《我老婆唔係我女朋友》【那些年／日常／校園】 第一至三章: 【第三章】 舞會中的聖域十二宮（１）
舞會中的聖域十二宮
他一拍額頭：「哎呀係喎，門小你講咗咁耐，差啲唔記得正經嘢。嗱，『聯校跨年舞會』單嘢就蘇菲prime嘅，我都係開會時聽啲唔聽啲噉啦，除咗聯校生以外，好似會以非公開形式招待街外人參加，噉呢啲場合狗公擒女就梗㗎啦，但係喺現場兜口兜面杜女呢，基本上係唔會發生嘅，以我所知聯校有糾察隊以防會場有失禮事情發生，離開會場有乜事發生就大家成年人自己負責喇，所以如果你一直傍住條女，行去邊都一齊應該安全嘅。你想去就好簡單啫，入場券、錢唔錢從來都唔係問題。」
「問題係失驚無神我用乜嘢理由陪個姐仔去『波』呢？識我嘅人都知我一定唔會去呢啲濕狗活動，你知佢又薄皮，俾人濕兩句同個肥仔去又唔開心，最後咪又係我做下靶。唉～我門小你…」我長嘆一聲，真個頭大如鬥。
Leon饒有趣味的打量著我：「話時話，記唔記得我哋識咗幾多年呀？」
我一怔，數數手指：「無啦啦問啲噉嘢？中三到而家，七年尾快八年啦，點呀？」
他笑笑指著我：「以你中學時咁仆街嘅性格，佢都可以調教你，變到成個暖男噉逆來順受，睇嚟你真係好甩條女，呢鋪嚟真喎。」
「仆街都話未開始無嘢喏…」我沒好氣的說。
「嘩！條囡簡直係神人，未開始都有咁強嘅能力，值得細佬頂禮膜拜！嗱，溝女梗係要搵件『治』到你㗎啦，既能夠治癒同時又能治理，呢個姐姐仔嘅人設啱晒你啦。嘜實佢娶埋做老婆添呀。」Leon一嘢幫我跳到End game了。