《我將一位宅女變成女神，然後再將自己變成佢隻兵》: 上集 (1)

 
阿靜(何妍靜)是一位宅女，只知自身條件不好，沒資格喜歡人，終日埋首屬於自己的世界，不過阿靜內心深處仍然期求一段刻骨銘心的戀愛經驗。主角阿明(劉啟明)不忍心看到好友阿靜這樣，覺得浪費了她所擁有的本錢，決心幫她打扮，教她如何控制男人的心，收兵技巧，玩弄愛情手段，同時亦幫助阿靜改善溝通技巧，擴大社交圈子，務求將這位宅女塑造成大家心目中的女神，一個擁兵自重的娘娘。但阿明慢慢發現，他對阿靜產生了愛意，在追求期間，不知不覺間，他發現自己竟成為了阿靜的一隻兵，同時大學生活將會對阿明所擁有的友情，親情，愛情帶來新的衝擊……如果你有興趣看劉啟明的故事，讓我們一起進入劉啟明的世界，感受一下中學和大學的青春。
 
大家好，我叫劉啟明，就讀孔明紀念中學7B班，係一個準備應付最後一年高級程度會考既準考生。在7B班入面，大家都有一個共同目標，就係要好好努力讀書，希望可以升讀本地大學。除此之外，每個人仲有一個共同目標，就是「標尾會」。
 
所謂既「標尾會」，就係寄望將近完結既中學生活，利用最後一段青春歲月，可以認識到一位伴侶，亦希望可以了結一件中學生傳統既心願- “著住校服去拍拖”。但對我而言，感情方面係唔可以勉強，我保持一個心態，就是隨緣，絕對唔會為拍拖而拍拖。係小息、午飯時候，各男女同學除了係7B班入面狩獵之外，佢地亦會向格離班，甚至向低年級出擊，而我卻安份守紀咁留在班入面，靜靜地坐係到諗，有咩野係比認識伴侶更值得去做呢?




 
我好鐘意發白日夢，諗下無聊野，又會留意身邊既事物，特別鐘意係上堂既時候發夢。對我黎講，7B班我係好熟悉，每位同學既性格，特徵我都好清楚。除左人之外，黑板邊處有裂痕，邊個儲物櫃既鎖壞左，我都一清二楚。我都好鐘意將女同學當成『股票』。
 
舉個例，少敏係一個公認好靚女既女生，短短既校服裙，經常露出一對白滑既雙腿，個對豐滿既上圍，經常吸引我地班麻甩學生哥注意，依個邪惡既人間胸器，在股票市場入面，每個人都會搶住黎認購，但係佢既港女性格好嚴重，視錢如命既佢經常更換品牌，對男友既要求都好高，依種股票對我黎講，係一隻中伏股，買左就知中伏，唔知欺騙左幾多無辜既小股民受害於她。
 
不過係7B班入面，仲有很多優質潛力股值得討論，係我心目中，佢……
 
『鈴….鈴….鈴…』 放學鐘聲響起了。
 
『鐘聲響起歸家的訊號……在他生命裡......』阿仁隨即唱起歌來，好鬼死風騷，事關佢一陣約左女朋友放學去行街拍拖，所以對阿仁黎講，已經唔洗標尾會。




 
『唔洗唱啦，俊仁你欠我既功課仲未交喎，一陣你留低做埋佢比我啦!』陳Sir指著阿仁說。
 
『唔係化……陳sir，聽日!就聽日!我一定交到比你，今日真係唔得!』 阿仁邊說邊跟住離開班房既陳Sir走。
 
『阿明，去打波啦!』范威見阿仁走左，唯有搵阿明。
 
『我唔想整到成身臭汗返屋企，我都係返屋企沖涼溫書算。』我收恰書包，正要離開。
 
『唔洗扮啦，你成績不嬲都咁勁，溫少一日無咩太大影響呀?』




 
『唔啦，下次先打，係咁啦。』我從來決定任何事都好決絕，絕對唔會拖拖拉拉。
 
一離開學校大門，我就拎對耳機出黎，開始享受MP3所帶來既悠閒娛樂。每次係依個時侯我都會覺得音樂真係人類最大既偉大發明，有人曾經問過我，如果世界上無左一樣野會令我感覺人生活著係無意義既，會係咩野? 如果玩野咁答，我會答一條J，作為男人無左條J既話，仲有咩人生樂趣? 但如果認真答既話，無左音樂，真係成個人生都會枯燥乏味，無左音樂抒發喜怒哀樂。
 
在返屋企條路上，我見到班入面一位女同學，她叫何妍靜，係一位典形宅女。講樣既話，其實佢就係我剛才想講既優質潛力股，不過佢既裝扮同埋不修篇幅既形象將佢既優點通通蓋上。個條長得差點到鞋尖既校服裙，色澤暗淡無光既髮色，配上好似撤哈拉沙漠一樣咁乾既髮質，仲開哂『屮』，唔講以為佢好耐無做過焗油同洗頭，但佢總係愛理不理，將把頭髮束起黎就算。
 
阿靜讀書成績唔錯，依個印象比人感覺係『讀書樣』，而且佢好鐘意睇動漫，每次小息既時候，就會拎本漫畫出黎睇，佢所睇開既漫畫對我黎講係非常重口味，咩春男同男既故事，諗起都覺得嘔心，真係唔明佢點解咁鐘意睇依類漫畫?
 
