《我老婆唔係我女朋友》【那些年／日常／校園】 第一至三章: 【第三章】 復活戰小組賽次回合（４）
好一會後，阿心完成追擊回來，笑容滿面的重新坐在我身旁：「你見過晒我班朋友啦。」
我仍未笑完：「係喎，成班都幾生鬼，唔怪得妳同佢哋出去食飯特別開心啦。哈哈，我都係第一次畀女圍咋。」再續剛才未完的調侃：「點呀，嗰啲筍盤得唔得呀，Lulu話個個都係極品嚟喎。」
她橫我一眼：「Lulu講嘢好誇張嘅，嗰啲都係其他院校啲莊，蘇菲諗住識多啲人有著數嘛，我又唔會上莊搞活動，Hi完咪Bye囉，連聯絡都無攞呀。」
個衰女對不相熟的男生，一貫的冷漠。哈，不過「正合朕意」，成班狼狗有得𥄫、有得聞，就係無得舐，呵呵呵～
「啲才俊真係請妳跳舞呀？」我有點好奇剛才Lulu話佢哋狂派檸檬。
「有就有，咪同佢哋講約咗人囉，我都唔鍾意同啲唔識嘅人講咁多。仲有呀，你話我懵盛盛，叫我唔好同人跳舞嘛。」她笑著再橫我一眼：「噉嚟舞會就梗係跳舞啦，你又唔准我同人跳，唯有你陪我跳喏。」
我嚇了一跳：「我？跳舞？！我唔識跳舞喎。」
阿心好像聽到一個好笑的笑話：「吓，跳舞咋喎？土風舞、社交舞中學時都有教啦。」
我𢯎𢯎頭，無奈的說：「我唔知妳間乜嘢中學，我嗰間就肯定無教嘞，我今次都係第一次嚟『波』咋。」
大姐呀，妳讀嗰間就話賢妻良母工廠，閒時飲茶跳舞啫，我嗰間飛仔竇日日都開武林大會㗎。
她瞪著大眼看我，有點不可思議，我續說：「真㗎，以前開波、開拖都有試過，去『波』真係第一次，唔係妳叫我都唔會嚟啦。」
她皺眉苦笑，神情有點失望：「又會咁渣嘅，跳舞都唔識…唉～好啦，成晚流流長，等我教你跳嘞，唔係齋坐都變化石。」
各位觀眾，會場限定版「義氣心 ver. Athena」閃亮登場。