《我老婆唔係我女朋友》【那些年／日常／校園】 第一至三章: 【第二章】 人生成就解鎖（１）
人生成就解鎖
次日3點又再打給她，似乎每天打去問候她，已經成了習慣，想不到她今天差不多完全康復了，只是說話期間有零星的乾咳：「咦，把聲聽得出好咗好多喎？」
「係呀，今日差不多好翻晒嚕。」她爽朗的答道。
「噉妳今日食唔食雞蛋仔呢？」我估為食妹一定想再吃，所以故意問她。
「今日唔食嘞。」她順口答道。
「哦～噉呀…」我好生失望，似乎再無藉口去找她了。
「但係你一陣放學都過一過嚟吖。」吓？柳暗花明！「係啦，好似噚日噉，返到地鐵站打畀我吖。」
放學後馬飛又來紏纏他的唱K事業：「喂喂，等等先啦，仆街噉仆去邊啫，幫手戥戥腳先啦，一個鐘！」
今日佳人有約，我自然懶得跟他廢噏：「黎G去先同我講啦，冚家祥你咪拉住我啦，我趕時間呀。」
他拉著我手臂不放：「你等等先，你有無留意阿心今日又無返呀？嗱，我幫你問咗蘇菲，原來佢病咗喺屋企休息，噉你唔使擔心啦。」蘇菲中學時跟阿心是同校不同班的，所以是罕有知道她底細的人。
我一怔又有點感動，原來馬飛除了關心業務之餘，都會關心同學的：「係咩？原來病咗，唔怕啦，有蘇菲啲筆記頂住咪得囉。」故意顧左右而言他。
誰知這個感動位只維持了三秒鐘，馬飛馬上打回原形：「嗱，咁有用嘅情報，抵你陪我哋去唱K啦。」三句不離本行。
「呿～去仆街啦你。」頭也不回的走了。