《我老婆唔係我女朋友》【那些年／日常／校園】 第一至三章: 【第二章】 人生成就解鎖（２）
三扒兩撥返到石硤尾，在地鐵站打給她。「喂？」我以為來聽電話的一定是阿心，遂用昨天的叫法開心吓：「唔該搵王小姐吖。」
「吓？王…小姐？」謎之女聲聽落有點詫異。
欵…咦？我好似舐嘢喎。
謎之女聲繼續說：「你打…錯，欵…？你搵王小姐係咪？等一陣。」我幾乎想掛斷電話，但想想始終都要找到阿心，只好硬著頭皮等了。
聽到電話的另一端有人叫家姐，聲音應該就是剛剛的謎之女聲了，接著一陣朦朧的對話，然後就是一陣打鬧的嬌笑聲，好容易終於等到阿心拿起聽筒：「喂，你到咗地鐵站嗱？你喺地下樓梯口等我一陣，我落嚟吖。（我插口：誒，頭先嗰個…）我個妹嚟㗎，佢今日放下晝。你咁渣㗎，連我把聲都認錯。」
「鬼知會有第二個人聽電話咩，我而家行過去嘞。」由地鐵站出來行到民泰樓樓梯口，等了一陣阿心落嚟了，面色仍有點蒼白，今天沒有招牌的馬尾，長髮披肩戴了頭箍和黑框眼鏡，顯得比平時更文青，長袖衛衣、運動褲配拖鞋的街坊裝。
她看著我笑了笑：「等咗好耐？」
「唔係呀，啱啱到之嘛，妳戴眼鏡嘅？」我一直以為她跟我一樣是沒有近視的。
「又唔係出街返學，無所謂啦。」接著她瞪眼向我說：「唔准笑我似小雲！」