《我老婆唔係我女朋友》【那些年／日常／校園】 第一至三章: 【第三章】 復活戰小組賽次回合（１）
復活戰小組賽次回合
孤獨的時光今次過得特別快，剛發了兩分鐘呆，Lulu就帶著兩個女生嘻嘻哈哈的過來「找」阿心，睇樣似係Lulu帶隊想打附加賽上訴了。
「咦？阿心呢？」Lulu笑著裝模作樣的問。
「跟蘇菲行咗去應酬喎，點呀Lu竹，有乜嘢幫到妳呀？」知道她開朗玩得，也不用跟她客氣了。
「哎唷，諗住搵佢跳舞嘛，噉啦，順便介紹兩個阿心嘅舊同學你識。」她嬌聲嗲氣的說著，連我也聽得出她的「醉竹之意」。
於是她逐一介紹姊妹團我認識，讀【灣大】的Ruby，五短身材，矮矮胖胖又笑嘻嘻的，和讀【肉園】的阿玉（英文名好像叫Yuki，我對中文名比較有印象），阿玉人如其名，小家碧玉斯斯文文的，跟阿心不耍野蠻時的形象有點相似；所謂物以類聚，兩個人都跟Lulu性格相似，是開朗活潑的女生。
「聽講蘇菲介紹啲年輕才俊畀你哋喎，你唔去見識吓嘅？」我先發制人，企圖轉移視線，避免即時進入圍揼環節。
Lulu跟一眾姊妹相望大笑：「喂，嗰啲人中之龍你真係要見識吓，搞到我哋同阿心成晚做檸檬公主呀。」
在我腦力全開，扭盡六壬、傾盡全力迴避之際，突然感到有一絲安慰，原來肥矮毒還不算是食物鏈中的低端層，還有那些所謂「才俊」墊底，真是「毒海無涯，唯才是戇」，在此我勉勵各位毒隱，千祈唔好好似我咁無自信，世界還是有希望的呀。