屍殺某街50號: 屍殺某街50號 (十 一) # 求生
老老實實，平時睇開恐佈片嘅巴絲可能會明，如果一套戲不停咁嚇你，去到咁上下次數你就會慢慢習慣。
出便隻嘢家下就明玩嘢嘅，佢識得貼住地板嚟敲，亦即係一早知我貼地板黎裝緊出面。
而我經過佢哩一下玩弄，反而清醒咗唔少。
首先佢地似乎就唔識講嘢嘅，而且起碼有一隻係擁有一定嘅智慧，同時可以對其他唔知幾多隻發號司令。
敲門嘅原因，亦絕對唔係因為比道爛鬼門阻住咁簡單，估計佢係想玩弄獵物。就好似啲貓會捉老鼠黎玩一樣。
我又諗到6樓個肥男人，佢同臭魚血腥不明物應該係息息相關，不過就無嚴重傷害我哋嘅意思，最起碼當時無。
諗到哩度，我知道家下我哋身處嘅密室，分分鍾已經成為全幢嘢最危險嘅地方，就好似啲曱甴走咗入曱甴屋咁樣，死鳩硬。
唔理喇，要求生就一定要突圍。
我轉身同女神講「係度等死，不如衝出去搏一鋪」女神簡單嗯咗一下。
砰!砰!砰!砰!砰!砰!!!出便隻嘢依然玩得得好開心。
仆你個街，我同女神企返喺門後面，計準時間，一嘢打開度門小小，出面隻嘢靜左靜，啲勁臭血腥味再次攻過黎，慢慢，慢慢等，啲味突然間近咗...
喺漆黑一片之中，我幻想到隻嘢依家已經伸咗個頭入黎，今次我有前無後，用全身最大嘅力度，猛烈咁澎埋道門...
一道超難聽嘅慘叫聲響起，暗戀你跟本唔似係人叫嫁 !
啲聲尖到Hi Hi，有啲似細個用指甲尖刮落黑板 x10，再用拆拆地嘅大聲公放大，總之全身起晒雞皮。
最慘係我仲feel到有啲唔知咩汁液，彈咗落我澎門嗰隻手上面，臭到Hi Hi，都唔知有冇毒。
我跟手揹返起女神，而出面隻嘢已經伴隨住佢啲尖叫聲衝返去前梯...
眼見機不可失，我揹住女神全力衝返出去相反方向嘅後梯，離開呢個令我又愛又恨嘅單位。
其實我跑唔到幾快，同一時間，我亦隨時做好準備，現場太黑，希望唔好黎一嘢突如其來嘅撞牆。
但一直都無，舊式建築嘅好處，話一就一，二就二。
建築嘅設計以方便用家為主，走廊就係走廊，唔會好似而家啲樓咁，三尖八角，建築面積800尺，用就用得500幾尺，屌你我講緊咩。
講返當時先，心入面依然喺靠嗰張自己勾畫出黎嘅地圖，心諗係時候要收一收腳步，再跑，我怕衝左落樓梯。
但世事往往需要用好多巧合串埋，因為就喺我就收一收步呢個時候，我先留意到，有一點光喺我左邊隔離閃左一下。
續 (十一)