佢既社交圈子小得可憐，她既Facebook只有三十二人，無錯，係三十二人。而依堆人就是我地7B班既同學。她總愛POST一D動漫既歌曲，和一D睇唔明既日文，我每一次都會利用Google翻譯佢所打既文字，先明白佢想講咩D。佢既status都無咩人會留意，好似玩緊單機Facebook咁。當我見到咁既情況，我都會比一D回應佢，就是一個『LIKE』，但我既讚好唔係用黎回應對她既內容，而係想表達出我已經睇過佢既文章，就好似老師經常改功課時侯，蓋上一個印章-『閱』。
 
不過我同她既感情都幾好，因為她住係我對面屋企，佢阿媽經常黎我屋企同我阿媽傾計，而我都可以話係佢同由細玩到大。她好鐘意宅係屋企，一到假期我都會見到她坐係電腦前睇動漫，日劇等等。每當學校旅行，她就會請假留係屋企，我曾經問佢原因係咩，佢話反正都無咩朋友，去到都只係自己一個，倒不如留係屋企睇劇好過。
 
無錯，阿靜身邊無咩朋友，班入面既女同學雖然都想接近佢，但不善於溝通既阿靜，總叫人無癮，每次傾計時侯，阿靜往往扮演住一個『話題終結者』既角色，令人無法應對。同埋好鐘意靜靜地坐係班房入面，咩地方，咩活動都唔想參加。所以班中既女同學都唔係成日同佢玩。
 




『喂，何妍靜，睇緊咩書?』我走上前問。
 
『八掛，唔關你事。』阿靜望一望我，便繼續睇漫畫。
 
『睇過……』我將佢本漫畫搶去，一睇之下，只見兩個大男人既對白係講緊令人曖味既說話。
 
『嘩，你仲睇緊依D書? 你小心睇壞腦呀!』
 
『唔關你事，比返我! 衰人!』 阿靜好嬲，不斷伸手黎搶，但身高只有一米六既她，對於身高一米八既我根本無咩威脅。
 
『比返你啦，係條街到拉拉扯扯貪好睇咩!』
 
『點解你咁鐘意蝦我?』阿靜奪回本漫畫，便繼續投身返佢既漫畫世界。
 
我地一直行返屋企，我望望天空，今日個天好靚，空氣好清新，深呼吸一下，整個人都精神不少。




 
『係呢，最近我煩緊大學揀咩科，你揀左未?』
 
『揀左。』阿靜依舊看著漫畫，淡淡地回應。
 
『我既夢想係能夠將我所寫既故事拍成電影，你知唔知? 我好喜歡創作，特別係寫故事，如果將我既故事變成電影，嘩，個種滿足感真係好大。不過……你試諗諗，係香港，依行很難發展，人工都唔係話好高，我唔想讀完個大學學位之後，就要做一個乞食既大學生。』
 
如是者，一路上我不斷講出我既夢想，理想，選科態度。阿靜仍然沉默，其實我都習慣左，我只係想搵個人黎吐吐苦水，每次我講完，心情總係好左好多，可能阿靜就係我心目中既『樹窿』。
 
回到家大門，我仍然在說。
 
『但我聽講個間大學既質素一般，因為我聽……』我話未說完，阿靜便拉開鐵閘大門。
 
『再見。』說罷，阿靜便關上了門。
 




我不自覺地笑了，便說:『再見。』
 
**********************************************
 
返到屋企之後，放低書包，攤係張梳化到，好想訓。但我唔可以訓，因為我係一個高登網上論壇區連載緊我所寫既故事，好想睇下反應係咪好熱烈，如果係既話，班讀者一定係咁問侯我娘親追我既文，所以我好多時都為左救娘親，就乖乖地坐係電腦面前，慢慢繼續打我既故事同回應讀者既問題。
 
