《我老婆唔係我女朋友》【那些年／日常／校園】 第一至三章: 【第三章】 少女心事你又識？（１）
少女心事你又識？
甫坐下Leon已經急不及待：「點呀，開始咗幾耐呀？」
我𢯎𢯎頭：「其實真係無嘢，乜都未開始喎，我個『朋友』想知道有關聯校舞會嘅嘢。」
聽我講完個「朋友」想我陪她去舞會的前因後果後。Leon嘆氣說：「唉，我都唔知點話你好，你呢啲男校嘅和尚仔真係唔識㗎喎，個女仔要你陪佢去『波』，即係間接邀請你做partner啦，你仲話大家未開始？仲曖昧緊？！人哋畀曬訊號你喎～」
我始終對自己的肥毒形象無信心，繼續𢯎頭：「咩呀，佢當我街坊順路啫，又或者會唔會當我係兵噉使呀？」
「嗱，街坊呢樣我唔同你拗，做兵？你覺得你做過乜嘢似兵呢？你見識過真正的『觀音』係點未呀？」Leon愈說愈激動，彷彿經歷過切膚之痛一樣。唔知何解我突然想起「鬆姐」睥睨眾生的眼神，隱隱覺得Leon其實形容緊佢。他續說：「觀音吩咐你辦事係老奉嘅，呀，都唔會吩咐添呀，你要識睇眉頭眼額，惴摸娘娘意旨，簡單啲講係使人唔使『講』！辦完事嗰句『唔該』亦都唔會有啦，你嗰位舞伴又點呢？」
回憶每次「出差」之後，阿心總會有窩心的「回贈」，那晚K房暖手後的雨中翹手補償（傘兵？），雞蛋仔外賣後的手製曲奇（伙頭兵？），前晚的【強記】糯米飯（運輸兵？），應該唔止派糧咁簡單吧，不過心裡也知道個衰妹不是娘娘種。
我不禁點頭同意：「確實佢當我係好朋友唔係兵嘅。」