靜企係球埸邊，示意叫我過去。
 
『丫....唔記得約左佢，喂!你地踢啦! 我唔踢! 下次再踢。』你老味，真係想即刻返屋企除褲check下兩粒蛋蛋仲係唔係到。
 
我跑到埸外，問阿靜咩事。
 
『我有野想搵你，但知你平時要返工，所以等你放工但你阿媽話你去左球埸踢波.....』
 
『得得得，我地返屋企先，我沖埋黎就去你屋企。』 之後就同阿靜各自回家，而我即刻狗衝返屋企，即刻除褲睇下粒蛋蛋係唔係到。
 
『好再仲係到....』
 
沖完涼，拎d未乾既底褲用風筒吹乾佢，濕濕地著上去就算。禁鐘去到阿靜屋企，見到佢個電腦set左高登為首頁。
 
『哈，睇黎你迷上左高登。』我問。
 
『無野做咪上下囉。』
 
『你有冇留底資料比人呀? 』
 
『無呀，你講過話唔可以咁做架嘛，我記得。』阿靜答。但事實上，阿靜講緊大話。
 
『無比就最好啦，我叫你上高登係想你明白一下社會文化，睇下d感情POST，理解一下男人平時諗d野，但一定唔好同佢地有所接觸，知唔知?』
 
『唔好講依d野住，你幾時放假呀? 我想轉下形像……』阿靜怕羞地問。
 
『哈? 咁心急做咩? 距離讀大學既日子仲有兩個月時間，咁急做咩?』
 
『咁人地依家成日無所事事，你幫我轉下look，比我自己學下同練下呀嘛。』阿靜始終唔敢同阿明講阿風件事比佢聽，怕阿明會嬲同反對。
 
我見阿靜咁心急，都明白既，可能阿靜開始緊張自己既打扮，都係件好事。
 
『好啦，咁我加快同你進行特訓啦，聽日你黎接我放工，我帶你去一個地方。』說罷，我再拍一拍阿靜膊頭就走左。
 
阿靜見阿明走左，即刻拎起手提想覆阿風既msg，阿明就突然出聲。
 
『丫!你記得帶錢，有幾多就帶幾多啦。』
 
『得!我會帶!』阿靜即刻收埋電話。
 
『古古怪怪，唔理你啦! 聽晚見啦。』
 
************************************
 
到左第二日既晚上，照返琴晚所講，阿靜黎左接我放工，係I.T門口等我。
 
『點呀，阿明! 今晚想做d咩?』
 
『無咩想點，想你自己去買衫。』
 
『下.....?買衫?』
 
『大佬呀，你d衫全部都係你阿媽著過或者買比你，d衫真係好肉酸同老套，你應該學下自己買衫。』
 
『嗯.....不過……』阿靜吞吞吐吐。
 
『不過……不過……不過你未試過自己買! 係咪? 同埋以你性格一定唔敢自己入去買衫。』我好清楚阿靜既性格，佢自信心咁低，要自己入去買衫一定感到好大壓力，加上佢唔係好識點應付d 售貨員，買衫對佢黎講係一件好大挑戰。
 
『既然你都知.....點解仲要我去買? 不如你陪我啦。』
 
『我會係你後面睇住你，但你要扮唔識得我，我都唔識你，你要自己執生。』
 
『不過......』
 
『不過咩呀，入去揀啦! 去去去去! 』我將阿靜係咁推去前，進入I.T門口。
 
當阿靜入到去，周圍既售貨員已經見到阿靜，開始想行埋黎招呼阿靜，令到阿靜手汗都出黎，覺得好大壓力，於是佢快速低頭行去d角落位，係到亂咁揀衫。阿靜吸一吸氣，同自己講定d黎。
 