不經不覺，已經夜晚六點幾。
 
望住個鐘，已經知道爸爸媽媽正在工作，應該趕唔切返黎煮飯。通常係咁既情況下，我會到阿靜屋企食，這也是慣常的事。
 
『叮……噹。』我按下門鐘。
 
『阿明? 你媽媽無返黎煮飯呀? 黎黎黎，今晚我買左好多餸。』阿靜媽媽好鐘意我，總是笑容滿臉地對我。
 
『多謝阿姨，打攪哂!』 我客氣地說。




 
踏入家裡，見到阿靜煮緊飯，她著住一條老套得唔可以再老套既圍裙，在一片濃厚蒸氣包圍下好努力咁炒餸。
 
我入佢間房睇下，見到電腦開著左，不其然地坐著，睇下佢部電腦有D咩野睇。
 
唔洗十幾秒，便聽到佢係廚房跑出黎大叫:『阿明!唔好入我間房呀!』
 
我即時嗅到由佢手上傳來既魚腥味，便蓋上鼻子:『你有無洗手呀?!好臭呀!』
 
『邊個話可以比你入黎?! 你快D出返去! 出返去!』說罷，阿靜會拉著我手將我拖出去。
 
『嘩，你唔好拉住我呀，你隻手好臭呀!』
 
『你出去我就唔拉你!』
 
『伯母! 阿靜唔去煮飯呀!』我示意給正在看電視的阿姨聽。
 
『阿靜!快D去煮飯!我地等緊你呀!』 阿姨也幫我說好說話。
 
『媽呀，佢用我部電腦呀!』阿靜不忿地說。
 
『有咩所謂，明仔想用咪比佢用囉! 你快D去煮飯。』
 
『聽到未，哈哈，快D去煮飯啦 !我肚好餓呀! 哈哈』我得意地說。
 
『衰人，你成日都蝦我，唔理你!』說罷，阿靜便跑回廚房煮飯。
 
望住阿靜既背影，其實阿靜係一位煮飯好得既女仔。女性煮飯叻本來係正常事，但今時今日既香港，要搵一個識得煮飯既女孩仲難搵過搵一個處女，真係買少見少。不然網上就唔會流傳個段影片，兩個女仔係個電爐上面干煎公仔麵吧!?
 
我都順道睇下阿靜電腦上究竟有D咩，發覺網址全部都係漫畫網站，仲有大量網上電視程式，她真係好鐘意煲劇呢。
 
我開左佢既Facebook，哈 !她既朋友唔係得三十二人咩? 依家竟然多左八人? 我諗下諗，不如攪攪新意思，我上左一個香港召妓既網站- 141，揀左幾個性工作者之後，就係旁邊按上一個『like』。就係咁，阿靜既Facebook就出現『 阿靜 在141召妓的網站-號碼35號 囡囡- 樂樂的網站上說讚』。
 
『衰人!快D出黎食飯!』阿靜邊說邊擺放碗筷。
 
『喂! 唔可以咁話明仔!』阿姨說。
 
阿靜既爸爸經常係內地工作唔返黎，屋企多數剩低阿靜同佢媽媽兩個，加上阿靜性格比較內向，唔係成日講野，所以阿姨好樂意我黎食飯，總算熱鬧些。而且佢都知道我同阿靜一班，所以都想從我口中探套阿靜係學校既生活係點。
 
『係呢，明仔，你估阿靜會唔會升到中文大學?』
 
『媽呀。』阿靜說。
 
『問問明仔意見呀嘛! 比你揀科個陣有個參考。』
 
『其實以阿靜既成績黎講，入中文大學唔係難事，話哂佢會考分數係二十六分，差不多已經半隻腳入左大學。』
 
『係? 我依個女無野叻，就係讀書唔錯，我都無咩寄望，只希望佢能夠努力讀書，將來搵一份好工做。』
 
『放心，阿靜無問題，係唔係呀?阿靜。』我轉向阿靜說。
 
『哼!』
 
『喂!唔可以咁無禮貌!』
 
『哈哈……』
 
吃飯過後，我幫忙收恰碗飯，和阿靜一起在廚房清潔。
 
『話時話，我頭先用左你部電腦上左召妓網站，仲like左。』我邊洗邊說。
 
『衰人!你又蝦我，人地睇左真係以為我上依D網呀!』
 
『盲都知係假啦，你係女仔點會上依D網，依個玩人方法好流行呀。』
 
『唔同你講野，都唔洗你洗碗，你快D返去。』阿靜搶了我的碗說。
 
『哈哈，求之不得，咁我走啦! 哈哈。』
 
正當我打開大門時，阿靜突然送了一本書給我。
 
『咩黎?』我接過書後。
 
『你自己唔識睇咩? 快D走。再見。』說罷，阿靜便關上大門。
 
我打開書一看，原來係我今天放學同佢講個間大學資料，仲圈左創作拍攝既學科比我睇，原來阿靜一直都有聽我講既野。
 
『多謝你，阿靜。』
 
除左阿靜係屬於優質潛力股之外，班上仲有一個女同學都係一個值得認購既股票，佢就是穎兒，穎兒性格好樂天，總是笑容滿臉，而且笑點非常低，只要你隨隨便便講一個笑話，佢已經笑到死死下，令身邊既男士們都有一種自豪既感覺 ” 呀!原來我講既笑真係咁好笑! “
 
不過，她對男同學有一種劃清界線既感覺，唔係討厭，都唔係唔鐘意同大家玩。只係佢對男性有一種距離，係學校，我地係親密，放學後，佢好快就走，班上既活動佢都無咩興趣，因此，男同學都將佢排除係認購股張List。但我仍然比佢既氣質所吸引。
 
而且佢個樣真係幾得，皮膚好白，經常束起馬尾，令坐佢後面既我經常玩弄她既髮尾。得閒無事就拉一拉，又或者我諗緊野個陣，就會拎佢既髮尾係咁旋轉，一路轉，我諗野既思路就會愈清晰。
 
