《我老婆唔係我女朋友》【那些年／日常／校園】 第一至三章: 【第一章】 肯定是好感多於好奇（2）
聽馬飛專業廢噏一輪，落到校巴站，搞到連尾班車都走埋，又要身水身汗行去火車站，想起又不能順便「跟蹤」阿心，不禁輕嘆一句，仆街～吹水真係累人累物。
已經開學差不多一個月了，有時在火車或地鐵上也會遠距離看見阿心，但我沒有蓄意接近她，須知女生主動跟毒隱說話就是友善，毒隱主動跟女生說話就是變態，事關毒隱都是相當恐怖的，妳對他稍稍和顏悅色，他就會胡思亂想了，這「Ｘ登福音」內記載的真理，我是真心認同的，也清楚明白亂諗嘢的後果。
不過她的和藹可親，確是讓我感到很親切，還有她的馬尾裝束，又是令我印象深刻，然而性格咁好嘅女生，點會無人認頭呢，再者自己知自己事，就算要揀，正常女生都唔會揀肥矮毒啦，都是無謂強迫人家侮辱自己，是以一直不敢有非份之想，保持安全距離遠觀就好了，不過如果…如果…有機會我都想試吓，或者佢善良到唔會侮辱人呢…
日子久了，漸漸地留意到跟她同上那科（我retake那科）的那天，由於返學時間接近，我曾經在石硤尾站月台上見過她的蹤影，因此就留上了心，會唔會咁好彩佢真係住石硤尾呢？
於是我先假設她真的住在這區，嘗試預測她返學的時間，再刻意提早15分鐘到地鐵站入閘口等，希望製造偶遇的機會（而家諗返轉頭，我真係毒到仆街，根本就係一個跟蹤狂），不過由於石硤尾站是有兩個入閘口的，所以一直等到第三次（輪流在不同閘口等），幾乎想放棄之際，天見可憐居然見到一個纖瘦的身影入閘，噢，原來她在B出口那邊閘機的，難怪我在A出口那邊等了兩日都食白果。