《我老婆唔係我女朋友》【那些年／日常／校園】 第一至三章: 【第三章】 上兵伐謀（１）
上 兵 伐 謀
放學後在「眾義堂」（Leon佢哋個莊房）刮了Leon到CC作中期檢討。
「馬飛條粉皮無照稿行喎，明明4張飛，叫咗5個人去，而家阿仙、阿May都去埋。」我=15.6px語帶投訴的跟他說。
不料他好整以暇的說：「我問你嘞，噉佢最後係咪都搵咗你戥腳呢？在目標為本嘅大前提下，『雅典娜保衛陣線』已經成軍，並且將你送緊去前線啦，係咪？」
我𢯎一𢯎頭：「你又講得啱嘅，只係跟預定嘅計劃有啲出入啫。」
「兄弟你有所不知喇，策劃好嘅劇本喺執行時，有沙石係在所難免嘅，畢竟實施嘅時候都有突發情況，所以行動組必須要識得執生，隨機應變，各司其職又互相配合，此乃團隊精神嘅最高境界呀。不過你作為行動組嘅前線成員，對住馬飛呢啲國際大奸狗，都勉強頂得住，算唔錯嘞。」Leon初步總結行動成果，頓一頓後又繼續：「嗱，外圍賽打完嘞，順利入圍，跟手應該部署同你舞伴班姊妹團打嘅小組初賽或準決賽，通常啲姊妹見到有疑似男朋友嘅物體呢，都會圍住嚟揼嘅，不過我睇你近日應對馬飛嘅狀態，客客氣氣穩守突擊，晉級應該唔難嘅，至於最後嘅總決賽就睇你自己造化嘞。」
我聽著他似是而非的講解，無奈下只能點頭。