小息時，好多同學都跑去小食部買小食，只有少數人留係班房無聊著。我見到穎兒沒事幹，便和她閒聊一下。
 
『喂，穎兒，我表演一個魔術你睇。』
 
『魔術? 好呀好呀!快D表演比我睇!哈哈哈。』我還沒開始表演，穎兒已經笑了。
 
『我可以再依張桌慢慢升起，睇野啦…….』我舉起雙手，像是向桌子施上魔法，然後再用雙腳把桌子慢慢托起。
 
『點呀，係咪好神奇呢?』
 
『哈哈哈，真係升起左呀! 哈哈! 你好好笑呀!』穎兒真的笑點很低，這種白痴的魔術也可以令她笑了。 對此，我有一種強烈既滿足感，我係到諗，我係穎兒心目中應該有一定既地位，不自覺地，好想要穎兒成為我既女朋友。
 
*******************************************
早上。
開門返學時，咁岩阿靜都出門，我地就一齊行。
 
『係呢，你溫左書未?』我總是再打開話題，若靠阿靜找話題說真是很困難。
 
『溫左。』
 
『琴晚我同穎兒溫到好夜，不過溫極都係唔熟。』我腦海慢慢回味昨晚Whatsapp對話。
 
『你鐘意左穎兒?』 估唔到阿靜咁直接咁問。
 
『少少啦，我覺得今次成功率好高，佢好鐘意我哄佢笑，又成日Whatsapp搵我，最重要既係，佢無人追! 哈哈! 只要我一追，佢一定受落!』
 
『用你個D爛笑話，爛魔術，竟然都哄到佢笑，我諗佢一定係唔知比咩反應你先咁講。』
 
『你依個宅女識咩呀! 一日到黑係到睇D毒漫，朋友又無，你試過追人咩?你感受過個種曖味既感覺咩? 』
 
『你……哼。』
 
我好像說得太過份，連忙說: 『其實你應該脫毒，中學生活都就完啦，你依個單身女人唔想拍拖咩?』
 
『我就係咁毒架啦，我又樣衰，無資格鐘意人，人地只會覺得係重口味，唔會同我一齊。』
 
『你……』我話未說完，阿靜便急步走前去了。
 
在路上，阿靜腦海中不斷浮出我剛才既說話，佢好想拍拖，好想感受戀愛既感覺。每一個晚上，佢都好寂寞，Facebook沒有人回應，電話除左媽媽同埋叫佢交電話費既三台職員外，就無人打黎搵過佢。佢好想用Sms，Whataspp同人傾計，但佢既無對像，電話都唔係智能手機。
 
每一個晚上，阿靜都不自覺地哭起來，睡覺時只能幻想漫畫中的男主角好好地對待她，把她當作追求者，令阿靜有了選擇權，就像毒品一樣，這種幻想可以消除阿靜一點負能量，令阿靜暫時可以脫離現實。
 
上課期間，阿靜望向班中所謂公認既班花，係到諗佢究竟有咩吸引力， 竟然可以吸引班上既男同學為佢賣命，的確，長長的直頭髮，散發著一股獨特的洗髮水香味，加上那對黑色的胸圍在很透的校服上盡顯出來，令男同學充滿幻想，而且佢既校服裙都好短，最神奇係，短得來又唔會觸犯校規，而且雙腳也不會粗……
 
外表上已經嬴盡了很多男同學的心，性格上更是吸引。她樂於助人，性格開朗，對什麼人都很好，連班上的毒男她也不會抗拒，也會一起玩，當她配上眼鏡後，更盡吸引，眼鏡娘真的很吸引嗎?
 
阿靜再慢慢看自己，摸一摸自己的胸部，雖然不是很大，但也有B級。再摸一摸自己的頭髮，髮質真的很差......而且額頭上還生了不少壓力暗倉，這已經是死罪......再看看自己的裙子，也自覺自己的校裙長度和其他女同學的校裙不一致，都係媽咪幫我買，我都無可奈何地接受。
 
唉，我真係好似阿明所講……真係咁毒? 唔係睇動漫就係毒?
我好想拍拖，好想感受戀愛既感覺，衰人阿明成日分享佢同穎兒既事，又唔知人地聽到心都酸埋，唉，攪到我都想感受一下。
 
『阿靜，還返本書比你。』
 
『嗯。』阿靜淡淡回應。
 
『點呀，仲嬲呀?』我問。
 
『無，我先無咁小氣。』
 
『咁就得啦，喂，有件想話你知。』我坐在阿靜身旁慢慢地說。
 
『咩事呀? 你唔好坐到咁埋!』
 
『下星期我地班約左一齊打邊爐，我約左穎兒去架啦，到時我就表白。』
 
『表白? 你真係要表白?』阿靜很驚訝地說。
 
『頂你! 洗唔洗咁大聲呀?! 表白好正常姐，我覺得我地只係等緊對方開口，我地感情咁好，佢鐘意我，我都鐘意佢，人地引唔到佢笑，我可以。哈哈! 點計我既成功率都好高!』我很自信地說。
 
