《我老婆唔係我女朋友》【那些年／日常／校園】 第一至三章: 【第二章】 潮州凍蟹旁的書店（１）
潮州凍蟹旁的書店
92年的九龍城，除了因為機場所帶來的繁盛，還有是舊區重建的躁動，事關「城寨」的前期清拆工程正在開展。
上了小巴後我問阿心：「無端端去侯王道做咩呀？買凍蟹定大閘蟹呀？」
侯王道有家老字號的潮州食店【樂口福】，除了以傳統潮式食物聞名外，還因為經常借出場地予電影拍攝，所以非常有名氣，而近九龍城街市那邊有幾家南貨店，明星都愛幫襯他們買大閘蟹，久唔久都上報。
她沒好氣的白我一眼，從袋中掏出一張宣傳單：「我想去呢度睇吓啫。」
原來是【播道書局】，一家已經屹立在九龍城幾十年的教會書店，新舗搬了去【樂口福】旁邊，裝修比以前光鮮，因為同時有精品文具發售，所以吸引很多學生幫襯，不過我又唔信老耶，梗係無入過去了。「唓～早講嘛，咪就係喺凍蟹隔離啫。」
「吓，你真係識去㗎，我以為你淨係知條街添。」她有點驚訝，可能以為是教會嘢我實唔知吧。
「小學時老竇帶我去九龍仔公園玩時，已經有呢間嘢啦，以前殘殘舊舊、黑麻麻成間黑店噉，後來應該裝修過啩，我中學時再經過，都已經好光猛啦，又玻璃門又玻璃櫥窗噉，多咗好多學生妹去添。」我憑記憶隨口說出來，看來書店也改變經營策略，用精品文具去招徠，導人迷信神。
「呵～估唔到你都有留意…」突然她微微瞇起眼睛：「多學生妹去又記得喎呵？會唔會你陪啲學生妹去至真呀。」
我輕輕用手踭撞她一下：「咩呀，而家我咪陪緊個超齡學生妹去囉，仲好講喎，成個村姑入城噉，又唔識路。」
「嘻嘻，唔該你囉，一陣請你食嘢囉。」她喜孜孜的說。