屍殺某街50號: 屍殺某街50號 (三) # 肥男人!!
無塵嘅原因，一係大風，一係經常有人活動。
一至五樓有塵，六樓以上無塵，即係有啲唔知咩嘅活動範圍集中喺特定區域，一係就啲風集中咁吹特定區域，你話你信邊樣。
我就同自己講信後者啦，唔通仲未夠驚咩。
呢類咁模糊嘅事，當時我亦唔想講出黎，而且佢兩個周圍大叫Vanessa個名，成件事個氣氛都好似好快搞掂咁，咁係我樂於見到的，就無謂節外生技喇。
今次又係叫得放膽好多，因為Jason話見到Vanessa，咁即係佢喺附近喇，唔再係大海撈針喇。呢個諗法 又持續咗30分鐘，而家就得返女神部電話嘅光源。
我就同女神講「嗱，不如我哋留返30%嘅電量啦，一低過30%電就用黎回程落返去，你而家有幾多電喺手 ?」
女神如夢初醒，望一望自己部電話「啊~得35% 呀」。
Shit!! 好彩女神之後收口，幾驚佢話頭先睇MyTV煲劇，我不能再受任何打擊。
「好，而家 35- 30 = 5，嗰5%電不如就上多一層快搵，搵埋8樓，之後即刻落去，OK唔OK先。」我相信 而家我講咩都OK，因為大家都覺得件事愈來愈唔簡單。
「頭先明明見到有人影，我哋咁叫法，Vanessa無理由聽唔到喎。」Jason完全無理會過我條問題，自己喺度講。
咪住，我即刻轉身問返佢「你見嘅只係人影 ? 你又話嗰係Vanessa ?」
「咁我以為係佢都好正常，唔係佢仲有邊個。」Jason仲理直氣壯過我。
「就係唔知仲有邊個先驚，記唔記得五樓聽到嘅男人聲呀。」真係，自己講完都寒一寒。
「你哋不如唔好講喇，33%電啦，仲上唔上去嫁。」女神都開始比我哋搞到唔耐煩。
「死都唔上!」Jason一句彈埋黎，嚇到我同女神一齊望住佢。
然後再跟返佢嘅視線，齊齊望上8樓嘅樓梯頂。 當女神部電話照過去嘅同時，我哋見到個好肥嘅中年男人企咗喺度。
唔知靜咗幾耐，個男人首先攞碌棍出黎，突然大大力咁打落扶手啲鐵技度，跟手一步步行埋落嚟，一路行又一路拍打鐵技。
成個環境好鬼似嗰啲咩德州電鋸殺人狂咁，我見到女神真係好驚，仲係咁後退，我同Jason不期然就企埋 喺女神前面，家下有棍大晒呀!
「你哋點入黎，快啲走呀!!」個肥男人原來識講嘢，見我哋兩個男仔唔驚佢，終於企定大喝。
「唔好意思，第一你哋無鎖門，第二我哋有個朋友唔見…」正當Jason試圖解釋，就比肥男人嘅大喝打斷
「我叫你哋走呀!!」
「你哋知唔知上面有咩呀!!」個肥男人愈叫愈激動，無程程自爆咗一句令人好有聯想嘅嘢出嚟。
----------
「咁有咩呀 ?」問呢句絕對係自然反應，就好似人哋同你講 A眼 B眼，跟住你會自動講埋 C眼 一樣。
但肥男人似乎偏偏就比呢句激起把火，佢竟然一支棍飛埋黎我哋度，最Hi Hi係個個都唔中，偏偏飛中女 神對黑絲腳。
「喂!你做咩打人呀 ?」而家道理就喺晒我哋呢面，搞到女神中招，點都同佢搏過，有咩事都係當自衛。
點知，那邊廂阿Jason一手拉起女神即走，而女神亦都大叫「亞鐵你仲講，快啲走啦 !」
走唔係唔得，但佢哋唔係就咁落樓，而係走返入7樓走廊。
嗱，個廢廠嘅設計就咁嘅，一層分有前、後兩組樓梯，我哋最初由後門入，咁好自然就用後面嗰組樓梯 啦，而次次搜索完嗰一層，我哋都會用返較熟悉嘅後樓梯作為上落。
行返入7樓走廊，即係而家向緊前梯方向跑過去，走到走廊盡頭，見到前梯，而走廊盡頭亦好好彩有道 門，仲用得，我哋即刻嘭埋...
---
3個人不停喘氣，其實頭先一路跑，我一路想問，點解唔直接用後梯鬆人，佢哋答我，當時樓下仲有個男人上緊嚟。
「個肥男人叫我哋走，自己又整埋晒啲前後包抄，咁算點，而家唔係唔走呀，係走唔到呀!」我一路喘氣 一路講。
「有咩辦法，而家唯有行返落去前梯，如果正門無鎖就正門走囉。」Jason嘅建議，算係今晚最正路嘅一句。
我望一望女神，原來佢喺度彎腰輕摸緊佢條黑絲腳，頭先大家掛住逃命，都無理過佢，家下比個咁嘅姿勢我睇，加上佢心口件白色恤衫，又離奇咁扣低少少，唔小心見到少少白色嘅胸圍同埋上半球，成個畫面都完全 令我忘記身處嘅危險，我即刻借頭借路，企喺Jason同女神中間，擋一擋先唔好講笑。
「你隻腳無咩事ma ?」我嘆左口氣，忍唔住用好輕柔嘅聲線問佢。
「鐵…亞鐵呀，你可唔可以揹我落去呀。」女神用啲唔好意思嘅眼神望住我講。
續(三)
下期：「Jason，不如我同鐵喺度等你啦，你落去探一探路先，有咩事都可以即刻跑返上黎 ma。」女神終於發 揮佢嘅機智，無錯以靈活性同走佬速度黎講，咁係最好嘅安排，問題在於Jason。 唔知佢心境如何。