《我老婆唔係我女朋友》【那些年／日常／校園】 第一至三章: 【第一章】 總書記是個女生？（３）
這時候的馬飛於我，不啻等於怒海中的一個水泡，條友屬於非常爛玩嘅浮游分子、機會主義者，基本上是逢玩必到、逢到必早的那種人，對唱K尤其狂熱，為人口若懸河，把口又𠺘過油，是天生做sales的人辦。
「喂？咁錯蕩呀，你上年應該修咗呢科喎，乜嘢事？」還未坐定，馬飛已經急不及待問我。
「唉，唔好提喇，總之今年又上啦。」我死狗一條的回答。
上年修過今年又再修，仲可以有乜嘢原因呢，眉精眼企的馬飛自然唔會再追問了，馬上轉開其他話題，正在左吹右吹之際，我突然醒起有件頭等大事，必須在上堂前先處理。
「咦喂，你呢班有無『書記』㗎？」所謂書記，就是每逢上堂都坐車頭，死抄爛抄筆記的乖學生，他們的出品之後當然是畀我哋啲廢青順手收藏了。
「哦，有啊，筆記搵林總書記阿心姐啦。」（當年大家仍未知道總書記原來是個有極高權力的職銜）隨著馬飛手指指向前方（我們坐hall一定是坐大後方，方便走堂散水），剛好有個綁中馬尾的女生轉身望過來，皺著眉頭盯了我們一眼，似乎聽到我們談及她，我連忙雙手合十向空中一拜，表達「射住射住」的意思，耳聽到彷彿輕輕「哼」的一聲，馬尾一擺，頭轉了回去。
「得啦，心姐義氣仔女嚟，唔使擔心喎。」馬飛補充著安慰我。