《我老婆唔係我女朋友》【那些年／日常／校園】 第一至三章: 【第三章】 舞會中的聖域十二宮（２）
「仆街啦你，諗諗計啦。」我笑罵著，同時亦感受到我跟他之間的真摰友誼，雖然大家來自不同的中學，只是在校外的活動中認識，居然一直當朋友到現在，兼又在用一所大專同系上課，可算是非常有緣，反而自己的中學同學也沒有這麼親密。
「嗱，一場兄弟，事關你嘅終身幸福，幫得到實幫嘅，但最大問題係單嘢由蘇菲揸旗，呢條女係女皇種嚟嘅，你聽佢叫『蘇妃』就知啦，做事快狠準又霸道，做莊務無得頂，佢本身喺其他院校都有聯繫，所以我唔方便介入太多，事實上我亦無空間可以踩入去。」Leon娓娓道來。
我點頭同意：「蘇菲收街外傭兵我都有聽聞，你噉講即是無能為力？唉～好灰…」
「哈哈，你太睇小我嘞，你唔記我嘅座右銘咩，再者策劃活動，做統籌先係我最大嘅興趣同強項，點會無計呢，叫我搞莊務我反而無興趣。」Leon熱完身開始轉入直路了。
我點頭示意我記得，條友仔的座右銘「世上無難事，只要我Likey」，佢中學雞時以至到上莊都有掛在唇邊，而他確實有這個能力。
Leon續說：「講咗咁耐無非都係想你同條女華麗登場，名正言順去到『波』又唔會咁突兀啫，嗱，你條女照跟『蘇妃隊』入場，夠曬政治正確喇啩。我哋呢邊組織『雅典娜保衛陣線』，運送你呢啲低等青銅鬥士去前線保護女神。哈哈，燃燒吧小宇宙！畀狗公咬春袋啦！哈哈哈哈。」他愈說愈興奮，有活動畀佢策劃，做搞手撚人，正中佢下懷。
「喂，咪玩啦，我煩到爆喇，咬你鹵味咩。」我不耐煩的投訴。