《我老婆唔係我女朋友》【那些年／日常／校園】 第一至三章: 【第二章】 送外賣的伙頭兵（１）
送外賣的伙頭兵
「哦，我媽叫我幫佢買馬啫。」隨便狗噏個理由。急步離開偉智街，以九秒九速度返屋企，馬上打給她。
她的聲音仍然很虛弱：「唉～我…發燒37度呀，醫生話…我冷親，要我休息…三日。」
「噚晚妳明明話學校見嘛，我見妳無返，以為妳有意外呀。」我坦白說出我的擔憂。
聞言她輕輕的笑了笑，慢慢的說：「我俾你…嚇死就真呀，無端端…走上嚟，一陣俾人見到都…唔知點算。」
「Sorry囉，我無你電話嘛。」說實在我自己也擔心被人看見。
「今次算你…啦，啱啱好夠…鐘食藥，你嘈醒我都…合時。」她仍輕輕的說道。
「噉妳而家有無感覺好啲？」我聽到她說話速度愈來愈慢，應該真的好攰，雖不捨但都要說：「唔好講咁耐嘞，瞓多一陣啦。」
「喂…等等，你…聽日唔好再上來喇，不如…你聽日3點再打嚟…叫醒我食藥啦。」她似乎怕我再摸上門，乾脆安排一個任務給我。「喂呀…我叫你唔好上嚟…係怕隔離左右多口…尷尬咋，你咪又多心…亂咁諗呀。」
吓，佢連我玻璃心都預計埋嘅？「都好吖，順便又可以知道妳好返未。得啦，我無亂諗喎，快啲去休息吓啦，掰掰。」