『小姐? 有咩可以幫到你? 』 一位男職員向阿靜問。
 
『我.....自己....睇就得架。』阿靜吞吞吐吐地回應。
 
『如果你睇岩邊件，可以同我地講，我地會比你試下著，睇下岩唔岩身。』
 
阿靜左望右望，就係衫堆到揀左一件好似幾好睇既Tee出黎，就叫個職員比佢試。
 
當個職員見到之後，有d難為情咁講 : 『小姐，依到係男裝部，依件既Size唔係咁岩你。』
 
阿靜見到遠處既阿明係到暗笑，就知自己樣衰左，好想即刻離開依個地方。阿靜紅都面哂，不斷係到搵下女裝部係邊。
 
後來有個女職員再行近阿靜問 :『小姐，有咩可以幫到你?』
 
『我.......』 阿靜心諗，班職員一定係到笑緊佢，望一望周圍既顧客，個個都係打扮得好潮既人，男既著得型，女既著得好靚，而望一望自己，好似大鄉里出城咁，一件黃黃地既Tee，加一條深藍色既牛仔褲，令到阿靜好自卑，依一刻好睇唔起自己。
 
『我都係無野.....』阿靜忍唔住就走左出去，佢實在頂唔順，走出門口連吸幾淡氣，因為佢真係感到好大壓力。
 
『咁快就頂唔順? 』阿明問。
 
『我真係唔得.......入到去....就覺得好緊張，連透氣都有困難，班人問我要d咩我都唔識答....唉...佢地一定笑緊我。我真係無得救。』
 
『係咪覺得好大壓力，好緊張? 』我關心地問。
 
『嗯.....我覺得佢地好似笑緊我，唉....我真係好差。』阿靜自信心已經崩潰。
 
我望一望手上既錶: 『我都預左架啦。仲有一粒鐘，我地係到等下。』
 
『等咩呀? 』
 
『一陣你就知。』
 
係依一粒鐘內，阿明同阿靜都無出過聲，阿靜個腦不斷係到自卑緊，覺得自己好差，同埋個腦浮現左阿風既樣出黎，但係阿靜從來都未見過阿風，依個印象中既"樣" ，只係自己幻想出黎，而阿靜開始成日留意住阿風有冇send msg比佢。
 
過左一粒鐘，I.T都開始拉閘收鋪。
 
『阿靜，知唔知點解你會緊張同感到有壓力?』
 
『我.....覺得自己好差....著得咁老套....班人一定會笑我.....唉!』
 
『其實你咁諗就錯，你好明顯係趺入左思想陷阱。所謂既思想陷阱有分好多種，而你就中左其中一樣，成日假設左某d事，同埋覺得自己好差，人地笑緊你。但其實所有野都係自己諗出黎，實質上係咪咁呢? 你自信心低，係因為你未試過同人相處，唔係好識點同人溝通。好多時都唔敢表達自己意見。』
 
我接著說:『以買衫為例，你係顧客，你買野，佢地會收佣，所以佢地不知幾鐘意你，好想你買野。可能你覺得自己著得差，佢地會笑你，但諗深一層，佢地又唔識你，比佢笑又點? 出左個門口，你就唔洗再面對佢，你怕咩? 就正如有d人坐小巴，唔敢叫落車一樣，假設左自己可能走音，叫錯左，或者司機聽唔到，咁樣就覺得自己好樣衰，成車人都笑佢，最後連到站都唔敢叫落車，但事實上，成車人又唔識你，你怕咩?』
 
阿靜聽到阿明既說話，覺得好似有道理，但道理還道理，理論同實踐始終要平衡返。
 
『入面所有職員都係我既朋友，我同佢地夾好左，一齊幫你轉look，同埋比你慢慢感受一下行店鋪既感覺，今晚全埸都任你行，慢慢比你適應，同時，班職員都會幫手訓練下你，點樣應對。』講完之後，我就拉住阿靜隻手行去店舖。
 
『阿明! 快d入黎! 我要拉閘。』一名男職員說。
 
『拿，阿靜，揀還揀，唔好亂咁放，我地仲要『摺衫』同『拉架』，你依家慢慢試，慢慢適應啦。』之後我就摺高衫袖，準備幫手執埸，要報答一下同事既幫忙。
 
面對面績咁大既I.T旗艦店，身邊都無咩人係到，任由阿靜慢慢揀慢慢行，令到阿靜壓力同緊張通通消失，加上職員幫手揀岩佢既衫，經阿明既介紹，佢對職員既害怕心理都消失埋，仲好樂意聽職員既意見。
 
