《我老婆唔係我女朋友》【那些年／日常／校園】 第一至三章: 【第二章】 潮州凍蟹旁的書店（２）
這時候小巴轉入嘉林邊道，我跟阿心說：「嗱村姑，妳望到前面【嘉林小築】嘛，跟住轉咗彎就叫落車喇。第日自己嚟就識路嘞」
她帶笑橫我一眼：「咪村姑噉叫到老晒喎，下次我照樣捉埋你嚟咪唔使認路囉。欵，呢間【嘉林小築】係咪住宅嚟㗎？。」
我登時語塞，點樣解釋【嘉林小築】係一家爆房專用的時租酒店呢…只好顧左右而言他了：「我都唔知噉多㗎。咦，妳一陣去書局睇乜嘢㗎？」
「無呀，睇吓書㗎咋。」她隨口答道。
我們在衙前圍道和獅子石道交界的【國際百貨】落車，它是九龍城的地標之一，商店地下是超級市場，二樓賣成衣、精品和雜貨，聽說三樓是自住的，但我一直也沒有閒暇去考究。
「我以前成日喺【國際】過冷河㗎，四圍得佢喺地下行入去就有冷氣涼。」我跟阿心介紹。
她抿著嘴在笑：「嘻，估到啦，肥仔肥腯腯～」
在【國際】過了馬路，去到侯王道街口有一家頗具規模的教會，整幢建築物都是會址，阿心駐足在看他們的文宣。我抬頭看看他們的招牌——【播道會恩泉堂】，要不是她有興趣，我可能一世也不會知呢間嘢叫乜名。阿心看了好一會才叫我行，我有點好奇：「我今日先知九龍城有教會喎，以前一直都無留意。」
自然又招來她的白眼：「九龍城有好多教會㗎，多到我都數唔晒，九龍城浸信會、九龍靈糧堂，同呢邊播道會恩泉堂，等陣去間書局都係播道會開啦。聽講以前佢哋以服務城寨居民為主嘅。」