《我老婆唔係我女朋友》【那些年／日常／校園】 第一至三章: 【第三章】 少女心事你又識？（２）
「係咪呀，寒天飲冰水，問自己有乜嘢待遇就最清楚啦，不過你話未開始但又一齊去『波』咁矛盾嘅？」Leon打蛇隨棍上。
「你問我點解我又答唔出囉。」我面有難色，覺得自己好像被迫供一樣。
「欸～會唔會人有人暗示，你有你無視咋？總有啲蛛絲馬跡啩。」他啜了一口凍奶茶。
「可能有我唔知啦，我真係唔識喎。」我仍是一籌莫展。
Leon皺著眉有點按捺不住：「仆街你個個星期借阿May本《姊妹》睇，無學吓嘢嘅咩？」
「吓？我除咗𥄫吓女之外，煲得都盡量煲㗎喇。你又係仆街嘅，有又唔提我睇，喂，點條生路行吓啦。」我恍然大悟竟然有啲噉嘅指南。
「門小你應睇唔睇，真係讀屎片…我諗吓嗰啲『少女心事』記得幾多先，嗱，我問你答。」論「書本」上嘅知識，讀老牌名校的Leon毫無疑問是比我優秀的。
Leon問
我答 佢同你之間係唔係愈嚟愈有默契？例如用眼神表情已經知道你想點？ 算係嘅。佢經常踢爆我心中所諗嘅嘢。 …… 佢有無主動約你去街？ 算有嘅，叫我去接佢返屋企囉。 吓！接佢？ 嗯，唔止一次嚕。 佢有無經常問你事情嘅意見或建議？ 有呀，好似今次去舞會囉。 …… 佢有無同你講啲私人嘢？例如家人、佢自己朋友啲嘢。 有呀，我知佢屋企有乜嘢人，做乜嘢同生活作息噉囉，佢朋友啲嘢都有提吓。 佢屋企人做乜你都知？ 知呀，邊度開工都知。 …… 佢有無話佢單身（A）或者問你係咪A？ 我知呀，所以無人接佢，又迫我去接佢囉。佢都好似試過迫我表態。 …… 佢有無叫你去佢屋企？用佢生活化住家嘅形象（非平日）見你？ 去屋企都幾次嚕，街坊裝算唔算係見過呢？ 去過個女仔屋企幾次！？ 嗯。 佢有無介意同你共用私人物品，例如你喝過的水杯喝水？ 我有試過飲佢杯嘢，有時食缽仔糕都會大家互咬。 你飲過佢杯水，佢都唔介意！？互咬缽仔糕？間接打茄… 嗯，應該唔介意嘅，仲有講有笑。 佢有無親手造或者買小禮物畀你？ 呀，有呀，佢親手焗曲奇畀我食。 喂你鹵味，我都未試過有女親手焗愛心曲奇送畀我… 🤷♂️ 佢有無對你詐嬌耍野蠻（撒嬌）？ 有野蠻！簡直是mind control，好似Jedi噉。 Je…di？！ 佢有無介意同你發生輕微嘅身體接觸，例如不經意的拖手？ 拖手有呀，我估佢唔介意嘅。 你拖咗佢手嗱？？？最近發生㗎？ 唔是呀，第一次聚會就拖嚕。