《我老婆唔係我女朋友》【那些年／日常／校園】 第一至三章: 【第二章】 送外賣的伙頭兵（３）
放學婉拒了Leon先去巡視業務，後去買餸的建議（買餸都肯陪我去，真正朋友）。滾水淥腳的飛返石硤尾，懶得找南山邨出口了，照樣經由B2，通過大坑西街的南山邨商場入口。
去到街市外，已經見到一班學生圍在幾檔小販車旁掃街了。當年南山邨那檔雞蛋仔午後都有開工的，排咗兩底就到我了，5蚊一底雞蛋仔可以𠱁吓阿心，等佢病得唔使咁辛苦，我又乘機可以親近吓佢，勁抵啦。
買完行入街市茶檔借電話：「喂，唔該搵王小姐吖，買咗雞蛋仔囉喎。」
她已經認得我的聲音了：「嘻嘻，點呀？」再聽得一聲歡呼。「好嘢，街市檔雞蛋仔好好食㗎呢。」
「我而家攞上來喇。」連續第三日撐上民泰樓，四周的環境變得熟悉，哪層有塗鴉都開始認得，不過今天和昨天的心情就有天壤之別了。又到了塗改成18字的10樓第三間，輕輕叩門：「喂，有無人叫外賣呀。」
簌簌的拖鞋聲響起，大門打開了一條狹縫，一隻修長的手「鬼鬼鼠鼠」的伸了出來，講笑！咁容易想偷蕃薯？趁機在她手心𢯎了一下，她輕輕的驚呼一聲縮手：「哇！做乜㗎？」雖然她不肯開門，但仍可以想像她在門後嘟著嘴的可愛模樣。
「嘻嘻，Sorry唔小心啫，妳伸返隻手出嚟先啦。」我𠱁她再伸手出來，只見她慢慢的再伸出「猶豫之手」到門外，今次真的塞了包雞蛋仔給她了，她帶著雞蛋仔縮回手。
她一邊吃雞蛋仔一邊口齒不清的咕噥著：「喂呀～等我一陣唔好走住吖。」等了半分鐘，大門又再開了狹縫，半包雞蛋仔伸返出來：「你同我兩份食啦。」原來她搣了半包留給我。
「喂，大姐，我買㗎喎，妳分畀我食，條數噉計嘅咩？」我又好氣又好笑。
「哈哈，此言差矣，你買畀我嘅就係我㗎啦，我而家大方請一半你食咋，哈哈哈哈。」好個「義氣心」，個「朵」唔係流嘅。
就這樣我們隔著大門分享仍溫暖的雞蛋仔，由「心」暖心，這個深秋愈來愈暖。