屍殺某街50號: 屍殺某街50號 (二) #血腥味
去一個唔想去嘅地方，見到一啲唔想見嘅事，但又偏偏走唔到喎，嗰一刻真係唔知點形容。唯有行快兩 步，早日搵到Vanessa，女神嘅玉手同Jason嘅隻臭手就可以早日鬆開。
基本上成座嘢堅係無光，而且好 多單位都已經中門大開，有啲就直頭連門都無埋，我哋真係唔想再入埋啲單位入面喇，唯有逐個單位喺 門口大叫兩嘢，好人好姐就一定聽到。
30分鐘左右啦，一樓至五樓都基本上搵晒喇，咁又唯有再遂層搵，就喺我哋走到五至六樓嘅中間位置，上面就傳嚟一把低沈嘅叫聲，就咁聽應該似係男人。
哇，好彩女神比人拖住單嘢搞到我成晚都眼 火爆，分晒心，如果係平時一定腳都震埋。咁嘅地方，整啲怪聲出黎，拍恐怖片咩。
「嗱，廢廠地方空曠，會唔會係Vanessa嘅叫聲反彈變咗回音咁呀。」我就嘗試對住佢面青青嘅女神同 Jason解釋。
見佢哋唔出聲，我又加多句「咁不如上埋去睇下啦。」我認我當時幼稚，跟本一心想主控返個場面，用 挑戰嘅眼神望住Jason。
「好呀，不過喺都送返佢落去先，我同你再由六樓搵上去。」嗰下真我呆晒，老實講，佢快過我講呢句，不過仲有邊個知。我比埋機會佢講呢句型嘢。
「一齊搵啦，我一個人喺樓下咪仲驚。」女神唔肯落，我忍唔住又望一望佢哋隻手，繼續拖實，可能實啲，我唔想知。
「咁行啦，有咩事你帶佢走先。」我個心拿住拿住，有一種心灰意冷嘅感覺，所以呢句嘢當時係真心講既。
我講完呢句，嗰下一轉身，P! 你! 個! K! 呀，腳都未踏，上面又傳黎微弱嘅男人叫聲，今次仲要聽得出係 唔止一個。
即刻心都寒埋，腦入係咁解釋，不停諗，中年流浪漢，一定係啦，唔使錢成座嘢任住，好過訓街啦。
又諗女神隻手一定無啦，揸都揸斷啦，個腦好混亂。
「仲行唔行呀 ?」第一次當Jason同伴看待，認真想問佢意見。
作為一個負責任嘅成年人，面對未知嘅環境係應該識得避開嘅。
可惜Jason條 Hi Hi只係一隻成年狗公， 佢嘅「下體作戰小組」應該運作得幾成熟，佢知道為咗下體未來嘅福祉著想，現階段仲未可以失威比女神睇。
於是佢諗都唔諗就同我講「神又你鬼又你，唔好再拖時間啦，我比膽你，而家返落去，Vanessa有咩事係 咪你負責先。」
傻的嗎 ? Vanessa有咩事應該佢自己負責，用啲低級說話技巧就想講到我錯咁。
我粒聲唔出轉身上埋六樓，呢層好怪，但又講唔出點解。
再望下部電話，25%電，唔知幾時變咗紅色。而家啲智能電話真係信 唔過，早知就攞埋個尿袋出黎啦 (早知攞埋電筒就真。)
至於周圍，就一早回復返平靜，成層得返我地三個嘅腳步聲。雖然好想好似之前咁大叫Vanessa個名， 但呢一刻我地無人想做第一個出聲嗰個。
我相信大家都諗緊，而家一出聲，就會引咗啲唔知咩嘅嘢出黎。六樓比平時搵耐咗好多，因為我哋唔想大叫，所以就真係逐個單位咁搵落去。
到搵完六樓，電話開始警告電量，Auntie得返 5%。我指一指部電話「仆街，電話真係無電啦，而家就得返5%，我會Off晒上網同 電筒App，留黎應急，你哋嗰邊點呀。」
Jason聽完答咗我一句，令我真心想打爆佢個 Seven Head 皮「我部機頭先一路用黎影相 Post上facebook IG，而家直頭無電啦。」
「喂 ! 大佬呀，面對啲咁嘅包皮環境，你可唔可以唔好掛住呃 Like呀，多幾個Like有春用咩。」喺漆黑一片加上靜到 Hi Hi嘅廢廠，我不顧一切咁大鬧阿Jason。
本身就已經成晚睇條 P K 唔順眼喇，家下佢直頭一嘢點著埋個火頭。
講完我即刻衝埋去女神度，一手捉住佢另一隻手，就咁掉低一句「我哋走!!」
嗱，咁大個人第一次拖住女神隻手，唔爽就假嘅，隻手真係好軟綿綿，好滑，手形好好拖，心跳得好快，原本谷住啖氣即刻無咗一大部份。
最重要係，我之所以可以拖到女神走，都要女神另一隻手鬆開咗Jason先做到，呢個念頭好快閃過我個腦，令我呢個小小嘅毒jj，得到莫大嘅安慰。
我無留意Jason條粉皮當時嘅表情，因為嗰一刻我Hight緊。
講真Jason條Hi Hi仔有咩好睇，但拉住女神轉身落樓前，唔知點解望咗佢一眼。佢企喺度好似呆咗，環境太黑，個樣睇唔清楚，不過就感覺到佢唔係對住我哋呆，而係對住樓上嗰層。
「不如都係走啦Jason，快啲黎啦。」女神真係好人，咁唔通我真係由得條hi hi死咩
「快啲黎啦，我部電話仲有5%，夠就咁行返落去。」乘機串多佢一嘢
「喂!唔係喎，上面有人喎，似Vanessa呀。」Jason繼續企喺度講，女神聽到Jason咁講，就一嘢鬆開埋我隻手，一路叫住Vanessa咁跑埋上去。
我哋3個人追上7樓，又係人影都無個。
但就好似聞到啲淡淡嘅怪味，正確黎講血腥味。(有小小似平時去 街市啲魚檔 Cossover 埋就咁放兩個月唔理嗰隻)
唔知係咪成個環境實在太怪異，我腦入出面突然閃咗一閃，一下子就比我諗通咗啲嘢，點解之前硬係覺得六樓咁怪，但又講唔出。無錯，當時成個六樓雖然殘亂，但同而家一樣，無咩塵……
下期：一至五樓有塵，六樓以上無塵，即係有啲唔知咩嘅活動範圍集中喺特定區域，一係就啲風集中咁吹特定 區域，你話你信邊樣。