屍殺某街50號: 屍殺某街50號 (五) # 摸黑

佢一下子令我好似人格分裂咁，一方面喺度諗，想點呀，當我水泡咩，仲要咁短時間嗰隻，我都有尊嚴嫁。

另一方面把口就講咗句「唔怕，我唔會比你有事。」

「咁...啲今次啲怪聲又係咩黎嫁 ?」女神今次差唔多喊住咁講，怪聲 ? 咩怪聲呀。

成件事黎到呢個時候， 我先真正認真咁聽返周圍嘅動靜，喺漆黑一片嘅環境之中，又再隱約傳黎一陣陣怪聲。原來女神之所以呼吸急速，係因為一早就聽到啲怪聲。

嗱，都係嗰句，我就無嘢驚，最怕就係無光無乘，黑MaMa，就算而家有人就咁企喺你旁邊，一直牛咁眼 望住你，你都可能完全唔知。 另外話我小氣都要講嫁喇，Hi HiJason，唔該你而家叫Facebook Like過你post嘅人出黎打救我呀，出嚟呀 !!





------
好，返正題，我嘗試搵出聲音傳黎嘅方向，就咁聽應該係樓上，相隔5層以上，因為1至7樓已經行過， 亦好自然就會聯想喺神秘嘅8樓或以上。啲聲就一直係咁斷下斷下，唔似人聲，反而似啲惡狗喺吠之前， 喉嚨中間谷出黎嗰種咕咕聲。

今次真係Hi Hi喇，如果而家出現埋惡狗，你都咪話唔好玩。最衰就伸手不見五指，如果唔係入返4樓單位哩埋，又或者搵碌棍防下身都好。 

我打側個頭問女神「你認真答我，你隻腳仲行唔行到。」

女神無答我，只係搖一搖頭，原來佢忍緊喊。

咁唔係辦法，無Jason通知，而家落去都好危險。





「唔使怕，比啲時間我諗諗。」我真心溫柔咁同女神講。

不過我唔記咗，時間並唔係女神比嫁，而且跟本無時間。

因為呢個時候，我又再聞到之前樓上聞過嘅血腥開始傳過黎，濃咗好多，愈來愈濃。

令我有一種感覺，有啲嘢靜雞雞落緊黎。

喺咩都好，你班PK比我抖下得唔得，真係一波未平一波又起。




 
我同女神講「今次點都要走啦，你抱實啲。」我一隻手逗住女神，伸出另一隻手，摸黑探路。同時用返腦入面嘅記憶，不停重復返成晚喺各個樓層走動嘅畫面，心目中慢慢咁樣畫返一張簡陋嘅地圖出黎。

同時，探路嗰隻手亦摸到塊牆，跟住係門框，過咗門框又係牆，之後再一路摸，應該就點都係其中一個單位嘅門框喇。啲血腥味重喺度，喺我後面，好明顯。我知道，相信女神都知道。

但女神好乖，好合作，佢一直用手按實自己個口，唔比自己出聲，我知佢其實一路喊緊，因為我Feel到個搏頭濕晒。

我行得好慢，我快唔到，一黎揹住人，二黎摸住牆。

啲牆仲要好似濕濕哋，唔知係咩，唔理喇。而最重要嘅原因，就係我總覺得，如果我動作大多小小，嗰啲唔知係咩就會即刻發現我哋嘅位置。 

行咗好似十幾年咁耐，終於比我摸到門框，應該係4樓其中一個單位，雖然我唔知個單位入面有無危險。

但就點都好過現在，後面好有被跟蹤嘅感覺，好寒。行完走廊，我無即刻衝入單位，而係用腳尖踢一踢門框附近，搵到門嘅另一邊門框，我第一時間就隊隻手埋去摸住，之後再摸入啲，有塊板。

正呀!!個單位竟然重有門。

肯定咗有門之後，我哋先入去，轉身用生平最最最溫柔嘅力度，輕輕地，慢慢地，一步一步地，逐串關門，唔好急，唔好怕煩。 因為喺呢個時候，我肯定有嘢跟咗我哋入黎4樓走廊。 其實我嗰時個心就急到差唔多標屎嘅，換轉Jason可能標埋添。

但一唔小心整啲聲出黎呢，到時就鐵門都未必有用。

時間一分一秒咁過，又係好似過咗十幾年咁。暗戀你捱到最後階段，眼見就神不知鬼不覺咁關埋道門啦，我竟然突然聞到一陣超濃烈嘅血腥味。

今次唔好話標屎，真係有咩標咩呀，因為我直覺話我知，隻嘢就企咗喺門口，而我哋就只係隔住一塊未關好嘅門，嚴格黎講係一塊木板咁大把。

 人就好得意，喺好驚慌嘅時期會做傻事，但喺責任面前，有時又會好清醒，就只係在於你點定位自己。

嗰一刻，我揹得起女神，嗰一刻我就比平時清醒好多。我知我地只可以做一樣嘢，就係咩都唔好做，唔好再搞道門 !!

 我縮返開隻手，好彩嗰一刻，我相信我地企咗喺門嘅後面。 等咗好耐，道門都係無咩動靜，我忍，因為啲味重未散，但同時又不禁有小小懷疑自己，會唔會由頭到尾未都跟本都無任何嘢。

只係啲血腥味比啲風吹黎吹去，如果係就真係傻的嗎到震，我唔會同女神解釋嫁。

但諗到呢度，道門突然比人喺出面推開咗一下，

好肯定 !出面隻嘢 裝 ! 緊 !入 ! 嚟 !———————

續五下期：我閉住氣，望住木門嘅位置，咩都望唔到，因為太黑。但我知我嘅感官敏銳咗，我Feel到佢，而且我更加驚。