《我老婆唔係我女朋友》【那些年／日常／校園】 第一至三章: 【第一章】 肯定是好感多於好奇（3）
「咦，你呀，咁啱嘅，等人呀？」阿心居然認出這個站在閘口的阿呆是我，禮貌的點頭問好，幸好她先開口叫我，否則我都唔知叫唔叫佢好…我又想起「X登福音」的教誨…
「欵～心姐？妳住石硤尾嘅咩，我…我等完喇，啱啱等個補習學生嘛。」雖然詭計得逞，但我發現自己根本無計劃過真的會遇上她，只能拙劣的回應。
她微蹙双眉嗔道：「都話叫阿心喏～」似乎相當抗拒叫到佢老晒。
「啊呀，係嘅係嘅，嘻嘻，習慣咗啫，妳返學嗎？不如一齊行吖。」並無事先諗定偶遇的對白，其實我已經無貨賣了，只好低能的賠笑。
她微笑著輕輕的「嗯」了一聲，似乎沒有反對我的建議（其實她也沒有表示同意啊），這種淡淡然的默許，給了我些少鼓勵，起碼她無西口西面一副厭棄的模樣，又無打我一巴大叫變態佬啦，所以我真心覺得輸少當贏，今晚應該要叫老媽劏雞還神。
這位性格隨和，（看來）不抗拒毒隱的素顏女生叫林心穎（這名字在當年無甚特別，可在今天「心穎BB」這個名字，真是街知巷聞了），朋友會叫她阿心，我有問她是不是心臟的心？她瞪著大眼盯我說：「開心的心得唔得呀。」但其實我一直都覺得奇怪為什麼她不叫阿Wing的。