《我老婆唔係我女朋友》【那些年／日常／校園】 第一至三章: 【第二章】 人生成就解鎖（３）
我心中竊笑，眼鏡配大眼睛真是像極了《IQ博士》那個則卷小雲（則巻アラレ）一樣，只差在沒有戴頂鴨舌帽而已。我笠水沒有敢笑出來，只好微微笑了一下：「今日咁精伶，好似好翻晒囉喎？」
「係呀，好好多喇。嗱，請你食吖，我今日自己整嘅。」她遞了一包密實袋零食給我，我打開一看，是心形曲奇餅來的。
「妳識整曲奇咁叻嘅？」順手取了一塊來吃，甜甜的朱古力夾雜著濃郁的牛油香味，味道真的不錯，我由衷的讚嘆：「幾好食喎！」
她嫣然一笑：「以前家政堂學過啦，照住recipe整有幾難啫，真係好食咩？」
我再吃了一塊：「係呀，真係幾好食。」band 1女校果然是賢妻良母的工廠。
她喜孜孜甜笑：「好彩心瑜下晝放假幫手咋，如果唔係都整唔切。」我估心瑜應該是那謎之女聲的細妹吧。
「哎吔，啱啱病好就唔好咁操勞啦。」我有點心痛。
「唏，瞓咗兩日都夠啦，而且整吓餅都唔係好辛苦啫，我估你鍾意食嘛。」她說話期間，我已經吃到第三塊了。
「嘻，又真係好食嘅。呀，今日馬飛提起蘇菲搵過妳，所以知妳病咗。」我將剛才馬飛的說話轉述。
「嗯，蘇菲見我無返學，有打過嚟問候吓。」她對其他人的關心，看起來有點冷漠。
我食住上：「噉不如下星期約埋一齊返學啦，費事一陣又有人玩失蹤！」
她笑著橫了我一眼：「上次講好咗啦，星期日晚再通電話約實時間啦，我唔驚你又撞上我屋企刮我咩。」