《我將一位宅女變成女神，然後再將自己變成佢隻兵》: 上集 (2)

第二朝早，我去左阿靜屋企。
 
『快D開電腦，我教你上高登。』我好興奮咁講。
 
『你咁興奮做咩? 你係咪當我白老鼠咁玩。』 阿靜似乎對我抱有懷疑。
 
『幫你咋，咩玩你姐，遲下你就要多謝我。』
 
開左電腦之後，我就係www.yahoo.com.hk到打左幾隻字 - 高登論壇
螢光幕就顯示出第一排既字 -香港高登 - 全港最受歡迎o既電腦資訊網站




 
『咩提供……電腦硬件價格和產品介紹?』 阿靜邊望住螢光幕邊讀出網站上既內容。
 
『唔洗理依D，入面有好多個台，姐係頻道，咩類型既Topic都分哂類架啦，以後你就上依個網啦。』
 
『咁……跟住點?』
 
『首先呢，梗係開返個Account先啦，我幫你準備好一個email架啦，我幫你申請啦。』
 
『唔洗唔洗，我用返我個Email 申請，唔洗你。』阿靜搶住個鍵盤打。




 
『唔得呀，依個論壇好特別，唔係一般Email可以申請，要用D特別既Email先可以申請到架。』
 
我再去會員登記到，顯示出""我們只接受互聯網供應商、學校或公司機構發出之電郵作為登記。我們將會把預設的密碼寄到您所填的電郵地址 “
 
『拿，都話架啦，又唔信。』
 
『係啦係啦，唔該你囉。』
 
『喂喂，想叫咩名? 要改名。』




 
『嗯……求其啦。』
 
『點可以求其，名呢，最令人幻想，依到呀，好多人扮人妖架，你要女性化D，D人先唔會懷疑你。』
 
『咁……唉也，唔知呀，你話幫我既，你幫我諗啦。』
 
『得啦，我一早預備好叫咩名，就叫 絲。』 其實我都係鳩up。
 
註冊成功，高登從此以後就多左位絲打，就叫絲。
 
『跟住就正式開始啦。』
 
『開始D咩呀?』 阿靜問。
 




『我要你自己上高登上幾日先，最好留埋言啦，等你適應一下高登文化先。』
 
『都唔知有咩咁好睇。』
 
『過幾日你就知，好啦，我返過去，你自己係到玩啦。』
 
之後我都返左屋企繼續係高登到打返我既故事，高登係我唯一一個地方可以比我分享故事作品，可以睇下反應，作為寫故既人，有人睇，有人欣賞，真係好大滿足感。
 
Whatapps 又再一次出現msg
 
穎兒:
做咩唔應人......
 
阿明:
琴晚累得濟 訓左




 
穎兒:
你無事呀嘛?
 
阿明:
無……你諗多左啦，我琴晚真係好累先無咩點出聲姐
 
穎兒:
我仲以為我做錯事......
 
 
阿明:
傻啦，無啦啦做咩錯事姐
 
穎兒:




嗯......
 
之後我都唔知應佢D咩好，我就放低手提唔理佢，但唔洗10分鐘，Whatsapp又響了
 
穎兒:
你做緊咩?
 
阿明:
無 上下網 聽下歌咁囉
 
穎兒:
哦……無出街咩?
 
阿明:
邊有人同我出呀! 你呢?你唔洗陪你男朋友咩?




 
穎兒:
佢大學好多野做，成日趕project，我都唔想阻佢。
 
阿明:
你都溫書啦，就快考AL。
 
穎兒:
唔知點解無咩心情溫書……不如你講個笑話比我聽啦　haha
 
我望住手提上既螢光幕，我諗左一陣，都係決定要改變一下我地之間既關係。 既然佢咁依賴我，不斷向我討"毒品"，咁我食住佢，反正對我黎講都無影響。
 
阿明:
無笑話呀 係啦 !唔傾啦 我去溫書 ，你都去溫書啦 拜
 
穎兒:
拜......
 