『咁祝你好運。』
 
『你都黎啦，順便介紹男人你識，你都應該Open一下自己，拍拖呀!』
 
『依班既男仔我一個都睇唔上眼。』
 
『嘩! 好大個官威呀，我地高貴既阿靜小姐竟然 睇唔起我地依班賤民。』
 
『快走快走，唔好坐我格離，唔想同你講野。』似乎阿靜好抗拒我坐佢旁邊，用力將我推開。
 
『哈哈，你自己決定去唔去啦，你要見證我既表白成功呀。』
 
說罷，我又同穎兒傾計，講下爛GAG引佢笑。
 
為左唔想成日都係我Whatsapp搵佢，我今日決定唔叫佢，就睇佢忍得幾耐。 點解我咁做? 打個比喻， Sms，Whataspp就好似毒品一樣，毒癮不大，但如果長期服食使用，就會變成依賴，成為心目中不可缺少既一部份，我長期將依個『毒品』比穎兒服用，佢已經依賴左我，只要我唔比佢食，佢一定好唔舒服，個心十五十六，哈哈。
 
我睇一睇佢既上線時間，每次都會顯示 " 上線中 " ，但過左一陣，又變回時間顯示。
我係到諗，佢一定開左Whatsapp睇下我有冇搵佢，因為佢部手機好怪，當人地搵佢既時侯，Whatsapp唔會即時顯示，所以佢要定期開黎睇，但佢一定好失望。因為我無搵佢。
 
我一直都開住Whatsapp，睇住佢不斷上線中，又下線，我都急燥了。腦海不斷有把聲出現 "快D叫我啦! 我等緊你呀!”
 
哈哈，突然Whatsapp顯示" 輸入中......" 我即時大叫一聲! 哈! 終於搵我啦咩?
 
穎兒:
好悶呀，你做緊咩?
 
Yo! 成功左，佢問我拎緊毒品，證明左我係佢心目中已經有一定既重要性。下星期我表白我一定志在必得。依段期間，我只需要保持住依段關係，周不時講一D曖味既說話，但亦不能明顯地表達出我對她有感覺，我要做到進可攻，退可守既局面，盡量令自己站立於不敗之地。
 
直到班聚會當晚，我打扮得靚靚仔仔咁，諗住執正自己，表白既成功率都會加分! 今次仲唔食硬你!
出門個陣，順便問下阿靜準備成點，禁左幾下門鐘之後，佢以一身街坊look出黎應門。
 
『你唔係呀? 仲唔換衫出去? 遲到啦! 』我有小小生氣。
 
『我都無話去，你去啦。』
 
『頂你次次都係咁，成日都收埋自己，你依世都唔洗指意識朋友啦，做你個宅女啦。』
 
『關你咩事姐，總之我唔去啦……係咁啦。』說罷，阿靜就關上門。
 
激氣，次次都係咁。不過算，佢黎唔黎對我都無咩影響，事關今日係我既大日子，佢睇唔到我成功係佢損失，仲諗住可以係佢面前哂下幸福，等佢葡萄下，心酸下，自然有決心去脫毒。
 
我拎出手提，打開Whatsapp，send左個msg比穎兒 。
 
阿明:
我出門啦，你出門未?
 
穎兒:
我出左街呀，一陣我會準時到架啦，一陣見啦
 
阿明:
好，一陣見! 不見不散! 一見……即散! 散呀~~~
 
穎兒:
hahahaha you are so kai! see u later la !
 
放返手機入袋，就正式出門!
 
