《我老婆唔係我女朋友》【那些年／日常／校園】 第一至三章: 【第二章】 送外賣的伙頭兵（２）
第二天我返A1大半日要上課，只能在學校打給她。捉著Leon做擋箭牌蛇入「眾義堂」打電話。「喂～心，今日覺得點呀？」
「今天無咁攰嚕，不過仲係好眼瞓囉。」她的聲音明顯精神了不少，但仍有點沙啞。
「仲有無發燒呢？」我還有點擔心。
「我無度喇，應該無喇啩，唉～食咗藥成日都口苦呀。」今天她說話也多了，可能悶了一整天吧。
「不如一陣放學，我順路買啲甜嘢妳食吓好唔好？唔使妳開門嘞，我都唔想見到『鴉烏婆』呀。」總是千方百計，想借啲意親近她。
「嘻，都好喎，但會唔會好麻煩呀。」聽得出她是真心歡喜的。
「唔會啦，順路嘛，妳想食乜嘢呢？」幾乎她想吃龍肉我也能弄到。
「嗯～你大約幾點返到石硤尾呢，放學時間不如買雞蛋仔吖？喺南山邨街市外會見到學生排隊嘞。」阿心想了想之後說。
「為食妹！我一陣返到再打畀妳，瞓多陣先啦。」哈，今天真的是心想事成了。
「唔瞓嚕，我睇電視等你吖。」
Leon一臉狐疑的看著我打完電話：「你個仆街，陰滋滋噉講電話，有蠱惑呀吓！」看來有甚事也很難逃過他的法眼，條友的確是心細如塵。
只好亂噏廿四了：「咩呀，一陣放學要幫阿媽買餸呀，唔啱你陪我一齊去啦。」