我冷笑了，穎兒個心依家一定十五十六，佢會不斷係到諗一D無答案既問題，係到諗阿明點解咁冷淡既? 會唔會係因為我有男朋友? 定係佢真係有野做呢? 我好悶呀……好想同佢傾計，會唔會佢討厭左我?
 
就即管由佢咁諗。
 
***************************************
星期一
 
洗臉個陣，我覺得今日我特別精神，其實正常黎講，知道穎兒有男朋友，我係應該傷心失意，但依家我仲未輸哂，穎兒依賴左我，我變返做主動個一方，主導權仲係我手上，我仲係嬴家。
 
但諗落，我既目的係咩? 我覺得自己開始對穎兒無以前咁鐘意，但我又想拖住佢，當我見到佢為我而唔開心既時侯，我反而好開心。我真係一個仆街黎，唔怪得D女人咁鐘意收兵玩人，原來個種感覺咁爽。 等我拿拿林幫阿靜變成一位女神，比佢感受下做娘娘既感覺，哈哈。
 
返到學校，穎兒見到我有D唔自然，我心入面就不斷暗爽緊，不如落重料，再令佢亂諗野先。
 
小息個陣，我拍一拍佢膊頭，佢轉身望我，個樣有D不安但又有點興奮。
 
『仲有幾個月就考AL，我想開始谷盡佢，有冇興趣一齊溫書一齊閉關修練?』
 
『好呀好呀，預埋我呀，一齊溫書呀。幾時開始呀?』穎兒表現得好興奮。
 
『就下星期開始啦，依個星期就輕鬆下，有得玩就玩盡佢，之後就正式溫書。』
 
『好呀，咁係邊到溫呀?』
 
『我屋企樓下個自修室。』
 
穎兒聽到之後面色一沉:『但……你住上水，我住香港仔，我黎既話好遠......』
 
『如果你唔得就算啦，我搵第二個。』 我決絕地說。
 
『不如咁啦，我地去旺角個……』穎兒未講完，我就加把咀: 『唔啦，只有我樓下自修室溫我先會入腦。』
 
『但係你個面.....』穎兒說。
 
『都係算啦，我都唔記得左你住得咁遠，算啦，我搵第二個，同埋我上星期開始我可能熜電話溫，謝絕玩手機，要專心D。』
 
穎兒聽到之後好唔開心，無可奈何咁轉返身。
 
我明知道佢住得遠，一定唔會黎我到溫書，我目的都係想打擊下佢，同埋我強調我會熜電話，唔會應人Whatsapp，到時佢個心一定仲更加十五十六，好唔舒服。
 
之後，佢突然訓左係張枱到，我突然有一絲同情心，但要搵既，你就搵你男友，要陪既，就搵你男友陪，唔好搵我。
 
我扮睇唔到，就去左搵阿靜吹水，順便問下佢上左兩日高登有咩感受。
 
『點呀，上左幾日高登，有咩感受呀?』 我坐左係阿靜身旁。
 
『好核突囉，成日有D咩J圖，入面勁多D咸濕相，成日貼D女仔腳出黎，又好多AV topic，我都唔敢禁入去睇。』
 
『哈哈哈，男人最鐘意睇依D架啦，個個男人都係咸濕既，好正常既事，你既思想唔好諗得咁核突。』
 
『你成日睇架?』
 
『你咪理，點呀，你有冇留過言?』
 
『好多既topic我都無咩興趣，有時D人就咁貼個icon出黎，又唔打字，都唔知可以討論D咩。不過我見到有D星座，同埋D 關於AL既topic 我都有留下言問下囉。』
 
