《我老婆唔係我女朋友》【那些年／日常／校園】 第一至三章: 【第三章】 少女心事你又識？（３）
Leon邊問我邊答，期間他不停反白眼，答到最後一條一百萬問題時，他幾乎將口中的奶茶都噴出來。「咪…咪住先，咳…我要清醒一下先，咳…我哋傾咗咁耐究竟係咪講緊同一個女仔先？」
嘿，弔詭的是原來我們坐下講了咁耐，一句都無提過阿心個名。
「嗯，咪就係頭先嚟班房搵我嗰個囉。」我理所當然地答他。
「What the…佢好文靜㗎喎？點會又Jedi又拖埋手呀？你仲話未開始？你搞到我開始懷疑人生…」Leon一輪嘴歇斯底里式的掃射。
「文靜個屁！少年你太年輕嘞。」，我粗略解釋一下當晚K房的情況，還有嗰隻小野蠻腦筋轉速快，只在熟人面前才會放下戒心的特點。
「吁～太突然喇，成件事啲先後次序全部錯曬嘅？有乜理由第一次就拖咗手，但到而家又未開始呢…」Leon軟攤在座位上，似乎一時難以接受。
我繼續𢯎頭：「我都唔知㗎，一切都好似好自然噉，雖然大家好啱Key，但我又唔知佢點諗，雖然我都想再行近啲，但都係無信心呀。」
「唉，你呢啲亂過亂世佳人，你同我講聽日結婚我都唔會驚訝，其實條女聰明伶俐、又善解人意，難得又知性啱嘴形，仲唔介意你一開波就抽佢水，人哋都殿曬「誠意金」啦（以前無「課金」呢個詞彙的），聽落你無反應仆街啲喎。」Leon有精闢獨到的見解。
原本阿心的gfable我都心知肚明，現在由Leon說出來只是多了一分客觀的支持，她應該是滿分的「候選女友」無錯了。
「嗯～都係嘅，我試試再主動啲囉，但舞會單嘢點拆呢？」我醒起今次自爆的目的。