《我老婆唔係我女朋友》【那些年／日常／校園】 第一至三章: 【第三章】 神拳無敵雅典娜（１）
神拳無敵雅典娜
「May I？」阿心微微彎腰欠身，半鞠躬的伸出手輕聲的問，是邀請別人跳舞的起手式。
「我…我可唔可以唔跳呢…」我以接近求饒的語氣說出來。
「唔得呀，快—啲—起—身！」阿心杏目圓瞪的下命令。我無奈死吓死吓噉企起身。她續說：「你知唔知女仔喺舞會請你跳舞，你唔可以拒絕㗎，仲扭扭擰擰喎！」
我扁著嘴：「邊有女仔會請我跳舞啫，我鬼識咩～」
她叉腰瞪眼：「吓！我唔係女仔咩。唔識跳所以咪要學囉，將來都會有用㗎嘛，仲有呀，如果一陣有人嚟請我跳舞，你要幫我頂㗎。」她認真的跟我解釋。
「我——頂—妳個肺咩？要代妳跳㗎？」我嚇得幾乎想立即回家。
她微微笑了笑：「正癡線仔，要請身邊有男伴嘅女生跳舞，要先徵得佢嘅男伴同意，明唔明呀？」
終於搞清楚，我稍為安心了一點：「呵～即係男伴可以代個女仔拒絕嘅，噉如果個男嘅同意呢？」
阿心冷冷的斜睥著我：「你不妨可以試吓嘅。」
我連忙伸伸脷：「小人不敢，小人不敢，嘻嘻。咦，女請男就焗住要應酬，男請女又可拒絕，噉有無男男或女女嘅呢？」那時候還未有「hehe」這種說法的。
她白我一眼：「突然又咁多嘢問，咪以為唔使跳呀，女生可以共舞嘅，一般係代表佢哋喺現場無男伴，間接鼓勵其他男士踴躍邀請，但男生就唔應該共舞嘞，噉係間接意味住佢哋不願向在場嘅女生邀舞，噉你話男生因乜事會唔去請人跳舞吖？」