『喂，醒喎你，星座依Dpost最岩釣狗公，拿，你去感情台個到玩就得架啦。』
 
『感情台? 點解呀。』
 
『個到大把毒男寄居左係到，大把感情失意既人係到流連，最岩收兵。』
 
『點解係要我收兵姐!』阿靜好似有D嬲。
 
『唔收兵……? 唔通係到搵男朋友呀?』
 
『咁.......』
 
『拿，今晚我黎你屋企，我幫你出個post，包大把人搵你。』
 
『你想點呀......』
 
『今晚你就知。』
 
上堂鐘聲響起，我又返返去座位等上堂，穎兒都起返身，聽到D索鼻水既聲，我就知佢岩岩可能喊過黎，但我都無動於衷，我個腦只係好好計劃緊今晚既大計。
 
當晚，我食完飯就去左阿靜屋企，伯母因為返工太累，所以一早就訓左 ，得返我同阿靜係房到，我再關上門。
 
『做咩關門呀? 好焗呀。』阿靜說。
 
『我話左今晚幫你開post吸引人，梗係要準備下。』說罷，我拎左部相機出黎。
 
『你做咩拎相機? 你唔係影我放上網呀? 我唔制呀。』
 
『我係影你放上網，但唔係咁簡單既，咁樣會比人討厭。』
 
於是我坐係電腦面前，上左高登，登入左阿靜既AC。就開左個POST
 
" 『只限絲打入』你地平時點吹頭? ? "
 
內容就係 :
 
絲打們 我天生頭髮好幼
前陰成日都因為太貼好似一餅野
試過用d可以卷劉海既工具但好快又貼返
可以點做  
 
同埋我想自己吹內彎 但吹到d頭髮乾哂旱哂都未吹到
有咩方法先可以吹到／卷到 好自然個隻內彎？
 
 
『係咁上下啦。』我再拎起相機，示意要同阿靜影相。
 
『你做咩開埋D咁既post? 你唔係要我POST相呀。你又只限絲打入，姐係點。』 阿靜係咁問問題。
 
『廢事D人當你係高登到收兵呀，講明絲打入以示證明，反正D狗公都會照狗衝入黎，佢地好快就會話無圖好難幫你架啦。』
 
點知，個POST隨時出現數位男字巴打留言:『無圖既話　你話你個頭貼服到變貼紙都得架啦！』
 
『拿拿拿，都話架啦。黎啦，我同你影相，我會用小畫家遮住你個樣架啦。』
 
『唔呀，咁危險我唔試。』
 
『我依家幫你呀，危咩險姐，你依家唔試，你以後唔好搵我幫你。』我開始態度強硬，唔想成日見到阿靜係到拖拖拉拉。
 
『唉……好啦，咁點影呀?』 阿靜見我好似燥燥地，態度都軟返落黎。
 
我望一望阿靜全身，然後就話: 『除左條褲佢。』
 
『咩呀? 你講咩話? 』阿靜好大反應。
 
『我意思係話，你條褲咁長，換條短褲黎著姐，你估真係影你個頭髮貼上去咩，我要影到你頭髮之餘，仲要影到你對腳。』
 
『劉啟明! 我發覺你真係好變態喎!』
 
『喂喂，我講過係男人都咸濕，你想捉住男人既心理就要知道男人鐘意D咩，點先可以吸引到男人，你地女人有既係本錢，全身都係武器，只要利用得宜，咩男人都會衰係你地手上。』
 
『不過......』阿靜好似唔太願意。
 
『唉....』 我行去阿靜面前，雙手搭住佢膊頭。 『你咁單純，你將來好易比人呃，你一定要識玩依個遊戲，如果唔係既話，將來你一定係最蝕底個個。要識玩依個遊戲，首先就要捉摸對方心態，男人好膚淺，個個都係睇樣睇身材，你唔用你既身體去吸引佢地，佢地點會聽你話?』
 
『我唔同意! 我相信有人會重視內在美 多過 外在美!』 阿靜反駁。
 
『你望下你自己，做左十幾年人，二十歲都黎，有冇男人埋過你身邊? 有冇男人係因為你內在美而鐘意你?』
 
『……』 阿靜以沉默既方式回答左我既問題。
 
『阿靜，我知你好善良，好純，但你依家外表真係差左少少，你又唔打扮下，又成日著你阿媽買比你既衫，咁樣點吸引男人? 唔吸引男人 ，佢地又點會睇到你內在美呢? 』
 
『嗯.......』阿靜似乎明白到阿明所講既野。
 
『你換條褲啦，我轉身唔睇。』 說罷，我就繼續睇下個post既發展點。
 
阿靜就拎左條PE褲黎換，當佢係我身後面換褲個陣，聽到D除褲聲，突然間我令我有一種興恰恰既感覺，我一直都覺得阿靜係潛力股黎，佢樣唔差，只係成日唔理自己外表，但係屋企到，特別係佢沖完涼個刻，佢真係幾正......
 
