《我老婆唔係我女朋友》【那些年／日常／校園】 第一至三章: 【第三章】 還是覺得妳最好（４）
那些年DJ在ballroom dance用日本流行曲做last dance可說是非常破格，錯非張學友將這首中文版唱到街知巷聞，而這首原曲一開始已經兜口兜面猛咁loop「愛してる…愛してる…」（Ai Shi Te Ru），全首歌幾乎1/4都是不停重覆噉「愛してる」，做last dance實在是冧到無命。（話說這首歌用作「聽歌學日文」也是不錯的，歌詞簡單直接又多重覆，旋律又夠晒慢。）
〈♫ 愛してる 愛してる いつまでも 君のことを ♬〉
（我愛你 我愛你 一直以來無論何時都愛著你）
〈♬ 呼んでいる 呼んでいる いつも君を 胸の中で ♫〉
（呼喚你 呼喚你 總是無間在心坎中呼喚著你）
而且last dance的選曲，對歌名是非常講究的，因為有個不成文的傳統，由於以前的「波」比較含蓄，會借用歌名來做表白，男生（或女生啦）可以在最後一舞時，假借問對方歌名，詐詐諦諦憑「歌名」寄意，好似呢首《愛してる》就fit到漏兼甜到漏油了。（拜託大家不要再來伍佰的Last Dance了，最近睇台劇聽到想嘔了）
雖然隻single炒價好貴，但之後我都找【鐳射店】老細忍痛入手一隻，一來隻碟兩首歌都好聽，二來隻副歌《愛してる》對我倆好有紀念價值，但數還數，老細最終（講價後）都計我20算160大洋，好隱肉赤。最仆街都係張學友！
有了頭先聽𦧲晒脷英文的經驗，又知道是舞會散場倒數中，今次我終於成功聽出佢𦧲「last dance」兩個字，連忙同阿心講：「喂，last dance囉喎，不如執嘢走啦。」
誰知她白我一眼：「First dance同last dance，都應該與相同舞伴一齊跳，唔係執嘢走㗎。」
「唉～好啦，都唔爭在嘞，繼續跳囉。」我只好垂頭喪氣的望著她的步調，避免又踩到佢。