《我老婆唔係我女朋友》【那些年／日常／校園】 第一至三章: 【第三章】 雅典娜保衛陣線（１）
雅典娜保衛陣線
晚上返到屋企，打畀阿心稟告解決方案：「嗱，老老實實嘞，我去都得，妳成晚要傍住我喎，我單拖一個好樣衰，妳無得自己去溝仔㗎。」
她在電話的另一邊開心的說：「你真係肯陪我去呀？但會唔會好明顯㗎？」
「喂妳唔好扯開話題先，妳係咪成晚傍住我㗎？」我緊張的問她。
「嗯…去廁所都一齊唔係咁方便噃，而且我喺旁邊會唔會阻住你識靚女呀？」她又扮出一副天真無邪的聲音。
「妳畀心機串我啦，一陣我唔去妳就知錯，妳返去覆蘇菲話妳會跟佢哋去啦。」我沒好氣跟她糾纏。
「咦，噉你呢？」可能我剛才兇佢，她有點膽怯我唔去。
「放心啦，我會跟另外一班人去，噉就唔會太明顯啦。」不過計劃都未正式開始，「另一班人」都未知是甚麼人。
第二日返早課八半（08:30），約了Leon在CC聚頭，開了第一次戰略簡報，當年的所謂Computer Center（CC），只是在library（拉把）的一個角落，有幾部終端機和個人電腦，讓學生可以查看校內通訊、做文書處理和印下嘢噉，選這裡開會是貪它人跡罕至，不用在lecture hall內傾咁張揚。
「我用幹事名義勾咗4張飛，一陣我直接去搵條粉皮，話個『波』收唔夠籌，老免請佢搵臨記去戥腳充撐場面，你個舞伴有無有用嘅情報呀？」Leon簡報初段部署。
「我呢邊暫時未有特別，不過有無辦法令條粉皮唔好咁多口呢？一陣佢周圍唱去『波』，阿豬阿狗都知佢有免費飛。」我想起阿心昨晚話「好揚」的擔憂。
「嗯，我諗諗，我而家去搵佢先，一陣我要開會，上晝潛水噃幫我點名吧，午飯時喺Canteen匯合再傾。」Leon說完怱怱去了。