『換完啦。』
 
我轉身一望，只見阿靜怕怕羞羞，企左係我面前，我好少見佢著短褲，平時上PE堂都係男女分開上，都無咩見過，平時條裙又鬼死咁長，咩都遮哂。就算平時夏天，佢都係著長褲多。
 
如今係我面前既係阿靜著住短褲係我面前，對腳原來都幾得.....一D「蚊爛」既痕跡都無，仲有D白滑。
 
我吞一吞口水，再叫阿靜坐低，將隻腳合埋。
 
『我唔可以就咁影你對腳POST上去，好令人反感。我要影你個樣，順便唔覺意咁影埋你對大脾。』
 
『嗯......』阿靜開始面紅，因為阿靜從來無試過遇到咁既情況，自己就好似一個Model咁，而阿明就正正係佢面前拎住相機影佢，二人距離唔夠幾十CM，大家都清楚大家既透氣聲。
 
當我拎住相機對住阿靜時侯，從鏡頭中，阿靜對雪白大脾就係我眼前，我吞了吞口水。個腦即時有個念頭就係 " 好想摸一下 "。
 
『咳……影完啦。』我起返身，係袋到拎條USB線出黎，插落部電腦到，諗住將相機既機過落電腦到。
 
阿靜就拎張櫈坐埋黎，同我一齊上高登。當我入緊相既時侯，我不其然望一望阿靜，佢對雪白大脾真係好吸引人，加上佢專注緊望住電腦時侯，個身向前傾，我隱約從佢件Tee到見到佢對胸圍。
 
『連接左啦喎!』阿靜突然說。
 
我即時嚇左一嚇，連忙接著說: 『係喎，等我用小畫家遮住你塊面再上傳上去先。』
 
之後我就係高登到貼上阿靜既相片，即時有大量巴打回應，內容大致上係" More ，娘娘，收我做兵 我係狗公 我可以吠! 汪汪! “。
 
『拿，都話好大反應架啦。』我好自豪地說。
 
『哈哈，佢地咁低能既! 佢地又睇唔到我個樣，講到好似好鐘意我咁。』
 
『只要佢地知你係女仔，年紀睇落應該同佢地差唔多，佢地就開始有好多幻想架啦，加上你對大脾，自自然然令佢地好想接近你。』
 
『哦……原來係咁.......』阿靜專注地看住電腦螢光幕。
 
『依家全個POST既人都好期待你再貼相，都好想做你隻兵，當然啦! 依家佢地都係亂up既姐，遲下我再幫你提高人氣，包你可以釣到大魚。』
 
『哈哈! 好呀，喂.....我想同佢地傾計呀，比我留言呀。』阿靜好興奮。因為由細到大佢都無試過可以成為眾人既蕉點，今次仲要係男人。突然內心湧住一股自豪感出黎，令到阿靜好滿足。
 
『好呀，同埋你慣左上高登之後，都要係其他POST留下言。』睇見阿靜咁興奮，我都起身走人，唔想係到阻住佢，突然間又有一絲既同情，阿靜係現實到得唔到既快感，估唔到要係網絡上尋求，其實都幾可憐。
 
『丫......依段時間你就係高登到流連啦，有咩特別野就同我報告，記住!千奇唔好講你FB，名同email出黎。班人會拎你既email係Google查你。廢事比人起底。』
 
『知道!』
 
『考完高考，我就同你執一執個外表。』
 
阿靜轉身望我:『係咪執好D，之後再貼上去? 我唔制呀。』
 
『唔係，其實你升到大學應該係意料中事，你既男朋友唔係係高登搵，而係大學搵。我要係開學之前，幫你轉形像，到時係大學慢慢吸引人黎媾你。』
 
『唉，算啦，我都係咁樣過下癮就算啦，反正都無人會鐘意我。』阿靜再次轉返身玩電腦。
 
我行去阿靜身後，雙手再次搭上佢膊頭 :『要改變內在，就係上高登係幫你調整心態，理解男人既心理同特性。要改變外在，就係改變形像，執正外表。到時兩者俱備，簡直就係一個完美女神。』
 
『到時先算啦。』阿靜依然望住個電腦，睇黎阿靜好滿足於依家既情況，咁又難怪既。
 
依一刻，我雙手感受到從阿靜既膊頭傳來既體溫，好舒服。我再係高空望落去，再一次隱隱約約見到從阿靜件tee透出既胸圍。頂……我係到做緊咩，我竟然係到佔阿靜便宜，抽佢水?
 
