《我老婆唔係我女朋友》【那些年／日常／校園】 第一至三章: 【第三章】 舞會中的聖域十二宮（３）
Leon的興致極高：「你稍安毋躁，聽我講埋個劇本先啦，記唔記得之前你有一晚去唱K搞到好夜，第二朝我仲問你點解會去？因為你不嬲唔玩呢味嘢㗎嘛。」
我點頭表示記得：「嗯，被人夾去囉，仲喺嗰晚拖到手添。」
Leon窒了一下，瞪大眼提高聲線：「嗰晚？！」
我笑著並做了個V字勝利手勢：「嗰晚！哈…」
Leon吟吟噚噚的：「咬你個仆街春袋都抵你嘅。嗱，照辦煮碗，我哋玩群眾壓力，我想辦法勾幾張入場劵出嚟，跟手唔小心跌出街，等有人執到時圍威喂call友一齊去，搵到你時咪免為其難，半推半就又光明正大噉上路，入場打聖域十二宮，揼實教皇喇喂，當然最後保護女神都要靠自己喇。嗯～但當務之急要搵條『棍』先。」
我聽得一頭霧水：「棍？你搵人哋『紅棍』搞我去『波』啲嘢？我無錢封老毛喎，人哋唔會睬你啩。」以前中學時都認識有社會團契背景的同學和街坊，這類團友最喜歡吹噓佢哋團契的逸事，所以職稱銜頭我哋都略知一二。
他大笑著解釋：「癡線咩，又唔係劈友，係要搵一條party animal嘅『搞屎棍』執到入場劵，仲要保證條茂里識得搵你戥腳。」
我登時醒悟：「啊哈，原來係噉，我有個合適人選喎。」
「咁啱嘅，我都有合適人選喎。」大家異口同聲一齊說。「黎G！」