當阿靜揀衫既時侯，望一望遠處既阿明身水身汗咁拖地，不禁輕輕講左一句
 
『多謝你，阿明。』
 
如是者，經過好多個晚上後，加上幾個星期既訓練，阿靜基本上已經好有信心面對自己買衫既問題，而且面對班售貨員時，佢都唔再緊張同感到壓力，佢清楚佢係客，佢係理應最被受照顧，唔洗咁驚都唔應該要驚。而且阿明除左帶佢去I.T 買衫外，仲帶左佢去其他牌子既店鋪，亦帶左阿靜去旺角既聯合廣埸等等專買女人野既地方，有時侯女仔買衫唔需要名牌，最緊要識襯衫，簡簡單單既配塔已經可以顯露出最靚既一面。而且仲買左一個粉紅色既小袋仔黎配搭，一陣少女味道完全出哂黎。
 
當我係阿靜屋企睇緊電視個陣，阿靜就開門出黎。我轉身一望，見到阿靜成個人都唔同哂，一個粉紅色小袋仔，一件深藍色襯衫，加一條白色既熱褲仔，加上阿靜既雪白皮膚，經過焗油同負離子改善既髮質，完全將阿靜既潛力一一發揮出最大極限，阿靜已經變成一個小美人。
 
『嘩…….真係…….成個人都唔同哂。』我吞了吞口水，個腦開始對阿靜產生了唔應該有既幻想。
 
『我好少著咁少……係咪真係好睇架?』阿靜有少少面紅，但今次我已經分唔到佢係比我讚到面紅，定係著得咁少企係我面前而面紅。
 
『好多女仔都係咁著，依個LOOK係青春既表現，後生女先可以咁著。』我一路講，我既視線一直停留係阿靜對腳到。
 
『咁睇黎真係幾好喎!哈哈!』 阿靜不斷係咁望下自己，轉下身咁睇，覺得好自滿。
 
『仲差少少野，就真係可以殺死人。』
 
『仲差D咩呀?』
 
我走近阿靜面前，已經聞到一股好香既洗頭髮水味，阿靜真係唔同哂。我慢慢拎起佢束頭髮。
 
『如果你整埋個公主頭咁就屈哂機啦。』
 
『係咪係頭髮後面中間再整一條馬尾仔個個髮型?』阿靜邊講邊整。
 
『係呀，嘩……簡直完美。攪到我都開始鐘意你。』我覺得依句說話，可能有一半係真，男人就係咁膚淺，阿靜係我心目中不嬲都係潛力股，印象分數不嬲都係中位數，依家轉左LOOK，即刻分數升到爆標咁濟。
 
『下……你講真架?』阿靜似乎好想知道答案。
 
『唔知呢，哈哈! 依家係咪覺得好有自信先。』為免尷尬，我即刻轉左話題。
 
『嗯!哈哈!多謝你呀!阿明。』阿靜真心向阿明致謝。
 
『依家你滿意啦? 哈哈! 其實都唔洗咁急啦! 過兩日放榜，等我地知道有得升上大學時再慢慢執都未遲。
 
『係喎，後日就放榜，你唔講我都唔記得。』
 
『到時一齊返去學校拎成績?』
 
『好呀! 順便一齊食早餐呀!』阿靜主動約我食早餐，依個舉動令我覺得阿靜開始改變左，竟然主動約人，而且同人對答既時侯都開始流利，睇黎我真係改變左佢好多。
 
『好呀，咁你記得著返依個LOOK，比個驚喜比大家。』
 
『哈哈! 佢地唔洗我比驚喜啦! 佢地收到佢地張成績表一定仲驚喜!』
 
當我返到屋企個陣，坐係電腦面前，坐低諗下，其實我應該都可以追阿靜架喎!? 我唔係一直視佢為潛力股咩? 既然咁睇得起佢，我應該存有唔小對佢既愛意吧? 既然係我一手將佢既潛力發揮出黎，加上我同佢既關係應該係最親密，而且阿靜圈子咁細，我要追應該無咩問題。
 
咪住.....點解依段說話咁熟既? 頂.....之前我對穎兒咪又係咁諗，最後完全估錯哂，你老味真係最忌有自信。但咪住.....今次情況根本就唔同啦，以前我對穎兒既資料一直都係有限，但我對阿靜既資料簡直就係第一手資訊同全面光纖覆蓋，無理由會衰既! 不過都係睇定D，慢慢黎。同埋後日放榜，我同佢成績不嬲都係班上頭幾名，入大學其實唔難，但唔知會唔會讀同一間大學就唔同講法。算! 都係睇定D!
 