我搖一搖頭，清醒下就講拜拜。
 
返到屋企，入房冷靜下自己，腦海不斷諗起頭先既情景，阿靜雪白既大脾同若隱若現既胸圍，真係令我成個人都興恰恰，估唔到自己對阿靜都有幻想。
 
我開左電腦，打開個AV存檔，慢慢除左條褲，開始揀套AV黎打飛機發洩一下。當我一路睇緊AV一路打飛機既時侯，望住螢光幕既AV女優，覺得點解可以咁靚? 點解佢地咁靚都要做AV女優?
 
突然間一股沉重既心情湧現，我停左手。
 
我係到諗 我究竟係到做咩? 依個情況仲要持續幾耐 ? 望住所謂既J 圖黎打飛機，令我覺得自己好似一個失敗者，J圖入面既女仔係現實中可以比佢地伴侶享用，而我地依類既失敗者，只可以對住張J圖黎打飛機，而依堆J圖仲要係當中既主角影黎施捨比我地.....
 
望住螢光幕中既AV女優，佢地被對方狠狠地屌，狠狠地玩弄，見到佢地咁爽既表情，而我地依類既失敗者永遠都享受唔到佢地當中既快感嗎?
 
愈諗愈灰，我關左個螢光幕，著返條褲，出去洗手再冷靜下。
 
唔可以再係咁，連阿靜都向佢既將來開始起步，我呢? 我係咪應該都開始為自己打算?
我拎起手提，望住Whatsapp，最近傾得最多既都係穎兒，可惜佢地有男朋友。 我不斷睇返過往同穎兒Whatsapp既對話，發覺某D對話真係幾好笑，個段時間真係好開心。 估唔到咁短時間內，我地兩個既心態都唔同哂。
 
睇睇下，Whatsapp就狂彈apps，每當我再搵返以前既對話時，Whatsapp就會彈，咁意味住D咩?
係咪意味住過去就係過去，永遠都返唔到轉頭嗎?
 
依一晚，令我諗左好多野。
 
**************************************
 
數個月後。
 
『嗚呀!!!!!!!!!!!今日Last day啦!!!!!!!!!!!!嗚呀!!!!!!!!!!!!!!!!』范威係班上大叫。
 
『喂，快D落去小食部食返餐最後小息餐!』阿仁說。
 
『各位，我地衝呀!!!!』范威係班上大叫。
 
佢地既舉動引來班上既女同學傳來種種低能，白痴既回應。
 
無錯，今日係我地既last day，過左今日之後，除左放榜個日會返黎之外，我諗都無咩機會再返黎學校。 為左今日，我帶左另一套件校服返黎，諗住放學比身邊既人簽名留念。一路上堂，我又係到發夢，腦海不斷回憶整個中學生涯，不禁有點感觸，話哂都讀左七年，唔多唔少都有感情，雖然平時無咩太大既感覺，但依家一諗到以後無得再返黎讀書，我就有點心酸。有人話讀書時就好想出黎做野搵錢，到左大過返工時，就會好返讀返書，特別想返返中學。我終於明白依個感受，就好似人平時唔珍惜生命，到左就黎死個刻反而唔想死，嗚呀，我突然覺得過去七年既校園生活好似有點白過。
 
『阿明，你溫哂書未?』穎兒轉身問。
 
『嗯，大致上都溫哂，你呢?』我答得好輕鬆，唔係因為我溫左書，而係我對穎兒既態度放鬆左同自然左，我諗過，始終今日係last day，以往既事都唔應該記住，而我好想同返穎兒回復返以前既關係，依幾個月內，溫書溫到個人好dry，有時侯都想搵人傾下計，send下Whatsapp，做唔到穎兒男朋友，其實都可以做一個好朋友既。
 