到左酒樓之後，即刻同班兄弟social一下，但我最關心既係穎兒黎左未，點知仲未黎。我唯有乖乖地坐係到食住等。
 
『喂，仲差邊個未到? 』范威係到數緊人頭。
 
『穎兒囉，同埋仲有個個何妍靜。』阿仁說。
 
『阿靜唔黎呀，唔洗預佢啦』 我說。
 
『阿靜阿靜，叫得咁親切，好心你咪成日痴埋佢到啦，咁重口味。』
 
『你個死毒撚係到話人，你......』
 
『穎兒黎左啦。』范威指住門口，順便揮手示意比穎兒睇。
 
我順勢望去，見到穎兒，而且……身旁仲有一個男人。
 
『頂，佢見我地唔到，喂，阿明，你出去接佢過黎。』
 
『嗯......』我心裡突然有一種不安感覺。
 
當我行出去個一刻，我開始腳步浮浮，好似會考放榜咁，準備迎接死亡既一刻。
 
『喂，穎兒，我地係個到呀。』
 
穎兒轉身一望，即時笑左出黎: 『咦，原來係到，哈哈。』
 
我望一望佢身旁既男人，穎兒見到我望住佢身旁既男人，於是作一個介紹。
 
『佢係我男朋友，佢叫阿Ray呀，讀緊大學Year1，但佢好悶架，又唔識講笑話哄我，阿明呀，你要教下佢先得呀。』
 
『喂喂喂，邊有人天生識講笑話架，你小D發脾氣，我咪唔洗哄你囉。』阿Ray說。
 
『邊個叫你次次都激我姐，阿明佢成日都哄我笑架，唔通佢又天生識講笑話喎!』
 
佢地兩個係我面前你一言我一語，雖然兩個站得不太近，但佢地對話期間，根本將我孤立，彷彿依個空間只有佢地兩個。
 
『你地約左?』我問。
 
『我地去左拍拖呀，岩岩睇左一套恐怖片，佢呀，成日睇埋哂D古靈精怪既電影。』
 
我大概明白了一些事情。但我仍然扮作好有風度。
 
『你好，你叫我明仔就得。』
 
『哈哈，我女朋友成日提起你，成日將你同佢既Whataspp對話比我睇，你真係識得哄佢開心，以後我激嬲佢個時，要搵你出手先得。』阿Ray說。
 
『唔好再傾啦，佢地係入面等緊我地。』我實在唔想再係到同佢地糾纏落去，突然之間，我覺得好無聊。成件事都好無聊。
 
『好啦，我地入去啦，拜拜啦，Ray。』說罷，穎兒同佢男友就係我面前黎一個Goodbye kiss。
 
此情此景，令我覺得好無癮，我個腦好亂，我係到處理緊我同穎兒既關係，咩叫做穎兒唔開心個陣 就要我出手哄佢開心? 我既角色係咩? 穎兒當我係咩? 小丑? 原來佢一直都將我既msg 比佢男友睇。由頭到尾，佢都無將我列入男女朋友既list到，我只係一個陪笑既小丑，一個普通朋友。
 
一路打邊爐，我一路係到諗。成件事根本就錯哂，係我錯哂。我一直以為佢身邊無追求者，姐係佢好dry，加上我日日都同佢傾計，send Whatsapp，而且佢成日主動搵我，又比我既笑話哄得好開心，但咁又點? 原來佢有男友......而且仲係一個好悶，唔識哄人既男人。究竟我輸左D咩? 究竟穎兒佢鐘意咩類型既人?
 
『做咩成晚唔出聲既? 唔似你喎!』穎兒問我。
 
我完全覺得好無聊，好無癮。好想離開依到，更加唔想再理穎兒，依一刻都發覺，當我知道左穎兒拍拖之後，佢係我心目中既地位即時趺至最低，我完全唔想再花心神去哄佢。
 
『無呀，可能有D累姐。』我冷淡地說。
 
整個晚上，我都沉默住，好多人都話我今晚好靜，完全唔似平時既我，但我仍然係到扮下笑咁，盡量將我低沉既一面收埋佢。
 
而穎兒不斷拎部iphone出黎打字，Whatsapp既聲音此起彼落，因為穎兒同班上既同學仔又唔係去到好熟既地步，佢黎都係因為我叫，依家我唔出聲，佢唯有玩下電話，消磨下時間。
 
我突然間覺得穎兒好討厭，佢當我係咩?
 
食完飯之後，班友仔話要去食糖水，我梗係無咁既心情，唯有話眼訓要返屋企。
 
『你真係唔去? 』穎兒望住我，似乎好想我去咁，定係佢好期待今晚會好開心咁大笑一下，所以想期待下半埸我既表演?
 
『真係唔去啦，都夜架啦，你呀，你再食落去，小心變肥婆呀! 到時阿Ray唔要你架啦。』
 
『唔會既，哈哈! 佢唔要我，你咪要我囉!』 穎兒打趣地說。
 
我不禁冷笑左一聲，想點呀? 收我做兵? 盲既都知佢既用意啦。依一刻我更加討厭穎兒。都覺得我之前哂左咁多時間，心神都係白費。我做到咁出面，佢唔係唔知呀?
 
作為一個男人，肯成日諗笑話引你笑，花心機聽你講心事，傾計，每日同你Whatsapp，唔好同我講只係朋友，男人做每件事都有佢既目的，對你好，都有目的，唔會零付出，每個男人都希望有回報。
既然得唔到回報，sorry，你依個股票我買唔落手，都買唔起。我要止血斬倉。盡快離埸。
 
我漫無目的咁行返去火車站，真係乘興而來，敗興而返。
 
真係好無聊。好想搵人呻下，好想吐下苦水。丫……成個腦不斷係到搵合適既人選，但苦無對像，原來我都無咩朋友可以傾下心事。
 
突然腦海靈光一閃，諗起阿靜，好想搵佢傾下計。不過佢應該會恥笑我，頂…… 但唔緊要，佢既作用都係比我吐下苦水，比佢笑下仲好，比我記住依個恥辱，下次一定唔會再犯。
 
已經夜晚十二點幾，我都唔想禁鐘叫阿靜出黎，一陣整醒伯母真係大件事。於是我就send 個sms比阿靜叫佢出黎，當我打緊字個刻，原來我從來都無同阿靜有sms既來往，今次都係第一次，我係到諗，平時阿靜會唔會有人同佢sms，會唔會miss左我既sms?
 
