《我老婆唔係我女朋友》【那些年／日常／校園】 第一至三章: 【第二章】 潮州凍蟹旁的書店（３）
我心諗滿天神佛，鬼識咁多咩，邊行邊說：「九龍城都多明星㗎，妳留意我哋後面嗰個九龍城街市，成日都有明星嚟買餸，佢頂樓仲有個熟食中心，好似南山邨嗰啲東菇亭噉。」
談談說說，行多兩步就到【播道書局】了。「到喇，學生妹，裡面迫我唔入去嘞，我喺門口等妳。」著她自己入去，我對耶教呢味嘢真的興趣不大。
隔著玻璃櫥窗，看著她在書店內東摸西摸，一時揭吓那些書本，轉頭又見她跟店員搭訕，似乎來這書店真的讓她感到很愜意，雖然我自己無興趣，仍暗自慶幸有帶她來。
就是她這種被動的性格，平日也很難從她的表現中看出喜惡（除了「掃街」，她是非常饞嘴的），往往只有大膽的前行，或是幫她拿主意，碰巧做對她心水的，才會不經意的流露出欣喜的情緒；搞到現在的關係好像處於樽頸一樣，明明就觸手可及，但她又沒有表明可以…
差不多15分鐘後，她推門出來了，手上拿著個膠袋：「咦，咁啱嘅？等人呀。嘻嘻…」平日見面時，她最喜歡用這開場白，看來心情大好呢。
我沒好氣：「…點呀…買到要買嘅嘢啦嘛？」
「有呀，買咗本書，嗰個店員話係牧師寫嘅小說，又買咗兩枝筆囉。」她喜形於色的告訴我。「呀，送畀你吖。」說時她塞了一張書籤給我，上面印有聖經金句。
妳送張書籤畀個文盲嘅？平日我都淨係會睇公仔書啫，不過她有心送的，我當然都高興：「多謝喇，到妳陪我去巡視業務囉喎。我哋而家去【龍珠】。」