屍殺某街50號: 屍殺某街50號 (一) 廢廠
啲人以為喺網絡出POST好必然，但對我嚟講就一啲都唔簡單，起碼喺兩個月前我唔會咁諗
首先，我同所有巴打一樣，都有個心儀已久嘅女神。不過我相信我會比大家可悲啲，其他人，我會一律將佢地命名為「狗公」。(雖然我知其他人都會咁叫我 )
佢外表真係好可愛，好靚好true好pure，喺嗰種有時會小小傻，細細粒但又有身材，而且無論咩角度都好睇嘅女仔，最重要係佢性格完全唔港女嗰隻。其實同佢識左好耐，不過就永遠都無咩話題，我份人本身唔係咁，但對住佢就唔知點解諗唔到嘢，呢個世界，你唔講，人地點會知你想點。日掛夜掛又點，CALL佢又無嘢講，見佢身邊一大堆狗公，真係怕有 一日會有個條件OK嘅Hi Hi搶走佢。
但兩個月前嘅一晚深夜，嗰晚又係 J 流流上緊網之類，女神竟然主動打比我
「亞鐵呀，等陣可唔可以陪我去一去觀塘呀?」三更半夜去觀塘 ? 嗰度得工廠咋喎，但嗰時女神叫到， 唔好話觀塘啦，佢話去北韓我都飛的去呀。
夜媽媽同女仔約會真係令人有好多幻想空間，之後一路飛的，一路哼住歌仔，其實幻想緊之後嘅小甜情節。
個的士佬就好耐先搵到目的地，仲要喺我開埋Google Map幫手，傻的嗎 ? 香港幾時有啲咁難搵嘅地方。
落車之後，見到佢哋已經喺座廢棄咗嘅工廠門口等緊我。無錯係佢哋，除左女神，另一個人係阿Jason。
其實我根本唔識嗰個Jason，但我又同時熟悉佢，呢個世界就係咁怪雞。條友真係好靚仔，180cm，又高 又型。我係咩，我只係一個偷睇女神FaceBook嘅毒jj，不過亦因為咁，我知個Jason就係用fb識女仔嘅高級狗公。
「咁夜咩事呀?」 我一邊行埋去女神度一邊問，同時望一望Jason點點頭，其實個心超唔舒服。
「亞鐵，呢位係Jason」女神指一指Jason當介紹，難為我仲要懶大方咁打招呼。
「唔好意思呀亞鐵，咁夜要你出嚟，其實我有個女仔朋友唔見咗，想你地陪我上去搵一搵。」女神再指 一指後出面嘅廢棄工廠，成件事由呢度開始我就唔係好想提啦…比啲時間我，我轉頭再講。(再提提各位 巴打，唔係甜故，我都想係)
女神唔見咗嘅朋友叫Vanessa，見過一次，講過兩句，樣唔錯，份人無咩，係有啲串串地，Man Man 地，不過我欣賞佢夠爽。
所以我亦暫時放低Jason條 Hi Hi，問清楚女神情況。「不如一路搵一路講，我有啲擔心佢呀。」女神一嘢打破埋我扮冷靜，懶分析嘅心態。
咁3個人唯有三更 半夜，行入嗰間九唔搭八嘅工廠啦，其實間嘢好易形容，就係「恐怖」。
「其實阿Vanessa頭先無端端比咗個WhatApp我，話自已喺呢度有嘢搞喎，咁之後無覆我啦，打比佢又唔通，你知佢平時份人唔講笑啦。」坦白講，鬼知Vanessa平時份人點咩，但女神咁講，就好似淡淡咁加強咗我嘅地位，嗰一刻，我地兩個好 似接近咗咁，呢種心態令我精神返晒黎。
工廠正門真係鎖咗，我就提議先圍住工廠走一圈先，睇下搵唔 搵到其他入口，如果無先再算。嗰陣佢地又真係聽晒我話。Hi Hi，早知嗰時就提議返屋企等消息。
至今後悔莫及的一步
好明顯，理智戰勝返頭先難得出現嘅情感，事關我一路搵就一路覺得好唔對路。
首先Vanessa黎呢度搞咩，雖然佢份人Man Man地，但話晒都係一個女仔人家，最重要係呢度唔係燈火通 明嘅中環寫字樓，而係一間正常唔會有人嘅廢廠，講真日光日白我都唔想入，何況而家三更半夜。
拿，我就無野驚，最怕就係有人分貨搞白粉軍火嗰類，到時真係3個人入去，無人行得返出嚟。 當我哋行到廢廠後面一條小路，我終於忍唔住出聲「喂，不如都係睇定啲先啦，其實入面地方咁大，又黑又無電筒，入到去我都怕你有危險喎。」
女神聽我咁講，亦都停咗一停望住我，似乎真係想睇定啲。
但個Hi Hi Jason，原來而家先黎出手，扮晒嘢「睇咩定啲 ? 搵人要緊呀，點知人哋Vanessa一個女仔會發生咩事，話唔定而家比人禁錮緊呀。」
禁錮 ? 條粉皮係咪睇得AV太多，而且佢又會肯定得Vanessa一個人，吹得就吹。但呢啲說話我無機會講 出黎，因為我唔夠佢靚仔，而同時我亦見到女神好情深咁望實佢，再點一點頭。嗰一刻真係火都黎，但同時又夾雜啲心酸，即刻唔理咁多，指住道超舊嘅鐵門同佢哋講，「係咪要入去 呀，係就試埋呢道門啦。」
一講完，我就即刻行埋去，再一推，道門就咁推開咗。成件事就好似道鐵門同Jason一早夾定咁。 我開咗部 iPhone 嘅電筒App，一馬當先行喺前面，而家諗返，點解我當時可以咁純情咁傻的嗎，比晒機會佢兩個喺後面跟住我，拖埋手。
下期：去一個唔想去嘅地方，見到一啲唔想見嘅事，但又偏偏走唔到