阿明:
訓左未? 我係樓下，想搵人傾計，落黎陪我好嗎?
 
點知阿靜過左成十五分鐘先回我，而且回得幾隻字。

阿靜:
現在幾點!我要睡!
 
我心諗:『真麻煩，聽日又唔洗返學，咁早訓托塔咩!』於是我再堅持叫佢落黎。
 
阿明:
真係好唔開心，表白失敗左，唉，好灰! 落黎陪我啦
 
阿靜依然過左成十幾分鐘先回我，而且仍然回得幾隻字。
 
阿靜:
你不找你的朋友? 為何要我 ?好吧 我下來
 
等左一陣，見到阿靜著住件睡衣裝束，真係好老套，件睡衣一定係伯母用開。
 
『叫你落黎都叫咁耐。』
 
『我唔識打字......打得好慢。』阿靜低著頭，不斷輕輕踢地上的樹葉。
 
『係啦，我冇表白到，因為我知道穎兒佢有男朋友，屌! 佢收左我做兵囉! 』 我簡單總結一下今晚發生既事。
 
『咩係做兵?』阿靜問。
 
『兵呀! 觀音兵呀! 』我心諗點解會有人唔知做兵係點解架?
 
『我真係唔知咩黎......』
 
阿靜依個問題真係考起我，其實做兵既定義係咩我真係唔知，只係把口突然衝口而出，直覺上穎兒係想收我做兵，但咩係叫做兵呢? 把口就成日講得多，但真正既意思係咩呢? 我真係答唔到。
 
『姐係.....唔會鐘意我，但又不斷利用我對佢既好.....黎滿足佢既快樂咁囉。』我試下作一個定義。
 
『我仍然唔係好明......』
 
『算啦算啦，叫你黎傾計 反而比你考起我，你呀! 都比唔到D意見人既。』
 
『咩喎.....又係你叫人出黎! 出到黎又罵人!』
 
見到阿靜既樣，忍唔住又覺得佢好可憐，係咁比我搵笨。
 
『你試過鐘意過人未? 』 我唯有轉過話題。
 
『關你咩事.....』阿靜仍然好抗拒我依D問題。
 
『你未試過鐘意人，你係唔明白我既心情。』
 
但事實上，阿靜好明白阿明既感受，都已經十九歲，讀左咁耐書，話無鐘意過人真係搵鬼信。一直以來阿靜都有心儀對像，例如中二個陣，佢鐘意左同班既班長，中三個陣又鐘意左個社長，直至中五開始，佢都曾經鐘意過阿明。
 
無咩特別原因，只係中二個陣，阿靜發燒，個位班長就扶佢落去醫療室，個一刻阿靜就愛上左佢，但班長對佢完全無感覺，最後同左第二個人拍拖。
 
中三個陣，陸運會將近，阿靜所屬既社長係咁搵人參加比賽，因為每個運動員參加，所屬既社就會加一分，社長見到阿靜後，係咁叫佢參加比賽，仲話一定會支持佢，依番說話感動左阿靜，令到阿靜參加比賽。當阿靜跑緊八百米比賽個陣，本來弱質既佢一直都跑包尾，佢覺得所有人都笑緊佢，而且佢既速度拖慢左大會既進行，好似全世界都等緊佢咁。當佢完成比賽後，阿靜好期待社長會對佢說什麼，但社長只係輕輕講左句:『跑完就上返去看台啦，唔係到阻住。』 聽到依番說話之後，阿靜係更衣室入面喊左好耐。
 
中五個陣，阿明成日都搵佢溫書，而且因為格離鄰居關係，阿明成日都黎佢屋企玩同食飯，雖然阿明成日都蝦佢，玩佢，笑佢。但每當去到緊急關頭，重要時侯，阿明都會幫佢。不知不覺，阿靜對阿明就產生左愛意，而且會考期間，阿靜同阿明相處時間很多，令到阿靜對阿明有一種依賴。
 
但日子一久，阿明成日都同阿靜講心事，咩都講哂比阿靜聽，例如睇中邊個女仔，點樣追女仔，都一一對阿靜講，令到阿靜知道阿明既要求好高，而且對佢完全無個種男女朋友感覺，加上阿明成日都話佢宅女，重口味，毒，更加令到阿靜感到自卑，慢慢對阿明，對所有人都失去自信，變成一個既期待愛情來臨，又感到自卑既女仔。
 
『不如咁啦，我幫你脫毒啦!』我突然間醒起一件有趣既事。
 
『我唔洗......』阿靜話未說完，我就加把咀講。
 
『唔洗脫毒!唔關你事呀嘛! 你係咪想講依D? 我同你都算叫熟啦，你怕咩醜姐，你唔想變索女，你唔想拍拖咩? 你唔想享受下比人追既感覺咩? 』我試下說服阿靜。
 
『想.....但點樣做?』 阿靜感受到阿明真係好想幫佢，都覺得自己真係需要改變一下，如果唔係，可能一世都孤單一個。於是開始讓步......
 
