《我老婆唔係我女朋友》【那些年／日常／校園】 第一至三章: 【第三章】 復活戰小組賽次回合（３）
一個單擋，Lulu後上補射：「嗱，而家大家識咗，下次咪一齊出嚟食飯囉，順便送埋啲街坊返屋企嘛，OK？」
「誒…都可以嘅，不過妳都係問阿心啦。」大姐，咪當正我真係男朋友先得㗎，只好出盡力「推」！
阿玉補位，攻勢浪接浪：「聽講你都住得近喎，你識打麻雀㗎？一齊打牌都可以喎。」似乎無論如何呢班姊妹都想擇日繼續揼。
「妳都係問阿心啦，咦咪住，打牌唔𠶧喎，『三娘教子』輸梗㗎喎，妳哋真係當我Lulu呀。」我想起小時候，隔離屋陳婆教我打牌時，講過有「三娘教子」的格局就要避忌了，但明明佢哋叫我戥腳（聲稱教我）時，都是三個師奶打我一個𡃁仔…
班姊妹聽到又Lulu、又「三娘教子」已經笑到反艇，當下仍是Lulu繼續：「哇哈哈…啋過你呀…哈…『三娘教子』你都識得噏，我都話佢行家啦，你叫你個心媽湊你咪得囉…哈哈。」
突然阿心的聲音在Lulu背後傳出：「呂淑儀～妳講緊邊個呀？」
Lulu立時像喪屍一樣定格，身體僵直雙眼直勾勾的望著Ruby：「死火嘞，佢阿媽返嚟喇，快啲還返個仔畀佢。」
果然見阿心在她們後面出現，雙手叉腰，圓瞪著眼。一眾女生立即舉手起哄，嘻哈怪叫四散。阿心在Lulu後面窮追，我就笑到肚痛跌坐椅上，我估呂淑儀應該是Lulu吧。
事後我得知她們四個女生都是中學時的夥伴，由中四開始同一班會考班，也一起重讀，四人又是麻雀腳，有時會聚在阿心家的士多打麻雀，而當中阿心跟Lulu是最要好的，因此她也不介意請Lulu提早出去大堂招呼我。