《我老婆唔係我女朋友》【那些年／日常／校園】 第一至三章: 【第三章】 雅典娜保衛陣線（３）
下午返A2班的Lecture，經過阿心個位跟她面無表情的打個眼色，彼此繼續扮冷漠就啱了。馬飛看見我又是第一時間揮手招呼：「喂，呢邊有位，有好嘢益你呀。」
看來我這魚腩真是戥腳的首選，當然要扮無知先啦：「門小你，去唱K唔該叫埋Gigi先好預我呀。」上次佢扮熟講黎G英文名，我也就將計就計了。
「嗱，咪話成日去唱K咁寡嘞，而家哥哥帶隊，同你入場掃囡好唔好先？」馬飛明知毒隱無囡，投其所好。
我即時坐直身正色：「仲嚟？唔好又搞啲咩嘢聯誼呀大佬，上次已經淤爆喇，唔去！」一於以退為進。
馬飛一貫的經紀本色：「唔使咁快決定嘅，聽我講埋先，一分鐘OK？今次唔同啲唔熟嘅女同學去嘅，嗱，蘇菲阿心都唔叫嘞，無問題啦？我哋成班光棍一齊去玩。」
我扮了一個驚恐樣：「你鹵味，成班光棍去玩乜嘢呀？玩『格劍』定『伴奏』呀？」
「No…No…此言差矣，話明去掃囡嘛，掃其他院校啲囡呀，女大生喎！」馬飛信心十足，好整以暇的解釋。
我連忙裝出饒有興趣的樣子：「嗯～噉都似樣啲，講多啲嚟聽吓。」
他用力拍拍我的膊頭：「有興趣係咪？我打算約大家去聯校舞會，有得食又有得玩，最緊要有囡溝。」
我故意打退堂鼓：「嘩，去舞會又要買飛，又要裝身，仆街樣樣都係錢喎，咪搞！」
馬飛有點著急：「喂唔係喎，一舊水全包囉喎，我哋無諗過使錢裝身㗎，都係平日返學噉咋。」