我見到阿靜態度放軟，我就開始同佢講點樣幫佢。
 
『首先，我對你既印象唔差，你好單純，可以話好天真好傻，但係依個社會上，你依D女人唔係叫可愛，唔係叫清純，而係蠢同白痴。如果你可以醒目返少少，又保持住單純，包你殺哂D男人。』
 
阿靜聽到阿明話佢蠢同白痴，本來嬲嬲地，但聽落又好似有D道理，於是都繼續聽落去。
 
『所謂既醒目少少，唔係話你讀書讀返黎，而係上論壇學返黎。』
 
『論壇?』
 
『無錯，係論壇到，你會見到幾千人，幾萬人係到討論好多形形式式，唔同種類既Topic! 你會感受到某一種流行文化，態度，思想。上得多，你都會同社會開始聯繫住。』
 
『有無咁誇呀......』 阿靜有D懷疑。
 
『唔信? 知唔知巴士阿叔件事係點? 知唔知有邊份報紙係投共? 知唔知布吉女件事? 係咪唔知咩黎呢，因為你成日對住D動漫，世界社會每一日都變緊，你都唔知。』
 
『咁.......我咪上多D論壇囉。』阿靜好似答得好求其。
 
『上論壇除左幫你提升返D社會知識，仲可以幫你擴大社交圈子。』我繼續講落去。
 
『下? 唔呀，我對網友無興趣。』
 
『洗鬼有興趣，我要你接觸多D人，特別係男性，我要你做下娘娘，收下兵，比你練下點樣對住男仔。』
 
『咩係娘娘......?點解又要我收兵呀，我條件咁差，邊會有男仔想識我?』阿靜對自己仍然無信心。
 
『係咪呢，就係因為你唔上論壇，所以唔知咩叫"娘娘"，仲有好多術語，潮語你都唔識。收兵唔洗條件，網絡世界又唔洗見樣，我教你點樣捉住狗公既心態，包你成名。』
 
『好啦好啦，咁我第一步應該點做呀?』阿靜好似好期待咁。
 
『就係......上高登!』
 
『高登?』 阿靜好似印象中有依個詞語出現係佢大腦入面。
 
『聽日我地就唔洗返學既，我聽早黎你屋企，等我教你點利用高登去幫自己升level!』
 
『是但你啦。我好眼訓呀，聽朝先講啦。』阿靜真係有D睡意。我唯有放人。
 
各自返到屋企之後，我攤左係張床到，突然間覺得自己好似D粉雄救兵咁，都幾得意。
正想訓覺個陣，突然Whatsapp 收到一個Msg。
 
穎兒:
喂 我係咪做錯左事呀? 如果係既 sorry ar
不過你今日真係怪怪地
你有冇事呀?
 
我睇到依個Msg之後，唔知點解個心戚住戚住，突然間好似對穎兒完全無一種討厭既感覺。由今晚打邊爐見佢男朋友個一刻，我就討厭到穎兒到依家，因為我覺得佢呃緊我，當我係兵。 但依一刻我係到諗，會唔會自己諗錯格離，諗埋一邊? 由頭到尾穎兒都無呃過我，佢無提佢男朋友，我都無問佢有冇男朋友。我見佢無咩點同男仔接觸，就假設左佢無男朋友同埋好Dry，依D都係自己既諗法，唔關佢事。
 
再諗深一層，佢可能真係當左我係好朋友，佢唔開心個陣好想搵人傾，好想搵人陪，特別係搵一個可以令佢開心既人。而我，正正符合左佢既要求，哄得佢好開心。
 
而我由頭到尾都係為左想追佢，不斷諗D新既笑話去哄佢，但事實上，自己從來都無拎一個做朋友既心態去對佢，依家一知道佢有男朋友，我就對佢既態度轉哂，討厭，完全唔想理佢。 但穎兒其實咩都無做過，我覺得自己咁做好似好衰咁。
 
正當我諗住變返以前個種關係既時侯，開始回覆佢既Whatsapp......
 
我個心又戚住戚住，我唔想變返以前個種關係，我唔想只有我一個係到付出，係到投資緊一個唔會有回報既股票，覺得自己好ON居。 但諗諗下，我係咪唔應該將穎兒當成股票，唔應該將佢列入男女朋友既list到呢?
 
我係咪應該保持一個做好朋友既心態去對待佢呢? 就算做唔到男女朋友，都可以做朋友姐
 
正當我開始回覆佢既Whatsapp既時侯......
我個心又戚住戚住，男女之間，我自問都幾肯定係無純友誼，除非對方係好樣衰，完全係極品，我諗我都可以同佢做一個朋友，因為係我腦入面，我係完全將佢排斥於戀愛對像既list，可以放心同佢做朋友。
但穎兒係唔同架，我追過佢，我試過鐘意佢，雖然投入感情暫時唔係好深，但日子一長，我難保我忍唔住鐘意返佢，到時我就沉船，返唔到轉頭咪大檸樂。
 
唉
成個心十五十六咁，成晚都係到諗....諗....諗....最後無回覆。就訓左。
 
***********************************