《我老婆唔係我女朋友》【那些年／日常／校園】 第一至三章: 【第一章】 黎G是佢同學！？（１）
黎G是佢同學！？
上課的時間是可以無限揮霍的，放下心頭大石後，又開始𢯎水吹（根本無上堂這回事…），以前未有手提電話和電腦，大家無咁自閉，上堂多數是吹水、聽歌、睇公仔書或雜誌。馬飛不愧是「吹神」，上天下地無所不談，好像最近治安唔好，警匪槍戰隔幾個星期就有，佢又知道係港英綠衣決戰大圈幫；政治嘢又吹到喎，未代港督肥彭履新，搞政改方案佢又知，仲搵咗張雜誌相畀我睇吓，「督憲府最索千金」彭雅思Alice個樣，「禮義廉」立黨佢又話有意加入做青年成員。
和馬飛說話基本上是可以完全不回應的，因為他會一浪接一浪的說不停口，話題無有終結（真㗎，條友可以自說自話成粒鐘），導致我亦有餘暇同時揭揭雜誌。看著他剛才給我睇相那本《姊妹》，呢本女性雜誌應該是某女同學買了，然後在上堂時供給大家傳閱，這種共享模式在我們課堂間非常流行，同學之間甚至有默契，既然佢買嗰本，我就買另一本吧，所以基本上坊間的漫畫和雜誌，全都可以在上堂時睇晒。
當然有時候都會被八婆同學調侃，男人之家學人睇《姊妹》？！不過有得睇總好過上堂瞪眼發呆吧，所以我依然期期都追，剛巧揭到某頁一位女星的專訪，忍不住打斷馬飛的說話鏈。
「喂～馬飛，黎G呢？」