屍殺某街50號: 屍殺某街50號 (十) # 敲門
吻下來 豁出去 !
我唔理啦，我決定而家就出去一個打十個，然後就堂堂正正咁帶住女神由正門走 !
我同女神first kiss嘅嗰一刻，我嘅內心世界就只係以上嘅對白，我估呢個世界無咩人會諗住呢句嘢黎咀。
而好可惜呢個first kiss，亦無幾多個會好似我咁短暫。
女神見我冷靜返，就細細聲咁同我講「而家係咪想攬住一齊死呀，叫到咁大聲。」
Oh，Shit，我叫多次，可唔可以黎多次先，正當我諗住口甜舌滑咁佔佢便宜。
度門木就突然間響起，砰砰砰!!一連串急速嘅敲門聲，令我由粉紅色世界返到黎呢個單位嘅黑暗之中，嗰下真係心都離一離。
應唔應門好，而家就有兩個可能，第一個就係Jason條 Hi Hi大難不死，而佢又聽到我頭先嘅叫聲。
而另一個可能就係啲唔知咩嘢聽到我頭先嘅叫聲，吸引咗過黎。
二份一機會，一係救人一係仆直，想話開聲問又唔得，好兩難。
砰!砰!砰!!又響，今次敲得更急速，諗落真係似Jason嘅處景。
我拉一拉住女神嘅小手，細細聲問佢「你覺得點，我指你隻腳，行唔行到先。」
女神一樣細細聲應我「sorry 呀，我企都企唔到...」
我之所以咁問，係因為我決定開門，我想知道萬一有咩事，我哋嘅逃走能力有幾高，而家睇黎就唔會好高。
既然係咁，開門之前我想試多一樣嘢先，我行埋去門度...
呢個時候，砰!砰!砰!!又響起，嚇咗我一跳。
心諗，仆佢個街，如果呢個真係Jason，陣間救佢入黎後真係要打爆佢隻手。
佢咁樣敲法，同我頭先大叫又有咩分別，呢個亦都係我咁快決定搏一搏嘅原因。
我慢慢咁跪低喺門下面，盡量閉氣，無錯，我想先由門下面條 Gap 位度裝一裝先。
我當時咁諗嘅，Jason手上有光源嫁ma，如果重有電嘅話，我就可以喺個 Gap 位度見到少少光喇，咁有光就9成知係佢啦。
嗰一刻，我塊面貼住地板，用盡眼力裝出去，咩都無，無光源。出便嗰個係Jason嘅機會即刻細咗，諗到呢度，個心即實一實。
砰!砰!砰!! 聽門聲嘅位置就知，出便隻嘢今次貼住地板黎敲...
續(十)