『我......應該會去外國讀書。所以溫唔溫都無咩所謂。』
 
『咩話?去外國讀書? 』我實在好驚訝，我從來無聽過穎兒講過要去外國讀書。
 
『嗯……係上個月決定，屋企人主張要我去外國讀書，而我……你知我成績不嬲都唔係好好，係香港升到大學既機會都唔大，可能去外國都係一個正確選擇。』從穎兒講依番說話既面色黎睇，佢係到自己呃緊呃自己，好明顯佢唔想去外國。
 
『咁大件事點解唔搵我傾下呀? 』
 
『我……我.....有....不過.....不過你無應我。』
 
『對唔住。』我突然心情好沉重，個腦又浮起之前既Whatsapp對話，事實上，穎兒一直都有搵我，但我全部都無應佢，漸漸地，穎兒都放棄左搵我，而我都好似忘記左穎兒同我既Whatsapp關係。
 
雙方突然沉默左落黎，依一刻，大家都有唔同既想法。
 
『哈哈，唔緊要啦，你溫書要緊，我都唔想係依個博殺時期煩住你。我明白既。』穎兒嘗試打破悶局。
 
『咁又係.......』事實上，我係唔認同，我係因為唔想搵你先避開你。
 
『今日係last day，等我係你張桌上畫返個公仔，以示紀念啦。』說罷，穎兒就拎起支筆慢慢係我桌上畫公仔。
 
『阿明，你要加油讀書，升上大學。享受一下你成日口中所講既大學生活，將來一定要分享比我聽，知嗎?』穎兒一路畫一路寫。
 
依一刻我腦海又浮現出幾個月前，穎兒好想同我一齊溫書既情景，穎兒一直都好想升到大學，當佢知道我邀請佢一齊溫書既時侯，佢係好興奮同好開心。但最後......竟然用地方遠既理由將佢拒之於門外。
 
當我望穎兒畫既公仔時侯，佢畫左棵樹。
 
『做咩畫樹既?』我強忍淚水，但我聽得出我說話有D困難。
 
『依棵係感情樹，當我地感情愈黎愈好既時侯，佢既樹枝就會生長，慢慢生長出去……』穎兒一路講一路用支筆將桌上既樹枝慢慢畫出去，一直畫到我手上。
 
穎兒捉住我隻手，用筆係我手上既感情線上慢慢加深顏色。
 
『穎兒......』
 
『睇下! 依棵樹生長得咁快，證明我地感情好深厚，樹枝生長到你手上既感情線。我同你既感情永遠永遠都係你手上。』
 
『穎兒......』
 
穎兒抬頭望住我，我可以睇得到佢雙眼已經紅左。
 
『阿明.....唔好唔記得我，知唔知呀?』
 
『一定唔會唔記得你.....我保證。』
 
『其實你都知.....我無咩朋友，係班上面得你同我玩得最埋，由於我自己都住得遠，所以次次放學我都要好早走，攪到我好少同班上既同學仔玩，加上我又係外校生入黎。』
 
『我明.......』
 
『你呀! 上到大學記得搵返個女朋友仔! 知唔知呀! 哈哈』
 
『希望啦，係呢.....你去外國，咁你男朋友點?』
 
『我地分左手，所以我去外國都對大家無影響，哈哈。』明顯地，穎兒係到強顏歡笑。
 
『分左手?我無聽你…..』
 
我未講完，我就知自己講錯野，都係自己唔搵穎兒，所以我對穎兒最近既事完全一無所知，我深深感受到穎兒個種失意，佢既社交圈子因為地方距離問題攪到好細，無咩朋友，只係得我一個成日哄佢開心既好朋友。但幾個月前，我唔理佢，佢同男友又分手，加上屋企人要佢去外國讀書，種種事情一下子湧現，要穎兒自己一個面對，我明白到穎兒個段時間一定好辛苦。
 
