《我老婆唔係我女朋友》【那些年／日常／校園】 第一至三章: 【第三章】 復活戰小組賽次回合（２）
「唔係吖，頭先同你入場嗰個高佬都幾型呀。」我順便賣吓口乖。
旁邊兩個女生聽完後哄堂大笑，其中Ruby搶著說：「得我哋陪佢嚟咋，嗰個佢阿哥嚟㗎，同讀【山大】啲同學一齊嚟。」【山大】就是「三大」之一的【山澗大學】。
Lulu尷尬的笑罵：「妳班八婆咪又係無人陪，而家得阿心有人約之嘛。」
呵～原來成班都是打單泡的可憐蟲，我想起當日馬飛要我畀錢買入場劵時，我耍他的藉口，接口說道：「點會無人約呢，啲入場劵貴之嘛，咪無人肯嚟囉，我都係有人請先嚟咋。」
Lulu向Ruby示威：「嗱，阿仁講嘢咪中肯囉。」她跟Ruby講講吓之際矛頭急轉，向我問道：「喂我哋想問吓，月頭我哋約出嚟食飯，走嘅時候阿心話約咗人，係咪約咗你呀？」Lulu冷不防在中場放一記冷箭「猛虎射球」。
我窒一窒唔知點答：「誒…可…可能係啩，我唔係好記得日子呢。」
Ruby隨即「金田一」上身，向眾人邀功：「嗱，都話個衰嘢約咗男仔㗎啦，謎題已經全部解開嘞。」
既然佢哋都認定約咗我了，都無謂多辯駁，反而我好奇的問Ruby：「妳又點知嘅呢？」
「Ru田一」繼續分析：「嗰晚個衰嘢成晚都微微嘴笑，問佢乜嘢咁開心又話無嘢，又成晚睇時間，明明大家都住石硤尾嘛，夜麻麻又話約咗人唔一齊走，斷估唔會咁孝順約咗爸爸啩，搞到我嗰晚自己一個返屋企時幾驚呀！」
我不住的點頭，呢個女生的「摩擦力」的確驚人。