當問題少年遇上問題少女: 65.大家有冇掛住我呀?

梓晴呆呆咁企係到，我亦都同佢共同進退，同眼前嘅生物互啤
 
我地兩個向左行，佢又向左行
 
向右行，佢又向右行
 
佢兩條觸鬚郁下郁下，好似知道我地會向邊一邊行咁樣
 
我地兩人一強係到對峙…
 




「不如….你去趕走佢啦」
 
「我…我呀?」
 
「你都驚呀?」
 
我不停點頭
 
「不過我會企係妳前邊嘅」
 




講完，型完，行前一步
 
我緊緊捉實梓晴隻手，跑呀!!!!!
 
面對贏唔到嘅對手，著草係唯一選擇
 
但係我地走果時，強亦同我地有相同諗法
 
佢跟住我地一齊走
 




我地見佢走近我地，所以我地又跑快D
 
「喂呀!佢跟住我地呀」
 
「咁不如踢死佢啦」
 
「我踢?」
 
「你…你叫我踢呀?」
 
「我踢啦」
 
對唔住強哥!我會幫你風光大葬架啦
 
我一下大腳一兜，強哥已經口中念念有詞一邊D我媽媽一邊飛走




 
直到佢飛到去垃圾車上邊
 
梓晴雙手捉住我
 
「嚇死啦….佢好似追住我地咁嘅」
 
「因為妳有吸引力囉」
 
佢拎起我拖住佢果隻手，然後咬落去
 
「話我吸引小強!?」
 
估唔到梓晴咬人係咁痛
 




「係啦係啦，唔話妳啦」
 
「哼」
 
當小強飛走之後，我地兩個慢慢行，期間梓晴冇放開我隻手
 
經過糖水舖果時，我地兩個正好四目交投
 
「妳想食糖水?」佢個樣已經出賣左佢
 
俾我咁樣踢爆法，佢自己都有D唔好意思，所以佢想將個波踢俾我
 
「咩…咩呀!!明明係你想食，你又屈我!?」
 
同佢住埋一齊個幾月，佢嘅脾氣我已經摸清




 
佢咁嘅反應，一定係俾我講中左
 
佢又係到拐嬲，嘟長個咀，所以我都一邊拖住佢，一邊搣佢塊面
 
「咁妳可唔可以去陪我食糖水呀?」如果我唔認我想食，佢係唔會放過我
 
「好啦，見你今日陪左我成日」
 
我地入到糖水舖，佢叫左碗幻彩明珠，而我呢，我比較鍾意食凍野，所以我叫左碗凍綠豆沙
 
梓晴用叉拮起舊芒果，然後餵我食
 
「點呀?今日開心嘛」
 




佢望住我微笑
 
「你咁識氹我，實開心架」
 
「妳笑果D咪幾好，咁先靚女架嘛」
 
「關你咩事喎」
 
我地兩個食完糖水，一出舖頭外，自然咁兩隻手又拖起黎
 
「下次學界比賽，唔知我地會去到邊呢?」
 
「我同妳拍檔，至少入到八強」
 
「真係?咁有信心?」
 
「當然」
 
愈黎愈近開學日子，亦即代表就到學界比賽
 
女單個位究竟點呢?大家都好心急想知道
 
終於，係開學後一星期左右…….
 
真光女書院內，羽毛球不停練習
 
副隊長嘅梓晴同埋我，係球場上不斷督促大家練習
 
係大家練到好緊張果時，有個人係門口出現左
 
佢慢慢行到球場中間
 
大家亦發現佢嘅存在之後，好開心咁衝向佢
 
冇錯，Polly終於返黎了
 
「各位!!!有冇掛住我呀!!!!」
 
其實問黎都多餘，大家真係非常掛住佢
 
我同梓晴兩個人行近Polly
 
「好啦，我而家可以將隊波交返俾妳啦」
 
Polly笑住咁對住我地兩個
 
「辛苦哂啦，洗唔洗送返d野俾你地?」
 
「唔洗啦，大家咁熟」
 
「唔…..咁呀….」
 
Polly望一望梓晴後，走過黎錫左我塊面一下
 
呢一下動作，令全場大叫
 
因為我同Polly嘅傳聞，係無間斷地出現
 
佢呢下動作，令到身邊嘅梓晴塊面立即黑過包公
 
Polly見狀就走去佢耳邊講左兩句，然後佢塊面就由黑轉紅
 
「好!!我地開始練習!!!!」Polly精神咁對住大家發號施令