『係我比人飛架，佢係大學到搵到第二個，哈哈! 可能我蠢怪，唔夠D大學生叻，所以比人飛左。』
 
『穎兒......其實我唔係唔理你，而係……』
 
『鈴.......鈴.........鈴.......』 上堂鐘聲響起，所有人一下子湧返入黎班房，連范威都返左黎，坐返我格離。
 
『而係咩呀.....?』穎兒問。
 
『丫......無野。』見到范威返左黎，我都唔好意思講依D野。
 
老師到左，各人都收恰心情係到上堂，而我卻靜靜地望住桌上既樹，再將自己既手慢慢移去桌上既樹支，真係好神奇，真係好似D樹枝生去我手上的感情線。
 
『咁得意既? 你畫架? 』范威問。
 
『你放隻手係到。』我拎起支筆係桌上畫多條樹支，慢慢畫長佢，慢慢畫去范威手上既感情線。
 
『WOW，果然係大師級畫功。』
 
『依棵叫感情樹，感情愈好，樹枝先會生長，我生左一條係你到啦，證明我地係一對好兄弟。』 唔知係咪比穎兒既說話感染左定係今日Last day效應，我發覺我講野都幾感性。
 
『男人老狗咪咁肉麻啦。係呢，咁依條呢?』范威指住穎兒所畫既樹枝。
 
我諗左一陣，望向坐我前面既穎兒，慢慢說出 : 『依支係證明我地永遠都係一對好朋友。』
 
『鈴....鈴....鈴.....』 放學鐘聲響起了，意味住我地既中學生活亦都告一段落。
 
最後一堂既李Sir放低一句之後，頭也不回咁離開班房:『祝你地前程錦繡。』
 
佢既性格就係咁瀟灑，但諗深一層，佢係到教左咁多年書，對於每年都畢業既學生，應該都睇化左吧!?
 
『喂喂，大家! 今日last day! 有咩玩先?』阿仁企出去大叫。只見班上既人都議論紛紛。 我望一望阿靜，見到佢收恰緊書包，準備離開。我就行埋佢到，問下佢做咩。
 
『要走?』
 
『係呀，返屋企溫書。』
 
『今日最後一日，留低一齊玩啦。』
 
『唔啦，反正不嬲都唔係玩開，何必最後一齊玩呢?』
 
『你個自卑心態又黎啦，都話左唔可以成日咁睇死自己，識朋友係要主動架，成日咁被動，邊會有人肯同你FD?』
 
『你望下其他人。』 阿靜視線轉向我身邊，示意叫我望一望周圍。
 
我轉身望下，發覺班上既人都走得七七八八，我再望一望阿仁既樣，佢攤開雙手，露出一個無奈既表情。
 
『唔係呀化?! 今日最後一日，D人咁就走?』
 
『阿明，你唔係唔知個班不嬲都唔係咁團結，何必夾硬用"last day last day" 依個藉口聚集班人呢? 我知你好青春，好想好似D電視劇咁，成班人一齊好熱血好青春咁玩，係咪? 但你去錯地方啦。』
 
阿靜一針見血既說話，令我感到無奈。事實上，班上既人不嬲都唔係咁團結，如果唔係Last day，我都唔會叫佢地留低一齊玩......唉，我琴晚仲係到上網查下google有咩野係last day應該做既事，到最後竟然會係咁.......
 
『係咁啦，拜拜。』阿靜揮揮手就走左。
 
班上只剩下阿仁，范威，同數名男女同學。佢地都不斷重覆問一句: 『喂? 有咩做? 』
 
但無人答得出。突然之間，各人心情都變得沉重，估唔到中學最後一日係咁樣結束。 於是各人都無出聲咁，收恰書包，準備離開。而我都無可奈何地執恰書包。
 
『拍……拍…...』 門口傳來數下拍打籃球既聲。
 
『喂! 我地不如出去打波啦。』穎兒突然出現，手上拎住一個籃球。
 
『穎兒 ? 你唔係走左咩? 』眾人都好驚訝地問。
 
『一打鐘我就衝左落去體育室拎個籃球返黎啦，廢事比人搶左去! 同埋今日last day 喎! 咁樣完結既話，你班熱血男兒點會滿足呀? 一齊落去玩啦。』穎兒興奮地說。
 
