《我老婆唔係我女朋友》【那些年／日常／校園】 第一至三章: 【第三章】 雅典娜保衛陣線（４）
我心裡面打咗個突，你個仆街死魚都過下刀，明明入場劵唔使錢，仲要收我一舊？！但個棚搭咗大半，臨門話唔去又怕畀阿心斬，只好見步行步，繼續虛與委蛇：「嗯～收一舊都合理嘅。咦，噉有邊個去呀？」
馬飛見我似乎落疊，加緊促銷：「咪又係我哋圍內幾個，墳哥、阿仙、阿May、我同你，總共5個，聽講有校巴接送添，可以慳返啲車費。」
我心中嘀咕，個「濕狗諸葛亮」話勾咗4張飛，點解可以有5個人去呢？明明叫咗條粉皮唔好搵囡去，點解又唔跟劇本開始暴走㗎…
「喂喂，咪住先，前幾句你先話成班光棍一齊去溝囡，而家又話阿仙、阿May都去，佢兩個幾時生咗條棍出嚟㗎？帶住兩條有棍囡去溝囡？你揩大咗定我思覺失調呀？我門小你鹵味～」愈想愈唔對路，忍唔住「質」條仆街。
馬飛見到穿崩，眼珠亂轉諗計死兜：「兩隻乸去飲飲食食啫，我哋三隻公去溝囡，OK？」
「唉～都係唔好嘞，我覺得係搵笨實嘅，又要畀錢，啲囡又無質素保證，你唔係唔知讀得書嗰班女大生有幾『索』啦。唉我門小你～豬頭喇叭嘴，皮膚又月球表面，諗起都打冷震呀。」我敢打賭條友仔一定會死𦧲，所以繼續趁火打劫。
果然馬飛收單心切，大幅割價：「唏，見你上次畀我累到咁樣衰，而家又咁想去，今次我捱義氣幫你頂50嘞，半價請你去，費事第日叫你唱K又唔去呀，無問題啦！」