同一時間，阿靜不斷係鏡中照黎照去，覺得真係成個人唔同哂，突然間有一個想法，就係貼圖上高登引下班男人，於是用手機偷偷地係廁所到自拍幾張，之後就入落電腦到，用小畫家整走自己個樣，上傳高登，但佢醒目，諗起阿明所講，唔可以咁招搖，唔係就比人討厭，於是佢就係自己個小圈子POST到貼。隨即引來新一批巴打既敬奉，令到阿靜自我感覺非常之好。
 
突然間，手提傳來Whatsapp提示。
 
阿風:
娘娘! 我見到你貼新相喎!
 
阿靜:
我唔係娘娘囉! 哈哈!
 
阿風:
後日放榜啦 驚唔驚?
 
阿靜:
無咩感覺!哈哈 因為我覺得自己考得幾好
 
阿風:
我都係! 係呢! 之前你講個套電影上映左成個星期啦 你幾時得閒?
 
阿靜諗左一陣，依一日點都要黎，之前避左阿風好多次，都係因為覺得自己無咩自信同條件差，如今佢已經改變左好多，連阿明都被佢吸引住，阿靜諗面對阿風應該無咩問題既!
 
阿靜:
好啦! 不如聽日丫! 當放榜前輕鬆一下
 
阿風:
好呀! 就聽日旺角中心等好嗎?
 
阿靜經過阿明既訓練，已經對旺角暸而指掌，如果係以前，聽到阿風講旺角中心等，一定唔知係邊到黎同埋唔識去，此刻，佢終於知道阿明既訓練目的。
 
阿靜:
無問題，到時見!
 
晚上。
 
『喂? 阿媽呀? 返黎未呀? 』我打比阿媽問佢返黎未，因為已經八點幾，如果佢仲未放工，我就照舊去阿靜屋企食飯。
 
『未呀，你去阿靜屋企食啦今晚，記得幫人洗碗丫! 係咁啦!』
 
收線後，我就去阿靜屋企食飯，唔知點解有一種感覺好特別，以前去阿靜屋企都無咩感覺，但依家去阿靜屋企反而有種期待，好想再接近阿靜，再親近阿靜，成個腦都係佢著個件深藍字襯衫加一條白色短熱褲，簡直就係完美。
 
禁鐘後，聽到門內傳來阿靜媽媽既叫聲: 『靜!去開門呀! 』
 
我諗阿靜應該又係房到上高登。阿靜開門比我後，只見阿靜即刻跑返房到。我見咁奇怪，就跟埋入去睇。
 
『睇咩咁緊張呀?』我問。
 
『我追緊個POST丫，入面講個男仔想追一個女仔，但又唔知個女仔諗緊咩，於是佢上黎高登問下巴打絲打點做。』阿靜一路望一路係咁禁個電腦制 - F5 。
 
『仲以為咩咁大件事，依D POST每日都唔知出現過幾多次係高登到啦，睇都睇厭左。』我去拎張椅坐係阿靜身旁。我又一次親近阿靜，個種女人既香味不斷散發出黎。
 
『係咩? 我覺得好好睇呀，唔知個女仔知唔知個男仔鐘意佢呢!』
 
『我問你丫，如果有個男仔想追你，你會點? 』我問。
 
『下.....唔知丫，我又未試過比人追。』但阿靜依一刻個腦到即時浮現出一個人 - 阿風。
 
『拿......即埸同你黎一個特訓啦，教你點樣收兵玩下男仔啦。』
 
『點架點架?』
 
見到阿靜咁興奮既樣，突然覺得有D唔同，但一時之間又諗唔到有咩唔同.....不過算。
 
『首先男仔追女仔有好多方法，我無理由講哂出黎架嘛，但通常男追女都係靠一個溝通工具- SMS同Whatsapp! 之前我幫你貼相上高登，係想比班人一個幻想，但佢地唔知你真實既樣，咁樣先可以吊住佢地癮。 而係SMS Whataspp到都要吊住對方癮，正所謂一淡沙糖一淡屎，得閒就好活躍好熱情咁搵對方傾下，就好似餵佢食毒品一樣，食到對方好HIGH，之後咁上下時間就唔好理對方，或者開始HEA應對方，"哦"丫 "嗯 “依D單字最有殺傷力。』
 