『穎兒!!!我愛你!!!!喂!!!我地拎埋書包落去球埸啦!!』阿仁講完，即刻收恰書包。
 
『接住!』 穎兒拋個籃球比我。 我接過後，就行近穎兒到。
 
『仲以為你走左。』我說。
 
『我走架啦，不過……過埋今日啦。哈哈! 我打波好渣架，你唔好笑我呀!』
 
『嗯! 一定唔會笑你，至多.....串你!』
 
『喂呀!!死人阿明!』
 
『仲講!!落去啦!!喂!!大家!!出去啦!!』各人保持住一個興奮既心情，拎住書包由六樓衝落去操埸。
 
一路衝落去既時侯，大家不斷閃避人群，雖然過程好驚險，仲差D趺倒，但我地都好開心，好好笑。大家平時係學校都扮乖乖仔女都扮到夠，今日就比我地趁Last day好好放縱一下。一路跑時，學校既同學仔都見到我地咁，都以一個葡萄既目光望住我地，就好似同我講” 頂……我都好想好似你地咁玩呀!” 。
 
而 我都留意到穎兒今日係我識佢以來，係笑得最自然，最真誠既一日。
 
係操埸上，我地男子組鬥女子組，大家都以玩既心態係到打波，任由D女仔拎住個波周圍走，就算佢地走步又好，用腳踢又好，犯哂規都好，我地都覺得好開心，估唔到我地最後一日係以打波黎完結。
 
『企埋D! 企埋D !明哥你隻手再伸直D!』 一個中六師弟係二樓大叫。
 
我地幾個人訓左係籃球埸到，砌左個" 凸" 字出黎，希望送比依間學校作為禮物，多謝佢地咁多年黎既教導。再叫師弟係二樓到幫我地執好個位同埋影返張相。
 
影完之後，我地都唔肯起身，望住個天，天色開始暗，但涼風吹過黎，令人好舒服。突然有一架飛機係天空上飛過，穎兒就大叫: 『我好僧飛機呀!!!!我唔想坐飛機走呀!!!!呀!!!!!』
 
『咁僧飛機，不如我地打飛機啦!』阿仁大叫。
 
『好核突呀你.....』女同學說。
 
『咩姐!我話打架飛機落黎呀!』阿仁反駁說。
 
『唔~~~~天氣不似如期，但要走 總要飛~~~』范威好風騷咁唱出Eason首歲月如歌。
 
『哈哈哈哈，你地好好笑呀!! 唔知我外國班同學仔會唔會都係咁好笑呢!』
 
我起身望住穎兒講: 『一定會。』
 
穎兒見我咁認真，都起身好認真問我: 『你咁肯定一定會?』
 
『唔知架…….希望在明天呀嘛。』我說出某個電視廣告對白。
 
『哈哈哈哈!死低B!!!』
 
『嘩....好爛呀!!』眾人說。
 
『你地識條春!!!』說罷，我拎起個籃球好型咁一野踢出去。
 
點知個波飛左去校工室個玻璃窗，一野打爛左。
 
『仆街啦，喂!走呀喂!』我心知不妙，即時執野走人。
 
『頂你阿明，你係咪白痴架!』范威一路講一路執野走佬。
 
『哈哈哈哈!笑死我啦。』穎兒說。
 
『你仲笑? 走啦! 快!』我拖住穎兒隻手，拎埋D野就衝出校門。
 
去到巴士站，我地都正式告別穎兒。
 
『一路順風。』個一刻唔知講咩好，唯有老老套套咁講依句說話。
 
黃昏既光線下，照射住穎兒身上，從來都無見穎兒出咁多汗，今日見到，原來係咁靚。
 
『多謝。你要加油，考好個AL佢，我一定會支持你。』穎兒說。
 
『嗯。一定會。』
 
『咁.....我走啦，拜拜。』
 
『拜拜。』
 
望住穎兒背影，慢慢行上去巴士，再見到架巴士離我而去，直至消失係我視線之內，我就對自己講 :『真係再見，祝你前程錦繡。』
 
**********************************************