《我老婆唔係我女朋友》【那些年／日常／校園】 第一至三章: 【第三章】 還是覺得妳最好（５）
阿心見我沒有望她，微微的握了我的手一下：「喂喂，你知唔知呢首歌係乜嘢名呀？」
我正在努力的跟隨節拍踏步，聞言答得有點大聲：「哎呀，妳唔好同我講嘢啦，我亂晒龍喇。」
「咁快就last dance，個舞會就嚟完喇，我有啲唔捨得…」她忽然多愁善感起來，低聲的喃喃自語。
「做乜嘢呀，突然噉嘅？妳鍾意去嘅，第二日咪再去過囉。」我察覺到她有點不妥。
她垂下頭望著地下默不作聲，女生情緒的陰晴圓缺話來就來，今晚真正領教了，下次真係要再借本《姊妹》好好溫習一下，當下我慌了手腳，不知如何是好。
「最多第二次再去『波』，我准妳邀請我陪妳去嘞，好唔好呀？」我氣急敗壞的勸她。
不知道是引起她的興趣還是甚麼原因，她抬頭望我擠出些少笑容：「你唔識跳舞喎你仲嚟？」
「嗰次去唱K妳陪我去都係噉啦，妳叫到嘅，我都要去㗎啦。」輪到我微微握了她的手一下。「妳一定係嗰次唱K喺杯嘢度落咗降頭，點解我飲完之後，次次都會聽妳講？」
「嘻，邊有啫。」不知道她是指無落降頭，還是我次次都聽佢話。
「笑下啦，今晚仲要送妳返屋企呀，第日又要一齊返學，陪少妳一陣都俾人拐走啦，癡線妹。」看到她有點笑容，我也鬆了口氣。
能夠相互陪伴在一起，不就是人生中的一大幸運了嗎？心，有咩嘢唔開心呀？
回想起那晚舞會，我對last dance的回憶，並無任何浪漫的感覺，滿腦子只有「又唔記得步法」、「咁渣㗎」、「踩到我喇」，同埋…有人忽然鬧愁緒。