當問題少年遇上問題少女: 71.決勝的game3

一時間，我同梓晴有少少亂
 
但係我地已經預料佢地會咁樣猛攻
 
所以梓晴同我互換位置，用佢嘅靈活去換取我殺波機會
 
佢開始發揮佢問題少女本色
 
突然間係網前，對方回個波過黎
 




果球波嘅高度係不利殺波
 
但係就係果一刻，梓晴運用佢強勁嘅腕力，將個波狠狠咁殺過去對方地下
 
即使對手之前有睇過我地比賽
 
但只限八強開始
 
而且梓晴打波果時，係唔知幾時會抽起筋亂出招
 




所以梓晴接連拎左幾分
 
當我地拎到11分，有60秒休息時，對方改變打法
 
當時比數係11比5
 
但係當對方轉打法後
 
佢地又中伏了
 




因為梓晴佢傻完，變返正常
 
對方集中係前場，下半節就係輪到我表演我嘅長距離攻擊
 
去到第15分果時，我跳到最高，然後使出阿爸教我嘅招數
 
凌空扣殺
 
呢一下扣殺並唔係咁易學
 
當初我練左好耐先學到阿爸3成
 
剩低果7成，我要不停係比賽、同阿爸練波之下先至學到
 
一招易學難精嘅招式




 
彈起…….好似隻蝦咁樣…..扣殺!!!!!
 
呢一球球速好快，個羽毛球好似粒子彈咁飛過去
 
“擦”一下落地聲
 
係一球in
 
呢一球，我將對方道氣打窒左
 
好快我地贏左第二局
 
不過有一個問題開始出現，我同梓晴開始體力流失好快
 




我嘅汗對比起梓晴，更多
 
呢個係我毛病之一
 
我一向打波都係頭兩局直落贏對手2-0
 
當我輸左一局之後，去到第三局就一定會流失體力
 
不過今次比以前比賽好D，冇咁攰
 
「好啦，第三局」阿爸坐係我地面前講
 
「阿晴妳第一次打比賽，辛唔辛苦?」
 
「少少…不過我仲可以應付到」但同時佢自己係到抖緊大氣




 
「傑…你又點呀?」
 
我拎住Polly俾我嘅水，但係都唔太飲得落
 
如果飲太多水，我知道我一定會嘔
 
阿爸將兩個氧氣罩罩住我地
 
過後開大枝氣
 
俾我地盡量多吸氧氣
 
雖然話策略成功…始終對手係冠軍級人馬，我地嘅體力都要流失好多先打到咁嘅地步
 




吸左氧氣，體力好左d
 
「阿爸，有咩指示?」
 
阿爸同我地講一句
 
「冇」
 
「冇!?」我地一齊講
 
「真係冇」
 
佢飲一啖水後
 
「點解冇呢….因為你地兩個已經盡力咁打，到呢個時候我都冇咩指示俾到你。我只可以叫你地兩個放鬆打。唔…..」
 
「唔咩呀?」
 
「如果話指示嘅話，我有一個嘅」
 
「講黎聽下」
 
「開心打波，享受比賽」
 
「咩…咩話?」我黑人問號中
 
「阿傑，你太著重勝負。以前我帶你去打波果時，你笑得好開心」
 
當然啦，唔洗溫書喎
 
我不自覺諗返起阿爸以前帶我去打波嘅事
 
我係未出世果時，阿爸已經受左傷，所以退落黎，打衛生波
 
每一次佢帶我去打羽毛球，都係好開心
 
當然佢會懷念下以前打公開賽嘅日子，一班師兄弟打波嘅日子
 
「爸爸，你唔比賽，冇贏冠軍你唔開心架咩?」
 
阿爸摸下我個頭
 
「有時候，贏到冠軍唔代表一切。如果一直咁贏，令會自己散慢。不過最重要呢，係要開心，如果打波打黎都唔開心，不如唔好打」
 
係細個時，每一球波我都打得好開心
 
係公園內同小朋友打羽毛球，特別係發育緊嘅中學大姐姐
 
就更加開心
 
睇住D波s飛黎飛去，令人心曠神怡
 
「阿傑，記住爸爸所講，打波會帶俾你歡樂同開心」
 
我慢慢記起細個時嘅事
 
打波係要令自己開心，有時即使輸波，令到自己有得著，都可以係一件好事
 
如果今次我出賽而令我最大嘅得著…..
 
一定係坐係我身邊嘅佢
 
我將呢個本應孤獨自己一個人嘅郡主，係黑暗之中拉出黎
 
而家仲同佢住係同一屋簷下
 
如果話俾大家聽，我對阿晴冇野，就咁係當佢妹妹咁睇，就一定係呃你