屍殺某街50號: 屍殺某街50號 (四) # 狗公

「鐵…亞鐵呀，你可唔可以揹我落去呀。」女神用啲唔好意思嘅眼神望住我講。
喺呢一刻，我第一次咁後悔莫及，後悔頭先點解唔上多幾層先出事。

另一方面，我堅係唔相信佢會選擇我嚟揹佢，因為我相信如果我係女，我一定搵Jason，就算隻腳無事，我個腦又開始亂諗，唔通女神個心一直都喺我度 ?定係佢特登搵Jason嚟迫我表白呢?

「吓…咁…」小小嘅自卑，令我有啲卻步。

「快啲啦，Jason佢生得咁高，唔通要佢揹我咩，唔該你啦。」女神一句返埋嚟。

「吓!! 咁你同我上黎!」 係我諗多咗。

揹住女神嗰種感覺真係好奇妙，無論係佢嘅體溫，定係佢起伏細緻嘅一呼一吸，都即時傳放入我身體入面。雖然經過一晚嘅走動，但佢身上面依然傳黎一陣陣天然嘅少女香氣。我嘅雙手免不了需要觸摸住佢 嘅雙腳，唔諗好地地，一諗到呢度，雙手即刻Feel到一陣柔軟嘅嘅觸感，加埋黑絲嘅幼滑，令我塊面好熱 好熱，我諗日光日白睇，一定紅晒，小毒jj真係容易滿足。

唔經唔覺已經落咗幾層，家下就輪到亞Jason粒聲唔出，攞住女神部電話喺前面好快咁帶路，條友為咩喺度 ? 為女囉。(其實我都係) 咁既然而家女神係我手上 (背上)，3個人之中，條粉皮應該係最想走出去嘅，呢樣嘢我好明。

「亞鐵，你做咩咁熱咁嘅 ? 係唔係好辛苦呀 ?」估唔到興奮嘅體溫，就連女神都Feel到，咁唔通話我就嚟扯旗咩，於是我求其話，係咩、無呀，咁就算。另一方面，就係咁迫自己諗第二啲嘢，要分心，話晒而 家不明不白咁比班傻佬威脅緊，要集中精神。

唉，唔諗好地地，一諗就知Hi Hi。呢個念頭一出現，我即刻細細聲叫停Jason先。

「亞Jason，7樓前梯就話有門，但7樓以下呢，如果一至六樓求其一層無門，班傻佬都入到黎前梯，到時 就可以喺我哋前面埋伏，佢哋而家好大機會喺樓下大堂。」

當時我哋距離唔知有無鎖嘅大前門得返3層，女神唯一部電話，25%電。

「Jason，不如我同鐵喺度等你啦，你落去探一探路先，有咩事都可以即刻跑返上黎 ma。」女神終於發 揮佢嘅機智，無錯，以靈活性同走佬速度黎講，咁係最好嘅安排，問題在於Jason。

唔知佢心境如何，會唔會好幼稚咁認為自己係行先死先嗰種，又或者被遺棄的一個之類。呢種因自卑而 產生嘅唔舒服感，我明的。

點不知佢望一望女神，諗咗陣，再講咗句「好呀，不過你要等我喎。」就轉身行落去，而喺呢一刻，我竟然Feel到女神嘅呼吸急咗。

我低估咗Jason，好一個Jason，果然係高級狗公，試問佢又點會出現被遺棄嘅毒撚心態，佢跟本知道女神 嘅提議係現時最好嘅辦法，自己有事又可以走得快啲，而且無得推卻，於是就順勢將自己包裝到英雄一 樣，再加埋臨走懶係曖昧嘅一句，我係仔都死啦，到時可以講係win win 局面，估唔到條Hi Hi唔單止高大靚仔，道行仲好高，今次女神又無喇。





 諗到呢度，成個人灰返晒，女神呼吸依然咁急，似乎係小鹿亂撞，心情久久不能平伏嗰隻。

我好想放返佢落地，究竟佢知唔知道，要一個鍾意佢嘅人，一齊分享佢對其他男人小鹿亂撞嗰種殘忍。

Jason一離開，成個4樓前梯即刻變返漆黑一片。

阿女神姐姐，我知Jason嗰句好型，但可唔可以唔好咁大反應呢 ?

我係度諗，如果而家有街外人上黎搵我地，電筒一照都應該幾好笑，一個揹住女神嘅小毒j j，個樣心灰意冷，而被人揹嗰個，就面泛紅霞，等待佢另一個情郎返黎。

諗到呢度，我忍唔住喇，細細聲同女神講「你無咩事喇ma，不如試下落一落黎，我扶實你好冇 ?」 

點知女神聽完我講，竟然一嘢就抱實我條頸，成個胸貼到我實一實，柔弱講「鐵，我…我好驚呀。

」嗱，各位絲打，男人嘅嘢呢，就好Q簡單嘅，唔使多，識一招就夠喇。 佢一下子令我好似人格分裂咁，一方面喺度諗，想點呀，當我水泡咩，仲要咁短時間嗰隻，我都有尊嚴嫁。另一方面把口就講咗句「唔怕，我唔會比你有事。」

「咁…啲今次啲怪聲又係咩黎嫁 ...」

續四下期：我同女神講「今次點都要走啦，你抱實啲。」我一隻手逗住女神，伸出另一隻手，摸黑探路。同時用返腦入面嘅記憶，不停重復返成晚喺各個樓層走動嘅畫面，心目中慢慢咁樣畫返一張簡陋嘅地圖出嚟。