『點解無啦啦唔理人丫? 』 阿靜問。
 
『當係一片大好光明之下，令到對方覺得好有機會時，你唔理佢，佢就會即刻亂諗野，好緊張你，究竟係咪佢做錯野，或者係咪你對佢冇感覺.....好多好多假設出現，令對方個心十五十六，如果佢唔搵你，你又唔搵佢，哈! 咁對方都有D料到，如果對方係咁搵你，咁佢輸左啦! 佢既底牌都比哂你睇，以後你就可以食住佢，任由你玩。兵呢，就係咁黎。』
 
『咁好似好衰咁。』
 
『唔衰唔衰，你要得閒搵下對方，講下曖味說話哄下佢，比個意識佢，令佢覺得有機會! 吊下佢癮! 比佢開心下囉。』
 
『咁如果咁做...對方突然間表白咁點算?』
 
『唔怕，你地女人最叻就係應付依個情況，講一句就可以收對方皮，又可以令到個情況無咁難睇。』
 
『下? 講咩呀?』
 
『就係" Sorry ar，我其實一直都當你係好朋友咋" ，嘩 依句夠哂屈機，完全可以將以往所做過既野合理化，對方完全吹你唔脹。』
 
『哈哈! 咁好似對佢好殘忍咁。』
 
『唔算啦，出黎得行，預左要還，媾女要交學費架。喂!唔講啦! 食得飯未?』
 
『係係係! 我即刻去炒埋碟菜就食得飯。』講完依句後，阿靜即刻衝去廚房炒菜。
 
當我望佢背影時，覺得阿靜真係唔錯，又識煮野食，樣又OK!身材都算OK! 又純! 真係要好好考慮下佢，搵日正式追佢先得!
 
晚飯過後，我同阿靜一齊洗碗，期間我地都有傾計。
 
『你諗住揀邊間大學呀?』阿靜問。
 
『應該係中大，你呢? 』
 
『你唔係想讀電影咩? 做咩揀中大? 我都諗住揀中大。』阿靜記得我之前一直都好想讀電影。
 
『唔啦，興趣唔可以當飯食，現實D好。』
 
『咁又係......』阿靜好似覺得好無奈。
 
『係喎，我見你換左手機既，唔叫我幫你揀?』 其實我一直留意左阿靜好耐，發覺佢換左個智能手機，一直用開舊式手機既佢，突然換左，令我覺得有D好奇。
 
『無呀，之前份約就到期，個人打黎話簽PLAN會送埋手機，咪順便買埋囉。』而事實上，阿靜係因為見到D交友post 個個都留低資料玩whatsapp，所以阿靜好想玩埋一齊，就去左買個智能手機。
 
『好啦，既然你換左手機，應該可以玩Whatsapp架啦，一陣我幫你download個app 之後慢慢同你傾，好嗎? 反正你都無人同你send msg架啦! 』我開始想進一步親近阿靜，決定由Whatsapp開始，依家無人同阿靜send msg，咁阿靜好快就會依賴左我同佢send，哈哈! 咁樣就好易得手。
 
『丫....唔洗啦，我上網睇D教學，知道點樣download d app同jb左。』
 
『JB你都識?』 我好驚訝，對於咩都唔識既阿靜，JB依個係香港女性角度黎講，仲難過煮返幾味。但咁複雜既野佢竟然識做!?
 
『上高登睇架.....『其實唔難』! 哈哈。』
 
『你真係丫…..用埋高登D術語，你真係上哂腦。』
 
『又係你叫我上高登既!』
 
『我叫你去死 你去唔去丫。』
 
『你講咩呀! 衰人。』阿靜將d水潑落我身上。
 
『頂你!』我又將水潑返阿靜身上，我地兩個就好白痴咁係廚房個到玩埋d白痴野，亦都係我地第一次係廚房到玩。我覺得依個感覺好溫馨。
 
****************************************